The Phnom Penh Post Search

Search form

Logo of Phnom Penh Post newspaper Phnom Penh Post - អ្នក​ធ្វើ​ប្លុក​វីដេអូ កំពុង​ព្យាយាម​បង្កើន​ប្រជាប្រិយភាព​លើ​គេហទំព័រ YouTube




អ្នក​ធ្វើ​ប្លុក​វីដេអូ កំពុង​ព្យាយាម​បង្កើន​ប្រជាប្រិយភាព​លើ​គេហទំព័រ YouTube

Content image - Phnom Penh Post
លោក Van Zakolin ថតរូប​អនុស្សាវរីយ៍​នៅ​ពី​មុខ​ប្រាសាទ​កោះកេរ្តិ៍​។ រូបថត សហការី

អ្នក​ធ្វើ​ប្លុក​វីដេអូ កំពុង​ព្យាយាម​បង្កើន​ប្រជាប្រិយភាព​លើ​គេហទំព័រ YouTube

កំណត់​ហេតុ​វីដេអូ ឬ Vlogging គឺ​នៅ​តែ​ជា​គំនិត​មួយ​ដែល​ថ្មី​សន្លាង​នៅ​ក្នុង​ប្រទេស​កម្ពុជា ប៉ុន្តែ​មធ្យោបាយ​នៃ​ការថត និង​ការ​ចែករំលែក​ត្រូវ​បាន​រីក​លូតលាស់​ជាក់ស្តែង​តាម​ប្រជាប្រិយភាព​របស់​វា ខណៈ​ពេល​ដែល​យុវជន​មួយ​ចំនួន​ព្យាយាម​ស្វែងរក​វិធី​ថ្មីៗ និង​ប្រកប​ដោយ​ភាព​ច្នៃប្រឌិត​ដើម្បី​ចែករំលែក​អំពី​បទពិសោធ​ជីវិត និង​ដំណើរ​ផ្សងព្រេង​របស់​ខ្លួន​។

អ្នក​ផលិត​ខ្សែ​ភាពយន្ត​ម្នាក់​វ័យ​ ២៣ ​ឆ្នាំ​លោក ជុង សៀវភីន គឺជា​អ្នក​ចំណូល​ថ្មី​ក្នុង​ការ​ធ្វើ​កំណត់​ហេតុ​វីដេអូ​នេះ​ប្លុក​វីដេអូ​របស់​គាត់​បាន​ចាប់​ផ្តើម​សាកល្បង និង​ផ្តិត​យក​បទពិសោធ​ជីវិត​របស់​ខ្លួន​ផ្ទាល់​ទៅ​កាន់​ពិភពលោក​តាមរយៈ​ប្រព័ន្ធ​អ៊ីនធឺណិត​កាល​ចុង​ឆ្នាំ​ ២០១៦ ​នេះ​។

ឥឡូវ​នេះ​លោក សៀវភីន បង្ហោះ​វីដេអូ​របស់​ខ្លួន​ជា​ទៀងទាត់​នៅ​លើ​គេហទំព័រ YouTube របស់​លោក​ដែល​ត្រូវ​បាន​គេ​ស្គាល់​ឈ្មោះ​ថា​ដើរលេង សន្តិភាព «Peace Derleng»​។

លោក សៀវភីន បាន​និយាយ​ថា៖ «​ខ្ញុំ​រីករាយ​នឹង​ការ​ចែករំលែក​កំណត់​ហេតុ​វីដេអូ​ដើរ​លេង​ផ្ទាល់​ខ្លួន​របស់​ខ្ញុំ​ដើម្បី​ផ្សព្វផ្សាយ​ពី​ទីតាំង​រមណីយដ្ឋាន​ដែល​ខ្ញុំ​បាន​ទៅ​ដល់​ចែករំលែក​សាច់​រឿង និង​ការ​គិត​របស់​ខ្ញុំ​ដែល​អាច​ជា​ប្រយោជន៍​របស់​អ្នក​ទស្សនា​ផង​ដែរ​»​។

លោក​បាន​បន្ថែម​ថា​គំនិត​ដំបូង​ដែល​លោក​បាន​ចាប់ផ្តើម​កំណត់​ហេតុ​វីដេអូ​នេះ​ដើម្បី​បង្ហាញ​ទស្សនិកជន​របស់​លោក​អំពី​ដំណើរ​ផ្សងព្រេង​សប្បាយៗ​របស់​ខ្លួន​ជាមួយ​មិត្តភក្តិ​តែ​ប៉ុណ្ណោះ​»​។

«​វា [vlogging] បាន​ចងក្រង​ពេលវេលា និង​អនុស្សាវរីយ៍​ដែល​ខ្ញុំ និង​មិត្តភក្តិ​របស់​ខ្ញុំ​មាន​ភាព​សប្បាយ​រីករាយ បើ​ទោះបី​ខ្ញុំ​មិន​ទាន់​បាន​ក្លាយ​ជា​អ្នក​ធ្វើ​កំណត់ហេតុ​វីដេអូ​ប្រចាំ​ថ្ងៃ​នៅ​ឡើយ​ក៏ដោយ​»​។

ក្នុង​នាម​ជា​អ្នក​ធ្វើ​ដំណើរ​ផ្សងព្រេង​ដ៏ញឹកញាប់​ម្នាក់​លោក សៀវភីន បាន​ប្រាប់​ថា​លោក​មិន​បាន​ប្រកាន់​ខ្ជាប់​តាម​កាលវិភាគ​ពេលវេលា​ក្នុង​ការ​ធ្វើ​កំណត់ហេតុ​វីដេអូ​ជាក់លាក់​ណា​មួយ​នោះ​ឡើយ​ដោយ​លោក​ចូលចិត្ត​ផ្តោត​ទៅ​លើ​ការ​ធ្វើ​វីដេអូ​របស់​ខ្លួន​ដែល​មាន​លក្ខណៈ​បែប​ធម្មជាតិ​បំផុត​។

ដោយ​មាន​ចំនួន​អ្នក​ទស្សនា​តាមដាន​គេហទំព័រ YouTube ជាង​ ១៧,០០០ ​នាក់​លោក សៀវភីន ជា​ទៀងទាត់​ទទួល​បាន​ការ​ទស្សនា​វីដេអូ​របស់​គាត់​ច្រើន​ជាង ១០,០០០ ​ដង​ដែល​ចូល​មើល​វីដេអូ​ដំណើរ​ផ្សងព្រេង​របស់​លោក​នៅ​ទីកន្លែង​រមណីយដ្ឋាន​ផ្សេងៗ​នៃ​ប្រទេស​កម្ពុជា​។

Content image - Phnom Penh Post
លោក Sievphin Chong ថតរូប​អនុស្សារីយ៍​នៅ​ទឹកជ្រោះ​ល្បាក់ខោន​។ រូបថត សហការី

តាមរយៈ​កំណត់​ហេតុ​វីដេអូ​ដែល​លោក​បាន​ចាត់​ទុក​ថា​ជា​មធ្យោបាយ​និទាន​រឿង​មួយ​លោក សៀវភីន បាន​និយាយ​ថា​លោក​ផ្តល់​នូវ​ក្តីសង្ឃឹម​លើក​ទឹកចិត្ត​ដល់​អ្នក​ធ្វើ​កំណត់ហេតុ​វីដេអូ​ជំនាន់​ក្រោយ​ផ្សេង​ទៀត​នៅ​ប្រទេស​កម្ពុជា​។

លោក​បាន​បន្ត​ថា៖ «​អ្នកណា​ក៏​អាច​ចាប់ផ្តើម​ការ​ធ្វើ​កំណត់ហេតុ​វីដេអូ​នេះ​បាន​ដែរ ដើម្បី​ភាព​សប្បាយ​រីករាយ​របស់​ខ្លួន និង​អ្នក​ដទៃ​ដែរ​»​។

ជា​ការ​ផ្ដល់​មតិយោបល់​នៅ​លើ​ការ​កើនឡើង​ប្រជាប្រិយភាព​នៃ​ការ​សរសេរ​ប្លុក និង​កំណត់ហេតុ​វីដេអូ ឬ​ប្លុក​វីដេអូ​នៅ​ក្នុង​ប្រទេស​កម្ពុជា កញ្ញា កែវ គូនីឡា ដែល​ជា​អ្នក​វិភាគ​សង្គម និង​អ្នក​សរសេរ​ប្លុក​នៅ​គេហទំព័រ blueladyblog.com បាន​មាន​ប្រសាសន៍​ថា​វត្តមាន​របស់​មធ្យោបាយ​ផ្សព្វផ្សាយ​សាច់​រឿង​នេះ​ត្រូវ​បាន​គេ​សង្កេត​មើល​ឃើញ​តាំងពី​ពេល​ដែល​ព្រះបាទ នរោត្តម សីហនុ បាន​សរសេរ​កំណត់​ហេតុ​បង្ហោះ​ក្នុង​បណ្តាញ​សង្គម​ប្លុក​ហើយ​ទ្រង់​បាន​បង្ហាញ​បន្ថែម​ព័ត៌មាន​ផ្សេងៗ​នៅ​ពេល​ណា​ដែល​ទ្រង់​បាន​ធ្វើ​ដំណើរ​ទៅ​ក្រៅ​ប្រទេស​។

កញ្ញា គូនីឡា បាន​ឲ្យ​ដឹង​ថា​នៅ​ក្នុង​ពេល​បច្ចុប្បន្ន​នេះ​ភាព​ពេញ​និយម​នៃ​ការ​ប្រើប្រាស់​ទូរស័ព្ទ​ដៃ បច្ចេកវិទ្យា និង​ភាព​រីកសាយ​ប្រព័ន្ធ​ផ្សព្វផ្សាយ​សង្គម​បាន​រួម​ចំណែក​ធ្វើ​ឲ្យ​មនុស្ស​កាន់តែ​ច្រើន​មាន​ចំណាប់​អារម្មណ៍​ក្នុង​ការ​បង្កើត​កំណត់ហេតុ​ប្លុក និង​កំណត់​ហេតុ​វីដេអូ​ដែល​ជា​វិធី​មួយ​ដើម្បី​ប្រាស្រ័យ​ទាក់ទង​ជាមួយ​មិត្តភក្តិ និង​អ្នក​គាំទ្រ​ការ​បង្ហោះ​ព័ត៌មាន​តាម​ប្រព័ន្ធ​អ៊ីនធឺណេត​។

បើ​យោង​តាម​កញ្ញា គូនីឡា ដែល​បាន​ក្លាយ​ជា​ប្រធាន​គ្រប់គ្រង​នៅ​សាខា​ប្រទេស​កម្ពុជា​របស់​ក្រុមហ៊ុន​ទំនាក់ទំនង​សាធារណៈ​គឺ​ក្រុមហ៊ុន Redhill Asia ដែល​មាន​មូលដ្ឋាន​នៅ​ប្រទេស​សិង្ហបុរី​។ នាង​បាន​ឲ្យ​ដឹង​ថា​ការ​សរសេរ​ប្លុក និង​កំណត់​ហេតុ​វីដេអូ មិនមែន​គ្រាន់​តែ​ជា​ឧបករណ៍​សម្រាប់​តែ​ផ្សព្វផ្សាយ​ខ្លួនឯង​នោះ​ទេ ប៉ុន្តែ​វា​មាន​សមត្ថភាព​ក្នុង​ការ​ផ្សព្វផ្សាយ​ដ៏សំខាន់​ក្នុង​ប្រព័ន្ធ​អប់រំ​។

អ្នក​វិភាគ​ប្រព័ន្ធ​សង្គម​រូប​នេះ​បាន​និយាយ​ទៀត​ថា៖ «​នៅក្នុង​បរិបទ​កម្ពុជា​យើង មិន​មាន​មនុស្ស​ជាច្រើន​នាក់​ទេ​ដែល​ស្រឡាញ់​ការ​សរសេរ​ដូច្នេះ​យើង​អាច​ប្រើ​ការ​សរសេរ​ប្លុក និង​កំណត់​ហេតុ​វីដេអូ​ដើម្បី​បញ្ចូល​គំនិត​ស្រឡាញ់ និង​បណ្តុះ​គំនិត​នៃ​ការ​សរសេរ​ទៅ​ដល់​ផ្នត់​គំនិត​ក្មេង​ជំនាន់​ក្រោយ​»​។

ការ​ធ្វើ​កំណត់​ហេតុ​វីដេអូ​មិន​ទាន់​មាន​សម្ទុះ​ឈាន​ដល់​កម្រិត​មាន​ប្រជាប្រិយភាព​ដែល​មាន​ការដឹង​ឮ​គ្រប់ៗ​គ្នា និង​ការ​ជក់​ចិត្ត​ដក​អារម្មណ៍​មិន​រួច​ដូច​បណ្តាញ​សង្គម​ហ្វេសប៊ុក​នោះ​ទេ ប៉ុន្តែ​កញ្ញា គូនីឡា បាន​សង្កេត​ឃើញ​យុវជន​នៅក្នុង​ប្រទេស​កម្ពុជា​កាន់តែ​ច្រើន​នាក់​ទទួល​យក​និន្នាការ​បច្ចេកទេស​នេះ​។

កញ្ញា​បាន​បន្ថែម​ថា៖ «​ប្រសិន​បើ​មាន​ប្រធានបទ ឬ​វីដេអូ​ដែល​មាន​ប្រយោជន៍​សម្រាប់​មនុស្ស​ទូទៅ​នោះ​នឹង​មាន​អ្នក​មើល​កាន់តែ​ច្រើន​ហើយ​អ្នក​ធ្វើ​កំណត់ហេតុ​វីដេអូ​អាច​រក​កម្រៃ​បាន​ពី​គេហទំព័រ​របស់​ពួកគេ​ដើម្បី​យក​ទៅ​ប្រើប្រាស់​ក្នុង​ការ​ផ្គត់ផ្គង់​ដំណើរ​ផ្សងព្រេង​របស់​ពួកគេ​ឲ្យ​កាន់​តែ​មាន​និរន្តរភាព​»​។

លោក កែវ ឧត្តម ដែល​ជា​អ្នក​ធ្វើ​កំណត់ហេតុ​វីដេអូ​អំពី​ជីវិត​ប្រចាំ​ថ្ងៃ និង​អំពី​បច្ចេកវិទ្យា​នោះ​បាន​ក្លាយ​ជា​អ្នក​ធ្វើ​កំណត់ហេតុ​វីដេអូ​ជាង​ពីរ​ទៅ​បី​ឆ្នាំ​មក​ហើយ បន្ទាប់ពី​ការ​ចាប់​ផ្តើម​ធ្វើ​ជា​អ្នក​សរសេរ​ប្លុក​ដំបូង​។

លោក ឧត្តម បាន​និយាយ​ថា​មិន​មាន​បទបញ្ជា​ខុស ឬ​ត្រូវ​ក្នុង​ការ​បង្កើត​កំណត់ហេតុ​វីដេអូ​មួយ​ទេ ប៉ុន្តែ​អ្នក​បង្កើត​វីដេអូ (vloggers) គួរ​តែ​គិត​ថា​ត្រូវ​រៀបរាប់​រឿងរ៉ាវ​យ៉ាង​ដូចម្តេច​ឲ្យ​មាន​ភាព​ចាប់​អារម្មណ៍ និង​ប្រយោជន៍​សម្រាប់​អ្នក​ទស្សនា​ហើយ​រក្សា​នូវ​ប្រវែង​ពេលវេលា​នៃ​វីដេអូ​ឲ្យ​ប្រហាក់​ប្រហែល​គ្នា​។

លោក ឧត្តម បាន​បរិយាយ​ប្រាប់​អំពី​អ្វី​ដែល​ជា​តម្រូវការ​ដើម្បី​ទទួល​បាន​ជោគជ័យ​ក្នុង​ការ​បង្កើត​ប្លុក​វីដេអូ​ថា​៖ «​អ្វី​ដែល​សំខាន់​គឺ​អ្នក​ត្រូវ​តែ​មាន​សាច់​រឿង​ដ៏ល្អ​មួយ​សម្រាប់​និយាយ​»​។

លោក ឧត្តម បាន​បដិសេធ​លើ​ការ​សន្មត​ជាទូទៅ​ដែល​មាន​គំនិត​ថា​កំណត់​ហេតុ​វីដេអូ​ត្រូវការ​ចំណាយ​ប្រាក់​រាប់ពាន់​លើ​ឧបករណ៍​ថត​ដែល​មាន​តម្លៃ​ថ្លៃ​។

លោក​បាន​ថ្លែង​ថា​៖ «​អ្នក​មិន​ចាំបាច់​មាន​កាមេរ៉ា ឬ​ឧបករណ៍​ដែល​មាន​តម្លៃ​ថ្លៃ​នោះ​ទេ​អ្នក​អាច​ចាប់ផ្តើម​ជាមួយ​នឹង​ទូរស័ព្ទ​របស់​អ្នក​ក៏​បាន​ដែរ​»​។

នៅ​ពេល​និយាយ​អំពី​ភាព​ខុស​គ្នា​រវាង​ការ​សសេរ​ប្លុក និង​ការ​បង្កើត​កំណត់ហេតុ​វីដេអូ​លោក ឧត្តម បាន​និយាយ​ថា​កំណត់​ហេតុ​វីដេអូ​ត្រូវ​ការ​ធ្វើ​ការងារ​បន្ថែម​ទៀត​ទៅ​លើ​ការ​ស្រាវជ្រាវ​លើ​បច្ចេកទេស​ដោយសារ​តែ​សមាសភាព​វីដេអូ និង​សំឡេង និង​ជំនាញ​ថ្មីៗ​បន្ថែម​ទៀត​នៅក្នុង​ប្រតិបត្ដិការ​ឧបករណ៍​ថត​វីដេអូ​ពិតជា​មាន​សារៈសំខាន់​។

លោក ឧត្តម បាន​មាន​ប្រសាសន៍​បន្ថែម​ថា​ជីវិត​ជា​អ្នក​បង្កើត Vlogging មាន​អត្ថប្រយោជន៍​ជាច្រើន​។ មួយ​ក្នុង​ចំណោម​នោះ​គឺជា​សមត្ថភាព​ក្នុង​ការ​ធ្វើ​ជា​អ្នក​មាន​ឥទ្ធិពល​ក្នុង​ការ​ជំរុញ​លើក​ទឹកចិត្ត​លើ​អ្វី​ម្យ៉ាង ខណៈ​ពេល​ដែល​អាច​ធ្វើ​ជា​អ្នក​បំផុស​ទឹកចិត្ត​តាមរយៈ​ការ​ចែករំលែក​រឿងរ៉ាវ​ផ្ទាល់​ខ្លួន​។

លោក វ៉ាន់ ហ្សាកូលីន ដែល​ជា​អ្នក​ធ្វើ​កំណត់ហេតុ​វីដេអូ​វ័យ​​ ២៨ ​ឆ្នាំ​រូប​នេះ​ទើប​តែ​បាន​បញ្ចប់​ដំណើរ​ផ្សងព្រង​ម្នាក់​ឯង​លើ​ចម្ងាយ​ផ្លូវ​ប្រមាណ​​ ៣០០០ ​គីឡូម៉ែត្រ​ដោយ​ម៉ូតូ​ក្នុង​រយៈពេល ១៦ ​ថ្ងៃ​នៅ​ប្រទេស​វៀតណាម​ដើម្បី​ធ្វើ​កំណត់​ហេតុ​វីដេអូ​ផ្សងព្រេង​របស់​ខ្លួន​លោក​បាន​ប្រាប់​ឲ្យ​ដឹង​ថា​មនុស្ស​មួយ​ចំនួន​ត្រូវ​បាន​ចូលរួម​នៅ​ក្នុង​ការ​ធ្វើ​កំណត់ហេតុ​វីដេអូ​ដើម្បី​តែ​ការ​អួតអាង​តែ​ប៉ុណ្ណោះ​។

លោក​បាន​ថ្លែង​ថា​៖ «​ខ្ញុំ​ជា​អ្នក​ធ្វើ​ប្លុក​វីដេអូ (Vlogger) ប៉ុន្តែ​ជាធម្មតា ខ្ញុំ​មិន​សូវ​បង្ហាញ​មុខ​នៅ​ក្នុង​វីដេអូ​របស់​ខ្ញុំ​នោះ​ទេ​»​។

ក្នុង​រយៈពេល​បី​ឆ្នាំ​កន្លង​ទៅ​នេះ​លោក ហ្សាកូលីន បាន​ចាប់​ផ្តើម​ថត​កំណត់​ហេតុ​វីដេអូ​ផ្ទាល់​ខ្លួន​របស់​លោក​អំពី​ការ​ធ្វើ​ដំណើរ​ដោយ​ម៉ូតូ​របស់​ខ្លួន​ក្នុង​គោលបំណង​ចង់​បង្ហាញ​ពី​ដំណើរ​ផ្សងព្រេង​របស់​លោក​ទៅ​ទស្សនិកជន​ជា​ជនជាតិ​កម្ពុជា​។

លោក ហ្សាកូលីន បាន​កត់សម្គាល់​ឃើញ​ថា​នៅ​ពេល​ដែល​លោក​បាន​ចាប់ផ្តើម​ដំបូង​លោក​មិន​បាន​ទទួល​ការ​ចាប់​អារម្មណ៍​ច្រើន​ពី​សាធារណជន​នោះ​ទេ ប៉ុន្តែ​ឥឡូវ​នេះ​អ្នក​គាំទ្រ​របស់​ខ្លួន​បាន​កើនឡើង​ជា​លំដាប់​។ វីដេអូ​​ដែល​បាន​បង្ហោះ​ទៅ​ក្នុង​គណនី YouTube របស់​លោក​ដែល​មាន​ឈ្មោះ Frost Zk Cambodia Motovlog ពេល​ខ្លះ​ទទួល​បាន​ការ​ទស្សនា​ជាង ៣០០,០០០ ​ដង ខណៈ​ពេល​ដែល​គណនី Facebook របស់​គាត់​អាច​ប្រមូល​ផ្ដុំ​ការ​ទស្សនា​បាន​ច្រើន​ជាង ​១០០,០០០ នាក់​ប៉ុណ្ណោះ​។

លោក​បាន​និយាយ​ថា៖ «​វីដេអូ​របស់​ខ្ញុំ​មាន​ការ​ចាប់​អារម្មណ៍​ពី​មនុស្ស​ជុំវិញ ហើយ​ខ្ញុំ​តែងតែ​ប្រឈម​មុខ​ជាមួយ​នឹង​ការ​ថត​វីដេអូ​ដោយ​ខ្លួនឯង​ក្នុង​ចំណោម​ទីសាធារណៈ​នេះ​»​។ លោក​បាន​បន្ថែម​ថា​បច្ចុប្បន្ន​នេះ​លោក​កំពុង​តែ​គ្រោង​ធ្វើ​ដំណើរ​នៅលើ​ម៉ូតូ​របស់​ខ្លួន​ទៅ​ប្រទេស​ឡាវ​សម្រាប់​កំណត់​ហេតុ​វីដេអូ​របស់​លោក​នៅ​ចុង​ខែ​មិថុនា ឬ​ដើម​ខែ​កក្កដា​ខាង​មុខ​នេះ​។

«​សព្វ​ថ្ងៃ​នេះ​ម៉ូតូ​របស់​ខ្ញុំ​ប្រៀប​ដូចជា​ប្រពន្ធ​របស់​ខ្ញុំ​មិន​ថា​ទៅ​ដល់​ទីណា ខ្ញុំ​តែងតែ​យក​ទៅ​តាម​ជានិច្ច​ហើយ​ខ្ញុំ​បាន​ភ្ជាប់​ខ្លួន​ជាមួយ​ធម្មជាតិ​តាមរយៈ​ការ​ធ្វើ​កំណត់ហេតុ​វីដេអូ​នេះ ដូច្នេះ​ខ្ញុំ​សង្ឃឹម​ថា​ទស្សនិកជន​របស់​ខ្ញុំ​អាច​ទទួល​យក​ទេសភាព​ធម្មជាតិ​របស់​ប្រទេស​កម្ពុជា និង​ទីតាំង​ទេសចរណ៍​តាមរយៈ​កំណត់​ហេតុ​មួយ​នេះ​»៕

អត្ថបទគួរចាប់អារម្មណ៍