.jpg)
កម្មកររបស់ CASC កំពុងរៀបចំកញ្ចប់ម្ហូបអាហារសម្រាប់ម្ហូបដាក់នៅលើយន្តហោះ។ ហេង ជីវ័ន
ប្រហែលមនុស្សមិនច្រើនទេ ដែលបានកត់សម្គាល់ពីទីតាំងរៀបចំអាហារមួយស្ថិតនៅក្នុងបរិវេណទំហំប្រមាណ ២ ពាន់ម៉ែត្រការេនៅម្ខាងផ្លូវទល់មុខនឹងអាកាសយានដ្ឋានអន្តរជាតិភ្នំពេញ។ ប៉ុន្តែនៅពេលដែលគេចូលកាត់មកតាមរបង គេនឹងបានឃើញរថយន្តដឹកទំនិញ សម្រាប់ដឹកជញ្ជូនគ្រឿងផ្គត់ផ្គង់ ជាពិសេសគឺអាហាររបស់ CASC សម្រាប់អ្នកដំណើរតាមផ្លូវអាកាសនៅព្រលានយន្តហោះនៅក្រុងភ្នំពេញ។
ក្រុមហ៊ុន Cambodia Air Catering Services Ltd (CACS) គឺជាអ្នកផ្គត់ផ្គង់ចំណីអាហារតែមួយគត់សម្រាប់អាកាសយានដ្ឋានអន្តរជាតិទាំងបីនៅកម្ពុជា។ ក្រុមហ៊ុននេះផ្គត់ផ្គង់នូវចំណីអាហារក្តៅ និងត្រជាក់ អាហារសម្រន់ ភេសជ្ជៈ ក៏ដូចជាបរិក្ខាប្រើប្រាស់ និងសម្ភារៈផ្ទះបាយផ្សេងៗ។
មិនមានអ្វីដែលគួរឲ្យភ្ញាក់ផ្អើលនោះទេដែលអនាម័យ គឺជាអទិភាពធំបំផុតរបស់ក្រុមហ៊ុន CACS។ មុនពេលចូលទៅក្នុងអគារ បុគ្គលិក និងភ្ញៀវត្រូវតែបានត្រួតពិនិត្យសុខភាពនៅការិយាល័យសន្តិសុខ។ បញ្ហាអនាម័យផ្ទាល់ខ្លួន សម្លៀកបំពាក់បែបឯកសណ្ឋានមន្ទីរពិសោធន៍ក៏ត្រូវបានត្រៀមសម្រិតសម្រាំងសម្រាប់ផ្លាស់ប្តូរជូន។
សន្លឹកក្រដាស កៅស៊ូកង និងលោហធាតុតូចៗនានាត្រូវបានគេហាមឃាត់មិនឲ្យយកចូលមកក្នុងកន្លែងរៀបចំ និងចម្អិនអាហារ។
ច្រករបៀងមួយនាំទៅរកបន្ទប់ Galley Setup ដែលជាកន្លែងដែលគេរៀបចំវេចខ្ចប់អាហារទាំងបីពេល អាហារសម្រន់ និងបង្អែម ត្រៀមដឹកយកទៅយន្តហោះ។ នៅបន្ទប់ចម្អិនអាហារក្តៅដែលនៅជិតនោះ ក្រុមចុងភៅកំពុងញាប់ដៃក្នុងការចម្អិនអាហារនៅក្នុងផ្ទះ មានពងទាចៀនអូមីឡែតខ្ចប់ប៉េងប៉ោះជាដើមដែលនឹងត្រូវបានផ្តល់ទៅឲ្យអ្នកដំណើរក្នុងយន្តហោះមួយសម្រាប់អាហារពេលព្រឹក។ នៅពេលដែលចម្អិនរួច អូមីឡែត និងអាហារដទៃទៀតនឹងត្រូវបានគេដាក់នៅក្នុងម៉ាស៊ីនធ្វើឲ្យត្រជាក់រហ័ស ដែលបច្ចុះសីតុណ្ហភាពមកត្រឹម ៥អស្សាសេរដោយត្រូវបានគេរក្សារហូតដល់ពេលកម្តៅសម្រាប់អ្នកដំណើរលើយន្តហោះ។
ក្រៅពីអាហារជាទូទៅក្រុមបុគ្គលិកក៏ត្រូវតែរៀបចំឈុតអាហារពិសេសដ៏ទៃទៀតស្របតាមគោលការណែនាំដ៏តឹងរឹងផងដែរ។ ជាទូទៅស្ទើតែគ្រប់ជើងហោះហើរទាំងអស់តែងតែមានអ្នកដំណើរមួយចំនួនដែលត្រូវការអាហារបួស អាហារហាឡាល់សម្រាប់អ្នកកាន់សាសនាឥស្លាម អាហារសម្រាប់អ្នកជម្ងឺទឹកនោមផ្អែម ឬឈុតអាហារសម្រាប់អ្នកដែលមានអាការៈប្រតិកម្មនឹងអាហារមួយចំនួន ដូចជា សណ្តែកដី ឬគ្រឿងសមុទ្រជាដើម។
នៅក្នុងបន្ទប់អាហារត្រជាក់ដែលនៅជិតនោះដែរមានផ្លែឈើស្រស់ និងការ៉េមត្រូវបានរក្សាទុកក្នុងទូទឹកកកយ៉ាងប្រុងប្រយ័ត្ន។ ក្រុមបុគ្គលិកនៅទីនោះកំពុងតែកាត់ផ្លែឈើជាដុំតូច មានទំហំ និងទម្រង់ដូចៗគ្នានឹងទៅតាមរូបថតណែនាំនៅលើជញ្ជាំង។
លោក Steve Callaghan អ្នកចាត់ការទូទៅរបស់ CACS ដែលមានបទពិសោធន៍ ៤ ឆ្នាំធ្វើការក្នុងសេវាកម្មផ្គត់ផ្គង់អាហារទៅដល់យន្តហោះនៅសហរដ្ឋអាមេរិក បានឲ្យដឹងថាការគ្រប់គ្រងគុណភាពគឺជាចំណុចដ៏សំខាន់មួយក្នុងការធ្វើធុរកិច្ចក្នុងវិស័យនេះ ហើយសូម្បីតែកំហុសដ៏តូចមួយមួយក៏អាចក្លាយទៅជាមហន្តរាយដ៏ធំបានដែរ សម្រាប់ក្រុមហ៊ុនដែលបម្រើអាហារទៅដល់អ្នកធ្វើដំណើរតាមផ្លូវអាកាសជាង ១,៧ លានអ្នកក្នុងមួយឆ្នាំ។
លោកថ្លែងថា៖ «យើងផ្តោតការប្រុងប្រយ័ត្នយ៉ាងខ្លាំងទៅលើគុណភាព គុណប្រមាណ សីតុណ្ហភាព និងសូម្បីតែចំណុចតូចបំផុត។ យើងពិនិត្យយ៉ាងម៉ត់ចត់ទៅលើវត្ថុធាតុដើមដូចជាសាច់ និងបន្លែ និងគ្រឿងទេសរបស់យើង ហើយយើងនឹងបញ្ជូនត្រឡប់ទៅវិញនូវអាហារទាំងឡាយណាដែលមិនល្អ ឬមានការខូចខាតណាមួយ»។
អស់រយៈពេលជាង ២០ ឆ្នាំកន្លងទៅក្រុមហ៊ុន CACS គឺជាក្រុមហ៊ុនតែមួយគត់នៅកម្ពុជាដែលផ្តល់សេវាផ្គត់ផ្គង់អាហារទៅដល់ក្រុមហ៊ុនអាកាសចរណ៍ក្នុងស្រុក និងអន្តរជាតិដែលមានយន្តហោះចុះចតនៅអាកាសយានដ្ឋាននៅរាជធានីភ្នំពេញ ខេត្តសៀមរាប និងក្រុងព្រះសីហនុ។
នៅឆ្នាំ ២០១៦ ក្រុមហ៊ុនយក្ស Gate Gourmet ដែលធ្វើពាណិជ្ជកម្មលើសេវាកម្មនេះដែរ ជាផ្នែកមួយរបស់សាជីវកម្ម Gategroup Holding AG ដែលមានមូលដ្ឋាននៅប្រទេសស្វីសបានទិញយកភាគហ៊ុន ៧០ ភាគរយនៃភាគហ៊ុនរបស់ CACS។
លោក Callaghan បន្ថែមថាការផ្គត់ផ្គង់អាហារទៅកាន់យន្តហោះតម្រូវឲ្យមានការអនុវត្តយ៉ាងខ្ជាប់ខ្ជួនទៅតាមស្តង់ដារអនាម័យអន្តរជាតិដូចជា ISO និង HACCP ក៏ដូចជាវិញ្ញាបនបត្រពីក្រសួងសុខាភិបាល និងវិញ្ញាបនបត្របញ្ជាក់ពីការអនុវត្តការរៀបចំអាហារតាមបែបហាឡាល់។ ស្របជាមួយគ្នានោះដែរ ក្រុមហ៊ុនត្រូវតែអនុវត្តតាមសេចក្តីណែនាំរបស់ក្រុមហ៊ុនហោះហើរដែលជាអតិថិជន ដែកចង់បានការបម្រើដ៏ល្អបំផុតសម្រាប់អតិថិជនរបស់ខ្លួនផងដែរ។
លោកបន្តថា៖ «យើងតែងតែមានអ្នកចុះមកត្រួតពិនិត្យពីក្រសួង និងអតិថិជនរបស់យើង។ ប្រសិនជាមានអ្វីមិនល្អកើតឡើងចំពោះអាហារដែលយើងបម្រើ មានន័យថាគឺជាបញ្ហាដ៏ធំសម្រាប់យើង។ ក៏ប៉ុន្តែក្នុងបណ្តាឆ្នាំកន្លងទៅយើងបានទទួលតែការរាយការណ៍ពីបញ្ហាតែប៉ុន្មានករណីតែប៉ុណ្ណោះ»។
ការចម្អិនម្ហូបអាហារដ៏មានរសជាតិអាចជារឿងមួយធម្មតាសម្រាប់ចុងភៅទូទៅ ក៏ប៉ុន្តែការរៀបចំអាហារសម្រាប់មនុស្សរាប់ពាន់នាក់នៅលើលំហអាកាសមិនមែនជារឿងងាយស្រួលឡើយសម្រាប់លោក ជួន សុខហេង ជាមេចុងភៅរបស់ CACS។ ជាមួយនឹងបទពិសោធន៍ ២២ ឆ្នាំបម្រើការនៅក្នុងសណ្ឋាគារផ្កាយប្រាំជាច្រើនដូចជាសណ្ឋាគារ Raffles សណ្ឋាគារសុខា និងមណ្ឌលកំសាន្ត NagaWorld ព្រមទាំងបានទទួលការបណ្តុះបណ្តាលនៅប្រទេសជប៉ុន និងសិង្ហបុរីផងដែរលោកបានទទួលស្គាល់ថា ការងាកមកការរៀបចំអាហារសម្រាប់អ្នកដំណើរលើយន្តហោះ មិនមែនជារឿងងាយស្រួលនោះទេ។
លោក សុខហេង ពន្យល់ថា៖ «នៅសណ្ឋាគារ យើងចម្អិនអាហារក្តៅ ហើយអតិថិជនក៏ទទួលទានអាហារក្តៅៗដែរ។ ក៏ប៉ុន្តែនៅទីនេះ ទោះបីយើងចម្អិនក្នុងវិធីតែ មួយយើងត្រូវរក្សាទុកអាហារនៅសីតុណ្ហភាពមួយថេរ ហើយនៅពេលដែលវាត្រូវបានកម្តៅម្តងទៀតមុនពេលលើកទោឲ្យអ្នកទទួលទាន ជាការពិតណាស់វានឹងបាត់បង់រសជាតិឆ្ងាញ់មួយកម្រិត»។
«ទោះបីជាយ៉ាងណាយើងកំពុងតែខិតខំឲ្យបានល្អតាមតែអាចធ្វើទៅបានដើម្បីធានាថា អ្នកធ្វើដំណើរចូលចិត្តអាហាររបស់យើង តាមរយៈការធ្វើការយ៉ាងជិតស្និទ្ធជាមួយនឹងអតិថិជនរបស់យើងដើម្បីបង្កើតនូវអាហារដែលត្រូវនឹងថវិការរបស់យកគេ»។
បច្ចុប្បន្ននេះ CACS មានអតិថិជនប្រចាំចំនួន ១៩ ដែលរួមបញ្ចូលនូវក្រុមហ៊ុនអាកាសចរណ៍ធំដូចជា Emirate និង ANA។ បុគ្គលិករបស់ក្រុមហ៊ុនរៀបចំអាហារជិត ៣ ពាន់ពេលក្នុងមួយថ្ងៃនៅក្រុងភ្នំពេញ និង ២ ពាន់ពេលទៀតនៅខេត្តសៀមរាប។
តាមការឲ្យដឹងរបស់លោក Callaghan ចំណូលរបស់ CACS បានកើនឡើងពី ៨ លានដុល្លារនៅឆ្នាំ ២០១៦ មកដល់ ១៤ លានដុល្លារនៅឆ្នាំ ២០១៧។ ទោះជាយ៉ាងណាលោកបានទទួលស្គាល់ថាតួលេខនេះគួរតែខ្ពស់ជាងនេះ។ ទោះបីជាមានតែ CACS តែមួយក្នុងអនុវិស័យសេវាកម្មម្ហូបអាហារលើយន្តហោះ ក្រុមហ៊ុនមិនបានផ្តល់សេវាកម្មទៅដល់ក្រុមយន្តហោះរបស់ក្រុមហ៊ុនអាកាសចរណ៍ទាំងអស់នៅកម្ពុជាឡើយ។
ក្រុមហ៊ុនហោះហើរមួយចំនួនមានផ្នែករៀបចំអាហាររបស់ខ្លួនឯង ខណៈមួយចំនួនមានអាហារយកមកពីប្រទេសរបស់ខ្លួនសម្រាប់ការហោះហើរចេញទៅវិញ។
លោក Callaghan និយាយថា៖ «ក្រុមហ៊ុនហោះហើរមួយចំនួនមានផ្នែករៀបចំអាហាររបស់ខ្លួនផ្ទាល់ ពីព្រោះពួកគេចង់សំចៃការចំណាយ ជាពិសេសលើការដឹកជញ្ជូន។ ជាមួយនឹងបញ្ហាប្រឈម យើងបាត់បង់ចំណូលបន្ថែម យ៉ាងហោចណាស់ ១០ លានដុល្លារក្នុងមួយឆ្នាំ»។
លោកបន្តថាបញ្ហាប្រឈមមួយទៀតគឺទំហំថវិការដែលក្រុមហ៊ុនអាកាសចរណ៍យល់ព្រមចំណាយសម្រាប់អាហាររបស់អ្នកធ្វើដំណើរ។
លោកនិយាយថា៖ «នៅពេលដែលគេចាប់ផ្តើមបាត់បង់ ឬខាតចំណូល ការកាត់បន្ថយចំណាយដែលគេមើលឃើញមុនគេគឺ អាហារ»។ លោកបន្ថែមទៀតថា កត្តានោះនឹងប៉ះពាល់ទៅដល់បរិមាណ និងគុណភាពអាហារដែល CACS ផ្តល់ឲ្យដែលត្រូវបានបម្រើនៅពេលហោះហើរ៕
