ស្របជាមួយនឹងព្រឹត្តិការណ៍ចំណេះដឹងផ្នែកហិរញ្ញវត្ថុ ឯកឧត្តម រ័ត្ន សុវណ្ណនរៈ ឧបការីទេសាភិបាល និងជាអគ្គនាយកត្រួតពិនិត្យធនាគារនៃធនាគារជាតិនៃកម្ពុជា (NBC) បានប្រាប់ភ្នំពេញប៉ុស្ដិ៍ថា ធនាគារកណ្ដាលគ្រោងនឹងបង្កើតសង្គមមួយដែលមានចំណេះដឹងផ្នែកហិរញ្ញវត្ថុ។
តើអ្វីជាគោលបំណងសំខាន់របស់ NBC ក្នុងការរៀបចំព្រឹត្តិការណ៍ចំណេះដឹងផ្នែកហិរញ្ញវត្ថុនៅថ្ងៃអង្គារនេះ?
គោលបំណងរបស់យើងនឹងផ្សព្វផ្សាយអំពីអត្ថប្រយោជន៍នៃចំណេះដឹងផ្នែកហិរញ្ញវត្ថុដល់សាធារណៈជន រដ្ឋាភិបាល និងវិស័យធនាគារ។ ក្រៅពីនេះ យើងចង់ជូនដំណឹងដល់សាធារណៈជនពីផែនការរយៈពេលវែងរបស់យើងជាពិសេសផែនការរបស់យើងក្នុងការដាក់ចំណេះដឹងផ្នែកហិរញ្ញវត្ថុទៅក្នុងកម្មវិធីអប់រំថ្នាក់ជាតិជាមួយក្រសួងអប់រំ យុវជន និងកីឡា។ នេះជាផ្នែកមួយនៃកិច្ចខិតខំប្រឹងប្រែងរួមពីសាធារណៈជន និងវិស័យឯកជន ដើម្បីបង្កើនកម្រិតចំណេះដឹងផ្នែកហិរញ្ញវត្ថុនៅក្នុងប្រទេសកម្ពុជា និងការពារអតិថិជន ដោយសារតែការអភិវឌ្ឍបច្ចេកវិទ្យា និងនវានុវត្តន៍យ៉ាងឆាប់រហ័សនៃផលិតផល និងសេវាហិរញ្ញវត្ថុ។
ការលើកកម្ពស់ការអប់រំផ្នែកហិរញ្ញវត្ថុគឺជារបៀបវារៈគោលនយោបាយដ៏សំខាន់របស់ NBC សូមពន្យល់អំពីសារៈសំខាន់នៃការអប់រំផ្នែកហិរញ្ញវត្ថុនេះ?
រដ្ឋាភិបាលបានទទួលយកយុទ្ធសាស្ដ្រអភិវឌ្ឍន៍វិស័យហិរញ្ញវត្ថុឆ្នាំ ២០១៦-២០២៥ ជាផែនទមគ្គទេ្ទសក៍ ដើម្បីអភិវឌ្ឍវិស័យហិរញ្ញវត្ថុ។ យុទ្ធសាស្ដ្រនេះបានផ្ដល់គំនិតផ្ដួចផ្ដើមជាច្រើនសម្រាប់វិស័យធនាគារ និងហិរញ្ញវត្ថុក្នុងការដើរតួនាទីដ៏សំខាន់នៅក្នុងការអភិវឌ្ឍន៍សេដ្ឋកិច្ច។ ហើយការពង្រឹងលទ្ធភាពទទួលបានហិរញ្ញវត្ថុគ្រប់គ្នា និងការលើកកម្ពស់ចំណេះដឹងផ្នែកហិរញ្ញវត្ថុត្រូវបានបង្កើតឡើងជារបៀបវារៈដ៏មានអាទិភាព។
ចំណេះដឹងផ្នែកហិរញ្ញវត្ថុគឺនិយាយអំពីការអប់រំប្រជាជនឲ្យប្រើប្រាស់សេវា និងផលិតផលហិរញ្ញវត្ថុប្រកបដោយប្រសិទ្ធភាព និងផលចំណេញ។ ដូច្នេះហើយការបង្កើនកម្រិតជីវភាពរស់នៅរបស់ពួកគេកាន់តែងាយស្រួល។ ការសិក្សាបានបង្ហាញថាប្រជាជនមានចំណេះដឹងផ្នែកហិរញ្ញវត្ថុនឹងអាចធ្វើការសម្រេចចិត្តប្រសើរជាងអ្នកដែលមិនមានចំណេះដឹងផ្នែកនេះ។
តើអ្វីជាសារដែល NBC មាននៅក្នុងព្រឹត្តិការណ៍នេះហើយតើអ្នកណាគឺជាអ្នកចូលរួមដ៏សំខាន់?
ចំណេះដឹងផ្នែកហិរញ្ញវត្ថុដើរតួនាទីសំខាន់ក្នុងការធ្វើឲ្យជីវិតរបស់ប្រជាជនកាន់តែប្រសើរ និងរួមចំណែកដល់ការអភិវឌ្ឍសេដ្ឋកិច្ចសង្គម និងលុបបំបាត់ភាពក្រីក្រ។ អាស្រ័យហេតុនេះសារដ៏សំខាន់របស់យើងនៅថ្ងៃនេះគឺ «ដោយសារមានតម្រូវការក្នុងលើកកម្ពស់ចំណេះដឹងផ្នែកហិរញ្ញវត្ថុមានសារៈសំខាន់សម្រាប់ភាគីពាក់ព័ន្ធទាំងអស់ទាំងទីភ្នាក់ងាររដ្ឋាភិបាល វិស័យឯកជន និងដៃគូអភិវឌ្ឍន៍ក្នុងការដាក់កិច្ចខិតខំប្រឹងប្រែងរួមទាំងធនធានមនុស្ស និងហិរញ្ញវត្ថុដើម្បីផ្ដល់អត្ថប្រយោជន៍ដល់ប្រជាជនកម្ពុជា»។ អ្នកចូលរួមជាទិសដៅដ៏សំខាន់របស់យើងគឺយុវវ័យកម្ពុជាដែលយើងជឿថានឹងជាថាមពលដ៏សំខាន់សម្រាប់ការអភិវឌ្ឍរបស់ប្រទេសនេះ។ យើងជឿជាក់ថា យុវជនទាំងនោះមានសមត្ថភាពគ្រប់គ្រាន់ក្នុងការពាំនាំចំណេះដឹងផ្នែកហិរញ្ញវត្ថុទៅដល់សាច់ញាតិមិត្តភ័ក្តរបស់ពួកគេ។
តើកម្មវិធីអប់រំផ្នែកហិរញ្ញវត្ថុរបស់ NBC ជួយបង្កើនចំណេះដឹងផ្នែកហិរញ្ញវត្ថុក្នុងចំណោមប្រជាជនដែរឬទេ?
ការលើកកម្ពស់ចំណេះដឹងផ្នែកហិរញ្ញវត្ថុត្រូវបានកំណត់ជារបៀបវារៈរបស់NBC។ រហូតមកដល់ពេលនេះ NBC បានដឹកនាំកម្មវិធីយល់ដឹងផ្នែកហិរញ្ញវត្ថុជាច្រើនសម្រាប់សាធារណៈជនប្រជាជននៅតាមជនបទ សិស្ស អាជ្ញាធរមូលដ្ឋាន។ តាមគំនិតផ្ដួចផ្ដើមនេះយើងបានសង្កេតឃើញថាមានកំណើនទំនុកចិត្តលើវិស័យធនាគារ ហើយប្រជាជនបានផ្លាស់ប្តូរទម្លាប់របស់ពួកគេពីការទុកប្រាក់នៅក្នុងផ្ទះរបស់ពួកគេទៅជាការដាក់ប្រាក់បញ្ញើនៅក្នុងគ្រឹះស្ថានហិរញ្ញវត្ថុផ្លូវការ។
ប្រជាជនអាចមានលទ្ធភាពប្រើប្រាស់កម្ចីកាន់តែមានប្រសិទ្ធភាពផងដែរ។ គួរឲ្យចាប់អារម្មណ៍ជាងនេះទៅទៀតប្រជាជនកាន់តែច្រើនកំពុងប្រើប្រាស់សេវាផ្ញើប្រាក់ និងសេវាទូទាត់ពីធនាគារ និងគ្រឹះស្ថានហិរញ្ញវត្ថុរបស់យើង។
ប្រធានបទនេះបានក្លាយជាបញ្ហាបន្ទាន់មួយ សូម្បីតែនៅក្នុងប្រទេសកំពុងអភិវឌ្ឍន៍ ដោយសារតែបំណុលកើនឡើងខ្លាំងបន្តការបារម្ភដល់អ្នកធ្វើគោលនយោបាយ និងរដ្ឋាភិបាល។ តើ NBC ដោះស្រាយបញ្ហានៅក្នុងប្រទេសកម្ពុជាដូចម្ដេច?
វាជាការពិតដែលថាបំណុលកើនឡើងខ្លាំងតែងតែជាប្រធានបទគួរឲ្យបារម្ភមួយ ប៉ុន្តែវាមិនមែនជាករណីសម្រាប់ប្រទេសកម្ពុជានៅពេលនេះទេ។ មូលហេតុទី ១ NBC បានចេញប្រកាសស្ដីពីការគណនាអត្រាការប្រាក់ដែលធនាគារ និងគ្រឹះស្ថានហិរញ្ញវត្ថុ នៅពេលនេះត្រូវបានអនុញ្ញាតឲ្យគិតអត្រាការប្រាក់លើចំនួនសរុប លើប្រាក់កម្ចីពីធនាគារ។
ទី ២ NBC បានចេញប្រកាសស្ដីពីការចែករំលែកព័ត៌មានឥណទានជាកន្លែងដែលធនាគារ និងគ្រឹះស្ថានហិរញ្ញវត្ថុតម្រូវឲ្យដាក់ព័ត៌មានហិរញ្ញវត្ថុអតិថិជន ទៅក្នុងការិយាល័យឥណទានកម្ពុជា និងត្រួតពិនិត្យរាល់ព័ត៌មានទាំងអស់របស់អតិថិជនមុនពេលផ្ដល់កម្ចី។ ទី ៣ សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជាបានបង្កើតគោលការណ៍ណែនាំផ្ដល់កម្ចីរួមរបស់ពួកគេដែលសមាជិកទាំងអស់យល់ព្រមក្នុងការផ្ដល់កម្ចីដោយភាពទទួលខុសត្រូវ និងសីលធម៌ ទី ៤ NBC រៀបចំយុទ្ធនាការយល់ដឹងជាសាធារណៈជាបន្តបន្ទាប់ស្ដីពីបញ្ហានៅគ្រប់ខេត្តផងដែរ។
NBC បានដាក់ឲ្យប្រើប្រាស់កម្មវិធីអប់រំផ្នែកហិរញ្ញវត្ថុផ្សេងៗ ឧទាហរណ៍ កម្មវិធី «តោះនិយាយពីលុយ» និងខ្សែទូរស័ព្ទទាន់ហេតុការណ៍ដើម្បីស្ដាប់ការត្អូញត្អែររបស់សាធារណៈជន។ តើគម្រោងទាំងអស់នេះមានប្រសិទ្ធភាពដូចម្ដេចដែរ?
NBC បានដឹកនាំកម្មវិធីយល់ដឹងផ្នែកហិរញ្ញវត្ថុជាច្រើន។ កម្មវិធីមួយក្នុងចំណោមកម្មវិធីទាំងនោះគឺ «ចូរយើងនិយាយអំពីប្រាក់» ដែលក្រុមការងាររបស់ NBC បានបង្កើតសៀវភៅកំប្លែង វីដេអូក្លិប ទំព័រហ្វេសប៊ុក និងកម្មវិធីដែលហៅថាការអប់រំរបស់ NBC។ អ្នកចូលរួមដ៏សំខាន់របស់យើងគឺយុវជន និងក្មេងៗហើយយើងសម្រេចបានលទ្ធផលដ៏ធំ។ លើសពីនេះក្រុមរបស់យើងបន្តទៅសួរសុខទុក្ខក្មេងៗតាមសាលារៀន ដើម្បីផ្ដល់ដល់ពួកគេនូវសម្ភារទាំងនេះដើម្បីអប់រំពួកគេ។
NBC បានទទួលស្គាល់ថាអតិថិជននៅពេលប្រឈមនឹងបញ្ហា ឬមិនច្បាស់លាស់អំពីបញ្ហាផ្នែកហិរញ្ញវត្ថុមួយចំនួន ពួកគេមិនដឹងកន្លែងណាត្រូវស្វែងរកជំនួយ ហើយនោះគឺជាមូលហេតុដែល NBC បង្កើតខ្សែទូរស័ព្ទទាន់ហេតុការណ៍ (៥ ខ្សែនៅការិយាល័យកណ្ដាល និងមួយខ្សែនៅតាមសាខាតាមខេត្តរបស់ NBC) ដើម្បីជួយដល់អតិថិជនផ្នែកហិរញ្ញវត្ថុ។ បន្ទាប់ពីការដាក់ឲ្យដំណើរការខ្សែទូរស័ព្ទទាន់ហេតុការណ៍ទាំងនេះ ក្រុមរបស់យើងបានទទួលការត្អូញត្អែរជាច្រើន ជាពិសេសពីតំបន់ជនបទ។
តើសង្គមដែលមានការយល់ដឹងផ្នែកហិរញ្ញវត្ថុនឹងជួយដល់សេដ្ឋកិច្ចដូចម្ដេច? តើវាអាចបង្កើនភាពប្រកួតប្រជែង ប្រសិទ្ធភាពទីផ្សារ និងជួយក្នុងការលុបបំបាត់ភាពក្រីក្របានដែរឬទេ?
ច្បាស់ណាស់ចំណេះដឹងផ្នែកហិរញ្ញវត្ថុនឹងជួយដល់អតិថិជនផ្នែកហិរញ្ញវត្ថុ គ្រប់គ្រងហិរញ្ញវត្ថុរបស់ពួកគេកាន់តែប្រសើរធ្វើឲ្យជីវិតរបស់ពួកគេកាន់តែប្រសើរ និងកាន់តែមានផាសុកភាព និងជួយដល់ពួកគេក្នុងការចូលរួមនៅក្នុងសកម្មភាពសង្គម និងទីបំផុតជួយពួកគេចេញផុតពីអន្ទាក់ភាពក្រីក្រ។ អតិថិជនអាចជ្រើសរើសសេវា និងផលិតផលហិរញ្ញវត្ថុដែលត្រូវតាមតម្រូវការ និងសមត្ថភាពរបស់ពួកគេ។ ចាប់ពីក្រុមហ៊ុនផ្គត់ផ្គង់ហិរញ្ញវត្ថុពួកគេចាំបាច់ត្រូវផ្ដល់សេវាហិរញ្ញវត្ថុមានគុណភាពកាន់តែច្រើនកាន់តែមានសមត្ថភាពប្រកួតប្រជែងកាន់តែមានប្រសិទ្ធភាព និងងាយស្រួល ដើម្បីរក្សាអតិថិជនរបស់ពួកគេ។
តើការរៀនសូត្រអំពីការគ្រប់គ្រងប្រាក់ជួយក្នុងការលើកកម្ពស់បរិយាប័ន្នហិរញ្ញវត្ថុនៅក្នុងប្រទេសកម្ពុជាដែរឬទេ?
ចំណេះដឹងផ្នែកហិរញ្ញវត្ថុនិយាយអំពីសមត្ថភាពក្នុងការសម្រេចចិត្តផ្នែកហិរញ្ញវត្ថុឲ្យបានត្រឹមត្រូវ។ នេះអាចដាក់បញ្ចូលការគ្រប់គ្រងប្រាក់ ការប្រើប្រាស់កម្ចីត្រឹមត្រូវ ការប្រឹក្សាយោបល់។ល។ ដរាបណាអតិថិជនមាន ចំណេះដឹង និងសមត្ថភាពផ្នែកហិរញ្ញវត្ថុច្បាស់ណាស់ពួកគេអាចទទួលបានអត្ថប្រយោជន៍ពីសេវាហិរញ្ញវត្ថុទាំងនេះ ហើយទីបំផុតជំរុញឲ្យពួកគេទទួលបានសេវាហិរញ្ញវត្ថុផ្សេងទៀតផងដែរ។
យោងតាមការសិក្សា កម្រិតចំណេះដឹងផ្នែកហិរញ្ញវត្ថុរបស់ប្រទេសកម្ពុជា រក្សាក្នុងចំនួន ១៨ ភាគរយដែលទាបខ្លាំងធៀបនឹងដៃគូអាស៊ានរបស់ខ្លួន។ តើវិធានការអ្វីដែល NBC ធ្វើឡើងដោយដើម្បីដោះស្រាយបញ្ហាដ៏សំខាន់នេះ?
យើងបានចាត់វិធានការជាច្រើនដូចជាកម្មវិធីការលើកកម្ពស់ការយល់ដឹងផ្នែកហិរញ្ញវត្ថុកាន់តែច្រើន ការដាក់ឲ្យប្រើប្រាស់យន្តការការពារអតិថិជនប្រកបដោយប្រសិទ្ធភាព ការអនុវត្តច្បាប់កាន់តែច្រើន និងការត្រួតពិនិត្យរបស់ NBC លើធនាគារ និងគ្រឹះស្ថានហិរញ្ញវត្ថុបន្តភាពជាដៃគូរបស់ NBC ជាមួយភាគីពាក់ព័ន្ធទាំងអស់ និងបន្តពង្រឹងការបង្កើនសមត្ថភាពសម្រាប់មន្ដ្រីរបស់ NBC ។
តើអ្វីជាបញ្ហាប្រឈមដ៏សំខាន់ដែល NBC ប្រឈមក្នុងការលើកកម្ពស់ការអប់រំផ្នែកហិរញ្ញវត្ថុនៅក្នុងប្រទេសនេះ?
បញ្ហាប្រឈមមួយចំនួនគឺឧបសគ្គផ្នែកធនធានទាំងមនុស្ស ចំណេះដឹង និងទិដ្ឋភាពហិរញ្ញវត្ថុ។ អាស្រ័យហេតុនេះកិច្ចខិតខំប្រឹងប្រែងរួមត្រូវការពីភាគីពាក់ព័ន្ធទាំងអស់។ ហើយគោលបំណងមួយក្នុងចំណោមគោលបំណងសំខាន់ៗជាច្រើននៃកម្មវិធីនៅថ្ងៃនេះនឹងអំពាវនាវឲ្យមានការសម្របសម្រួល និងកិច្ចសហប្រតិបត្តិការពីភាគីពាក់ព័ន្ធទាំងអស់ ដើម្បីធ្វើការងាររួមគ្នាក្នុងការលើកកម្ពស់ចំណេះដឹងផ្នែកហិរញ្ញវត្ថុ។
យោងតាមក្រុមអ្នកជំនាញ ការអប់រំផ្នែកហិរញ្ញវត្ថុមានសារៈសំខាន់ ដោយសារតែវាដើរតួនាទីដ៏សំខាន់នៅក្នុងការគ្រប់គ្រងហិរញ្ញវត្ថុតាមគ្រួសារ និងសកម្មភាពសហគ្រាសផងដែរ។ តើ NBC អនុវត្តកម្មវិធីចំណេះដឹងផ្នែកហិរញ្ញវត្ថុរបស់ស្ដ្រីដែរឬទេ?
NBC បានដឹកនាំកម្មវិធីចំណេះដឹងផ្នែកហិរញ្ញវត្ថុសម្រាប់សាធារណៈជនជាទូទៅដែលមានន័យថា សម្រាប់ទាំងបុរស និងស្ដ្រី។ ប៉ុន្តែយើងពិតជាមានគោលបំណងរបស់យើងក្នុងការធ្វើឲ្យស្ដ្រីមានលទ្ធភាពក្នុងការទទួលបានហិរញ្ញវត្ថុកាន់តែច្រើន។ NBC កំពុងសហការជាមួយក្រសួងកិច្ចការនារី ដើម្បីលើកកម្ពស់ការអប់រំផ្នែកហិរញ្ញវត្ថុដល់ស្ត្រី៕