.jpg)
លោកជំទាវ អេវ៉ា ង្វៀន ប៊ិញ ឯកអគ្គរដ្ឋទូតបារាំងប្រចាំកម្ពុជា។ សហការី
បុណ្យជាតិបារាំង គឺជាពេលវេលាដ៏មានអត្ថន័យសម្រាប់ប្រជាពលរដ្ឋបារាំង។ ទិវានេះគឺជាឱកាសជួបជុំគ្នាអបអរគុណតម្លៃរបស់យើង និងអ្វីដែលប្រទេស បារាំង តំណាងឱ្យ ហើយវាក៏ជាពេលសប្បាយរីករាយជាមួយមិត្តភក្តិ និងដៃគូដែលសកម្ម និងគាំទ្រទំនាក់ទំនងនយោបាយ និងសេដ្ឋកិច្ច ព្រមទាំងកិច្ចសហប្រតិបត្តិការវិទ្យាសាស្ត្រ អប់រំ និងវប្បធម៌នៅក្នុងគម្រោងអភិវឌ្ឍន៍របស់យើង។
នៅប្រទេស កម្ពុជា បុណ្យជាតិបារាំង គឺជាពេលអបអរទំនាក់ទំនងរវាងប្រទេសយើងទាំង ២។ ព្រឹត្តិការណ៍ជាច្រើនក្នុងអំឡុង ១២ ខែចុងក្រោយ នេះបានពង្រឹងចំណងផ្សារភ្ជាប់ដ៏ល្អឯករវាងកម្ពុជា និងបារាំង។
ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាបានយាងទៅទីក្រុងប៉ារីស ដើម្បីចូលរួមពិធីអបអរខួប ២៥ ឆ្នាំ នៃការបង្កើតគណៈកម្មាធិការអន្តរជាតិសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ (ICC Angkor)។
ពិធីអបអរនេះពិតជាមានអត្ថន័យយ៉ាងក្រៃលែងព្រោះវាបានបង្ហាញឱ្យឃើញពីផ្លូវដែលយើងបានធ្វើដំណើរចាប់តាំងពីពេលបង្កើត ICC Angkor ភ្លាមៗបន្ទាប់ពីការដាក់រមណីយដ្ឋានអង្គរនៅក្នុងបញ្ជីសម្បត្តិបេតិកភណ្ឌពិភពលោករបស់អង្គការយូណេស្កូ។ ចាប់ពីពេលនោះមក ប្រទេស បារាំង បានធ្វើជាសហប្រធាន ICC Angkor ជាមួយប្រទេស ជប៉ុន ដោយផ្តល់ការគាំទ្រដល់អាជ្ញាធរកម្ពុជាដើម្បីអភិរក្ស និងអភិវឌ្ឍតំបន់អង្គរ។ បច្ចុប្បន្ន ICC Angkor ត្រូវបានចាត់ទុកជាស្ថាប័នគំរូ ១ នៅក្នុងពិភពលោក។
យើងក៏មានកិត្តិយសផងដែរ ដែលឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានទៅបំពេញទស្សនកិច្ចផ្លូវការលើកដំបូងនៅប្រទេស បារាំង ដើម្បីចូលរួមក្នុងវេទិកាអន្តរជាតិមួយរៀបចំឡើងដោយឯកឧត្តម ប្រ៊ុយណូ ឡឺមែរ រដ្ឋមន្ត្រី ក្រសួងសេដ្ឋកិច្ចបារាំង។ កិច្ចពិភាក្សាទេ្វភាគីបានប្រព្រឹត្តទៅប្រកបដោយផ្លែផ្កា។
យើងក៏អាចលើកឡើងផងដែរអំពីដំណើរទស្សនកិច្ចកម្រិតខ្ពស់របស់គណៈប្រតិភូនៃសភាជាតិបារាំងនៅកម្ពុជាកាលពីខែធ្នូកន្លងទៅ។
ឆ្នាំនេះយើងបានសម្ពោធដាក់ឱ្យដំណើរការសម្ព័ន្ធភាពបារាំង (Alliance Française) នៅសៀមរាប ដើម្បីឆ្លើយតបទៅនឹងតម្រូវការសិក្សាភាសាបារាំង។ យើងក៏បានរៀបចំព្រឹត្តិការណ៍ «ផ្សារបារាំង» ជាលើកដំបូងផងដែរ នៅក្នុងស្ថានទូតបារាំង ដើម្បីបង្ហាញអំពីផលិតផល ក្រុមហ៊ុន និងភាពជាដៃគូបារាំង-កម្ពុជា។ យើងខ្ញុំមានសេចក្តីរីករាយដោយសារក្នុងអំឡុងតែ ១ ថ្ងៃប៉ុណ្ណោះ យើងទទួលបានអ្នកចូលទស្សនា ៨ ០០០ នាក់ ដែលភាគច្រើន ជាជនជាតិខ្មែរ។
ទំនាក់ទំនងពាណិជ្ជកម្មរវាងប្រទេសយើងទាំង ២ មានការវិវឌ្ឍដ៏វិជ្ជមាន៖ ការផ្លាស់ប្តូរទ្វេភាគីរវាងប្រទេសយើងទាំង ២ បានកើនឡើង ៣ ដង ក្នុងរយៈពេល ៥ ឆ្នាំ ហើយកម្ពុជាគឺជាគោលដៅទី៥ នៃការវិនិយោគរបស់បារាំងក្នុងតំបន់អាស៊ាន។
ធុរជនបារាំងចំនួន ១៥០ នាក់ ដែលមានចំណាប់អារម្មណ៍ចំពោះអាស៊ានបានជ្រើសរើសភ្នំពេញជាលើកដំបូងសម្រាប់កិច្ចប្រជុំប្រចាំឆ្នាំរបស់ពួកគេ ដែលបានប្រព្រឹត្តទៅកាលពីខែមុន។
ក្នុងរយៈពេល ២៥ ឆ្នាំ ជំនួយជាង ៥៩៤ លានដុល្លារអាមេរិក ត្រូវបានផ្តល់ដោយទីភ្នាក់ងារអភិវឌ្ឍន៍បារាំង (AFD) ដើម្បីគាំទ្រដល់ការរីកលូតលាស់ប្រកបដោយបរិយាប័ន្ននៅកម្ពុជា។ ឆ្នាំនេះផងដែរ គម្រោងសំខាន់ៗជាច្រើនត្រូវបានអនុវត្តដោយទីភ្នាក់ងារ AFD ជាមួយអាជ្ញាធរកម្ពុជា និងដៃគូផ្តល់ជំនួយផ្សេងទៀតនៅក្នុងវិស័យអាទិភាពដូចជា ការគ្រប់គ្រងទឹក និងកាកសំណល់ កសិកម្ម ការបណ្តុះបណ្តាលវិជ្ជាជីវៈ និងថាមពល។ នៅក្នុងពិភពមួយដែលកំពុងជួបនឹងបញ្ហាប្រឈម និងការគំរាមកំហែងជាសកលយ៉ាងច្រើន បារាំង និងកម្ពុជា គឺជាដៃគូនឹងគ្នា។
ឆ្នាំនេះប្រទេស បារាំង ធ្វើជាប្រធានកិច្ចប្រជុំក្រុមប្រទេស G7 ហើយបានប្រកាសដាក់ការប្រយុទ្ធប្រឆាំងនឹងវិសមភាពជាអាទិភាពរបស់ខ្លួន។ ដើម្បីរួមចំណែកកាត់បន្ថយវិសមភាពក្នុងវិស័យសុខាភិបាល ប្រទេស បារាំង នឹងធ្វើជាម្ចាស់ផ្ទះរៀបចំសន្និសីទនៃមូលនិធិសកលប្រយុទ្ធនឹងជំងឺអេដស៍ របេង និងគ្រុនចាញ់ នៅថ្ងៃទី ១០ ខែ តុលា ខាងមុខ។ បារាំងជាប្រទេសផ្តល់ជំនួយធំទី២ ដល់មូលនិធិសកល ហើយប្រទេស កម្ពុជា ទទួលបានលទ្ធផលយ៉ាងល្អប្រសើរក្នុងការងារប្រយុទ្ធនឹងជំងឺអេដស៍ របេង និងគ្រុនចាញ់។ យើងនឹងបន្តធ្វើការជាមួយគ្នាដើម្បីប្រយុទ្ធនឹងជំងឺឆ្លងទាំងនេះ ហើយសន្និសីទខាងលើនឹងជាឱកាសដ៏សំខាន់មួយដើម្បីគូសបញ្ជាក់ពីជោគជ័យរបស់មូលនិធិសកល និងរបស់កម្ពុជា។
នៅក្នុងខែវិច្ឆិកាខាងមុខ វេទិកាអន្តរជាតិទីក្រុងប៉ារីសលើកទី២ ស្តីពីសន្តិភាព និងអភិបាលកិច្ច នឹងត្រូវបានរៀបចំឡើង។ លោកប្រធានាធិបតីបារាំង អេម៉ានុយអែល ម៉ាក្រុង ចង់ឱ្យវេទិកានេះក្លាយទៅជាជំនួបមួយសម្រាប់ពិភាក្សាពីគម្រោងជាក់លាក់ និងមានលក្ខណ:បង្កើតថ្មីដែលអាចជួយកែលម្អពិភពលោកឱ្យកាន់តែប្រសើរ។
កាលពីឆ្នាំមុន ប្រមុខរដ្ឋ និងប្រមុខរដ្ឋាភិបាលចំនួន ៦៥ រូប អ្នកអនុវត្តគម្រោងចំនួន ១២១ នាក់ និងតួអង្គសង្គមស៊ីវិល ៦ ០០០ នាក់ បានចូលរួមក្នុងវេទិកានេះ។ យើងសូមអំពាវនាវដល់អ្នកអនុវត្តគម្រោងទាំងអស់នៅកម្ពុជាអញ្ជើញមកទីក្រុងប៉ារីស ដើម្បីចូលរួមក្នុងឱកាសដ៏កម្រនេះ។
មុននឹងបញ្ចប់ ខ្ញុំសូមបញ្ជាក់ថា ជាទម្លាប់យើងរៀបចំបុណ្យជាតិបារាំងដោយមានការរាំកម្សាន្ត។ ដូច្នេះនឹងមានពិធីរាំកម្សាន្តនៅថ្ងៃទី ១៣ ខែ កក្កដា នៅភ្នំពេញ និងនៅថ្ងៃទី ១៤ កក្កដា នៅសៀមរាប។
សូមចូលមើលទំព័រអ៊ីធឺណិត ឬទំព័រហ្វេសប៊ុករបស់ស្ថានទូតបារាំង ដើម្បីជ្រាបព័ត៌មានបន្ថែម និងទិញសំបុត្រចូលរួម។
សូមអញ្ជើញមកកម្សាន្តរីករាយជាមួយយើងខ្ញុំទាំងអស់គ្នា!
