តើលោកអាចណែនាំអំពីគម្រោង L’attrait បានដែរឬទេ? តើក្រុមហ៊ុនគ្រោងនឹងចំណាយទុនវិនិយោគប៉ុន្មាន?
A: L’attrait Property Development Inc. ជាក្រុមហ៊ុនអភិវឌ្ឍន៍ក្នុងស្រុកបង្កើតដោយក្រុមហ៊ុនដើមឈ្មោះ L’attraitCo., Ltd. នៅប្រទេសជប៉ុនដែលជាក្រុមហ៊ុនអភិវឌ្ឍន៏អចលនទ្រព្យមួយហើយបានចុះបញ្ជីនៅទីផ្សារភាគហ៊ុនទីក្រុងតូក្យូប្រទេសជប៉ុន។ ក្រុមហ៊ុន L’attrait Property Development Inc គ្រោងនឹងចំណាយទុនវិនិយោគចំនួន ២០ លានដុល្លារអាមេរិកសម្រាប់ធ្វើការអភិវឌ្ឍគម្រោងខុនដូឈ្មោះ L’attrait BoeungKeng Kang។
គម្រោង L’attrait BoeungKeng Kang មានទីតាំង No.4 ផ្លូវលេខ 334 សង្កាត់បឹងកេងកង ១ ខណ្ឌចំការមនរាជធានីភ្នំពេញ និងមានចម្ងាយ ៨០០ ម៉ែត្រពីវិមានឯករាជ្យ។
តើក្រុមហ៊ុនចាប់ផ្តើមអភិវឌ្ឍគម្រោង L’attrait BoeungKeng Kang ពេលណា? ហើយគ្រោងនឹងបញ្ចប់ និងបើកទ្វារជូនអតិថិជននៅពេលណា?
A : គម្រោង L’attrait BoeungKeng Kang បានចាប់ផ្តើមសាងសង់កាលពីខែមករាឆ្នាំ ២០១៨ កន្លងមកដោយគ្រោងនឹងបញ្ចប់ការសាងសង់នៅ ឆ្នាំ ២០២០ ខាងមុខនេះ។ គម្រោងនេះក៏បានចាប់ផ្តើមប្រកាសលក់មុន (Pre-sale) នៅឯក្រៅប្រទេសដើម្បីទាក់ទាញអតិថិជន និងអ្នកវិនិយោគបរទេសផងដែរ។ គិតមកដល់ពេលនេះក្រុមហ៊ុនបានលក់អស់ជាង ៣៥ ភាគរយហើយ។ ចំណែកការលក់សម្រាប់អតិថិជននៅក្នុងស្រុក ក្រុមហ៊ុនគ្រោងនឹងប្រកាសលក់ជាសាធារណៈនៅខែមេសាឆ្នាំ ២០១៨ ខាងមុខនេះ។
តើក្នុង ១ យូនីតមានតម្លៃប៉ុន្មាន?
A: គម្រោង L’attrait Boeung Keng Kang នឹងផ្តល់ជូននូវតម្លៃពិសេសចាប់ពីជាង ៩ ម៉ឺនដុល្លារអាមេរិកឡើងទៅសម្រាប់បន្ទប់ប្រភេទ Studio។ តម្លៃចាប់ពីជាង ១៤ ម៉ឺនដុល្លារដល់ជាង ២០ ម៉ឺនដុល្លាសម្រាប់យូនីត 1 bedroom ហើយតម្លៃជាង ២៥ ម៉ឺនដុល្លារដល់ជាង ៣០ ម៉ឺនដុល្លារ គឺសម្រាប់យូនីត 2 bedroom។
តើលោកអាចពន្យល់អំពីយូនីតនីមួយៗបានដែរឬទេ? សរុបមានប៉ុន្មានយូនីត? តើមានយូនីតណាខ្លះសម្រាប់អតិថិជន?
A: អគារ L’attrait Boeung Keng Kang នឹងមានកម្ពស់ ២៦ ជាន់សរុបមានចំនួន ១៤៩ យូនីតដោយមានផ្ទៃក្រឡាសំណង់សរុប ៩៣៦០ ម៉ែត្រការ៉េ។
ក្នុងនោះមានលំនៅឋានប្រភេទ Studio មានចំនួន ៧២ យូនីត ដែលមានទំហំចាប់ពីប្រហែលជាង ២៧-៣៦ ម៉ែត្រការ៉េ។ ប្រភេទ 1 Bedroomចំនួន ៦៦ យូនីត មានទំហំចាប់ពីប្រហែលជាង ៤០-៥០ ម៉ែត្រការ៉េ។ ប្រភេទ 2 Bedroom ចំនួន ៨ យូនីតមានទំហំពីប្រហែលជាង ៧០-៧៦ ម៉ែត្រការ៉េ និងប្រភេទ Penthouse ចំនួន ៣ យូនីតមានទំហំពីប្រហែលជាង ១៤៣-១៥២ ម៉ែត្រការ៉េ។ ស្តង់ដារ និងរចនាប័ទ្មរបស់ L’attrait BoeungKeng Kang គឺផ្តល់ដល់អ្នករស់នៅនូវអារម្មណ៍សុខដុមដូចទៅនឹងសណ្ឋាគារកម្រិតខ្ពស់ (High end) តែម្តង។
តើអគារ L’attrarit ត្រូវបានរចនាប្លង់ និងសាងសង់ដោយក្រុមហ៊ុនណា?
A: ការរចនាប្លង់មេ (Master Plan) ទាំងផ្នែកខាងក្រៅអគារ និងផ្ទៃខាងក្នុងអគារ ត្រូវបានរចនាឡើងដោយក្រុមហ៊ុន L’attrait Co., Ltd. ជាក្រុមហ៊ុនមកពីប្រទេសជប៉ុនចំណែកការឌីហ្សាញ និងសាងសង់ដោយក្រុមហ៊ុន CMED។
L’attrait Boeung Keng Kang ផ្តោតការយកចិត្តទុកដាក់ជាពិសេសលើនិន្នាការថ្មីនៃការរស់នៅបែបស៊ីវិល័យ (Urban lifestyle) ដោយក្រុមអ្នកជំនាញបានគិតគូរតាំងពីចំណុចតូចល្អិត ឬផ្នែកតូចមួយនៅក្នុងផ្ទះ (យូនីត) និង (Layout) ដែលមានវិសាលភាពងាយស្រួលក្នុងការរៀបចំតុបតែងសម្រាប់ការរស់នៅ និងបានគិតគូរទាំងមានការបំពាក់គ្រឿងសម្ភារប្រើប្រាស់នៅក្នុងផ្ទះគ្រប់គ្រាន់តាមតម្រូវការ។ មិនទុកឲ្យសល់ចន្លោះទំនេរ (space) ចោល និងមិនឲ្យខ្វះចន្លោះ (space)។
អ្នកជំនាញក៏បានគិតគូរលម្អិតលើតម្រូវការក្នុង និងក្រៅបន្ទប់នៃយូនីតនីមួយ។ ទាំងអស់នេះគឺអ្នកជំនាញផ្នែកស្ថាបត្យកម្ម (Architecture) របស់ L’attrait ព្យាយាមផ្តល់ភាពងាយស្រួលដល់អ្នកស្នាក់នៅ និងរស់នៅប្រកបដោយផាសុកភាព។
យោងតាមព័ត៌មាន និងការសិក្សាស្វែងយល់របស់ពួកយើងនៅកម្ពុជា គឺសំណង់ភាគច្រើនមានបញ្ហាទាក់ទងនឹងបញ្ហាជ្រាបទឹក សាចទឹក បញ្ហាខ្យល់បញ្ហាទ្វាបង្អួចពិបាកបិទបើក គ្មានទឹកក្តៅគ្រប់គ្រាន់ និងបញ្ហាសម្ពាធទឹកខ្សោយជាដើម។ យើងបានគិតគូរយ៉ាងល្អិតល្អន់លើបញ្ហាទាំងអស់នេះ ដូច្នេះយើងនឹងមិនអនុញ្ញាតឲ្យកើតមានឡើងនៅលើអគារ L’attrait Boeung Keng Kang ឡើយ។
ជាពិសេសសំណង់ L’attrait Boeung Keng Kang មិនត្រឹមតែបានគិតគូរលើបញ្ហាខាងលើប៉ុណ្ណោះទេ ប៉ុន្តែសំណង់របស់យើងទាំងរបៀបធ្វើប្រព័ន្ធទឹកភ្លើងទាំងគ្រឹះ និងគ្រោងអគារ គឺយើងយកបទពិសោធដែលធ្លាប់ឆ្លងកាត់នៅប្រទេសជប៉ុន មកអនុវត្តនៅលើគម្រោងនេះ។
យើងបានគិតគូរហូតដល់រយៈពេលវែងក្រោយពេលបញ្ចប់ការសាងសង់ដូចជាភាពងាយស្រួលក្នុងការថែរក្សាអគារ (Maintenance) ឬមិនចំណាយក្នុងការថែទាំ ឬការប្រើប្រាស់ចំណាយតិចបំផុតលើការថែទាំ។
តើលក្ខណៈពិសេសនៃការរចនាប្លង់តាមរបៀបជប៉ុនមានបែបណាខ្លះ (លំហ ទំហំ និងចន្លោះតូចៗ)?
A: ក្រុមហ៊ុន L’attrait បានសិក្សាស្វែងយល់យ៉ាងច្បាស់លាស់អំពីអគារស្នាក់នៅទំនៀមទម្លាប់នៃការរស់នៅនៃវប្បធម៌ជប៉ុន និងចំណាប់អារម្មណ៍ពិសេសលើការរស់នៅ (ការចាប់អារម្មណ៍លើចំណុចតូចៗនៅក្នុងផ្ទះ) និងរបៀបនៃការរស់នៅរួមទាំង Layout ដែលមានរបស់គ្រប់គ្រាន់ (មិនសល់ space ចោល និងមិនខ្វះ space) គិតគូរលម្អិតលើតម្រូវការខាងក្នុងខាងក្រៅបន្ទប់ជាដើម ទើបយើងយកគំនិតទាំងអស់នេះមកធ្វើសំយោគការឌីហ្សាញ ដើម្បីផ្តល់ភាពងាយស្រួលដល់អ្នកស្នាក់នៅ។
សម្រាប់ក្រុមហ៊ុន យើងគឺឈរលើជំហរជាមួយអ្នកស្នាក់នៅហើយយើងឃើញចំណុចល្អនៃវប្បធម៌ជប៉ុន និងចំណាប់អារម្មណ៍លើការរស់នៅប្រកបដោយផាសុកភាព និងភាពងាយស្រួល។
បច្ចុប្បន្នមានអគារខុនដូ និងអាផាតមិនជាច្រើននៅតំបន់បឹងកេងកង។ តើអ្វីជាលក្ខណៈពិសេសរបស់គម្រោង L’attrait ដែលនឹងផ្តល់ជូនអតិថិជន ឬទីផ្សារនេះ? ភាពទាក់ទាញរបស់វាចំពោះអតិថិជន?
- ដូចបានលើកឡើងពីខាងលើការត្រួតពិនិត្យដំណើរការនៃគម្រោងដោយផ្តោតលើគុណភាពត្រូវបានធ្វើឡើងដោយក្រុមអ្នកជំនាញរបស់ក្រុមហ៊ុន L’attrait Co., Ltd. ដែលមានឯកទេសខាងរចនា និងជំនាញខាងអភិវឌ្ឍ អគារ និងខុនដូ ដែលជាក្រុមហ៊ុនបានចុះបញ្ជីទីផ្សារភាគហ៊ុន (listed company) នៅប្រទេសជប៉ុនផងដែរ។
មិនត្រឹមតែប៉ុណ្ណោះ L’attrait Co., Ltd. មានអ្នកក្រុមអ្នកប្រឹក្សាយោបល់ និងអ្នកត្រួតពិនិត្យចាប់តាំងពីការរៀបចំផែនការការគូរប្លង់រហូតដល់ការចាប់ផ្តើមការសាងសង់ត្រួតពិនិត្យសំណង់ដោយផ្ទាល់។ ការចុះបញ្ជីភាគហ៊ុនរបស់ក្រុមហ៊ុននៅបរទេសបែបនេះគឺមិនធ្លាប់មានក្រៅពីគម្រោងនេះឡើយក្នុងប្រទេសកម្ពុជា។
-បើនិយាយពីពាក្យថា «ប្រេនន៍ក្រុមហ៊ុនជប៉ុន» គឺផ្តល់ទំនុកចិត្តទៅលើគុណភាពជាចម្បង។ ទាំងនៅទូទាំងពិភពលោក និងនៅក្នុងប្រទេសកម្ពុជា មានផលិតផលជប៉ុនជាច្រើនដូចជាយានយន្ត គ្រឿងយន្ត គ្រឿងអេឡិចត្រូនិក និងសម្ភារប្រើប្រាស់ផ្សេងៗជាដើម តែងតែទទួលបានទំនុកចិត្តពីអតិថិជនដោយសារគុណភាពល្អ ដូច្នេះទាំងខុនដូក៏ដូចគ្នាគឺ «ប្រេនន៍ជប៉ុនមានគុណភាពល្អ»។
- គោលដៅមួយទៀតរបស់ L’attrait គឺសម្រាប់អតិថិជនជនជាតិបរទេសដែលបំពេញការងារនៅកម្ពុជា ហើយពួកគេចង់រស់នៅកន្លែងដែលមានភាពងាយស្រួល (តំបន់បឹងកេងកង១) ដើម្បីឲ្យពួកគាត់មានភាពងាយស្រួលក្នុងការរស់នៅ និងប្រកបការងារក៏ដូចជាលម្ហែពីការហត់នឿយ ក្រោយពីពេលបំពេញ ការងារយើងបានគិតគូរ និងឌីហ្សាញឡើងនូវបរិយាកាសប្រកបដោយផាសុកភាពសម្រាប់ពួកគាត់ដោយយើងមានរួមបញ្ចូលទាំងកន្លែងធ្វើការរួម ទីតាំងសាធារណៈ (common space) និងកន្លែងហាត់ប្រាណ និងអាងហែលទឹក (gym & pool) ជាដើម។
តើនរណាខ្លះដែលជាអតិថិជនគោលដៅរបស់ L’attrait?
A: អតិថិជនគោលដៅរបស់ L’attrait គឺក្រុមអ្នកវិនិយោគបរទេស និងអ្នកវិនិយោគក្នុងស្រុកព្រមទាំងអ្នកដែលមានគោលបំណងចង់រស់នៅក្នុងតំបន់បឹងកេងកង។
តើអ្វីខ្លះទៅដែលនឹងជាតម្លៃបន្ថែមសម្រាប់អតិថិជនទូទៅ?
A: អត្ថប្រយោជន៍គឺសម្រាប់ការរស់នៅដោយគ្មានការបារម្ភ លម្ហែកាយក្រោយពីការងារ និងមានអារម្មណ៍ពេញចិត្ត។ មិនត្រឹមតែប៉ុណ្ណោះ L’attrait Boeung Keng Kang គឺជាអគារដែលគិតគូរដល់អ្នករស់នៅ (target living customer) វាក៏នឹងផ្តល់ភាពងាយស្រួលក្នុងការដាក់ជួលបន្តផងដែរ៕