.jpg)
ឆ្នាំនេះគឺជាឆ្នាំទី ៣៩ ដែលរូបិយប័ណ្ណប្រាក់រៀលត្រូវបានដាក់ឲ្យចរាចរឡើងវិញនៅក្នុងប្រទេសកម្ពុជា។ ចាប់តាំងពីពេលដែលប្រាក់រៀលត្រូវបានដាក់ឲ្យចរាចរឡើងវិញមក ប្រទេសកម្ពុជាបានជួបប្រទះនឹងការផ្លាស់ប្តូរសំខាន់ៗជាច្រើននៅក្នុងប្រទេសរួមមានកំណើនសេដ្ឋកិច្ចដ៏ខ្លាំងក្លា ការរីកចម្រើនផ្នែកបច្ចេកវិទ្យាថ្មីៗក៏ដូចជាការកើនឡើងនូវសហគ្រិនវ័យក្មេងនៅក្នុងប្រទេស។
អ្វីដែលគួរឲ្យកត់សម្គាល់នៅក្នុងឆ្នាំ ២០០៨ គឺការណែនាំនូវសេវាកម្មតាមប្រព័ន្ធឌីជីថលដែលបានជះឥទ្ធិពលលើវិស័យផ្សេងៗរួមទាំងវិធីសាស្ត្រដែលប្រជាជនធ្វើចរាចរប្រាក់រៀលផងដែរ។ នេះមានន័យថាចរាចរណ៍នៃសាច់ប្រាក់បានជួបប្រទះនឹងការផ្លាស់ប្តូរដោយអតិថិជនមានជម្រើសក្នុងការផ្ញើប្រាក់ទៅឲ្យមនុស្សម្នាក់ទៀតតាមរយៈទូរស័ព្ទចល័តជំនួសឲ្យការធ្វើដំណើរតាមឡានក្រុងដើម្បីប្រគល់ប្រាក់ ឬផ្ញើប្រាក់តាមបុគ្គលណាម្នាក់។
ក្រុមហ៊ុនដំបូងបង្អស់នៅកម្ពុជាដែលនាំយកសេវាកម្មតាមប្រព័ន្ធឌីជីថលនេះមកគឺធនាគារឯកទេស វីង (ខេមបូឌា) លីមីតធីត ដែលបានបង្កើតឡើងក្នុងគោលបំណងផ្លាស់ប្តូររបៀបនៃការផ្ញើប្រាក់មិនថាជារូបិយប័ណ្ណប្រាក់រៀល ឬប្រាក់ដុល្លារដែលងាយស្រួល និងមានតម្លៃសមរម្យតាមរយៈបណ្តាញភ្នាក់ងារ វីង ទូទាំងប្រទេស។
ការផ្លាស់ប្តូរដ៏សំខាន់នេះមានន័យថាចរាចរណ៍នៃរូបិយប័ណ្ណប្រាក់រៀលត្រូវបានធ្វើឡើងតាមប្រព័ន្ធឌីជីថល ដោយសារតែកំណើនឡើងនៃទូរស័ព្ទចល័ត ក៏ដូចជាសេវាទូរស័ព្ទ និងបណ្តាញអ៊ីនធឺណេតនៅក្នុងប្រទេស។ វីងបានចូលរួមចំណែកយ៉ាងធំធេងក្នុងសេដ្ឋកិច្ចកម្ពុជាដោយបានធ្វើការណែនាំនូវវិធីសាស្ត្រផ្ញើប្រាក់ ជារូបិយប័ណ្ណប្រាក់រៀល តាមប្រព័ន្ធឌីជីថល ហើយស្ថិតិនៃការផ្ញើប្រាក់ជារូបិយប័ណ្ណប្រាក់រៀលត្រូវបានរំពឹងថានឹងមានការកើនឡើងពីមួយឆ្នាំទៅមួយឆ្នាំ។ ក្នុងឆ្នាំ ២០១៨ ជិត ៥០% នៃប្រតិបត្តិការសរុបរបស់ធនាគារឯកទេស វីង ត្រូវបានធ្វើឡើងជារូបិយប័ណ្ណប្រាក់រៀលដែលចំនួននេះមានការកើនឡើងប្រមាណ ៤០% បើប្រៀបធៀបនឹងតួលេខក្នុងឆ្នាំ ២០១៧។
គំនិតនៅពីក្រោយការលើកកម្ពស់គុណតម្លៃនៃរូបិយប័ណ្ណប្រាក់រៀលមិនបានបញ្ឈប់ត្រឹមនេះទេ។ វីង តែងតែផ្តោតការយកចិត្តទុកដាក់លើរូបិយប័ណ្ណប្រាក់រៀលនៅគ្រប់សម្ភារទំនាក់ទំនងក្នុងស្រុករបស់ធនាគារ។ មិនថាវាជាថ្លៃសេវាកម្ម វិក្កយបត្រលើការបង់ទឹកភ្លើង ទិញទំនិញនៅតាមបណ្តាហាងដែលទទួលការទូទាត់តាម WingPay ឬទទួលប្រាក់ដែលផ្ទេរពីជាង ២០០ ប្រទេស ធនាគារឯកទេស វីង តែងតែធានាថាអតិថិជនអាចបង់ថ្លៃសេវាទាំងនោះតាមរយៈរូបិយប័ណ្ណប្រាក់រៀល។
ការគិតគូរពីរូបិយប័ណ្ណប្រាក់រៀលតែងតែជាអ្វីដែលស្ថិតនៅក្នុងគោលគំនិតរបស់ធនាគារឯកទេស វីង។ វីង ធានាថារាល់អតិថិជនរបស់ខ្លួនក្នុងនោះដែរ ៧៥% មិនធ្លាប់ប្រើប្រាស់សេវាធនាគារអាចទទួលបានសេវាកម្មហិរញ្ញវត្ថុធនាគារមួយប្រកបដោយស្តង់ដាតាមរយៈកម្មវិធីស្មាតហ្វូន វីង ឬគណនី វីង ជារូបិយប័ណ្ណប្រាក់រៀល។ បច្ចុប្បន្នអតិថិជនម្នាក់ក្នុងចំណោមអតិថិជន ៤ នាក់ជ្រើសរើសគណនី វីងជារូបិយប័ណ្ណប្រាក់រៀល ហើយពួកគេរាប់បញ្ចូលទាំងអ្នកបើកបររ៉ឺម៉កកង់៣ ម្ចាស់អាជីវកម្មខ្នាតតូច កម្មកររោងចក្រ និងអ្នកប្រកបមុខរបរផ្សេងៗទៀតផងដែរ។ អតិថិជនទាំងនេះបានរួមចំណែកយ៉ាងធំធេងក្នុងការលើកកម្ពស់រូបិយប័ណ្ណប្រាក់រៀលតាមប្រព័ន្ធឌីជីថលទាំងនៅក្នុងមុខជំនួញទាំងនៅក្នុងការរស់នៅប្រចាំថ្ងៃរបស់ពួកគេ។ វីង ពិតជាចង់ថ្លែងអំណរគុណចំពោះការគាំទ្ររបស់ពួកគេព្រោះដោយសារតែការគាំទ្ររបស់ពួកគេ តម្លៃនៃប្រតិបត្តិការសរុបជាប្រាក់រៀលរបស់ វីង នៅតែបន្តកើនឡើង។
លើសពីនេះទៅទៀត វីង បានជួយសហគ្រិនក្នុងស្រុករាប់ពាន់នាក់ដែលកំពុងប្រឈមនឹងការលំបាកក្នុងការរៀបចំក្រដាសប្រាក់រៀលតូចៗសម្រាប់អាប់ជូនអតិថិជនដែលប្រើប្រាស់ផលិតផល និងសេវាកម្មរបស់ពួកគេ។ ជាមួយនឹងគណនីអាជីវកម្ម WingPay ជារូបិយប័ណ្ណប្រាក់រៀល ម្ចាស់អាជីវកម្មទាំងនោះនឹងអាចធ្វើការទូទាត់ភ្លាមៗដោយមិនចាំបាច់ព្រួយបារម្ភអំពីរូបិយប័ណ្ណក្លែងក្លាយ ការរៀបចំក្រដាសប្រាក់រៀលតូចៗជារៀងរាល់ថ្ងៃនៅពេលគាត់បិទអាជីវកម្ម។ ជាមួយនឹងគណនីអាជីវកម្ម WingPay ជារូបិយប័ណ្ណប្រាក់រៀល អតិថិជនរបស់យើងអាចចូលទៅពិនិត្យប្រវត្តិនៃប្រតិបត្តិការតាមប្រព័ន្ធឌីជីថល ដែលបង្ហាញព័ត៌មានពេញលេញនៃប្រាក់ចំណូលរបស់ពួកគេ ដែលនេះបានផ្តល់ភាពងាយស្រួលដល់អាជីវករក្នុងការគ្រប់គ្រងចំណូលពីអាជីវកម្មរបស់ពួកគេតាមរយៈកម្មវិធីស្មាតហ្វូន វីង ដែលអាចប្រើប្រាស់សម្រាប់គណនីជាប្រាក់រៀល។
ទាំងនេះគ្រាន់តែជាឧទាហរណ៍មួយចំនួនអំពីរបៀបដែល វីង កំពុងកសាងប្រព័ន្ធអេកូនៃការទូទាត់ដោយមិនប្រើក្រដាសប្រាក់ដោយផ្តោតទៅលើរូបិយវត្ថុជាតិ។ ការកើនឡើងនៃគណនី វីង ជាប្រាក់រៀលក៏ដូចជាការធ្វើប្រតិបត្តិការជាប្រាក់រៀលបានផ្តល់នូវសារមួយច្បាស់លាស់ថាមានលទ្ធភាពជាច្រើនក្នុងការលើកកម្ពស់ការប្រើប្រាស់រូបិយប័ណ្ណប្រាក់រៀលតាមរបៀបដែលសមស្របនឹងចក្ខុវិស័យនៃសេដ្ឋកិច្ចឌីជីថល ដែលត្រូវរំពឹងថានឹងសម្រេចបាននៅឆ្នាំ ២០២៣ ដូចដែលបានអះអាងដោយរាជរដ្ឋាភិបាលកម្ពុជា។
វីង ក៏សូមឆ្លៀតឱកាសនេះផងដែរដើម្បីអបអរសាទរដល់ធនាគារជាតិនៃកម្ពុជា សម្រាប់ខួបលើកទី ៣៩ នៃការដាក់ឲ្យចរាចរឡើងនូវរូបិយប័ណ្ណប្រាក់រៀល។ ក្នុងនាមជាអ្នកផ្តល់សេវាកម្មធនាគារចល័តឈានមុខគេក៏ដូចជាអ្នកឈ្នះពានរង្វាន់ “ស្ថាប័នដែលមានភាពច្នៃប្រឌិតបំផុតផ្នែកប្រព័ន្ធឌីជីថលប្រចាំឆ្នាំ” វីង ត្រៀមខ្លួនរួចជាស្រេចក្នុងការចូលរួមជាមួយរាជរដ្ឋាភិបាលក្នុងការលើកកម្ពស់រូបិយប័ណ្ណប្រាក់រៀលតាមប្រព័ន្ធឌីជីថល និងធានាឲ្យបានថាប្រជាជនកម្ពុជានៅតែបន្តទទួលបាននូវបទពិសោធពាក់ព័ន្ធនឹងផលិតផល និងសេវាកម្មដែលប្រកបដោយការច្នៃប្រឌិតសំដៅជួយឲ្យប្រសើរឡើងនូវជីវភាពប្រចាំថ្ងៃរបស់ពួកគេ៕
