ការសិក្សាគឺជាមូលដ្ឋានគ្រឹះដ៏សំខាន់សម្រាប់សេដ្ឋកិច្ចរបស់ប្រទេសមួយ។ វាគឺជាធាតុដែលត្រូវពង្រឹងដើម្បីការរីកចម្រើនសម្រាប់មនុស្សជំនាន់ក្រោយនៅក្នុងសង្គម។ សាលាអន្តរជាតិកាណាដា (CIS) ភ្នំពេញគឺជាសាលាឈានមុខគេដែលផ្តល់ការសិក្សាគ្រប់ជ្រុងជ្រោយដល់សិស្សានុសិស្សនៅក្នុងប្រទេសកម្ពុជា។
លើសពីនេះទៀតសាលាអន្តរជាតិ CIS មានតុល្យភាពខ្ពស់ទាំងលើផ្នែករឹង និងផ្នែកទន់។ ផ្នែករឹងគឺសំដៅទៅលើគ្រឿងបរិក្ខារ ឧបករណ៍ និងសម្ភារសម្រាប់បង្រៀន ចំណែកឯផ្នែកទន់គឺសំដៅលើទេពកោសល្យនៃការបង្រៀន (គណៈគ្រប់គ្រង សាស្ត្រាចារ្យ) ដែលពោរពេញដោយជំនាញវិជ្ជាជីវៈ និងចក្ខុវិស័យខ្ពស់ក្នុងការបណ្តុះបណ្តាលសិស្ស។ សាលាអន្តរជាតិ CIS កំពុងស្ថិតនៅក្នុងដំណាក់កាលនៃការសាងសង់អគារទំនើប និងអគារមួយចំនួនទៀតដើម្បីត្រៀមសម្រាប់ការសិក្សាថ្នាក់វិទ្យាល័យ បន្ទាប់ពីសិស្សបញ្ចប់ការសិក្សានៅកម្រិតអនុវិទ្យាល័យ។ ចំពោះផ្នែកទន់ (កម្មវិធីសិក្សា) សម្រាប់សិស្សថ្នាក់វិទ្យាល័យ សាលា CIS កំពុងដំណើរការដាក់ពាក្យសុំកម្មវិធីសិក្សាស្តង់ដាអន្តរជាតិ International Baccalaureate (IB) ។
លោក Tony George អ្នកសម្របសម្រួលកម្មវិធីសិក្សា និងកម្មវិធី IB បានប្រាប់ភ្នំពេញប៉ុស្តិ៍ថា៖ «ខ្ញុំបានជួបគ្រូបង្រៀននៅសាកលវិទ្យាល័យនានា ហើយពួកគេសុទ្ធតែចាប់អារម្មណ៍ទៅនឹងកម្មវិធីសិក្សា IB ព្រោះវាជាកម្មវិធីសិក្សាអន្តរជាតិដែលអភិវឌ្ឍនិស្សិត និងបណ្តុះបណ្តាលសមត្ថភាពនិស្សិតក្នុងការទទួលខុសត្រូវលើឥរិយាបថ និងសុខុមាលភាពផ្ទាល់ខ្លួន»។
«កម្មវិធីនេះបើកផ្លូវដល់ការសិក្សាថ្នាក់ឧត្តមសិក្សាសម្រាប់សិស្សបញ្ចប់ការសិក្សានៅថ្នាក់វិទ្យាល័យ។ ផ្តោតលើការច្នៃប្រឌិត និងសេវាកម្មសិក្សា។ ផ្តល់ឱ្យសិស្សនូវសមត្ថភាពក្នុងការកំណត់អត្តសញ្ញាណ ការផ្លាស់ប្តូរដែលពួកគេចង់ធ្វើនៅក្នុងពិភពលោកនេះ»។
លោក Barry Squires នាយកសាលា CIS មានប្រសាសន៍ថា សាលា CIS ចង់ឲ្យសិស្សទទួលបានបទពិសោធនៃសេវាកម្មសិក្សានៅសាលា។ គ្រូបង្រៀនរបស់សាលា CIS នឹង ដាក់បញ្ហាឲ្យសិស្សចេះគិតឲ្យបានស៊ីជម្រៅ ដើម្បីស្វែងរកដំណោះស្រាយ។
លោកបញ្ជាក់ថា នៅពេលដែលសាលា CIS ទទួលបានភ្លើងខៀវពីស្ថាប័នមូលនិធិអប់រំអន្តរជាតិ IB ដើម្បីប្រើប្រាស់កម្មវិធីសិក្សា IB ពេលនោះសាលានឹងមានកម្មវិធីសិក្សាដែលទទួលស្គាល់ពីអន្តរជាតិចំនួន ២ គឺកម្មវិធី Alberta និង IB ។
«សាលារបស់យើងតែងតែផ្តោតលើបរិបទប្រទេសកម្ពុជាក្នុងការផ្តល់ការបណ្តុះបណ្តាល និងអប់រំដល់យុវជនជំនាន់ក្រោយឲ្យក្លាយជាអ្នកដឹកនាំនាពេលអនាគត»។
លោកបន្ថែមថា៖ «ក្នុងនាមយើងជាសាលាអន្តរជាតិ សិស្សក៏មានចម្រុះជាតិសាសន៍ដែរ ដូច្នេះយើងមានកម្មវិធីសិក្សា ២ ភាសានៅក្រោមកម្មវិធីសិក្សា Alberta គឺភាសាបារាំង និងចិន»។ លោក Squires ពន្យល់ថាកម្មវិធីសិក្សា ២ ភាសានេះផ្តល់ឱ្យសិស្សនូវឱកាសមួយដើម្បីរៀនភាសាកំណើតរបស់ពួកគេ។ ក្រៅពីថ្នាក់ភាសាបារាំង និងភាសាចិន សិស្សដែលបានចុះឈ្មោះចូលរៀនកម្មវិធីទាំងនេះក៏អាចរៀនអំពីការសិក្សាសង្គម និងវិទ្យាសាស្ត្រជាភាសាកំណើតរបស់ពួកគេផងដែរ។
លោក Squires មានប្រសាសន៍ថា៖ «យើងរក្សាទំហំថ្នាក់រៀនរបស់យើងឱ្យមានទំហំតូចល្មម សម្រាប់សិស្សចន្លោះពី ១៦ ទៅ ២១ នាក់សម្រាប់ថ្នាក់មួយ។ ធ្វើដូចនេះគឺអនុញ្ញាតឱ្យគ្រូអាចតាមដានសិស្សម្នាក់ៗបានល្អិតល្អន់។ សិស្សនៅសាលា CIS ក៏ត្រូវបានផ្តល់ឱកាសឲ្យរួមចំណែកដល់សង្គមតាមរយៈកម្មវិធីសេវាកម្មសហគមន៍ផងដែរ»។
លោក Squires និងលោក George មានមោទនភាពចំពោះកម្មវិធីសិក្សានេះ ពីព្រោះវាជាគំនិតផ្តួចផ្តើមដ៏ល្អសម្រាប់សិស្សដែលពួកគេអាចកត់សម្គាល់បញ្ហាសង្គម ចេះស្វែងរកដំណោះស្រាយ ចេះរៀបចំផែនការ និងសម្រេចចិត្តដោយខ្លួនឯង។
លោក George មានប្រសាសន៍ថាសិស្សបានធ្វើការជាមួយអង្គការក្រៅ រដ្ឋាភិបាលជាច្រើនសម្រាប់សេវាកម្មសហគមន៍របស់ពួកគេ ហើយត្រូវបានកោតសរសើរចំពោះការគិតប្រកបដោយភាពច្នៃប្រឌិតក្នុងការបង្កើតដំណោះស្រាយ ដើម្បីកសាងសង្គមមួយប្រកបដោយសុខុមាលភាព និងភាពរីករាយនៅក្នុងប្រទេសកម្ពុជា។
IB គឺជាមូលដ្ឋានគ្រឹះអប់រំអន្តរជាតិដែលមានទីស្នាក់ការនៅទីក្រុងហ្សឺណែវប្រទេសស្វ៊ីស។ វាផ្តល់នូវកម្មវិធីអប់រំចំនួន ៤ គឺកម្មវិធី IB Diploma Program កម្មវិធី IB Career-related Programme សម្រាប់សិស្សដែលមានអាយុពី ១៦ ដល់ ១៩ ឆ្នាំ, កម្មវិធី IB Middle Years Program សម្រាប់សិស្សដែលមានអាយុពី ១១ ដល់ ១៦ ឆ្នាំ និងកម្មវិធី IB Primary Years Programme សម្រាប់កុមារអាយុចាប់ពី ៣ ដល់ ១២ ឆ្នាំ។
ដើម្បីបង្រៀនកម្មវិធីទាំងនេះបានសាលារៀនត្រូវទទួលការអនុញ្ញាតពីកម្មវិធី International Baccalaureate ជាមុនសិន៕