សាលារៀនអន្តរជាតិសិង្ហបុរីកម្ពុជា SCIA ជាសាលាអន្តរជាតិដំបូងគេផ្តល់ជូននូវកម្មវិធីសិក្សាស្តង់ដារចម្រុះសិង្ហបុរី និងខេមប្រ៊ីដក្នុងប្រទេសកម្ពុជា។
SCIA ស្ថិតនៅក្នុងខុនដូ One Park នៃមជ្ឈមណ្ឌលរាជធានីភ្នំពេញនឹងទទួលសិស្សចូលរៀនជាលើកដំបូងនៅពាក់កណ្តាលខែសីហាខាងមុខនេះ។ SCIA ជាសមាជិកក្រុមហ៊ុន SIM Group ដែលនាំមុខគេក្នុងការផ្តល់ជូនសេវាចម្រុះក្នុងវិស័យអប់រំ និងបណ្តុះបណ្តាលជំនាញផ្សេងៗក្នុងប្រទេសសិង្ហបុរី។
សិស្សរបស់យើងនឹងទទួលបានការអប់រំរួមពិតប្រាកដស្រប និងការអភិវឌ្ឍដ៏ជឿនលឿននៃសតវត្សរ៍ទី 21 នេះដែលពិសេសលើសពីកម្រិតការសិក្សាក្នុងថ្នាក់រៀនទៅទៀត។ លក្ខណៈពិសេសនេះផ្អែកលើកម្មវិធីសិក្សាចំនួន ៣ ជាអាទិភាពដែលផ្តោតលើ STEM (វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា) ភាពជាអ្នកដឹកនាំ និងសហគ្រិនភាព។
លោក Anselm Chu ជានាយក និងប្រធានគ្រប់គ្រងសាលាបានបន្ថែមថា៖ "យើងមានថ្នាក់ដឹកនាំប្រកបដោយការប្តេជ្ញាចិត្ត សមត្ថភាព និងបទពិសោធខាងការបង្រៀន និងគ្រប់គ្រងមិនតិចជាង 20 ឆ្នាំទាំងក្នុងសាលារដ្ឋនៅសិង្ហបុរី និងសាលាអន្តរជាតិនានានៅក្នុងតំបន់។ ថ្នាក់ដឹកនាំសាលារបស់យើងទទួលបានការជួយជ្រោមជ្រែងពីអ្នកអប់រំដែលមានសមត្ថភាព និងទទួលស្គាល់ទូទាំងពិភពលោករួមទាំងសិង្ហបុរី នឹងធានានូវភាពត្រឹមត្រូវតាមស្តង់ដារការអប់រំអន្តរជាតិ"។
SCIA ផ្តល់នូវការអប់រំជា ៣ ភាសាអង់គ្លេស ចិន និងខ្មែរ ហើយយើងក៏បានសង្កត់ធ្ងន់លើសារៈសំខាន់នៃការទទួលយកវប្បធម៌ខ្មែរតាមរយៈការរៀនភាសាខ្មែរផងដែរ។ ខណៈប្រទេសចិននៅតែបន្តដើរតួនាទីជាពិសេសនៅក្នុងសេដ្ឋកិច្ចអន្តរជាតិជាមួយគំនិតផ្តួចផ្តើម One Belt One Road ភាសាចិននឹងត្រូវបានប្រើប្រាស់កាន់តែខ្លាំងឡើងៗក្នុងការទំនាក់ទំនងពាណិជ្ជកម្មដែលនាំឲ្យយើងត្រូវគិតជាចាំបាច់ក្នុងការរៀបចំសិស្សឱ្យត្រៀមខ្លួនជាស្រេចសម្រាប់អនាគតរបស់ពួកគេ។
លោក Chu បានសរុបថា៖ "សិស្សត្រូវបានដាក់ជាស្នូលនៃកម្មវិធីសិក្សា និងគរុកោសល្យបង្រៀនរបស់សាលាយើង។ ការអភិវឌ្ឍចរិតលក្ខណៈរបស់កុមារតាំងពីតូចគឺជាចំណុចសំខាន់របស់យើងក្នុងនាមជាស្ថាប័នអប់រំ។ ការធ្វើការរួមគ្នាជាមួយឪពុកម្តាយ និងអ្នកផ្តល់ការអប់រំរបស់យើង SCIA មានបំណងផ្តល់ការអប់រំដល់អនាគតជាអ្នកដឹកនាំរបស់យើងដើម្បីដឹកនាំដោយប្រើបញ្ញា សកម្មភាព និងបេះដូងរបស់ពួកគេដោយមិនបោះបង់ក្នុងការបន្តស្វែងរកលទ្ធភាពដែលអាចធ្វើបានគ្មានទីបញ្ចប់នៅក្នុងជីវិត"៕