The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ហាក់​ដូចជា​ស្ថិត​ក្នុង​សុបិន​នៅ​ឡើយ​ចំពោះ​សមាហរណកម្ម​សេដ្ឋកិច្ច​អាស៊ាន




កម្ពុជា​ហាក់​ដូចជា​ស្ថិត​ក្នុង​សុបិន​នៅ​ឡើយ​ចំពោះ​សមាហរណកម្ម​សេដ្ឋកិច្ច​អាស៊ាន

មេដឹកនាំ​បណ្ដា​ប្រទេស​ក្នុង​សមាគម​អាស៊ាន​ពេល​ជួប​ប្រជុំ​នៅ​រាជធានី​ភ្នំពេញ​កាលពី​ឆ្នាំ ២០១២ កន្លង​មក។
មេដឹកនាំ​បណ្ដា​ប្រទេស​ក្នុង​សមាគម​អាស៊ាន​ពេល​ជួប​ប្រជុំ​នៅ​រាជធានី​ភ្នំពេញ​កាលពី​ឆ្នាំ ២០១២ កន្លង​មក។ ហេង ជីវ័ន

កម្ពុជា​ហាក់​ដូចជា​ស្ថិត​ក្នុង​សុបិន​នៅ​ឡើយ​ចំពោះ​សមាហរណកម្ម​សេដ្ឋកិច្ច​អាស៊ាន

ចាប់​តាំង​ពី​កិច្ចប្រជុំ​ថ្នាក់​ដឹកនាំ​អាស៊ាន​លើក​ទី​២៧ នៅ​ថ្ងៃ​ទី​២២ ខែ​វិច្ឆិកា ឆ្នាំ​២០១៥ នៅ​ទី​ក្រុង​គូឡាឡាំពួ​នៃ​ប្រទេស​ម៉ាឡេស៊ី​បាន​អនុម័ត​ឲ្យ​ដំណើរការ​សមាហរណកម្ម​សេដ្ឋកិច្ច​អាស៊ាន​ដែល​អាច​វាស់វែង​បាន​ពី​ឆ្នាំ​២០១៦ ដល់​ឆ្នាំ​២០២៥។

ការ​អនុវត្ត​សមាហរណកម្ម​នេះ​គឺ​ស្រប​គ្នា​ជាមួយ​នឹង​ទស្សនទាន​សមាគម​អាស៊ាន​ឆ្នាំ​ ២០២៥ និង​ផែន​ការ​ស្ថិរភាព​នយោបាយ និង​សង្គម​វប្បធម៌​ក្នុង​សមាគម​អាស៊ាន​ឆ្នាំ​ ២០២៥ ​ផង​ដែរ​។ គោល​បំណង​សមាហរណកម្ម​សេដ្ឋកិច្ច​អាស៊ាន​នេះ​គឺ​ចង់​បង្កើត​ផលិតផល និង​ទីផ្សារ​តែ​មួយ​ដែល​មាន​មូលដ្ឋាន​នៅ​សមាគម​ប្រទេស​អាស៊ាន​ដើម្បី​លើក​កម្ពស់​ការ​ប្រកួត​ប្រជែង​នៅ​ក្នុង​តំបន់ លើក​កម្ពស់​ការ​អភិវឌ្ឍ​សេដ្ឋកិច្ច​ព្រមៗ​គ្នា​នៅក្នុង​តំបន់​ដើម្បី​សមាហរណកម្ម​អាស៊ាន​ទៅ​ក្នុង​សេដ្ឋកិច្ច​លើ​សកលលោក (www.asean.org)​។

ជាមួយ​គ្នា​នេះ​ដែរ​រាជរដ្ឋាភិបាល​បាន​ដាក់​វិស័យ​អាទិភាព​ចំនួន​ ១២ ដែល​មាន​វិស័យ​ខ្លះ​មាន​ស្រាប់​ហើយ​គឺ​ដាក់​ឲ្យ​តែ​បានៗ​ទៅ​ស្ងាត់ៗ​ក្នុង​សមាហរណកម្ម​សេដ្ឋកិច្ច​អាស៊ាន​នេះ​ដូចជា ផលិតផល​ដែល​ចេញ​ពី​រោងចក្រ​រួម​មាន​កសិឧស្សាហកម្ម ត្រី កាត់ដេរ​។ មាន​បញ្ចូល​ជ័រ​កៅស៊ូ ឈើ គ្រឿងយន្ត គ្រឿង​អេឡិចត្រូនិក​។ រីឯ​ផ្នែក​ការ​ថែទាំ​សុខភាព បច្ចេកវិទ្យា-ព័ត៌មានវិទ្យា​ e-ASEAN ការ​ដឹក​ជញ្ជូន​តាម​យន្តហោះ ទេសចរណ៍ និង​សេវា​ដឹក​ជញ្ជូន​ក៏​ត្រូវ​បាន​កំណត់​នៅ​ក្នុង​អាទិភាព​ផង​ដែរ​។ ចំពោះ​វិស័យ​អាទិភាព​ទាំង​នេះ តើ​ម្ចាស់​សាមី​ស្ថាប័ន ក្រុមហ៊ុន ឬ​អ្នក​ឯកទេស​មាន​ដឹង​ខ្លួន​ហើយ​នៅ​?​តើ​ព័ត៌មាន​ទាំង​អស់​មាន​ប្រជាពលរដ្ឋ​ប៉ុន្មាន​នាក់​ដែល​ពាក់ព័ន្ធ​បាន​ដឹង​ពី​សមាគម​សេដ្ឋកិច្ច​អាស៊ាន​គេ​ធ្វើ​អី​នោះ​? ថា​តើ​មាន​ប៉ុន្មាន​នាក់​ដែល​រៀបចំ​យុទ្ធសាស្ត្រ ឬ​ក៏​ផែនការ​ធ្វើឲ្យ​ទៅ​តាម​ស្តង់ដារ និង​គុណភាព ឬ​ក៏​បាន​ត្រៀម​ខ្លួន​រួច​ហើយ​នោះ?

បើ​និយាយ​សារព័ត៌មាន​ក្នុង​ស្រុក​បាន​បង្ហាញ​អំពី​សមាហរណកម្ម​សេដ្ឋកិច្ច​អាស៊ាន​នេះ​មាន​តិច​តួច​ណាស់​និយាយ​ជា​រួម​គឺ​អ្នក​សារព័ត៌មាន​មាន​ចំណេះ​តិចតួច​ពេក​ពី​អាស៊ាន​នេះ​។ ហេតុ​ដូច្នេះ​ហើយ​ធ្វើ​ឲ្យ​ពួកគេ​ញញើត​ញញើម​ក្នុង​ការ​សរសេរ​ព័ត៌មាន​ស្តី​ការ​វិវឌ្ឍ​របស់​សមាគម​អាស៊ាន ផ្សព្វផ្សាយ​ជូន​ប្រជាពលរដ្ឋ​។ អ៊ីចឹង​ហើយ​មាន​តែ​សរសេរ​នៅ​វិលវល់​តែ​រឿង​នយោបាយ​បែប​ឆ្មា និង​កណ្តុរ​ដដែល​ទៅ​តាម​ការ​គាំទ្រ​គណបក្ស​នយោបាយ​រៀងៗ​ខ្លួន​ស្ទើរ​តែ​ធ្វើ​ឲ្យ​ពុល​អ្នក​តាមដាន​សភាពការណ៍​។ នៅ​ពេល​ដែល​គេ​អញ្ជើញ​ចូលរួម​យក​ព័ត៌មាន​ពី​អាស៊ាន​ម្តងៗ​ធ្វើ​ភ្នែក​ឡិងឡង់ ពិបាក​ទាំង​យល់ និង​ទាំង​ការ​ស្តាប់​។ ចំណុច​នេះ​បើ​នៅ​ប្រទេស​ថៃ​វិញ​ខ្ញុំ​បាន​ធ្វើ​ទស្សនកិច្ច​នៅ​សមាគម​អ្នក​កាសែត​ថៃ​គឺ​គេ​អញ្ជើញ​អ្នក​ជំនាញ​ខាង​ការ​សិក្សា​ពី​អាស៊ាន​តែ​ម្តង​មក​ធ្វើ​បទបង្ហាញ​ដើម្បី​បង្កើន​ចំណេះដឹង​ស្តីពី​អាស៊ាន និង​ទំនាក់​ទំនង​របស់​សហគមន៍​នេះ​។

ពេល​ខ្លះ​ការ​កំណត់​គោលដៅ​ពង្រីក​ផលិតផល​ធំ​ពេក​របស់​រាជរដ្ឋាភិបាល​ធ្វើឲ្យ​បរាជ័យ​ទៅវិញ ឧទាហរណ៍​ករណី​ «​ភូមិ​មួយ​ ផលិត​ផល​មួយ​»​។ កាលពី​មិន​ទាន់​ចេញ​យុទ្ធសាស្ត្រ​នេះ​នៅ​ឃុំ​កោះដាច់​មាន​អ្នក​ធ្វើ​សូត្រ ហូល ផាមួង​សឹង​តែ​គ្រប់​ផ្ទះ​តែ​គ្រាន់​ចេញ​យុទ្ធសាស្ត្រ​នេះ​មក​នៅ​កោះដាច់​គេ​លែង​ចង់​ធ្វើ​ហូល​ផាមួង​អស់​ព្រោះ​ធ្វើ​យូរៗ​ខាត​តែ​ពេល​វេលា​ហើយ​គ្មាន​ទីផ្សារ​ទៀត​។ រីឯ​អ្នក​ធ្វើ​ស្រែ​ចម្ការ​មួយ​ចំនួន​ធំ​ក៏​បរាជ័យ​ដែរ​នៅពេល​ដែល​ធ្វើ​បាន​ផល​ហើយ​គ្មាន​ទីផ្សារ ឬ​ទីផ្សារ​មាន​តម្លៃ​ថោក​ធ្វើ​ឲ្យ​ពួកគេ​ដាច់​ចិត្ត​ធ្វើ​ចំណាក​ស្រុក​ទៅ​ធ្វើ​ខ្ញុំ​គេ​ខុស​ច្បាប់​នៅ​ប្រទេស​ជិត​ខាង​។ បច្ចុប្បន្ន​នេះ​គឺ​នាំ​ចូល​មក​​ដល់​ផ្សារ​ដើមគ​តែ​ម្តង​នូវ​បន្លែ​បន្លុក​ផ្លែ​ឈើ​ស្ទើរតែ​ទាំង​ស្រុង​ពី​ប្រទេស​វៀតណាម និង​ប្រទេស​ថៃ​។

ម្យ៉ាង​វិញ​ទៀត​គុណភាព និង​សមត្ថភាព​ផ្តល់​សេវា​យើង​នៅ​មាន​កម្រិត​នៅ​ឡើយ​ទេ​ធ្វើឲ្យ​ការ​ប្រកួត​ប្រជែង​ដែល​ដាក់​ក្នុង​វិស័យ​អាទិភាព​ ការ​ថែទាំ​សុខាភាព​ដែល​សូម្បី​តែ​ប្រជាពលរដ្ឋ​ខ្លួន​ឯង​ហ្នឹង​មិន​ទាន់​ជឿជាក់​លើ​សេវា​សុខាភិបាល​យើង​នៅ​ឡើយ​ទេ​ជាពិសេស​នោះ​គឺ​តាំង​ពី​ការ​ប្រឡង​ឡើង​ថ្នាក់​វិជ្ជាជីវៈ​សុខាភិបាល​នៅ​ទាប​ហើយ​និស្សិត​ធ្វើ​បាតុកម្ម​សុំ​ជាប់ ឬ​ក៏​សូក​លុយ​ជាប់​នោះ នេះ​បង្ហាញ​ពី​ចំណុច​ខ្សោយ​តាំងពី​នៅ​រៀន​មក​ម្ល៉េះ។

រីឯ​វិជ្ជាជីវៈ​មេធាវី​ក៏​នៅ​ទាប​ដែរ​ពិបាក​ប្រើ​ការ និង​ចូលរួម​ប្រកួត​ប្រជែង​ជាមួយ​ប្រទេស​គេ​នោះ​បើ​ទោះ​បី​ជា​ច្បាប់​ហាមឃាត់​មិន​ឲ្យ​មេធាវី​បរទេស​ធ្វើ​នៅ​ស្រុក​ខ្មែរ​ក៏​មេធាវី​ខ្មែរ​ពូកែ​ខាង​រត់​ឯកសារ​ខ្លះ​ជួល​មេធាវី​បរទេស​ធ្វើ​ជា​ទីប្រឹក្សា​តែ​នៅ​ពេល​ដែល​មាន​គេ​ជួល​រឿង​ធំៗ​គឺ​មេធាវី​បរទេស​មក​ឆ្លើយឆ្លង​កូន​ក្តី ឬ​ក៏​គូ​បណ្តឹង​ធ្វើ​ដូច​គាត់​ហ្នឹង​ស្រប​ច្បាប់​អ៊ីចឹង​។ នេះ​បង្ហាញ​ពី​ចំណុច​ខ្សោយ​របស់​មេធាវី​មួយ​ចំនួន​ធំ​ដែល​កាល​គាត់​ប្រឡង​ក៏​សូក​ទៅ​តាម​សម័យកាល​ឮ​ថា​មាន​តាំង ៣ ​ដល់​ ៥ ​ម៉ឺន​ដុល្លារ​ដល់​ពេល​រៀន​ក៏​សូក​ទៀត​អ៊ីចឹង​ធ្វើការ​អី​ចេញ​មាន​សមត្ថភាព​ត្រឹម​តែ​រត់​ឯកសារ​ និង​ស៊ី​ប្រថាប់ត្រា​លើ​ឯកសារ​តែ​ប៉ុណ្ណឹង​។

ជាង​នេះ​ទៅ​ទៀត​ក្រុមហ៊ុន​របស់​ឧកញ៉ា​ខ្លះ​រកស៊ី​កោរ​បាន​តែ​នៅ​ក្នុង​ស្រុក​ទេ​តែ​ដល់​ពង្រីក​ទីផ្សារ​ទៅ​ក្រៅ​ប្រទេស​ដើម្បី​យក​ប្រាក់​ចំណូល​មក​ស្រុក​វិញ​ទៅ​តាម​ស្តង់ដារ​អាស៊ាន​នោះ​គឺ​មិន​សូវ​ហ៊ាន​ទៅ​ទេ​ខ្លាច​រកស៊ី​មិន​ឈ្នះ​គេ​ដេញ​ថ្លៃ​មិន​ឈ្នះ​គេ​ហើយ​គុណភាព​ទាប​ជាង​គេ​។ សព្វថ្ងៃ​នេះ​ឃើញ​មាន​ធនាគារ​អេស៊ីលីដា​ចាប់ផ្តើម​ចេញ​បើក​សាខា​នៅ​ក្រៅ​ប្រទេស​ហើយ​មាន​នៅ​ប្រទេស​ឡាវ និង​ប្រទេស​មីយ៉ាន់ម៉ា។

ដូច្នេះ​សមាហរណកម្ម​សេដ្ឋកិច្ច​អាស៊ាន​បាន​ត្រឹម​តែ​នៅក្នុង​សុបិន​នៅ​ឡើយ​ទេ​សម្រាប់​ពួកគេ​នៅ​តែ​មិន​ហ៊ាន​តើ​ពេល​ណា​បាន​ហ៊ាន​?

បើ​យើង​សង្កេត​មើល​តាម​បណ្តា​ខេត្ត​នានា​ថ្មីៗ​នេះ​យើង​ឃើញ​មាន​ក្រុមហ៊ុន​ថៃ​បាន​នាំ​សម្ភារ​ដូច​ពូក ខ្នើយ ចានឆ្នាំង និង​សម្ភារ​ផ្សេងៗ​ទៀត​មក​ប្រទេស​យើង​ទាំង​ឡានៗ​បាន​ដើរ​ផ្សព្វផ្សាយ​ពី​ផលិតផល និង​លក់​នៅ​តាម​ស្រុក​ទីប្រជុំជន​តាមរយៈ​រៀបចំ​ការ​ប្រគំ​តន្ត្រី​ហើយ​កាល​ពី​សប្តាហ៍​មុន​នេះ​ក្រុមហ៊ុន​ K-cement បាន​អញ្ជើញ​ក្រុម​បាល់ទាត់​ជើងឯក​រង​របស់​ថៃ Muangthong-United មក​ប្រកួត​មិត្តភាព​ជាមួយ​ក្រុម​ជម្រើស​ ១១ ​នាក់​ដែល​លេង​នៅ​ក្នុង​លីក​នៅ​កម្ពុជា​ជា​ប្រវត្តិសាស្ត្រ​នេះ​ដើម្បី​យក​ថវិកា​ដែល​ប្រមូល​បាន​មក​ជូន​មន្ទីរពេទ្យ​គន្ធបុប្ផា។ នេះ​បង្ហាញ​ពី​ការ​ចាប់​ផ្តើម​សមាហរណកម្ម​បណ្តើរៗ​ហើយ​ចុះ​ពេល​ណា​បាន​ក្រុមហ៊ុន​ខ្មែរ​ទៅ​លក់​នៅ​ប្រទេស​គេ​វិញ​? មាន​អ្វី​ខ្លះ​ទៅ​លក់​?

ទោះ​យ៉ាង​ណា​ក៏​មាន​វិស័យ​អប់រំ​ត្រូវ​បាន​ពង្រឹង​គុណភាព​រយៈពេល​ ២ ​ឆ្នាំ​ចុង​ក្រោយ​នេះ​នៅ​កម្រិត​វិទ្យាល័យ និង​ឈាន​ទៅ​រក​សាកលវិទ្យាល័យ​បណ្តើរៗ​ដូចជា​វិស័យ​បច្ចេកទេស ភាសា​អង់គ្លេស និង​មុខវិជ្ជា​ទំនាក់​ទំនង​អាស៊ាន និង​ការ​ធ្វើ​ផ្លាស់ប្តូរ​បទពិសោធ​គ្នា​បណ្តា​ប្រទេស​អាស៊ាន​នេះ​ធ្វើ​យ៉ាង​ណា​ឲ្យ​និស្សិត​ដែល​ចេញ​ពី​សាកលវិទ្យាល័យ​មក​មាន​ភាព​រឹងប៉ឹង ឈប់​ភ័យ ខ្លាច​ការ​ធ្វើ​ការងារ​នៅ​ថ្នាក់​តំបន់​នេះ​។

ហេតុ​ដូចនេះ​ហើយ​ទើប​តម្រូវ​ឲ្យ​មាន​ការ​ទទួល​បាន​នូវ​ព័ត៌មាន​ឲ្យ​បាន​ច្រើន​ទាក់ទង​នឹង​បញ្ហា​អាស៊ាន និង​ការ​ធ្វើ​សមារណកម្ម​សេដ្ឋកិច្ច​អាស៊ាន​នេះ​ឲ្យ​បាន​ទូលំទូលាយ​ជាពិសេស​ការ​ពង្រឹង​សមត្ថភាព​ខ្លួន​ឯង ការ​ខិតខំ​រក​ទីផ្សារ និង​ការ​លុប​បំបាត់​អំពើ​ពុករលួយ​ដើម្បី​កុំ​ឲ្យ​ចេះ​តែ​សុបិន និង​ភិតភ័យ​តទៅ​ទៀត​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

អត្ថបទគួរចាប់អារម្មណ៍