កាសែត VIENTIANE (Vientiane Times/ANN) ៖ ប្រទេសអូស្ត្រាលី និងសហភាពអឺរ៉ុបបញ្ជាក់ជំហរជាថ្មីលើការប្តេជ្ញារបស់ខ្លួនក្នុងការជួយដល់វិស័យអប់រំនៅក្នុងប្រទេសឡាវ តាមរយៈកម្មវិធីសិក្សា Basic Education Quality and Access in Laos Programme ហៅកាត់ BEQUAL។
ក្រោមកម្មវិធីដែលមានទំហំទឹកប្រាក់ជំនួយ ៦៤ លានដុល្លារអាមេរិក រដ្ឋាភិបាលប្រទេសអូស្ត្រាលីកំពុងចាប់ដៃគូជាមួយក្រសួងអប់រំ យុវជន និងកីឡា ប្រទេសឡាវព្រមទាំងសហភាពអឺរ៉ុប ដើម្បីជួយដល់កុមារពិសេសកុមារដែលងាយនឹងរងគ្រោះដើម្បីពង្រឹងគុណភាពវិស័យអប់រំថ្នាក់បឋមសិក្សា កាត់បន្ថយអត្រាអនក្ខរកម្មយល់ដឹងពីគណិតវិទ្យា និងជំនាញក្នុងជីវិតរស់នៅប្រចាំថ្ងៃផ្សេងៗទៀត។
ការប្តេជ្ញានេះត្រូវបានលើកឡើងកាលពីសប្តាហ៍មុននៅពេលដែលអគ្គនាយករងផ្នែកបេសកកម្មរបស់ប្រទេសអូស្ត្រាលីគឺលោក Andreas Zurbrugg និងនាយកផ្នែកសហប្រតិបត្តិការរបស់សហភាពអឺរ៉ុបគឺលោក Bryan Fornari បានចុះទៅធ្វើទស្សនកិច្ចនៅខេត្ត Luang Namtha និង Oudomxay ដើម្បីធ្វើការពិនិត្យតាមដាន និងលើកកម្ពស់កម្មវិធីអប់រំនៅទីនោះផងដែរ។
ក្នុងអំឡុងដំណើរទស្សនកិច្ចរបស់អស់លោកទៅកាន់ខេត្តទាំង ២ នេះចាប់ពីថ្ងៃទី ២៣ ដល់ថ្ងៃទី ២៦ ខែមេសា ឆ្នាំ ២០១៨ កន្លងមកមន្ត្រីបរទេសទាំង ២ រូបនេះបានទទួលការស្វាគមន៍អមដំណើរដោយមន្ត្រីរដ្ឋាភិបាលមកពីក្រសួងអប់រំ យុវជន និងកីឡា និងក្រសួងផ្នែកគម្រោង និងវិនិយោគផងដែរ។
គណៈប្រតិភូទាំងអស់បានពិភាក្សាគ្នាអំពីដំណើរការលូតលាស់ក្នុងវិស័យអប់រំ ព្រមទាំងឧបសគ្គពាក់ព័ន្ធនានាផងដែរ។
លោក Zurbrugg បានថ្លែងថា៖ «ប្រទេសអូស្ត្រាលីមានក្តីសោមនស្សក្រៃលែងក្នុងឱកាសចាប់ដៃគូសហការជាមួយក្រសួងអប់រំ យុវជន និងកីឡា ប្រទេសឡាវ ដើម្បីជួយដល់វិស័យអប់រំកម្រិតបឋមសិក្សាក្នុងខេត្តធំៗទាំង ២ នេះ»។
«ការវិនិយោគលើកុមារងាយរងគ្រោះដែលរួមមានទាំងកុមារាពិការផងនោះនឹងជួយឲ្យប្រទេសឡាវអាចសម្រេចគោលដៅអភិវឌ្ឍសេដ្ឋកិច្ចសង្គមបានដោយជោគជ័យ»។
លោក Fornari ថ្លែងថា៖ «គុណភាពរបស់គ្រូបង្រៀនគឺជាកត្តាមួយដ៏សំខាន់ក្នុងការជំរុញឲ្យការសិក្សារបស់សិស្សទទួលបានជោគជ័យ។ យើងមានក្តីរីករាយយ៉ាងខ្លាំងក្នុងការចាប់ដៃគូសហការជាមួយប្រទេសអូស្ត្រាលី និងក្រសួងអប់រំ យុវជន និងកីឡាតាមរយៈការផ្តល់ជំនួយអភិវឌ្ឍន៍សមត្ថភាពដល់គ្រូបង្រៀន និងការបណ្តុះបណ្តាលដល់សិស្សានុសិស្សជនជាតិភាគតិចដែលនឹងក្លាយជាគ្រូបង្រៀនតាមតំបន់ដាច់ស្រយាល»។
ដំណើរទស្សនកិច្ចនេះក៏រួមមាននូវការធ្វើដំណើរទៅកាន់សាកលវិទ្យាល័យបណ្តុះបណ្តាលគ្រូបង្រៀន (TTC) ក្នុងខេត្ត Luang Namtha ដែលប្រទេសអូស្ត្រាលី និងសហភាពអឺរ៉ុបបានផ្តល់អាហារូបករណ៍ចំនួន ១០២ កន្លែងសម្រាប់គ្រូបង្រៀនមកពីភូមិដាច់ស្រយាល រួមមានទាំងគ្រូបង្រៀនភេទស្រីចំនួន ៥៦ នាក់ និងការបណ្តុះបណ្តាលលើការបង្រៀនសម្រាប់សាស្ត្រាចារ្យផងដែរ។
គ្រូបង្រៀនតំបន់ដាច់ស្រយាលចំនួន ៦៤ នាក់នឹងបញ្ចប់ការសិក្សាពីសាកលវិទ្យាល័យនេះហើយនឹងត្រូវបានបញ្ជូនទៅកាន់ភូមិកំណើតរបស់ពួកគេវិញក្នុងខែកញ្ញានាពេលខាងមុខនេះ។
លោក Zurbrugg និងលោក Fornari បានចូលរួមជាមួយអាជ្ញាធរថ្នាក់ខេត្តក្នុងពិធីបើកសម្ពោធជាផ្លូវការនូវចង្ក្រានបាយថ្មី និងបន្ទប់ទឹកនៅសាកលវិទ្យាល័យ TTC នេះ។
នៅខេត្ត Luang Namtha គណៈប្រតិភូទាំងអស់ក៏បានចុះទៅពិនិត្យមើលសាលាបឋមសិក្សា និងសហគមន៍ដែលបានបញ្ជូនកូនៗមករៀននៅសាលានេះ ដើម្បីនឹងដាក់ចេញនូវកម្មវិធីសិក្សាសាកល្បងព្រមទាំងគ្រូបង្រៀនដែលនឹងបញ្ចប់ការបណ្តុះបណ្តាលក្នុងពេលឆាប់ៗខាងមុខនេះក្នុងអំឡុងពេលហ្វឹកហាត់នៅស្រុក Sing។
ពួកគេក៏បានចុះពិនិត្យបណ្ណាល័យជាតិ Luang Namtha National Library ផងដែរដែលកំពុងដាក់ចេញនូវការអនុវត្តលើការចងក្រងឯកសារទាក់ទងនឹងរឿងរ៉ាវក្នុងតំបន់ចាប់ពីសហគមន៍ Lenten និង Yao ផងដែរ ដើម្បីបង្កើតនូវបណ្ណាល័យឌីជីថលជាលក្ខណៈវីដេអូ និងមានសំឡេងព្រមទាំងឯកសារបោះពុម្ព និងសម្ភារឯកសារសិក្សាអនឡាញដើម្បីជួយដល់ការពង្រឹងអក្ខរកម្មផងដែរ។
ក្នុងអំឡុងពេលចុះទស្សនកិច្ចខេត្ត Oudomxay លោក Zurbrugg បានប្រកាសអំពីជំនួយដែលត្រូវបានពន្យារសុពលភាពជាថ្មីជាមួយនឹងទឹកប្រាក់ ១ លានដុល្លារអូស្ត្រាលីសម្រាប់កម្មវិធីសុខភាពពិភពលោក ដើម្បីជួយដល់សហគមន៍ដែលងាយរងគ្រោះនៅក្នុងប្រទេសឡាវ ហើយជួយដល់ការផ្តល់អាហារនៅតាមសាលា និងបង្កើនការយល់ដឹងរបស់ពួកគេឲ្យកាន់តែល្អប្រសើរចំពោះបញ្ហានៃការផ្លាស់ប្តូរអាកាសធាតុ។
គណៈប្រតិភូទាំងអស់ក៏បានចុះទស្សនកិច្ចនៅក្នុងស្រុក Namor ស្រុក Beng និងស្រុក Houn ផងដែរ ដើម្បីឃ្លាំមើលអំពីសកម្មភាពផ្សេងៗតាមសាលារៀនក្នុងការពង្រឹងគុណភាពនៃការរៀននៅក្នុងថ្នាក់ និងការបង្រៀន ការលើកកម្ពស់ការអាន និងការអនុវត្តនូវរបៀបរបបរក្សាអនាម័យផងដែរ៕
News Desk