ឆ្នាំនេះគឺជាឆ្នាំឯតទគ្គកម្មមួយទៀតសម្រាប់ការដឹកជញ្ជូនទំនិញតាមផ្លូវអាកាសនៅកម្ពុជា ដោយមានក្រុមហ៊ុនអាកាសចរណ៍ដឹកជញ្ជូនកាន់តែច្រើនធ្វើការឆ្លើយតបទៅនឹងការកើនឡើងការនាំចេញនាំចូលទំនិញតាមយន្តហោះ ជាពិសេសការនាំចេញរបស់ក្រុមហ៊ុនផលិតសម្លៀកបំពាក់។ បរិមាណទំនិញតាមជើងយន្តហោះសរុបមានជាង ៦៥០០០ តោនក្នុងឆ្នាំ ២០១៧ ដែលបរិមាណនេះគឺកើនឡើង ៣៦ ភាគរយបើប្រៀបធៀបនឹងឆ្នាំ ២០១៦។
ក្រុមហ៊ុន Cambodia Airports ដែលជាក្រុមហ៊ុនគ្រប់គ្រង និងប្រតិបត្តិការលើអាកាសយានដ្ឋានអន្តរជាតិទាំង ៣ នៅកម្ពុជាបានឲ្យដឹងថា បច្ចុប្បន្នមានក្រុមហ៊ុនអាកាសចរណ៍ទាំងអស់ចំនួន ៤ កំពុងបម្រើសេវាកម្មដឹកជញ្ជូនទំនិញតាមផ្លូវអាកាស។
ក្រុមហ៊ុនទាំង ៤ នោះរួមមានក្រុមហ៊ុន Cathay Pacific Cargo, K-Mile Air, Turkish Airlines និងក្រុមហ៊ុន Qatar Cargo ដែលកំពុងប្រតិបត្តិជាប្រចាំក្នុងការដឹកជញ្ជូនទំនិញនៅអាកាសយានដ្ឋានអន្តរជាតិភ្នំពេញដោយប្រើប្រាស់ជើងយន្តហោះប្រភេទដឹកទំនិញ ខណៈដែលក្រុមហ៊ុនដឹកទំនិញតាមយន្តហោះផ្សេងទៀតបម្រើសេវាកម្មជួលយន្តហោះសម្រាប់ការដឹកជញ្ជូនទំនិញ។
ដើម្បីឆ្លើយតបទៅនឹងកំណើនយ៉ាងធំនៅក្នុងរយៈពេលប៉ុន្មានឆ្នាំកន្លងមកនេះ ស្ថានីយដឹកទំនិញនៅតាមព្រលានយន្តហោះត្រូវបានពង្រីកបន្ថែមឡើងដោយក្រុមហ៊ុន Cambodia Airports ដូចជា ការពង្រីកនូវកន្លែងផ្ទុកទំនិញធំៗឲ្យកាន់តែធំឡើង ដើម្បីឆ្លើយតបទៅនឹងការកើនឡើងការដឹកជញ្ជូនទំនិញតាមផ្លូវអាកាស។
លោកស្រី Chloé Lapeyre អ្នកគ្រប់គ្រងទូទៅក្រុមហ៊ុន Cambodia Airports បានមានប្រសាសន៍ថា៖ «ស្ថានីយដឹកជញ្ជូនទំនិញនៅអាកាសយានដ្ឋានភ្នំពេញ ត្រូវបានពង្រីកឲ្យធំបន្ថែមក្នុងរយៈពេលប៉ុន្មានឆ្នាំចុងក្រោយនេះដើម្បីឆ្លើយតបនឹងការកើនឡើង»។
លោកស្រីបានបន្តថា៖ «បច្ចុប្បន្ននេះមានក្រុមការងារឃ្លាំងចំនួន ៤ សម្រាប់ជួយសម្របសម្រួលក្នុងការលើកដាក់ទំនិញ ដែលអាចលើកដាក់ទំនិញលើយន្តហោះដឹកជញ្ជូនខ្នាតធំយ៉ាងហោចណាស់ ២ ឬ ៣ គ្រឿងក្នុង ១ ថ្ងៃរួមបន្ថែមទាំងការដឹកជញ្ជូនតាមជើងហោះហើរផ្នែកដឹកអ្នកដំណើរធម្មតា»។
លោកស្រីបន្តទៀតថាការអភិវឌ្ឍកន្លែងដឹកទំនិញចាស់នៅក្នុងបរិវេណអាកាសយានដ្ឋានភ្នំពេញគឺដើម្បីឆ្លើយតបទៅនឹងការកើនឡើងនៃតម្រូវការនាពេលអនាគត។
លោកស្រី Lapeyre បន្តថា៖ «ក្រុមហ៊ុន Cambodia Airports កំពុងបន្តអភិវឌ្ឍចំណតរថយន្តដឹកទំនិញ ការបញ្ជាទិញទំនិញ ការធ្វើការងារ និងឃ្លាំងស្តុកទំនិញ ដើម្បីបង្កើនប្រសិទ្ធភាពឃ្លាំងផ្ទុកទំនិញ និងចរាចរណ៍ទំនិញ»។
ថ្មីៗនេះប្រតិបត្តិករព្រលានយន្តហោះបានស្នើឲ្យក្រុមហ៊ុនជំនាញដឹកជញ្ជូនតាមផ្លូវអាកាសមកជួយរៀបចំចង្វាក់ផលិតកម្ម និងរចនាប្លង់អគារទំនិញថ្មីមួយដែលនឹងត្រូវសាងសង់នៅព្រលានយន្តហោះអន្តរជាតិភ្នំពេញ។
លោកស្រី Lapeyre បានបន្តថា៖ «ការសាងសង់អគារថ្មីនេះនឹងជួយសម្របសម្រួលការកើនឡើងនៃការដឹកជញ្ជូនទំនិញតាមយន្តហោះក្នុង និងក្រៅប្រទេសដែលរំពឹងទុកថានឹងកើនឡើងនៅទសវត្សរ៍ខាងមុខ»៕
ណុប សុវណ្ណ