.jpg)
លោកបណ្ឌិត អុិន ចាន់នី ប្រធានសមាគមធនាគារនៅកម្ពុជា។ សហការី
យើងទាំងអស់គ្នាសូមចូលរួមអបអរសាទរក្នុងឱកាសដែលធនាគារជាតិនៃកម្ពុជាប្រារព្ធពិធីអបអរខួបលើកទី៣៩ នៃការដាក់ឲ្យប្រើប្រាស់ប្រាក់រៀលឡើងវិញ។ បច្ចុប្បន្នប្រាក់រៀលត្រូវបានប្រើប្រាស់យ៉ាងទូលំទូលាយនៅតាមតំបន់ជនបទហើយកំពុងបញ្ជ្រាបខ្លួនចូលទៅក្នុងតំបន់ទីប្រជុំជន និងតំបន់ទេសចរណ៍នានា ជាតំបន់ដែលប្រាក់ដុល្លារគ្របដណ្តប់ខ្លាំង។
ដូចដែលយើងបានដឹងស្រាប់ហើយថា ប្រាក់ដុល្លារបានក្លាយជារូបិយប័ណ្ណដ៏ពេញនិយមនៅក្នុងអំឡុងពេលដែលអាជ្ញាធរបណ្តោះអាសន្ននៃអង្គការសហប្រជាជាតិ ចូលមកក្នុងប្រទេស កម្ពុជា ក្នុងទសវត្យរ៍ឆ្នាំ ១៩៩០ ហើយគិតចាប់តាំងពីពេលនោះមក រូបិយប័ណ្ណមួយនេះនៅតែជារូបិយប័ណ្ណដែលមានឥទ្ធិពលខ្លាំងដែលតំណាងឱ្យប្រហែល ៩០ ភាគរយនៃទ្រព្យសកម្មរបស់ធនាគារពាណិជ្ជ គិតត្រឹមដំណាច់ឆ្នាំ ២០១៨។
ការចរាចររួមគ្នាដ៏រលូននៃប្រាក់ដុល្លារអាមេរិកដែលជារូបិយប័ណ្ណទទួលបានការជឿទុកចិត្តជាអន្តរជាតិ និងប្រាក់ រៀលបានជួយគាំទ្រដល់ការវិនិយោគយ៉ាងធំធេងនៅក្នុងប្រទេស កម្ពុជា និងបាននាំប្រទេសមួយនេះឆ្ពោះទៅរកភាពរីកចម្រើនឥតឈប់ឈរ ប្រកបដោយនិរន្តរភាពដែលបានវិវឌ្ឍខ្លួនពីប្រទេសដែលមានការអភិវឌ្ឍតិចតួចបំផុតនៅក្នុងពិភពលោក រហូតក្លាយទៅជាប្រទេសដែលមានប្រាក់ចំណូលមធ្យមកម្រិតទាប ដូចសព្វថ្ងៃនេះ។
ទីផ្សាររូបិយវត្ថុសេរីនេះបានធ្វើឲ្យអត្រាប្តូរប្រាក់រវាងប្រាក់ដុល្លារ និងប្រាក់រៀលមានស្ថិរភាពយ៉ាងរឹងមាំគឺ ប្រែប្រួលតែក្នុងរង្វង់ ១,៥ ភាគរយប៉ុណ្ណោះ ក្នុងរយៈពេល ១០ ឆ្នាំកន្លងមកនេះ។ វាជាសមិទ្ធផលដ៏ធំធេងនឹងបានរួមចំណែកយ៉ាងសំខាន់ដល់ស្ថិរភាពរូបិយវត្ថុ និរន្តរភាពនៃកំណើនសេដ្ឋកិច្ច និងសុខុមាលភាពរបស់ប្រជាជនកម្ពុជា។
ទាំងនេះ គឺជាសមិទ្ធផលដ៏ជោគជ័យដែលជាលទ្ធផលនៃការខិតខំប្រឹងប្រែងយ៉ាងខ្លាំងក្លាពីសំណាក់មន្ត្រីរបស់ធនាគារជាតិ នៃ កម្ពុជា។
យុទ្ធសាស្ត្ររបស់ធនាគារជាតិ នៃ កម្ពុជាត្រូវបានរៀបចំយ៉ាងលម្អិតនៅក្នុងយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ ២០១៦-២០២៥ ដែលត្រូវបានអនុវត្តយ៉ាងយកចិត្តទុកដាក់បំផុត។
អភិបាលនៃធនាគារជាតិ នៃ កម្ពុជានៅក្នុងតួនាទីដឹកនាំនយោបាយរូបិយវត្ថុដ៏ប៉ិនប្រសប់របស់លោក បានដឹកនាំយុទ្ធសាស្ត្រនាំមុខដោយទីផ្សារនេះ ដើម្បីលើកទឹកចិត្តដល់សាធារណជនឲ្យប្រើប្រាស់ប្រាក់រៀលកាន់តែទូលំទូលាយ ជាពិសេសបានអនុវត្តសកម្មភាពប្រកបដោយនិរន្តរភាពជាច្រើន រួមទាំងការបង្កើតនូវប្រតិបត្តិការផ្តល់សន្ទនីយភាពដោយមានការធានាជាប្រាក់រៀល (LPCO) ថែមទៀតផង។
ប្រាក់រៀល គឺជាមធ្យោបាយដ៏ចម្បងនៃការទូទាត់នៅតាមធនាគារដែលជាមជ្ឈមណ្ឌលសម្រាប់ទូទាត់រូបិយប័ណ្ណអន្តរជាតិទាំងអស់នៅក្នុងប្រព័ន្ធធនាគារ និងឧស្សាហកម្មហិរញ្ញវត្ថុក្នុងប្រទេស កម្ពុជា។
យុទ្ធសាស្ត្រនាំមុខដោយទីផ្សារ និងសកម្មភាពដែលកំណត់គោលដៅបានសមស្រប នាំឱ្យការប្រើប្រាស់ប្រាក់រៀលកើនឡើងដែលកំណត់លក្ខខណ្ឌជាមួយនឹងការធានាដល់កំណើនសេដ្ឋកិច្ច អតិផរណាមានកម្រិតទាប និងអត្រាប្តូរប្រាក់ពីប្រាក់រៀលទៅប្រាក់ដុល្លារមានស្ថិរភាព។
ក្នុងនាមខ្ញុំជាអគ្គនាយកធនាគារអេស៊ីលីដា ភីអិលស៊ី និងជាប្រធានសមាគមធនាគារនៅកម្ពុជា ខ្ញុំជឿជាក់ និងទុកចិត្តយ៉ាងមុតមាំថា វាជាពេលវេលាដ៏សមស្របបំផុតដែលប្រាក់រៀលរបស់យើងត្រូវដើរតួឲ្យបានពេញលេញក្នុងនាមជារូបិយវត្ថុជាតិ នៅក្នុងគ្រប់មធ្យោបាយនៃការទូទាត់ និងដំណោះស្រាយទាំងអស់។
យើងគាំទ្រចំពោះការផ្តួចផ្តើមដ៏មានតម្លៃរបស់រាជរដ្ឋាភិបាលកម្ពុជា និងធនាគារជាតិ នៃ កម្ពុជាសម្រាប់តួនាទីដ៏សកម្មរបស់ប្រាក់រៀល ដែលជាមធ្យោបាយនៃការទូទាត់ដ៏សំខាន់ដោយផ្អែកលើវិធីសាស្ត្រទីផ្សារ។ សមាជិកទាំងអស់របស់សមាគមធនាគារនៅកម្ពុជាសូមគាំទ្រយុទ្ធសាស្ត្រដែលនាំមុខដោយទីផ្សារយូរអង្វែង និងប្រកបដោយប្រសិទ្ធភាពរបស់ធនាគារជាតិ នៃ កម្ពុជាដើម្បីលើកកម្ពស់ប្រាក់រៀល។
យើងតែងតែបានត្រៀមខ្លួនរួចជាស្រេចក្នុងការគាំទ្រដល់ធនាគារជាតិនៃកម្ពុជា ចំពោះយុទ្ធសាស្ត្រនាំមុខដោយទីផ្សារយូរអង្វែង ដើម្បីលើកកម្ពស់ប្រាក់រៀលជាមួយនឹងការយល់ដឹងយ៉ាងស៊ីជម្រៅអំពីទីផ្សារ និងជំនាញដ៏ពិតប្រាកដរបស់យើងដែលធ្វើការជាមួយសាធារណជនដោយផ្ទាល់ជារៀងរាល់ថ្ងៃ៕
