.jpg)
ឯកឧត្តម Wang Wentian ។
នៅក្នុងឱកាសដ៏វិសេសវិសាលនៃការប្រារព្ធខួបលើកទី ៧០ នៃការបង្កើតសាធារណរដ្ឋប្រជាមានិតចិននេះ តាងនាមឲ្យស្ថានទូតចិនប្រចាំកម្ពុជា ខ្ញុំសូមសម្តែងការអបអរសាទរយ៉ាងកក់ក្តៅបំផុតជូនចំពោះជនរួមជាតិចិន ដែលកំពុងសិក្សាកំពុងធ្វើការ និងកំពុងរស់នៅក្នុងប្រទេសកម្ពុជា និងសូមថ្លែងអំណរគុណយ៉ាងជ្រាលជ្រៅចំពោះមិត្តកម្ពុជារបស់យើងនៅគ្រប់មជ្ឈដ្ឋាន ដែលបានប្តេជ្ញាចិត្តលើកកម្ពស់ចំណងមិត្តភាពរវាងចិន-កម្ពុជា។
ក្នុងរយៈពេល ៧០ ឆ្នាំកន្លងមកនេះប្រទេសចិនបានចៀសផុតពីភាពក្រីក្រ ឆ្ពោះទៅរកភាពរុងរឿង និងរឹងមាំ។ ការអភិវឌ្ឍចេញពីភាពក្រីក្រ និងភាពទទេសោះរហូតក្លាយទៅជាប្រទេសដែលមានសេដ្ឋកិច្ចធំបំផុតទី ២ នៅក្នុងពិភពលោក សេដ្ឋកិច្ចរបស់ប្រទេសចិនមិនត្រឹមតែមានការរីកចម្រើននៅក្នុងបរិមាណប៉ុណ្ណោះទេ ប៉ុន្តែព្រមទាំងរចនាសម្ព័ន្ធ និងការលើកកម្ពស់គុណភាពរបស់វាផងដែរ។
វិទ្យាសាស្ត្រ និងបច្ចេកវិទ្យារបស់ចិនមានការរីកចម្រើនយ៉ាងឆាប់រហ័ស ហើយយុទ្ធសាស្ត្រអភិវឌ្ឍន៍ដែលជំរុញដោយការច្នៃប្រឌិត កំពុងត្រូវបានអនុវត្តយ៉ាងមានប្រសិទ្ធភាពជាមួយនឹងសមិទ្ធផលដ៏គួរឱ្យកត់សម្គាល់ជាច្រើនដូចជាការធ្វើដំណើរទៅទីអវកាស ការរុករកនៅសមុទ្រជ្រៅៗ ការអភិវឌ្ឍកុំព្យូទ័រល្បឿនលឿន និងបច្ចេកវិទ្យា big data ជាដើម។
ជីវភាពរស់នៅរបស់ប្រជាជនបានប្រសើរឡើងយ៉ាងខ្លាំង ខណៈដែលប្រជាជនចិនជាង ៧០០ លាននាក់បានរួចផុតពីភាពក្រីក្រគិតចាប់តាំងពីការធ្វើកំណែទម្រង់ និងការបើកចំហត្រូវបានធ្វើឡើងកាលពីជាង ៤០ ឆ្នាំមុន ហើយបច្ចុប្បន្នប្រជាជនយើងដែលមានប្រាក់ចំណូលមធ្យមរហូតដល់ ៤០០ លាននាក់ពោលគឺខ្ពស់ជាងគេបំផុតនៅលើពិភពលោក។
ការអប់រំ សេវាកម្មវេជ្ជសាស្ត្រ និងគម្រោងទ្រទ្រង់ជីវភាពរស់នៅជាច្រើនទៀតកំពុងត្រូវបានអនុវត្តហើយជីវភាពរស់នៅរបស់ប្រជាជនកំពុងប្រសើរឡើង។ ទន្ទឹមនឹងនេះដែរ ប្រទេសចិនបានក្លាយជាក្បាលម៉ាស៊ីនដ៏សំខាន់សម្រាប់កំណើនសេដ្ឋកិច្ចពិភពលោកជាមួយនឹងអត្រារួមចំណែកជាង ៣០ ភាគរយក្នុងរយៈពេលជាច្រើនឆ្នាំជាប់ៗគ្នា។
ក្នុងរយៈពេល ៧០ ឆ្នាំកន្លងមកនេះប្រទេសចិនបានបញ្ចូលកម្លាំងជំរុញថ្មីទៅក្នុងសន្តិភាពពិភពលោក និង ការអភិវឌ្ឍ និងពង្រឹងមុខមាត់របស់ខ្លួនក្នុងនាមជាមហាអំណាចប្រកបដោយការទទួលខុសត្រូវ។
ប្រទេសចិនតែងតែប្រកាន់ខ្ជាប់នូវគោលនយោបាយការបរទេសឯករាជ្យ សន្តិភាព លើកកម្ពស់សន្តិភាព និងការអភិវឌ្ឍមនុស្សជាតិ និងជំរុញការបង្កើតឲ្យមានយុត្តិធម៌ និងសមធម៌ និងសណ្តាប់ធ្នាប់អន្តរជាតិប្រកបដោយការទទួលខុសត្រូវខ្ពស់។
ទាំងអស់នេះគឺបានឆ្លុះបញ្ចាំងនៅក្នុងករណីមួយចំនួន ដូចជាគំនិតផ្តួចផ្តើមគោលការណ៍ទាំង ៥ នៃការរួមរស់ដោយសន្តិភាពរួមគ្នាជាមួយប្រទេសជិតខាងជួយដោះស្រាយបញ្ហាអន្តរជាតិ និងក្នុងតំបន់ដូចជាបញ្ហានៅឧបទ្វីបកូរ៉េ បញ្ហាអាហ្វហ្គានីស្ថាន បញ្ហានុយក្លេអ៊ែរអ៊ីរ៉ង់ និងជំរុញការស្ថាបនាគំនិតផ្តួចផ្តើមខ្សែក្រវាត់ និងផ្លូវក៏ដូចជាសហគមន៍ជោគវាសនារួមសម្រាប់មនុស្សជាតិ។
ដោយត្រូវបានទទួលស្គាល់ និងកោតសរសើរកាន់តែច្រើន គំនិតផ្តួចផ្តើមរបស់ចិន និងយុទ្ធសាស្ត្របានក្លាយជាផ្នែកមួយដ៏សំខាន់នៃប្រព័ន្ធអភិបាលកិច្ចអន្តរជាតិ។
ក្នុងរយៈពេល ៧០ ឆ្នាំកន្លងមកនេះចំណងមិត្តភាពរវាងចិន-កម្ពុជាបានជម្នះរាល់ឧបសគ្គ និងបញ្ហាអន្ដរជាតិនានាដែលបានធ្វើឲ្យចំណងមិត្តភាពនេះកាន់តែរឹងមាំ និងសម្រេចបាននូវសមិទ្ធផលជាច្រើនគួរឱ្យកត់សម្គាល់។
ប្រទេសទាំង ២ មានជំហរស្របគ្នាខ្ពស់ក្នុងការប្រឆាំងនឹងការជ្រៀតជ្រែកពីបរទេស និងបន្តមាគ៌ានៃការអភិវឌ្ឍស្របតាមលក្ខខណ្ឌជាតិ។
យើងចែករំលែកគោលដៅតែមួយនៃការអភិវឌ្ឍសេដ្ឋកិច្ច និងលើកកម្ពស់ជីវភាពរស់នៅរបស់ប្រជាជន និងផលប្រយោជន៍រួមក្នុងការការពារសន្តិភាព និងស្ថិរភាពក្នុងតំបន់ និងការកសាងគំរូថ្មីនៃទំនាក់ទំនងអន្តរជាតិ។
ប្រទេសចិនបានវាយតម្លៃខ្ពស់ចំពោះរាជរដ្ឋាភិបាលកម្ពុជាដែលប្រកាន់ខ្ជាប់គោលការណ៍ចិនតែមួយដោយមិនងាករេ។
យើងរីករាយក្នុងការធ្វើការជាមួយភាគីកម្ពុជា ដើម្បីអនុវត្តកិច្ចព្រមព្រៀងសំខាន់ៗដែលបានសម្រេចដោយថ្នាក់ដឹកនាំនៃប្រទេសយើង ដូចជាគំនិតផ្តួចផ្តើម ខ្សែក្រវាត់ និងផ្លូវ និងយុទ្ធសាស្ត្រចតុកោណ ដោយរួមគ្នាកសាងសហគមន៍ជោគវាសនារួមជាមួយយុទ្ធសាស្ត្រដ៏មានសារៈសំខាន់ និងនាំមកនូវអត្ថប្រយោជន៍ជាក់ស្តែងបន្ថែមទៀតដល់ប្រទេស និងប្រជាជនទាំង ២។
កាសែតភ្នំពេញប៉ុស្តិ៍គឺជាកាសែតភាសាអង់គ្លេសធំបំផុតនៅក្នុងប្រទេសកម្ពុជាដែលមានអ្នកអានជាច្រើន។
ហើយខ្ញុំក៏ចង់ឆ្លៀតយកឱកាសនេះថ្លែងអំណរគុណដល់មិត្តអ្នកអានទាំងអស់ ដែលបានយកចិត្តទុកដាក់ និងគាំទ្រដល់ទំនាក់ទំនងរវាងចិន-កម្ពុជា។
ខ្ញុំរំពឹងថាកាសែតភ្នំពេញប៉ុស្តិ៍នឹងដើរតួនាទីកាន់តែធំនៅក្នុងការធ្វើឲ្យចំណងមិត្តភាពទ្វេភាគីកាន់តែស៊ីជម្រៅរវាងប្រជាជនចិន និងកម្ពុជា៕
