.jpg)
លោក Lee Shueng Yuen នាយកប្រតិបត្តិការិយាល័យពាណិជ្ជកម្ម និងសេដ្ឋកិច្ចហុងកុង (HKETO) មានមូលដ្ឋាននៅទីក្រុងបាងកក បានគូសបញ្ជាក់ពីរបៀបដែលមជ្ឈមណ្ឌលហិរញ្ញវត្ថុអន្តរជាតិសំខាន់ៗបានរួមចំណែកដល់សេដ្ឋកិច្ចកម្ពុជា។
១) តើ HKETO ទទួលបានជោគជ័យយ៉ាងដូចម្តេច ក្នុងការពន្លឿនពាណិជ្ជកម្ម និងការវិនិយោគមកប្រទេសកម្ពុជា ក្នុងរយៈពេលជាច្រើនឆ្នាំមកនេះ?
ការិយាល័យ HKETO នៅទីក្រុងបាងកកត្រូវបានបង្កើតឡើងនៅខែកុម្ភៈ ឆ្នាំ ២០១៩។ វាគឺជាការិយាល័យថ្មីបំផុត និងទី១៣ នៅបរទេស ដែលតំណាងឱ្យរដ្ឋាភិបាលនៃតំបន់រដ្ឋបាលពិសេសហុងកុង។ បេសកកម្មរបស់យើង គឺដើម្បីសម្រួលដល់ការអភិវឌ្ឍទំនាក់ទំនងទ្វេភាគីរវាងហុងកុង និងកម្ពុជា និងប្រទេសចំនួនបីទៀត ដែលនៅក្បែរនោះគឺមានប្រទេសថៃ មីយ៉ាន់ម៉ា និងបង់ក្លាដេស ដើម្បីនាំយកកិច្ចសហប្រតិបត្តិការរបស់ហុងកុងជាមួយប្រទេសទាំងនេះឲ្យទៅដល់កម្ពស់ និងទិសដៅថ្មី។
នៅឆ្នាំ ២០១៩ ទំហំពាណិជ្ជកម្មទ្វេភាគីរវាងហុងកុង និងកម្ពុជាសម្រេចបាន ១,២ ពាន់លានដុល្លារអាមេរិក។ បើធៀបនឹងឆ្នាំ ២០១៦ មានការកើនឡើង ៤,៣ ភាគរយ។ ទាក់ទងនឹងបញ្ហានេះ យើងកំពុងធ្វើការយ៉ាងជិតស្និទ្ធជាមួយក្រសួងពាណិជ្ជកម្មកម្ពុជា សម្រាប់ការផ្តល់សច្ចាប័នលើកិច្ចព្រមព្រៀងពាណិជ្ជកម្មសេរីអាស៊ាន-ហុងកុង ផ្តល់ដោយកម្ពុជា។
ដោយឡែកហុងកុង និងកម្ពុជា បានចុះហត្ថលេខាលើកិច្ចព្រមព្រៀងជៀសវាងការយកពន្ធត្រួតគ្នា កាលពី ខែមិថុនា ឆ្នាំ ២០១៩ ដើម្បីជំរុញការវិនិយោគ និងពាណិជ្ជកម្មទ្វេភាគីបន្ថែមរវាងភាគីទាំង ២។
២) តើសហគ្រិនហុងកុងមានទស្សនៈបែបណា ចំពោះសេដ្ឋកិច្ចកម្ពុជា?
យោងតាមក្រុមប្រឹក្សាអភិវឌ្ឍន៍កម្ពុជា, ហុងកុង គឺជាអ្នកវិនិយោគបរទេសដ៏សំខាន់មួយនៅក្នុងប្រទេសកម្ពុជា។ ក្នុងឆ្នាំ ២០១៩ ហុងកុងជាវិនិយោគិនបរទេសធំទី២ របស់កម្ពុជា ដែលមានទឹកប្រាក់វិនិយោគ ៩១៣ លានដុល្លារអាមេរិក។ សហគ្រិនហុងកុងទាំងនោះ បានវិនិយោគលើវិស័យអាជីវកម្មផ្សេងៗគ្នានៅកម្ពុជា រួមមាន វាយនភណ្ឌ និងសម្លៀកបំពាក់ សណ្ឋាគារ សំណង់ លក់រាយ និងវិស័យដឹកជញ្ជូន។
៣) តើកម្ពុជាអាចពឹងផ្អែកលើហុងកុងដូចម្តេច ខណៈហុងកុងត្រូវបានគេស្គាល់ថា ជាមជ្ឈមណ្ឌលពាណិជ្ជកម្ម និងហិរញ្ញវត្ថុពិភពលោក ដែលជាច្រកសម្រាប់ពាណិជ្ជកម្ម និងការវិនិយោគ?
ហុងកុងផ្តល់នូវគុណប្រយោជន៍ពិសេសសម្រាប់ក្រុមហ៊ុនកម្ពុជា ព្រោះថាវាជាច្រកចូលប្រទេសចិន ដែលមានភាពងាយស្រួល និងមានសុវត្ថិភាពបំផុត។ វាមានអត្ថប្រយោជន៍តែមួយ គឺគោលការណ៍ “ប្រទេសមួយប្រព័ន្ធ ២” នៅហុងកុង។ តាមរយៈកិច្ចព្រមព្រៀងពាណិជ្ជកម្មសេរីរបស់យើងជាមួយប្រទេសចិន ក្រុមហ៊ុននៅហុងកុងរួមទាំងក្រុមហ៊ុនកម្ពុជាផងដែរ ប្រសិនបើពួកគេត្រូវបានបង្កើតឡើងនៅហុងកុង ពួកគេរីករាយនឹងការចូលទៅកាន់ទីផ្សារកាន់តែច្រើន និងងាយស្រួល។
៤) ជំងឺកូវីដ ១៩ នៅតែបន្តជះឥទ្ធិពលដល់សេដ្ឋកិច្ច និងពាណិជ្ជកម្មសកល។ តើការផ្ទុះឡើងជំងឺនេះ មានឥទ្ធិពលប៉ះពាល់ធ្ងន់ធ្ងរទៅលើទំនាក់ទំនងពាណិជ្ជកម្មរវាងហុងកុង និងកម្ពុជាឬទេ?
នៅពេលមានជំងឺរាតត្បាតកូវីដ ១៩ បានបង្កឱ្យមានការលំបាកសម្រាប់ការប្រាស្រ័យទាក់ទងទល់មុខគ្នា ប៉ុន្តែវាមិនមានឧបសគ្គសម្រាប់ការបន្តកិច្ចសហប្រតិបត្តិការអាជីវកម្មរវាងហុងកុង និងកម្ពុជាទេ។
ឧទាហរណ៍ រដ្ឋមន្ត្រីក្រសួងសេដ្ឋកិច្ចមកពីប្រទេសសមាជិកអាស៊ានទាំង ១០ និងហុងកុងនៃប្រទេសចិន (HKC) នៅថ្ងៃទី ២៨ ខែ សីហា ឆ្នាំ ២០២០ បានបើកកិច្ចប្រជុំតាមប្រព័ន្ធវីដេអូសម្រាប់ពិគ្រោះយោបល់សម្រាប់កិច្ចប្រជុំ (Fourth Asean Economic Minister-HKC Consultations) លើកទី៤ និងបានព្រមព្រៀងលើកកម្ពស់ទំនាក់ទំនងសេដ្ឋកិច្ចរវាងហុងកុងនៃប្រទេសចិន និងអាស៊ាន រួមមានទាំងប្រទេសកម្ពុជា ដែរ, តាមរយៈការប្រើប្រាស់កិច្ចព្រមព្រៀងពាណិជ្ជកម្មសេរី Asean-HKC Free Trade Agreement និងកិច្ចព្រមព្រៀង Asean-HKC Investment agreement។
៥) តើហុងកុងអាចរួមចំណែកអ្វីខ្លះក្នុងការអភិវឌ្ឍន៍ប្រទេសកម្ពុជា ឧទាហរណ៍ការធ្វើផែនការទីក្រុង និងហេដ្ឋារចនាសម្ព័ន្ធ?
សហគ្រាស និងអ្នកជំនាញហុងកុង បានរួមចំណែកក្នុងការអភិវឌ្ឍប្រទេសកម្ពុជា តាមរយៈគំនិតផ្តួចផ្តើមផ្លូវមួយខ្សែក្រវាត់មួយ ដែលផ្តល់នូវឱកាសជាច្រើនសម្រាប់កិច្ចសហប្រតិបត្តិការទៅវិញទៅមក និងការសហការគ្នា។ ដោយផ្អែកទៅលើគុណសម្បត្តិពិសេសជាច្រើន ក្នុងនាមជាមជ្ឈមណ្ឌលហិរញ្ញវត្ថុអន្តរជាតិ និងមានអ្នកជំនាញច្រើនដែលប្រតិបត្តិការក្រោមស្តង់ដារអន្តរជាតិ ទីក្រុងហុងកុង គឺជាទីតាំងដ៏ល្អបំផុត ដើម្បីក្លាយជាវេទិកាផ្តល់នូវសេវាកម្មជំនាញ ក៏ដូចជាជួយសម្រួលដល់លំហូរមូលធន និងគម្រោងហិរញ្ញប្បទាន៕
