.jpg)
NBC ៖ អត្រាអតិផរណាបន្តស្ថិតនៅក្នុងកម្រិតទាប ។ រូបថត សហការី
សេដ្ឋកិច្ចរបស់កម្ពុជានឹងនៅតែរក្សាបានកំណើនដ៏រឹងមាំនៅក្នុងឆ្នាំនេះ ទោះបីសកម្មភាពពាណិជ្ជកម្មអន្តរជាតិមានការថមថយបន្តិចក្តី។
យោងតាមធនាគារជាតិនៃកម្ពុជា (NBC) បានឲ្យដឹងថា កំណើនសេដ្ឋកិច្ចដែលនៅតែបន្តរឹងមាំនេះគឺគាំទ្រដោយកំណើនវិស័យកាត់ដេរ សំណង់ និងទេសចរណ៍ គួបផ្សំនឹងការកើនល្បឿនបន្តិចនៃវិស័យកសិកម្ម។
នៅក្នុងរបាយការណ៍ប្រចាំឆមាសទី ១ ឆ្នាំ ២០១៩ របស់ NBC បានឲ្យដឹងថា ជញ្ជីងទូទាត់ត្រូវបានប៉ាន់ស្មានថាមានស្ថានភាពល្អប្រសើរ និងបន្តមានអតិរេក ៥,៥ ភាគរយនៃ ផ.ស.ស (៧៤១ លានដុល្លារអាមេរិក) ដែលគាំទ្រដោយភាពរឹងមាំនៃលំហូរចូលសុទ្ធគណនីហិរញ្ញវត្ថុ ទោះបីជាឱនភាពគណនីចរន្តកើនឡើងក៏ដោយ។
អតិរេកនេះនឹងបន្តរួមចំណែកបង្កើនទុនបម្រុងអន្តរជាតិដុលដល់ ១១,១ ប៊ីលានដុល្លារអាមេរិក។ មានន័យថា វាអាចធានាការនាំចូលទំនិញ និងសេវាសម្រាប់គ្រាបន្ទាប់បានប្រមាណ ៥ ខែខ្ពស់ជាងកម្រិតអប្បបរមាចំនួន ៣ ខែដែលប្រទេសកំពុងអភិវឌ្ឍន៍គួរមាន។
NBC ក៏បានបញ្ជាក់ផងដែរថាអត្រាអតិផរណាបន្តស្ថិតក្នុងកម្រិតទាប និងបានថយចុះមកត្រឹម ២ ភាគរយដោយសារការអនុវត្តគោលនយោបាយរូបិយវត្ថុប្រកបដោយភាពប្រុងប្រយ័ត្នតាមរយៈការរក្សាស្ថិរភាពអត្រាប្តូរប្រាក់ (ក្នុងរង្វង់ ៤០៣៨ រៀលក្នុងមួយដុល្លារអាមេរិក) និងការផ្គត់ផ្គង់រូបិយវត្ថុស្របតាមកំណើន សកម្មភាពសេដ្ឋកិច្ច។
រូបិយវត្ថុទូទៅ (M2) មានកំណើន ២១,៣ ភាគរយ ប្រហាក់ប្រហែលនឹងអត្រាកំណើនឆមាសទី ១ ឆ្នាំ ២០១៨ ។ ប្រព័ន្ធធនាគារបន្តមានកម្រិតសន្ទនីយភាពខ្ពស់ដោយសន្ទនីយភាពលើសជាដុល្លារអាមេរិកមានកម្រិត ៥៥ ភាគរយ និងប្រាក់រៀលប្រមាណ ៣,៩ ដងនៃប្រាក់បម្រុងកាតព្វកិច្ច។
កម្រិតសន្ទនីយភាពខ្ពស់គឺបានពង្រឹងភាពធន់នៃប្រព័ន្ធធនាគារដើម្បីទប់ទល់នឹងហានិភ័យដែលអាចកើតឡើងជាយថាហេតុ។
ដើម្បីពង្រឹងប្រសិទ្ធភាពគោលនយោបាយរូបិយវត្ថុ ការប្រើប្រាស់ប្រាក់រៀលត្រូវបានលើកកម្ពស់ជាបន្តបន្ទាប់ ដោយផ្អែកលើយន្តការទីផ្សារ។ ក្នុងបរិការណ៍នេះ មូលបត្រអាចជួញដូរបាន (NCDs) និងប្រតិបត្តិការផ្តល់សន្ទនីយភាពដោយមានការធានា (LPCO) ត្រូវបានអភិវឌ្ឍដើម្បីស្រូបយក និងផ្គត់ផ្គង់ប្រាក់រៀលតាមតម្រូវការសេដ្ឋកិច្ច។
ការចេញផ្សាយ NCDs ចារឹកជាដុល្លារអាមេរិកមានចំនួន ១១ ប៊ីលានដុល្លារអាមេរិកដែលបានកើនឡើងបន្តិច ខណៈដែលការចេញផ្សាយ NCDs ចារឹកជាប្រាក់រៀលមានចំនួន ៣,៥ ទ្រីលានរៀលដែលបានថយចុះដោយសារ គ្រឹះស្ថានធនាគារ និងហិរញ្ញវត្ថុបានបង្កើនការផ្តល់ឥណទានជាប្រាក់រៀល។
ចំណែកប្រតិបត្តិការ LPCO ត្រូវបានធ្វើឡើងចំនួន ៨ លើកដោយទំហំទឹកប្រាក់ដែលស្នើសុំដេញថ្លៃសរុបប្រមាណ ៤ ទ្រីលានរៀលកើន ១១ ដង ធៀបនឹងឆមាសទី ១ ឆ្នាំ២០១៨ ។
វិស័យធនាគារ និងហិរញ្ញវត្ថុបានបន្តអភិវឌ្ឍប្រកបដោយភាពរឹងមាំ និងបានចូលរួមចំណែកយ៉ាងសកម្មក្នុងការគាំទ្រ និងជំរុញកំណើន សេដ្ឋកិច្ច។ ទ្រព្យសកម្មរបស់គ្រឹះស្ថានធនាគារ និងហិរញ្ញវត្ថុបានកើនឡើង ១៩,២ ភាគរយ (ពីមួយឆ្នាំទៅមួយឆ្នាំ) ស្មើនឹង ១៦៦ ភាគរយ នៃ ផ.ស.ស ឥណទាន ១០៣ ភាគរយ និងប្រាក់បញ្ញើ ៩២ ភាគរយ នៃ ផ.ស.ស។
ដើម្បីគាំទ្រការរីកចម្រើនសេដ្ឋកិច្ច និងហិរញ្ញវត្ថុ ហេដ្ឋារចនាសម្ព័ន្ធហិរញ្ញវត្ថុក៏ត្រូវបានអភិវឌ្ឍជាលំដាប់ឲ្យកាន់តែមានប្រសិទ្ធភាព ជាពិសេសការធ្វើទំនើបកម្មប្រព័ន្ធទូទាត់សំដៅលើកកម្ពស់សុវត្ថិភាព និងកាត់បន្ថយ ថ្លៃប្រតិបត្តិការ។
ធនាគារជាតិនៃកម្ពុជា (NBC) ក៏បានលើកឡើងផងដែរថាខ្លួនបានបន្តពង្រឹងសមត្ថភាពជំនាញ និងឯកទេសសកម្មជាប្រចាំតាមរយៈការបណ្តុះបណ្តាលទាំងក្នុង និងក្រៅប្រទេស ព្រមទាំងការសិក្សាតាមប្រព័ន្ធអនឡាញ។ ជាពិសេស កិច្ចសហប្រតិបត្តិការជាមួយបណ្តាស្ថាប័នអន្តរជាតិ និងធនាគារកណ្តាលនានាទាំងក្នុងក្របខ័ណ្ឌទ្វេភាគី និងពហុភាគីក៏ត្រូវបានពង្រឹង និងពង្រីក។
ជំហានទាំងអស់នេះគឺដើម្បីជំរុញសមាហរណកម្មហិរញ្ញវត្ថុក្នុងតំបន់ និងពិភពលោកឲ្យកាន់តែស៊ីជម្រៅ ជាពិសេសការពង្រឹងបណ្តាញសុវត្ថិភាពហិរញ្ញវត្ថុក្នុងតំបន់៕
