The Phnom Penh Post Search

Search form




Logo of Phnom Penh Post newspaper Phnom Penh Post - អ្នកស្ម័គ្រចិត្ត JICA ផ្នែក​កីឡា​ពី​អតីតកាល បច្ចុប្បន្ន និង​អនាគត

អ្នកស្ម័គ្រចិត្ត JICA ផ្នែក​កីឡា​ពី​អតីតកាល បច្ចុប្បន្ន និង​អនាគត

 លោក Masahiko Nakamura (រូប​ជួរ​ក្រោយ​សើច​ចេញ​ធ្មេញ) អ្នកស្ម័គ្រចិត្ត​ម្នាក់​ក្នុង​ចំណោម​អ្នកស្ម័គ្រចិត្ត JICA បួន​នាក់​ដំបូង ដែល​បាន​បញ្ជូន​មក​កម្ពុជា គឺជា​គ្រូបង្រៀន​ហែលទឹក ថតរូប​ជាមួយ​នឹង​សិស្ស​នៅ​ខេត្ត​បាត់ដំបង ក្នុង​ឆ្នាំ​១៩៦៧​។
លោក Masahiko Nakamura (រូប​ជួរ​ក្រោយ​សើច​ចេញ​ធ្មេញ) អ្នកស្ម័គ្រចិត្ត​ម្នាក់​ក្នុង​ចំណោម​អ្នកស្ម័គ្រចិត្ត JICA បួន​នាក់​ដំបូង ដែល​បាន​បញ្ជូន​មក​កម្ពុជា គឺជា​គ្រូបង្រៀន​ហែលទឹក ថតរូប​ជាមួយ​នឹង​សិស្ស​នៅ​ខេត្ត​បាត់ដំបង ក្នុង​ឆ្នាំ​១៩៦៧​។ រូបថត សហការី

អ្នកស្ម័គ្រចិត្ត JICA ផ្នែក​កីឡា​ពី​អតីតកាល បច្ចុប្បន្ន និង​អនាគត

ទីភ្នាក់ងារ​សហប្រតិបតិ្តការ​អន្តរជាតិ​ជប៉ុន នៅ​កម្ពុជា មាន​ឈ្មោះ​ល្បី ដោយសារ​តែ​ជំនួយ​របស់​ខ្លួន​ក្នុង​ការ​អភិវឌ្ឍ​ហេដ្ឋារចនាសម្ព័ន្ធ​រូបវន្ត​នៅក្នុង​ប្រទេស​នេះ​។ ការ​ឧបត្ថម្ភ​មួយ​ទៀត​នៅ​កម្ពុជា ដែល​អាច​ពុំ​សូវ​មាន​គេ​ស្គាល់​ជា​សាធារណៈ គឺ​កម្មវិធី​អ្នក​ស្ម័គ្រចិត្ត​សហការ​ក្រៅប្រទេស​របស់ JICA​។

កម្មវិធី​នេះ​អ្នកស្ម័គ្រចិត្ត​នេះ​បាន​ចាប់ផ្តើម​ជា​សាកល​នៅ​ឆ្នាំ​១៩៦៥ និង​ឈាន​ដល់​គម្រប់​ខួប​ទី​៥០ របស់​ខ្លួន​ក្នុង​ឆ្នាំ​២០១៥​ខាង​មុខ​នេះ​ដោយ​បាន​បញ្ជូន​អ្នកស្ម័គ្រចិត្ត​ចំនួន​ជាង​៤៥០០០​នាក់ ទៅ​កាន់ ៩៤​ប្រទេស ដើម្បី​ជួយ​ប្រជាជន សហគមន៍​ក្នុង​ស្រុក និង​រដ្ឋាភិបាល ឆ្ពោះ​ទៅ​អភិវឌ្ឍ​ក្នុង​វិស័យ​ជាច្រើន​។ កម្ពុជា​គឺជា​ប្រទេស​មួយ​ក្នុង​ចំណោម​ប្រទេស​មួយ​ចំនួន​តូច ដែល​ទទួល​អ្នក​ស្ម័គ្រចិត្ត​ជប៉ុន​ក្រុម​ទី​១ ក្នុង​ឆ្នាំ​១៩៦៦​។ បើ​ទោះបី​ជា​កម្មវិធី​នេះ​ត្រូវ​បាន​បង្អាក់​អស់​ជាង ២​ទសវត្សរ៍ ដោយសារ​សង្គ្រាម​ស៊ីវិល​ក៏ដោយ ក៏​ប៉ុន្តែ​អ្នកស្ម័គ្រចិត្ត JICA ចំនួន​ជិត​៦០០​នាក់ បាន​មក​ដល់​ប្រទេស​កម្ពុជា រស់នៅ និង​ធ្វើការ​ជាមួយ​នឹង​ប្រជាជន​នៅ​ទី​នេះ ក្នុង​រវាង​ចន្លោះ​ពី​៧​ខែ​រហូត​ដល់​២​ឆ្នាំ​។

នៅ​កម្ពុជា ក៏ដូចជា​នៅ​ប្រទេស​កំពុង​អភិវឌ្ឍន៍​ជាច្រើន​ដទៃ ទៀត​លើ​ពិភពលោក​ដែរ អ្នក​ស្ម័គ្រចិត្ត​ជាន់ខ្ពស់​របស់ JICA និង​កម្មវិធី JOCV បាន​ធ្វើការ​ជាមួយ​ប្រជាជន​ក្នុង​វិស័យ​កីឡា និង​ការ​អប់រំ​កាយ​។ ដោយ​មាន​ជំនឿ​ថា កីឡា​គឺ​មិន​ត្រឹមតែ​ពង្រឹង​រាងកាយ​ទេ តែ​ថែម​ទាំង​ពង្រឹង​ចិត្ត​ទៀត​ផង​។ ដូច្នេះ​ហើយ​រាល់​ការងារ​របស់​ពួកគេ គឺ​សុទ្ធតែ​បាន​ចូលរួម​ចំណែក​ពង្រឹង​សមត្ថភាព​របស់​ប្រជាជន​កម្ពុជា ទាក់ទង​នឹង​ជំនាញ​រូបកាយ និង​ការ​អភិវឌ្ឍ​ផ្លូវចិត្ត និង​ផ្លូវ​អារម្មណ៍​។ ទាំងនេះ​មាន​ន័យ​ថា ពួកគេ​បាន​រួម​ចំណែក​ជួយ​ដល់​សុខុមាលភាព​សង្គម និង​ប្រទេស​ជាតិ​។

ក្នុង​ចំណោម​អ្នកស្ម័គ្រចិត្ត​បួន​នាក់​ដំបូង នៅ​កម្ពុជា​ក្រោយ សម័យ​អាណានិគម អ្នក​ស្ម័គ្រចិត្ត​ចំនួន​ពីរ​នាក់​គឺជា​គ្រូ​កីឡា ពោល​គឺ កីឡា​ហែលទឹក និង​កីឡា​ចំបាប់ ដែល​ពួកគាត់​បាន​ជួយ​ឲ្យ​យុវជន​កម្ពុជា បាន​ទៅ​ប្រកួតប្រជែង​លើស​ង្វៀន​អន្តរជាតិ​។ ការងារ​របស់​អ្នកស្ម័គ្រចិត្ត​វិស័យ​កីឡា​ទាំងនេះ​គឺ​ស្រប នឹង​គោលនយោបាយ​លើក​កម្ពស់​កីឡា​យុវជន ដែល​បាន​គាំទ្រ​ដោយ​ព្រះបាទ នរោត្តម សីហនុ នៅពេល​នោះ​។

ប៉ុន្មាន​ឆ្នាំ​ថ្មីៗ​នេះ គ្រូស្ម័គ្រចិត្ត​នៃ​កីឡា​ផ្សេងទៀត​ដូចជា កីឡា AiKido និង​កីឡា​បាល់ទាត់​បាន​និង​កំពុង​ធ្វើការ​ជាមួយ​យុវជន​កម្ពុជា ដែល​រួម​បញ្ចូល​ទាំង​ក្រុម​យុវជន​ជាតិ (​អាយុ​ក្រោម​១៤​ឆ្នាំ ជ្រើសរើស​ពី​ទូទាំង​ប្រទេស​)​ផង​ដែរ​។ គោលបំណង​ធំ​របស់​ពួកគាត់ គឺ​សម្រេច​ឲ្យ​បាន​នូវ​សេចក្តី​ប្រាថ្នា​ឈ្នះ​មេដាយ​មាស​នៅក្នុង​ការ​ប្រកួត​កីឡា​ស៊ីហ្គេម​ឆ្នាំ​២០២៣ នៅ​កម្ពុជា​ខាង​មុខ​នេះ​។ ទន្ទឹម​នេះ​ដែរ អ្នកស្ម័គ្រចិត្ត​ជិត​មួយ​ភាគ​បួន​ពី JICA នៅក្នុង​ប្រទេស​កម្ពុជា​ក៏​បាន​ធ្វើការ​ពង្រឹង​ការ​អប់រំ​អារម្មណ៍​នៅ​តាម​សាលាបឋមសិក្សា​ផង​ដែរ តាមរយៈ​ការ​បង្រៀន​ពី​សារៈសំខាន់​នៃ​កីឡា ដែល​កន្លងមក​ហាក់​ដូចជា​ត្រូវ​បាន​គេ​មើល​រំលង និង​ព្រងើយ​កន្តើយ​នៅក្នុង​បរិបទ​នៃ​ប្រទេស​កម្ពុជា​។

ក្នុង​ឆ្នាំ​២០១៣ រដ្ឋាភិបាល​ជប៉ុន បាន​ចាប់ផ្តើម​កម្មវិធី​កិច្ចសហប្រតិបត្តិការ​អន្តរជាតិ​ថ្មី​មួយ ដែល​ជំរុញ​ឲ្យ​វិស័យ​កីឡា​ជា​មធ្យោបាយ​មួយ​ដើម្បី​បង្កើត​អនាគត​ល្អប្រសើរ​សម្រាប់ ពិភពលោក​។ ចាប់ពី​ឆ្នាំ​២០១៤ ដល់​២០២០ ដែល​ជា​ឆ្នាំ​ប្រកួត​កីឡា​អូឡាំពិក​នៅ​ទីក្រុង​តូក្យូ «កីឡា​សម្រាប់​ថ្ងៃ​ស្អែក​» នឹង​ពង្រឹង​កិច្ចសហប្រតិបត្តិការ​វិស័យ​កីឡា​របស់​ជប៉ុន​ដែល​តម្រង់​គោលដៅ​លើ​មនុស្ស​ជាង​១០​លាន​នាក់ នៅ​ជាង​១០០​ប្រទេស​។ កម្មវិធី​ស្ម័គ្រចិត្ត​របស់ JICA នឹង​ដើរ​តួនាទី​សំខាន់​ក្នុង​កម្មវិធី​នេះ ដោយ​បញ្ជូន​អ្នក​ស្ម័គ្រចិត្ត​ចេញ​កាន់តែ​ច្រើន​ដើម្បី​ជួយ​បណ្តា​ប្រទេស​មួយ ចំនួន​ឲ្យ​ពូកែ​ក្នុង​វិស័យ​កីឡា និង​ការ​អប់រំ​រាងកាយ​។ គេ​រំពឹង​ទុក​ថា វិស័យ​កីឡា​របស់​ប្រទេស​កម្ពុជា ដែល​កំពុង​ក្លាយ​ជា​ប្រភព​នៃ​មោទនភាព​ជាតិ នឹង​បន្ត​ទទួល​ប្រយោជន៍​ពី​ការ​យក​ចិត្ត​ទុក​ដាក់​របស់​អ្នក​ស្ម័គ្រចិត្ត​ក្នុង​ពេល​ប៉ុន្មាន​ឆ្នាំ​ខាង​មុខ​នេះ៕

អត្ថបទគួរចាប់អារម្មណ៍