រហូតមកដល់ចុងខែមករា កន្លងទៅថ្មីៗនេះ ក្រុមអ្នកជំនាញបានធ្វើការជួសជុលស្ពានជ្រោយចង្វារឡើងវិញ សម្រេចការងាររបស់ខ្លួនបានប្រមាណ ១១,៥១ ភាគរយ នៃគម្រោងទាំងមូល ដែលគ្រោងនឹងបញ្ចប់ក្នុងរយៈពេល ២៤ ខែ ដោយចាប់ផ្តើមពីចុងខែ កញ្ញា ឆ្នាំ ២០១៧ និងគ្រោងនឹងបញ្ចប់នៅចុងឆ្នាំ ២០១៩ ខាងមុខនេះ។
គម្រោងជួសជុលស្ពានជ្រោយចង្វារ ឡើងវិញនេះ ត្រូវចំណាយទឹកប្រាក់ចំនួន ៣០ លានដុល្លារ ដោយស្ថិតក្រោមជំនួយឥតសំណងរបស់រដ្ឋាភិបាល ជប៉ុន តាមរយៈទីភ្នាក់ងារប្រតិបត្តិការអន្តរជាតិជប៉ុន (JICA)។
កាលពីរសៀលថ្ងៃអង្គារ នាដើមសប្តាហ៍នេះ លោក SANTOSHI Adachi, Supervisor នៃក្រុមហ៊ុន Central (Consultant Services for The Project for Rehabilitation of the Chroy Changvar Bridge, Japanese Grant Aid Project) និងជាអ្នកគ្រប់គ្រងការដ្ឋានជួសជុលស្ពាននេះ បានថ្លែងតាមរយៈអ្នកបកប្រែភាសាថា មានកិច្ចការជាច្រើនដែលត្រូវអនុវត្តសម្រាប់ការដ្ឋានជួសជុលស្ពានប្រវត្តិសាស្ត្រមួយនេះ ហើយរាល់ការងារទាំងអស់នោះ គឺ«ត្រូវការបច្ចេកទេសត្រឹមត្រូវខ្ពស់ណាស់ រួមជាមួយនឹងសម្ភារឧបករណ៍ទំនើបផងដែរ»។
លោក Adachi បន្តថា អ្នកដែលមិនដឹងអំពីទំហំនៃការងារនេះគេតែងតែចោទសួរថា «ចុះគ្រាន់តែជួសជុលស្ពានសោះ ហេតុអ្វីត្រូវចំណាយពេលរហូតដល់ជាង ២០ ខែ?»។
ប៉ុន្តែផ្ទុយទៅវិញ ក្រុមអ្នកជំនាញ និងកម្មករដែលបំពេញការងារនេះផ្ទាល់គឺ «បារម្ភពីពេលវេលាខ្លីទៅវិញទេ»។
លោក ប៉ាល់ ឧត្តុង្គ (PAL Oudong Civil Engineer) វិស្វករសំណង់ស៊ីវិល នៃក្រុមហ៊ុន Central បានឲ្យដឹងថា បើនិយាយពីកម្លាំងពលកម្មសរុបនៅក្នុងការដ្ឋានមួយនេះគឺមានមនុស្សសរុបជាង ២៣០ នាក់ ក្នុងនោះមានកម្មករ ប្រចាំការនៅការដ្ឋានចំនួនជាង ១៣០ នាក់ រួមទាំងក្រុមអ្នកជំនាញជនជាតិជប៉ុនជាង ១០ នាក់ និងក្រៅពីនោះជាបុគ្គលិកធ្វើការនៅតាមការិយាល័យ និងផ្នែកពាក់ព័ន្ធនានា។
«សម្ភារជួសជុល និងឧបករណ៍ដែលបម្រើការ និងសម្រាប់ផ្គត់ផ្គង់ការដ្ឋានជួសជុលស្ពាននេះ គឺជារបស់ថ្មីទើបចេញពីរោងចក្រ ដោយនាំចូលមកពីប្រទេសជប៉ុនទាំងអស់» នេះបើតាមប្រសាសន៍របស់លោក ឧត្តុង្គ។ «មានគ្រឿងចក្រមួយចំនួន ដូចជាម៉ាស៊ីនស្ទូច និងម៉ាស៊ីន (កោស និងបាញ់ថ្នាំគឺជាបច្ចេកវិទ្យាថ្មីដែលទើបតែចេញប្រើនៅប្រទេស ជប៉ុន ហើយយើងក៏មានប្រើនៅទីនេះដែរ»។
លោក ឧត្តុង្គ បានបន្តថា ស្ពានជ្រោយចង្វារមានប្រវែងសរុប ៩៧១ ម៉ែត្រដោយចែកចេញជា ៣ ផ្នែកសំខាន់ៗផ្សេងគ្នា។ ក្នុងនោះផ្នែកទី ១ គម្រោងជួសជុលចុងស្ពាន និងផ្លូវថ្នល់ ទាំងសងខាងមានប្រវែង ២៥៨ ម៉ែត្រ, និងផ្នែកទី ២ ជាគម្រោងជួសជុលគល់ស្ពានប្រវែង ១៦៨ ម៉ែត្រ។ ចំណែកឯផ្នែកដ៏សំខាន់នោះ គឺតួស្ពានមានប្រវែង ៥៤៥ ម៉ែត្រ។
«នៅផ្នែកចុងស្ពាន និងតភ្ជាប់ផ្លូវថ្នល់នោះ គឺយើងរៀបចំសាជាថ្មីទាំងស្រុង គឺរួមទាំងគ្រឹះផ្លូវថ្នល់ និងគ្រឹះចុងស្ពាន ក៏ត្រូវខួងដាក់ជាគ្រឹះថ្មី» និងបច្ចេកវិទ្យាថ្មីដែរ នេះបើតាមប្រសាសន៍របស់លោក ឧត្តុង្គ។ «ការជួសជុលបែបនេះគឺប្រើរយៈពេលយូរមែន ប៉ុន្តែគុណភាពរបស់ស្ពានគឺរឹងមាំល្អណាស់ គឺដូចធ្វើថ្មីអ៊ីចឹង»។
គួររំឭកថា ក្នុងប្រវត្តិរបស់វាជាងកន្លះសតវត្សរ៍មកនេះស្ពានជ្រោយចង្វារបានធ្វើការជួសជុលជាលើកទី ២ ហើយ។ ស្ពានជ្រោយចង្វារបានសាងសង់ឡើងក្នុងឆ្នាំ ១៩៦៦ នាសម័យសង្គមរាស្ត្រនិយម។ ក្រោយមកស្ពាននេះត្រូវបានទាហានខ្មែរក្រហមដាក់មីនបំផ្ទុះកាត់ផ្តាច់នៅចំណុចពាក់កណ្តាលស្ពាន កាលពីសម័យសង្គ្រាមឆ្នាំ ១៩៧៣។ ចាប់ពីពេលនោះមកស្ពាននេះបានផ្អាកដំណើររហូតដល់ដើមទសវត្សរ៍ឆ្នាំ ១៩៩០។
រហូតមានការរៀបចំការបោះឆ្នោតដោយអ៊ុនតាក់ (UNTAC) នៅឆ្នាំ ១៩៩២ ទើបរដ្ឋាភិបាលជប៉ុន បានផ្តល់ថវិកា និងបច្ចេកទេសក្នុងលក្ខខណ្ឌជំនួយឥតសំណង ដើម្បីធ្វើការជួយជួសជុលតភ្ជាប់ស្ពាននេះឡើងវិញចាប់ពីឆ្នាំ ១៩៩២ និងត្រូវបានបើកសម្ភោធដាក់ឲ្យដំណើរការឡើងវិញនៅឆ្នាំ ១៩៩៥៕