The Phnom Penh Post Search

Search form




Logo of Phnom Penh Post newspaper Phnom Penh Post - ឥទ្ធិពល​ប្រព័ន្ធ​ផ្សព្វផ្សាយ​សង្គម​ មកលើ​ស្ថាប័ន​សារព័ត៌មាន​នៅ​កម្ពុជា

ឥទ្ធិពល​ប្រព័ន្ធ​ផ្សព្វផ្សាយ​សង្គម​ មកលើ​ស្ថាប័ន​សារព័ត៌មាន​នៅ​កម្ពុជា

Content image - Phnom Penh Post
អ្នក​ប្រើប្រាស់​ទូរស័ព្ទ​ស្មាតហ្វូន​ម្នាក់​ចូល​មើល​ព័ត៌មាន​ក្នុង​គេហទំព័រ​កាសែត​ភ្នំពេញ ប៉ុស្ដិ៍ ។ ផា លីណា

ឥទ្ធិពល​ប្រព័ន្ធ​ផ្សព្វផ្សាយ​សង្គម​ មកលើ​ស្ថាប័ន​សារព័ត៌មាន​នៅ​កម្ពុជា

ភ្នំពេញៈ ការ​ប្រើប្រាស់​ប្រព័ន្ធ​ផ្សព្វផ្សាយ​សង្គម​នៅ​ក្នុង​ប្រទេស​កម្ពុជា ជាពិសេស ហ្វេសប៊ុក​បាន​កើនឡើង​យ៉ាង​ខ្លាំង​នា​រយៈពេល​ប៉ុន្មាន​ឆ្នាំ​កន្លង​មក​។

និន្នាការ​នេះ​ត្រូវ​បាន​គេ​មើល​ឃើញ​កើត​មាន​ចាប់​តាំងពី​ការ​បោះឆ្នោត​ថា្នក់​ជាតិ​ឆ្នាំ ២០១៣ ដែល​ប្រព័ន្ធ​ផ្សព្វផ្សាយ​ទំនើប​ថ្មី​នេះ​បាន​បង្ហាញ​ពី​ផលប៉ះពាល់​ខ្លាំង​លើ​ឆាក​នយោបាយ និង​កិច្ចការ​សង្គម​នៅ​ក្នុង​ប្រទេស​កម្ពុជា​។

មិន​តែ​ប៉ុណ្ណោះ​វា​ក៏​កំពុង​តែ​ពេញនិយម និង​បាន​ទាញ​ប្រជាប្រិយ​ខ្លួន​កើន​លើស​ស្ថាប័ន​សារព័ត៌មាន​នៅ​កម្ពុជា​ដែល​បាន​ក្លាយ​ជា​ប្រភព​ព័ត៌មាន​ចម្បង សម្រាប់​ពលរដ្ឋ​កម្ពុជា​ជា​លើក​ដំបូង​បំផុត​នៅ​ឆ្នាំ​នេះ​ដោយសារ​ពួកគេ​ជឿ​លើ​ភាព​ឯករាជ្យ​របស់​វា និង​សេរីភាព​បញ្ចេញ​មតិ​។
យោង​តាម​របាយការណ៍​សិក្សា​ប្រចាំ​ឆ្នាំ​មួយ​ដែល​ផ្តោត​ទៅ​លើ​ការ​ប្រើប្រាស់​ទូរស័ព្ទដៃ​នៅ​កម្ពុជា​ដែល​ចេញ​ផ្សាយ​កាលពី​ចុង​ឆ្នាំ​ ២០១៦ ដោយ​មូលនិធិ​អាស៊ី (The Asia Foundation) និង​វិទ្យាស្ថាន​បើក​ទូលាយ (Open Institutes) បាន​បង្ហាញ​ថា​ប្រភព​ព័ត៌មាន​គោល​នៃ​ប្រជាជន​កម្ពុជា​គឺ​ចេញ​ពី​ហ្វេសប៊ុក​ និង​អ៊ីនធឺណិត​ដែល​មាន​ចំនួន ៣០ ភាគរយ បន្ទាប់មក​គឺ​ទូរទស្សន៍​មាន ២៩ ភាគរយ​ការ​និយាយ​ប្រាប់​ត​គ្នា​មាន​ ២៣ ​ភាគរយ និង​វិទ្យុ ១៥ ភាគរយ​។

និន្នាការ​នេះ​បាន​មក​ដល់​ទន្ទឹម​នឹង​ការ​កើនឡើង​គួរ​ឲ្យ​កត់សម្គាល់​នៃ​អ្នក​ដែល​មាន​ទូរស័ព្ទ​ស្មាតហ្វូន​ដោយ ៤៨ ភាគរយ​នៃ​ប្រជាជន​កម្ពុជា​មាន​ទូរស័ព្ទ​វៃឆ្លាត ឬ​ស្មាតហ្វូន (Smart phone) មួយ​គ្រឿង​នៅ​ឆ្នាំ​នេះ​កើនឡើង​ទ្វេដង​ធៀប​នឹង ៣ ឆ្នាំ​មុន ខណៈ ៧៦ ភាគរយ​នៃ​ទូរស័ព្ទ​ទាំង​នោះ​អាច​ឲ្យ​អ្នក​ប្រើប្រាស់​មើល​អក្សរ​ខ្មែរ​បាន​។

នៅ​ពេល​ដែល​ឥទ្ធិពល​របស់​ប្រព័ន្ធ​ផ្សព្វផ្សាយ​សង្គម​នេះ​រីក​កាន់​តែ​ធំ វា​រឹត​តែ​សំខាន់​ទៅ​ទៀត​ដែល​ស្ថាប័ន​សារព័ត៌មាន​គួរ​តែ និង​អាច​ប្រើប្រាស់​វា​ឲ្យ​មាន​ប្រសិទ្ធភាព និង​ប្រកប​ដោយ​ការ​ទទួល​ខុស​ត្រូវ​ខ្ពស់​។ ពួក​វា​អនុញ្ញាត​ឲ្យ​ស្ថាប័ន​សារព័ត៌មាន​ប្រមូល​ព័ត៌មាន​តាម​បែប​ថ្មី​អាច​ចែកចាយ​ព័ត៌មាន​ទៅ​កាន់​អ្នកអាន​របស់​ខ្លួន​បាន​លឿន​រហ័ស និង​ជុំវិញ​ពិភពលោក​ព្រម​ទាំង​បង្កើត​ជា​វេទិកា​សម្រាប់​ការ​ផ្លាស់ប្តូរ​ព័ត៌មាន និង​ការ​យល់​ឃើញ​ផ្សេងៗ​។

ជា​បន្តបន្ទាប់​ក្រុមហ៊ុន​ប្រព័ន្ធ​ផ្សព្វផ្សាយ​សង្គម​ទាំង​នោះ​ជាពិសេស​ហ្វេសប៊ុក​នេះ​បាន​និង​កំពុង​អភិវឌ្ឍន៍​បច្ចេកវិទ្យា​ដែល​មួយ​ផ្នែក​ជួយ​សម្រួល​កាន់តែ​ងាយស្រួល​ដល់​ស្ថាប័ន​សារព័ត៌មាន​នានា​ដូចជា​ការ​ផ្សាយ​ផ្ទាល់ (Lives) និង​កម្មវិធី Instant Articles ដែល​ជួយ​ឲ្យ​អត្ថបទ និង​វីដេអូ​បង្ហាញ​ចេញ​បាន​យ៉ាង​លឿន​បំផុត​ដល់​អ្នក​ប្រើប្រាស់ និង​ប្រព័ន្ធ​ប្រតិបត្តិការ​ផ្សេងៗ​ទៀត​សម្រាប់​សារព័ត៌មាន​នៅ​លើ​អ៊ីនធឺណិត​។

អំឡុង​នៃ​យុទ្ធនាការ​បោះឆ្នោត ឃុំ-សង្កាត់ អាណត្តិ​ទី ៤ កន្លង​ទៅ​ទាំង​លោក​នាយករដ្ឋមន្ត្រី ហ៊ុន សែន និង​មេដឹកនាំ​គណបក្ស​ប្រឆាំង​រួម​ទាំង​ស្ថាប័ន​សារព័ត៌មាន​ជាច្រើន​បាន​ប្រើប្រាស់​ទំព័រ​ហ្វេសប៊ុក​ខ្លួន​ធ្វើការ​ផ្សាយ​ផ្ទាល់​នៃ​យុទ្ធនាការ​ឃោសនា​រក​សំឡេង​ឆ្នោត​បាន​ភ្លាមៗ​ដែល​ក្រុម​អ្នក​សង្កេតការណ៍​បាន​ចាត់ទុក​ថា​ប្រព័ន្ធ​ផ្សព្វផ្សាយ​សង្គម​នេះ​កំពុង​តែ​ដើរ​តួនាទី​យ៉ាង​សំខាន់​ក្នុង​ការ​បោះឆ្នោត​នេះ និង​សម្រាប់​ការ​បោះឆ្នោត​ឆ្នាំ​ ២០១៨ ខាង​មុខ​។

នេះ​គឺជា​ការ​វិវត្ត​ថ្មី​មួយ​ទៀត​នៃ​វិស័យ​ព័ត៌មាន​នៅ​ក្នុង​ប្រទេស​កំពុង​អភិវឌ្ឍន៍​ដូចជា កម្ពុជា​ដែល​ស្ថិត​ក្នុង​ពិភពលោក​បច្ចេកវិទ្យា​កំពុង​រីកចម្រើន​ខ្លាំង​បែប​នេះ​។ ក្រុម​អ្នក​ជំនាញ​ក៏​យល់​ឃើញ​ដែរ​ថា​ការ​ក្តោបក្តាប់​យ៉ាង​តឹងរ៉ឹង​របស់​រដ្ឋាភិបាល​ទៅ​លើ​ទូរទស្សន៍ និង​វិទ្យុ និង​កំណើន​អ្នក​គាំទ្រ​បក្ស​ប្រឆាំង​បាន​ជំរុញ​ឲ្យ​ពួកគេ​ងាក​ចេញ​ពី​ការ​ទទួល​បាន​ព័ត៌មាន​ពី​ទម្រង់​នៃ​ប្រព័ន្ធ​ផ្សព្វផ្សាយ​ទាំង​នោះ​។

ការ​ចុះ​ផ្សាយ​របស់​កាសែត​ភ្នំពេញ ប៉ុស្តិ៍ កាលពី​ខែ​មុន​ដែល​បាន​ដកស្រង់​សម្តី លោក មឿន ឈានណារិទ្ធ នាយក​នៃ​វិទ្យាស្ថាន​សិក្សា​ប្រព័ន្ធ​ផ្សព្វផ្សាយ​កម្ពុជា បាន​បរិយាយ​ពី​កំណើន​នៃ​ប្រព័ន្ធ​ផ្សព្វផ្សាយ​សង្គម​ថា «​ជា​ប្រជាធិបតេយ្យ​នីយកម្ម​» នៃ​ព័ត៌មាន​ព្រម​ទាំង​លើក​ឡើង​ទៀត​ថា​ប្រជាជន​កាន់តែ​ច្រើន​អាច​សម្តែង​នូវ​ការ​​រិះគន់​របស់​ខ្លួន​ចំពោះ​បញ្ហា​សង្គម​នានា​ជា​ភាសា​ខ្មែរ​នៅ​លើ​អនឡាញ​បាន​។

យោង​តាម​ទិន្នន័យ​ពី​ក្រុមហ៊ុន​ភ្នាក់ងារ​សារព័ត៌មាន និង​ប្រព័ន្ធ​ផ្សព្វផ្សាយ​សង្គម We Are Social របស់​ប្រទេស​សិង្ហបុរី​បាន​បង្ហាញ​ថា​គិត​ត្រឹម​ដើម​ឆ្នាំ ២០១៧ នេះ​ចំនួន​អ្នក​មាន​លទ្ធភាព​អាច​ប្រើប្រាស់​ប្រព័ន្ធ​អ៊ីនធឺណិត មាន​ជាង ៧ លាន​នាក់​ក្នុង​ចំណោម​ប្រជាជន​កម្ពុជា​សរុប​ជិត ១៦ លាន​នាក់​ហើយ​ចំនួន​អ្នក​ប្រើប្រាស់​ប្រព័ន្ធ​ផ្សព្វផ្សាយ​សង្គម​មាន​ប្រមាណ ៥ លាន​នាក់ ខណៈ​អ្នក​ប្រើប្រាស់​ប្រព័ន្ធ​ផ្សព្វផ្សាយ​សង្គម​តាម​ទូរស័ព្ទ​ដៃ​ប្រហែល ៤,៥ លាន​នាក់​។

Content image - Phnom Penh Post
តារាង​ទិន្នន័យ​អំពី​ការ​កើនឡើង​យ៉ាង​ខ្លាំង​នៃ​ការ​ប្រើប្រាស់​ប្រព័ន្ធ​ផ្សព្វផ្សាយ​សង្គម​នៅ​ក្នុង​ប្រទេស​កម្ពុជា ។ រូបថត We Are Social

ជា​រួម​ខណៈ​ពេល​ដែល​ប្រព័ន្ធ​អ៊ីនធឺណិត​នៅ​ប្រទេស​កម្ពុជា​កាន់តែ​មាន​ភាព​ងាយស្រួល និង​មាន​តម្លៃ​ថោក​ក៏​ដូចជា​កំពុង​រីកសាយ​ភាយ​ដល់​តំបន់​ជនបទ​កម្ពុជា ស្ថាប័ន​សារព័ត៌មាន​កម្ពុជា​ស្ទើរតែ​ទាំងអស់​កំពុង​ប្រើប្រាស់ និង​ពឹង​ផ្អែក​ជា​ចាំបាច់​លើ​បណ្តាញ​សង្គម​នេះ​ដើម្បី​ឲ្យ​មាន​អ្នក​ចូល​អាន ឬ​ទស្សនា​ឲ្យ​បាន​កាន់តែ​ច្រើន​ឡើង​លើ​គេហទំព័រ​របស់​ខ្លួន​។

ការ​ដើរ​រំលង​ស្ថាប័ន​ព័ត៌មាន

ប្រព័ន្ធ​ផ្សព្វផ្សាយ​សង្គម ជាពិសេស​ហ្វេសប៊ុក​ដែល​កំពុង​ពង្រីក​វិសាលភាព​ខ្លួន​ក្នុង​ប្រទេស​កម្ពុជា​នោះ​ក៏​កំពុង​ធ្វើឲ្យ​ស្ថាប័ន​សារព័ត៌មាន​ក្នុង​ប្រទេស​នេះ​ជួប​ការ​ប្រឈម​ជាមួយ​នឹង​ក្រុមហ៊ុន​បច្ចេកវិទ្យា​យក្ស​របស់​ពិភពលោក​មួយ​នេះ​ដែរ ជាពិសេស​លើ​ការ​ទាញ​យក​ចំណែក​ទីផ្សារ​ផ្សព្វផ្សាយ​ពាណិជ្ជកម្ម​។

ក្រុមហ៊ុន​ហ្វេសប៊ុក​កាលពី​ខែ​មុន​បាន​រាយការណ៍​ពី​កំណើន​ប្រាក់​ចំណេញ​ប្រចាំ​ត្រីមាស​របស់​ខ្លួន​ចំនួន ៣,០៦ ពាន់​លាន​ដុល្លារ​ពី​ប្រាក់​ចំណូល​ចំនួន ៨,០៣ ពាន់​លាន​ដុល្លារ​ដោយ​កើនឡើង ៧៦ ភាគរយ ខណៈ​ពេល​ដែល​ចំនួន​អ្នក​ប្រើប្រាស់​បណ្តាញ​សង្គម​មួយ​នេះ​កើនឡើង​ដល់​ជិត ២ ពាន់​លាន​នាក់​នៅ​ទូទាំង​ពិភពលោក​។

ដោយឡែក​នៅ​កម្ពុជា​យោង​តាម​ទិន្នន័យ​ធ្វើការ​ស្រាវជ្រាវ​របស់​ក្រុមហ៊ុន Indochina Research កាលពី​ឆ្នាំ​ ២០១៦ បាន​បង្ហាញ​ថា​នៅ​ត្រឹម​ត្រីមាស​ដំបូង ថវិកា​ចំណាយ​លើ​ការ​ផ្សព្វផ្សាយ​ពាណិជ្ជកម្ម​នៅ​តាម​កាសែត និង​ទស្សនាវដ្ដី​ធ្លាក់​ចុះ​យ៉ាង​ខ្លាំង ខណៈ​ការ​ចំណាយ​លើ​ទូរទស្សន៍ កើនឡើង​។

ទោះបី​តំណាង​មកពី​ក្រុមហ៊ុន​ស្រាវជ្រាវ​មិន​អាច​បង្ហាញ​ពី​មូលហេតុ​នៃ​ការ​ធ្លាក់​ចុះ​នេះ​ក៏ដោយ ក៏​អ្នក​រកស៊ី​នៅ​ក្នុង​ឧស្សាហកម្ម​នេះ​ចាត់ទុក​ថា​ការ​កើនឡើង​ចំនួន​ប្រព័ន្ធ​សារព័ត៌មាន​ឌីជីថល​ក្នុង​រយៈពេល​ពីរ​បី​ឆ្នាំ​ចុងក្រោយ​នេះ​កំពុង​ទាញ​យក​ថវិកា​ផ្សព្វផ្សាយ​ពាណិជ្ជកម្ម​នេះ​មួយ​ផ្នែក​ពី​វិស័យ​បោះពុម្ព​ដែល​ធ្លាប់​ទទួល​បាន​។

បើ​តាម​ទិន្នន័យ​បាន​ពី​ក្រុមហ៊ុន Indochina Research តម្លៃ​នៃ​ការ​ផ្សព្វផ្សាយ​ពាណិជ្ជកម្ម​តាម​ទូរទស្សន៍​ចាប់​ពី​ខែ​មករា​ដល់​ខែ​មីនា​បាន​កើនឡើង​ដល់ ៣២ លាន​ដុល្លារ​អាមេរិក​គឺ​កើនឡើង ២៣ ភាគរយ​ធៀប​នឹង​រយៈពេល​ដូច​គ្នា​កាលពី​ឆ្នាំ​ ២០១៥ ខណៈ​កញ្ចប់​ថវិកា​ផ្សព្វផ្សាយ​ពាណិជ្ជកម្ម​នៅ​តាម​កាសែត និង​ទស្សនាវដ្ដី​ធ្លាក់​ចុះ ២៦ ភាគរយ​ពី ៣,៦ លាន​ដុល្លារ​ក្នុង​រយៈពេល​ ៣ ​ខែ​ដំបូង​កាលពី​ឆ្នាំ​ ២០១៥ មក​នៅ ២,៤ លាន​ដុល្លារ​។

ប៉ុន្តែ​ទោះ​យ៉ាង​នេះ​ក្តី​ក្រុមហ៊ុន​ក្នុង​ស្រុក​មួយ​ចំនួន និង​អ្នក​ចាប់ផ្តើម​អាជីវកម្ម​ដំបូង​មាន​និន្នាការ​ងាក​ទៅ​រក​ការផ្សព្វផ្សាយ​ផលិតផល និង​សេវាកម្ម​ដោយ​ការ​បង្កើត​ទំព័រ​ហ្វេសប៊ុក​ខ្លួនឯង​កាន់តែ​ច្រើន​ឡើងៗ​។

ទិន្នន័យ​ពី​ហ្វេសប៊ុក​ក៏​បាន​បង្ហាញ​ដែរ​ថា​ប្រព័ន្ធ​ផ្សព្វផ្សាយ​សង្គម​នៅ​កម្ពុជា​គឺ​ផ្តោត​ខ្លាំង​ទៅ​លើ​នយោបាយ បើ​ប្រៀបធៀប​នឹង​ប្រទេស​ដទៃ​ក្នុង​តំបន់​។ ជា​ការពិត យុវវ័យ ៨ នាក់​ក្នុង​ចំណោម ១០ នាក់​បាន​ចុច Like លើ​ទំព័រ​ហ្វេសប៊ុក​ផ្សេងៗ​ដែល​មាន​ព័ត៌មាន​នយោបាយ និង​ទំព័រ​ហ្វេសប៊ុក​របស់​ឥស្សរជន​នយោបាយ​ដែល​បាន​យល់​ដឹង​ពី​ការ​កើនឡើង​នៃ​អំណាច និង​ឥទ្ធិពល​នៃ​បណ្តាញ​សង្គម​មួយ​នេះ​។ ទំព័រ​ហ្វេសប៊ុក​ពីរ​ក្នុង​ចំណោម​នោះ​មាន​ទំព័រ​ហ្វេសប៊ុក​របស់​លោក​នាយក​រដ្ឋមន្ត្រី ហ៊ុន សែន និង​លោក សម រង្ស៊ី អតីត​មេដឹកនាំ​បក្ស​ប្រឆាំង​។

សម្រាប់​អ្នក​នយោបាយ​ប្រព័ន្ធ​ផ្សព្វផ្សាយ​សង្គម ហ្វេសប៊ុក​គឺជា​ឱកាស​មួយ​ដែល​ជួយ​ឲ្យ​ពួកគេ​បាន​យល់​ពី​អ្វី​ដែល​ប្រជាជន​ភាគច្រើន​និយម​ចាប់​អារម្មណ៍​។ ប្រព័ន្ធ​ផ្សព្វផ្សាយ​សង្គម​កំពុង​តែ​បាន​ក្លាយ​ទៅ​ជា​វេទិកា​របស់​ប្រជាជន​កម្ពុជា​សម្រាប់​ពិភាក្សា​អំពី​បញ្ហា​សំខាន់ៗ​នានា​ដែល​មាន​ឥទ្ធិពល​មកលើ​ពួកគេ​។

មាន​ន័យ​ថា​ប្រព័ន្ធ​ប្រតិបត្តិការ​ដូចជា​ហ្វេសប៊ុក​បាន​អនុញ្ញាត​ឲ្យ​រដ្ឋាភិបាល ធ្វើការ​ពន្យល់​បាន​កាន់តែ​ប្រសើរ​អំពី​គោលនយោបាយ​របស់​ខ្លួន​ទៅ​ដល់​ប្រជាពលរដ្ឋ ហើយ​ប្រជាពលរដ្ឋ​អាច​បង្ហាញ​ការ​យល់​ឃើញ​របស់​ពួកគេ​ដោយ​ផ្ទាល់​ទៅ​កាន់​មន្ត្រី​បាន​។

រីឯ​ក្រុមហ៊ុន ស្ថាប័ន អង្គភាព​ខ្លះ​ក៏​បាន​ធ្វើការ​ផ្សព្វផ្សាយ​សេចក្តី​ប្រកាស​ខ្លួន ឬ​លិខិត​ស្នាម​អ្វី​មួយ​តាមរយៈ​ការ​បង្ហោះ​លើ​ទំព័រ​ហ្វេសប៊ុក​របស់​ខ្លួន ដើម្បី​ធ្វើការ​ផ្សព្វផ្សាយ ពន្យល់ ឬ​បកស្រាយ​ពី​បញ្ហា​អ្វី​មួយ​ដូចជា ពាក្យ​ចចាមអារ៉ាម និង​ការ​ផ្តល់​ព័ត៌មាន​ខុស​។

ហ្វេសប៊ុក​បាន​ក្លាយ​ជា​ឧបករណ៍​ដ៏សំខាន់​មួយ​ដើម្បី​បង្កើត «​ទំនាក់ទំនង​ពីរ​ផ្លូវ​» ដោយ​មើល​ទៅ​ហាក់​មិន​ចាំបាច់​មាន​តួនាទី​របស់​សារព័ត៌មាន​ដើម្បី​ធ្វើការ​បញ្ជាក់​។

ការ​រីក​ឡើង​នៃ​ព័ត៌មាន​ក្លែងក្លាយ

ព័ត៌មាន​ក្លែងក្លាយ​គឺជា​ប្រភេទ​ព័ត៌មាន​ដែល​ត្រូវ​បាន​គេ​ប្រឌិត​ឡើង ឬ​ជា​ពាក្យ​ចចាមអារ៉ាម​ដែល​ត្រូវ​បាន​បង្កើត​ដោយ​នរណា​ម្នាក់ ឬ​ក្រុម​ណា​មួយ​ដើម្បី​បង្ខូច បង្កើត​ជា​ការ​ភាន់ច្រឡំ​ក្នុង​គោលបំណង​ទទួល​បាន​ផលប្រយោជន៍​ផ្សេងៗ​ជាពិសេស​ផ្នែក​សេដ្ឋកិច្ច និង​ការ​កេង​ចំណេញ​ផ្នែក​នយោបាយ​ជាដើម​។

ព័ត៌មាន​ក្លែងក្លាយ​នេះ​មិនមែន​ជា​រឿង​ថ្មី​នោះ​ទេ ប៉ុន្តែ​កាល​ពី​មុន​លទ្ធភាព​នៃ​ការ​ផ្សព្វផ្សាយ​ព័ត៌មាន​នេះ​នៅ​មាន​កម្រិត​ប៉ុណ្ណោះ​។ ពាក្យ​នេះ​ត្រូវ​បាន​ពិភពលោក​លើក​យក​មក​ពិភាក្សា​ច្រើន​ឡើង និង​ចាប់​អារម្មណ៍​ខ្លាំង​ក្រោយ​ពី​ការ​បោះឆ្នោត​នៅ​សហរដ្ឋ​អាមេរិក​ឆ្នាំ​ ២០១៦ គឺ​នៅ​ពេល​មាន​ការ​ស្រាវជ្រាវ​ថា ព័ត៌មាន​ក្លែងក្លាយ​ជាច្រើន​ត្រូវ​បាន​បង្ហោះ និង​ចែករំលែក​តាម​ប្រព័ន្ធ​ផ្សព្វផ្សាយ​សង្គម​ដើម្បី​ទាក់ទាញ​អ្នក​ចុច​មើល​។

នៅ​កម្ពុជា​ព័ត៌មាន​បែកធ្លាយ និង​ដំណឹង​ចចាម​អារ៉ាម​កាន់តែ​ច្រើន​ឡើង ត្រូវ​បាន​បង្ហោះ​លើ​បណ្ដាញ​សង្គម​ដែល​ព័ត៌មាន​ទាំង​នេះ​មួយ​ចំនួន​ធំ​មិន​អាច​ស្វែងរក​ការ​បញ្ជាក់​ពី​ការពិត​បាន​។ ព័ត៌មាន​ដែល​ពេល​ខ្លះ​ត្រូវ​បាន​ប្រឌិត​ឡើង អាច​ដល់​មនុស្ស​រាប់សែន​នាក់​ក្នុង​ពេល​តែ​មួយ​។

អ្នក​ឃ្លាំ​មើល​ការ​បោះឆ្នោត​បារម្ភ​ថា​ព័ត៌មាន​ក្លែងក្លាយ​បាន​បង្កើន​ឥទ្ធិពល​បំពុល​បរិយាកាស​នយោបាយ នៅ​ពេល​ដែល​ការ​បោះឆ្នោត​នៅ​កម្ពុជា​ខិត​ជិត​មក​ដល់​ដោយសារ​ប្រព័ន្ធ​ផ្សព្វផ្សាយ​សង្គម​កំពុង​ត្រូវ​បាន​ប្រើប្រាស់​កាន់តែ​ច្រើន និង​ក្លាយ​ជា​ឧបករណ៍​មួយ​ផ្តល់​លទ្ធភាព​នៃ​ការ​ផ្សព្វផ្សាយ​ព័ត៌មាន​ក្លែងក្លាយ​កាន់​តែ​ទូលំ​ទូលាយ​។

ព័ត៌មាន​ក្លែងក្លាយ​កាន់តែ​អាច​សាយភាយ​លឿន​រហ័ស ដូច្នេះ​ការ​ទទួល​បាន​ព័ត៌មាន​នៅ​តាម​បណ្ដាញ​សង្គម​គួរ​តែ​ត្រូវ​បាន​ធ្វើ​ឡើង​ដោយ​ប្រុងប្រយ័ត្ន​បំផុត និង​ត្រូវ​តែ​ផ្ទៀងផ្ទាត់​ព័ត៌មាន​ជាមួយ​ស្ថាប័ន​សារព័ត៌មាន​ដែល​មាន​វិជ្ជាជីវៈ​ខ្ពស់​ឲ្យ​បាន​ច្រើន​តាម​ដែល​អាច​ធ្វើ​បាន​។ សរុប​មក ស្ថាប័ន​សារព័ត៌មាន​នៅ​តែ​ដើរ​តួនាទី​សំខាន់​នៅក្នុង​សម័យ​បច្ចេកវិទ្យា​រីកចម្រើន និង​ការ​រីកឡើង​នៃ​ប្រព័ន្ធ​ផ្សព្វផ្សាយ​សង្គម​៕

គិត​ត្រឹម​ចុង​ខែ​មិថុនា ឆ្នាំ ២០១៧ ទំព័រ​ហ្វេសប៊ុក POST Khmer របស់​​កាសែត​​ភ្នំពេញ ប៉ុស្តិ៍ ជា​ភាសា​ខ្មែរ​ដែល​ប្រើ​ប្រាស់​សម្រាប់​ចែកចាយ​​ព័ត៌មាន​​ពិត ឯករាជ្យ​ និង​សម្បូរ​បែប​ដល់​អ្នក​អាន​តាម​បណ្តាញ​អ៊ីនធឺណិត​មាន​ចំនួន​អ្នក Likes ដល់​ជាង ៤,៧ លាន​​គណនី​ស្ថិត​នៅ​លំដាប់​ទី​បី​ក្នុង​ចំណោម​ទំព័រ​ហ្វេសប៊ុក​ទាំងអស់​នៅ​ក្នុង​ប្រទេស​កម្ពុជា។ រីឯ​នៅ​បណ្តាញ​សង្គម ធ្វីធើ (Twitter)វិញ ទំព័រ​ភ្នំពេញ ប៉ុស្តិ៍ ជា​ភាសា​អង់គ្លេស​មាន​ចំនួន Followers ស្ថិត​នៅ​ក្នុង​លំដាប់​ទី​ពីរ​នៅក្នុង​ប្រទេស​កម្ពុជា​ផង​ដែរ៕ ប្រភព socialbakers.com

Content image - Phnom Penh Post

Content image - Phnom Penh Post

អត្ថបទគួរចាប់អារម្មណ៍