.jpg)
លោក Yum Sui Sang ប្រធានសមាគម CHKMEBA។
បទសម្ភាសជាមួយភ្នំពេញ ប៉ុស្ដិ៍ លោក Yum Sui Sang ប្រធានសមាគម China, Hong Kong and Macau Expatriate and Business Association of Cambodia បង្ហាញពីទំនាក់ទំនងពាណិជ្ជកម្មដ៏ជិតស្និទ្ធរវាងសមាគមនេះនឹងកម្ពុជា។
តើអ្វីជាវិស័យអាទិភាពសំខាន់ដែលសមាគមរបស់លោកមានចំណាប់អារម្មណ៍នៅក្នុងរយៈពេលប៉ុន្មានខែខាងមុខនេះដើម្បីលើកកម្ពស់ពាណិជ្ជកម្មទ្វេភាគីរវាងកម្ពុជា និងហុងកុង?
ហុងកុង និងកម្ពុជាតែងតែជាសម្ព័ន្ធមិត្តដ៏ជិតស្និទ្ធទាក់ទងនឹងពាណិជ្ជកម្ម និងការអភិវឌ្ឍសង្គម។ សមាគម CHKMEBA គឺជាសមាជិកមួយក្នុងចំណោមសមាជិកទាំង ៤៣ នៃសហព័ន្ធសមាគមពាណិជ្ជកម្មហុងកុងពិភពលោក ទទួលបានអត្ថប្រយោជន៍ពីការដឹកនាំរបស់ក្រុមប្រឹក្សាអភិវឌ្ឍន៍ពាណិជ្ជកម្មហុងកុងដើរតួនាទីជាអ្នកភា្ជប់ដ៏សំខាន់មួយនៅក្នុងប្រទេសកម្ពុជាក្នុងការតភ្ជាប់ជាបន្តនូវពាណិជ្ជកម្ម និងទំនាក់ទំនងរវាងប្រទេសកម្ពុជា និងហុងកុង។
តើលោកវាយតម្លៃកម្រិតទំនាក់ទំនងរវាងកម្ពុជា និងហុងកុងដូចម្ដេច ទាំងទំនាក់ទំនងរវាងប្រជាជន និងប្រជាជនក៏ដូចជាចក្ខុវិស័យពាណិជ្ជកម្ម និងការវិនិយោគ?
ក្រុមប្រឹក្សាអភិវឌ្ឍន៍ពាណិជ្ជកម្មហុងកុង ការិយាល័យពាណិជ្ជកម្មសេដ្ឋកិច្ចហុងកុង ក្រុមប្រឹក្សាផលិតភាពហុងកុង ទាំងអស់នេះបាននិងកំពុងរៀបចំបេសកកម្មពាណិជ្ជកម្មមកទស្សនាកម្ពុជា ដើម្បីបង្ហាញស្ថានភាពពាណិជ្ជកម្ម និងវិនិយោគដល់ទីក្រុងហុងកុងយ៉ាងទៀងទាត់។ ចំណែកឯហុងកុងក៏បានអញ្ជើញមន្ដ្រីរដ្ឋាភិបាលចូលរួមព្រឹត្តិការណ៍នានា ដូចជា «កិច្ចប្រជុំកំពូលខ្សែក្រវាត់ និងផ្លូវ» វេទិកាហុងកុង វេទិកាហិរញ្ញវត្ថុអាស៊ី ដើម្បីតភ្ជាប់ក្រុមហ៊ុន និងទំនាក់ទំនងកាន់តែច្រើនបន្ថែមទៀត។
និយាយជារួមប្រជាជនកម្ពុជាមើលទៅគឺមានភាពរួសរាយរាក់ទាក់ និងខិតខំយ៉ាងខ្លាំងដើម្បីភាពរីកចម្រើនជាមួយនឹងសក្ដានុពលដ៏ច្រើន ខណៈដែលភាគច្រើននៃកម្លាំងពលកម្មស្ថិតក្នុងវ័យ ២០ ឆ្នាំជាង។
ពាណិជ្ជកម្មទ្វេភាគីកំពុងស្ថិតលើគន្លងរីកចម្រើន។ តើអ្វីជាកតា្តជំរុញវិស័យពាណិជ្ជកម្ម ហើយតើការចូលរួមរបស់វិស័យឯកជនកំពុងរួមចំណែកដល់ភាពជោគជ័យនៃកំណើននេះដូចម្តេច ?
ការបើកចំហបរិយាកាសវិនិយោគ និងសេដ្ឋកិច្ចពឹងផ្អែកលើប្រាក់ដុល្លារអាមេរិក គឺជាកត្តាជំរុញដ៏សំខាន់សម្រាប់វិស័យឯកជន ដែលមិននិយាយអំពីការបន្ធូរបន្ថយក្នុងការគ្រប់គ្រងអត្រាប្តូរប្រាក់បរទេស ក៏បាននិងកំពុងធ្វើឲ្យប្រទេសកម្ពុជាក្លាយជាទិសដៅមួយក្នុងចំណោមទិសដៅវិនិយោគដែលទាក់ទាញខ្លាំងបំផុតមួយ។
តើសហគមន៍ធុរកិច្ចហុងកុងបានរួមចំណែកដល់សេដ្ឋកិច្ចរបស់កម្ពុជាក្នុងរយៈពេលជាច្រើនឆ្នាំនេះដូចម្ដេច?
ក្រុមវិនិយោគិនហុងកុងមានប្រវត្តិវិនិយោគជាយូរយារណាស់មកហើយនៅក្នុងប្រទេសកម្ពុជា ហើយយើងបាននិងកំពុងនាំយកអ្នកជំនាញរបស់យើងមកប្រទេសកម្ពុជា។ ក្រុមវិនិយោគិន ពាណិជ្ជករហុងកុងបានចូលរួមក្នុងវិស័យជាច្រើន ដូចជាផលិតកម្ម ហិរញ្ញវត្ថុ ឡូជីស្ទិក ការអប់រំ សំណង់ ការរចនាប្លង់ ការអភិវឌ្ឍអចលនទ្រព្យ អាហារ និងភេសជ្ជៈ ច្បាប់ ឱសថ ព័ត៌មានវិទ្យា ការលក់រាយ ការពិគ្រោះយោបល់ ការគ្រប់គ្រង គណនេយ្យ និងសវនកម្មជាដើម។
តើពាណិជ្ជករកម្ពុជាអាចទទួលបានពីក្រុមហ៊ុនហុងកុងដូចជាការផ្ទេរបច្ចេកវិទ្យាយ៉ាងដូចម្ដេច?
ហុងកុងគឺជាទីក្រុងមួយដែលយើងតែងតែទទួលបានបទពិសោធល្អបំផុត នៅពេល «លោកខាងលិចជួបលោកខាងកើត» ដែលស្រដៀងគ្នាខ្លាំងនឹងទីផ្សារកម្ពុជាបច្ចុប្បន្ន។ ហើយពលរដ្ឋចិនក៏មានវត្តមានជាយូរលង់មកច្រើនដែរនៅក្នុងប្រទេសកម្ពុជា។
ក្រុមហ៊ុនហុងកុងតែងតែមានលក្ខណៈដូចគ្នាគឺមានបទពិសោធច្រើននៅក្នុងការសហការ និងទទួលបានលទ្ធផលល្អបំផុតពីបទពិសោធទាំងនោះ។ លើសពីនេះទៀត ហុងកុង គឺជាច្រកចេញចូលរវាងចិនដីគោក និងទីក្រុងហុងកុង ជាពិសេសនិយាយអំពីសេចក្ដីព្រាងកិច្ចសន្យា ការការពារផ្លូវច្បាប់ និងជំនាញវិជ្ជាជីវៈផ្សេងទៀត៕
