ក្រុមហ៊ុន YouAdMe ដែលមានមូលដ្ឋាននៅក្នុងប្រទេសកម្ពុជាកំពុងសម្លឹងទៅរកការឈរជើងដ៏រឹងមាំនៅក្នុងតំបន់ ដោយផ្តោតលើទីផ្សារគោលដៅគឺយុវជនដែលមានជំនាញខាងបច្ចេកវិទ្យា ដើម្បីផ្លាស់ប្តូរគំរូនៃការផ្សព្វផ្សាយ និងបង្កើតប្រព័ន្ធអេកូទាំងមូលសម្រាប់ប្រព័ន្ធឌីជីថលនៅកម្ពុជា។
កិច្ចខិតខំប្រឹងប្រែងរបស់ក្រុមហ៊ុនទទួលបាននូវការជំរុញនៅក្នុងទម្រង់ជាកិច្ចព្រមព្រៀងភាពជាដៃគូផ្តាច់មុខ និងជាមួយការវិនិយោគយុទ្ធសាស្ត្រពីធនាគារឯកទេសវីង។
កម្មវិធី YouAdMe ត្រូវបានដំណើរការ និងគ្រប់គ្រងដោយបុគ្គលដែលមានបទពិសោធផ្នែកផ្សព្វផ្សាយ និងឧស្សាហកម្មហិរញ្ញវត្ថុយ៉ាងសម្បូរបែបដោយកំពុងជ្រើសរើសរកយុវជនដែលប៉ិនប្រសប់ក្នុងបណ្តាញសង្គមដើម្បីធ្វើការភ្ជាប់ទំនាក់ទំនងជាមួយដៃគូម៉ាកយីហោ ជាមួយអតិថិជនរបស់ពួកគេដែលចាប់អារម្មណ៍ក្នុងការបង្កើតមាតិកាផ្ទាល់ខ្លួន។
កម្មវិធី YouAdMe ត្រូវបានប្រើប្រាស់រួចហើយនៅក្នុងរាជធានីភ្នំពេញ។ បច្ចុប្បន្នកម្មវិធីនេះមានពាណិជ្ជករជាង ៥០០ នាក់ និងមានអ្នកប្រើប្រាស់ជាង ៥ ម៉ឺននាក់បានចូលរួមផ្សព្វផ្សាយសកម្មភាពរបស់ពួកគេនៅលើវេទិកាមួយនេះ។
លោក Bernard Teo ដែលជាសហស្ថាបនិក និងជាអគ្គនាយកក្រុមហ៊ុន YouAdMe ថ្លែងថា៖ «ការវិនិយោគនេះមានគោលបំណងដើម្បីអភិវឌ្ឍហេដ្ឋារចនាសម្ព័ន្ធ និងដំណោះស្រាយដែលភ្ជាប់អាជីវកម្មទៅអតិថិជនរបស់ពួកគេ។ យើងនឹងផ្តល់នូវផលិតផលឌីជីថល និងដំណោះស្រាយមានលក្ខណៈច្នៃប្រឌិតដែលផ្តល់ឱ្យអ្នកប្រើប្រាស់នូវប្រភពនៃការលើកទឹកចិត្ត ការទទួលបានសេវាកម្មឌីជីថលកាន់តែច្រើន ហើយជាទូទៅគឺជួយពួកគេឲ្យចូលក្នុងយុគឌីជីថល»។
លោក Jojo Malolos ប្រធានក្រុមប្រឹក្សាភិបាល និងជាទីប្រឹក្សាយោបល់របស់ធនាគារឯកទេសវីងបានលើកឡើងថា ការច្នៃប្រឌិតនៃការផ្សព្វផ្សាយនេះមិនត្រឹមតែមានឥទ្ធិពលលើទីផ្សារខ្នាតមធ្យម និងទីផ្សារខ្នាតធំប៉ុណ្ណោះទេ ប៉ុន្តែទីផ្សារគោលដៅរបស់វីងផងដែរ ដូចជាសហគ្រាសខ្នាតតូច និងមធ្យម។
«ទីនេះវាគឺជាឱកាសដ៏ធំក្នុងការនាំយកគំនិតច្នៃប្រឌិតថ្មីនេះទៅរកអាជីវកម្មខ្នាតតូច និងជួយពួកគេឲ្យឈានទៅដល់កម្រិតខ្ពស់មួយដែលមិនធ្លាប់មានពីមុន។ ដូច្នេះយើងមានកម្មវិធី YouAdme ហើយសព្វថ្ងៃយើងរីករាយដែលជម្នះឧបសគ្គនេះមិនត្រឹមតែនៅក្នុងទីផ្សារប៉ុណ្ណោះទេ ប៉ុន្តែនៅក្នុងផ្នត់គំនិតផងដែរ។
«គិតដល់ការនាំយកការផ្សព្វផ្សាយលក់ផលិតផលរបស់ពួកគេតាមហ្វេសប៊ុកពីសំណាក់ហាងលក់រាយ តូចៗ ហាងកាហ្វេ សាលារៀននៅតំបន់ដាច់ស្រយាល តុកតុក ឬសហគ្រិនខ្នាតតូចឲ្យមកផ្សព្វផ្សាយជាមួយកម្មវិធីនេះ។ ហើយជាកម្រិតបន្ទាប់នៃភាពជាដៃគូរវាងវីង និង YouAdme រាប់តាំងពីអ្នកដែលគ្មានគណនីធនាគារឲ្យមានគណនីធនាគារ អ្នកដែលមិនទាន់បានផ្សព្វផ្សាយឲ្យមកផ្សព្វផ្សាយ និងអ្នកដែលមិនទាន់បានធ្វើទីផ្សារឲ្យមកធ្វើទីផ្សារ»។
ដោយអនុលោមតាមគោលដៅ និងគោលបំណងរបស់វីងគឺផ្តល់ឲ្យពលរដ្ឋកម្ពុជាគ្រប់រូបនូវសេវាហិរញ្ញវត្ថុតាមរយៈទូរស័ព្ទដៃ ហើយភាពជាដៃគូនេះនឹងផ្តល់ឱកាសដល់សហគ្រិនខ្នាតតូចក៏ដូចជាអតិថិជនទាំងទីក្រុង និងជនបទឱ្យមានភាពច្នៃប្រឌិតក្នុងការរកប្រាក់ចំណូល និងដើម្បីធ្វើឲ្យអាជីវកម្មរបស់ពួកគេរីកចម្រើន។
លោក Malolos ជឿជាក់ថាភាពជាដៃគូនេះមិនដូចដៃគូដទៃទៀតដែលវីងធ្លាប់បានចុះហត្ថលេខាពីមុនទេពីព្រោះវាជាការធ្វើសមាហរណកម្មយុទ្ធសាស្ត្រ ទេពកោសល្យ គំនិត ធនធាន និងគោលដៅរួមដើម្បីលើកកម្ពស់ប្រាក់ចំណូល។
ភាពជាដៃគូយុទ្ធសាស្ត្រផ្សេងទៀតរួមមានបរិយាប័ន្នហិរញ្ញវត្ថុ និងផ្តល់នូវដំណោះស្រាយឌីជីថលដែលត្រៀមរួចជាស្រេចសម្រាប់ពេលអនាគតដែលនឹងផ្លាស់ប្តូរប្រព័ន្ធអេកូនៅក្នុងប្រទេសកម្ពុជា៕