.jpg)
លោកនាយករដ្ឋមន្ត្រី ហ៊ុន សែន និងអ្នកដំណើរនាវា Westerdam កាលពីថ្ងៃសុក្រ។ រូបថតក្រសួងការបរទេស
នៅពេលដែលពិភពលោកពោរពេញទៅដោយព័ត៌មានសោកសៅទាក់ទងនឹងការផ្ទុះវីរុសកូរ៉ូណា ឬ Covid-19 បទចម្រៀងរបស់ជប៉ុនដែលមានចំណងជើងថា “Ue oMuite Arukou” (ឬប្រែថាយើងនាំគ្នាដើរងើយទៅលើ) ច្រៀងដោយលោក គ្យូ សាកាម៉ូតូ កាលពីឆ្នាំ ១៩៦១ បានបន្លឺឮរណ្តំនៅក្នុងអារម្មណ៍របស់ខ្ញុំ។ នៅគ្រាលំបាក សិល្បៈ និងបទចម្រៀងអាចជាវិធីសណ្តំអារម្មណ៍មួយ។
“ខ្ញុំសម្លឹងមើលទៅលើ ពេលដែលខ្ញុំដើរ ដើម្បីកុំឱ្យទឹកភ្នែកខ្ញុំស្រក់ ខ្ញុំនឹកឃើញដល់រដូវផ្ការីកដ៏ស្រស់បំព្រង...ក្តីសប្បាយទាំងឡាយគឺនៅលើពពកនោះឯង ក្តីសប្បាយទាំងឡាយគឺនៅលើមេឃនោះឯង...ក្តីសោកសៅសូមដាក់នៅក្រោយស្រមោលតារា ក្តីសោកសៅសូមដាក់នៅក្រោយស្រមោលព្រះចន្ទ”។
តើយើងពង្រឹងស្មារតីយើងរបៀបម៉េចនៅពេលជួបកាលៈទេសៈសោកសៅ និងទាន់ហន់?
នៅពេលដែលមានរឿងពាក់ព័ន្ធនឹងអាយុជីវិតមនុស្ស យើងមិនអាចគេចវេះពីមនោសញ្ចេតនាបានទេ។ ពិភពលោកយើងកំពុងតែប្រយុទ្ធនឹងវីរុសថ្មីមួយដែលយើងទាំងអស់គ្នាពុំបានដឹងឮពីមុនមក។ ការភ័យខ្លាច ភាពតក់ស្លុត ហានិភ័យសុខភាព ហានិភ័យសេដ្ឋកិច្ច វិធានការទប់ស្កាត់ការរីករាលដាល ជំនឿទុកចិត្តលើអាជ្ញាធរទាំងអស់នេះគឺសុទ្ធតែជាបញ្ហាស្មុគស្មាញដែលយើងត្រូវធ្វើចំណាត់ការ។ ការធ្វើចំណាត់ការប្រកបដោយភាពនឹងនរ និងទទួលការជឿទុកចិត្ត ពិតជាមិនមែនជាការងារងាយស្រួលនោះទេ ហើយទាមទារឱ្យមានស្មារតីរឹងប៉ឹងខ្លាំងណាស់នៅចំពោះមុខវិបត្តិបែបនេះ។
នៅក្រោមព្រិលធ្លាក់ លោកនាយករដ្ឋមន្ត្រី ហ៊ុន សែន និងប្រតិភូបានធ្វើទស្សនកិច្ចនៅទីក្រុងប៉េកាំងកាលពីថ្ងៃទី ៥ ខែកុម្ភៈ ដោយមិនពាក់ម៉ាស់។ កម្ពុជាបានផ្តល់ការគាំទ្រផ្នែកស្មារតីតាមរយៈការបង្ហាញវត្តមានជាក់ស្តែងដោយថ្នាក់ដឹកនាំកំពូលដែលជាថ្នាក់ដឹកនាំដំបូង ហើយមកទល់ពេលនេះគឺនៅតែជាថ្នាក់ដឹកនាំតែ ១ គត់ដែលបានធ្វើទស្សនកិច្ចនៅចិន បន្ទាប់ពីការផ្ទុះវីរុស នៅពេលដែលប្រទេសជាច្រើនមិនហ៊ានយកខ្លួនទៅបៀតជាមួយចិន និងដាក់បម្រាមធ្វើដំណើរទៅចិន ឬទទួលជនជាតិចិន។ល។
ព្រះករុណា ព្រះមហាក្សត្រ ព្រះបាទសម្តេចព្រះបរមនាថនរោត្តម សីហមុនី និងសម្តេចព្រះមហាក្សត្រីនរោត្តម មុនិនាថសីហនុ ព្រះវររាជមាតាជាតិខ្មែរ ថែមទាំងបានថ្វាយនូវព្រះរាជទ្រព្យផ្ទាល់របស់ព្រះអង្គដល់ប្រទេសចិនទៀតផង។
ព្រឹត្តិការណ៍ថ្មីមួយទៀតបានធ្វើឱ្យពិភពលោកក្រឡាប់ចាក់។ ប្រទេសតូចមួយដែលតែងតែលេចឮព័ត៌មានអវិជ្ជមាន បានធ្វើឱ្យពិភពលោកភ្ញាក់ផ្អើល។
កម្ពុជាមានសេចក្តីក្លាហានក្នុងការទទួលអ្នកដំណើរ និងនាវិកលើកប៉ាល់កម្សាន្ត វេស្ទ័រដាម (Westerdam) ឱ្យចូលចតនៅកំពង់ផែក្រុងព្រះសីហនុ បន្ទាប់ពីបានពិនិត្យឃើញថាពុំមាននរណាម្នាក់មានផ្ទុកវីរុសកូរ៉ូណា។ កប៉ាល់នេះត្រូវបានប្រទេស ៥ បដិសេធការសុំចតដោយមានភ្ញៀវ ១៤៥៥ នាក់ និងនាវិក ៨០២ នាក់មកពីប្រទេស ៤១។
ពួកគេត្រូវបានទទួលស្វាគមន៍យ៉ាងកក់ក្តៅជាមួយនឹង “ក្រមាខ្មែរ” និងផ្កាកុលាបនៅចំថ្ងៃវ៉ាលែនថាញ ឬ “ទិវានៃក្តីស្រឡាញ់”។
លោកបណ្ឌិត Tedros Adhanom Ghebreyesus អគ្គនាយកអង្គការសុខភាពពិភពលោកបានសរសេរលើ Twitter របស់លោកថា “កម្ពុជាគឺជាគំរូនៃសាមគ្គីភាពអន្តរជាតិដែលពិភពលោកទាំងមូលកំពុងតែខិតខំអំពាវនាវស្វែងរក។ ខ្ញុំពិតជាអរគុណយ៉ាងជ្រាលជ្រៅដល់រដ្ឋាភិបាល ជាពិសេសលោក នាយករដ្ឋមន្ត្រី ហ៊ុន សែន ដែលបានទទួលកប៉ាល់ Westerdam និងអ្នកដំណើរ។ នេះគឺជាពេលដែលត្រូវសម្តែងសាមគ្គីភាព មិនមែនជាពេលដែលត្រូវមាក់ងាយរើសអើងនោះទេ។”
ឯកអគ្គរដ្ឋទូតអាមេរិក Patrick Murphy បានសរសេរនៅលើ Twitter របស់លោកថា “យើងអរគុណយ៉ាងធំធេងចំពោះការគាំទ្ររបស់អាជ្ញាធរ និងប្រជាជនកម្ពុជាក្នុងការជួយដល់អ្នកដំណើរទាំងអស់នៅលើកប៉ាល់ Westerdam” ហើយសរសេរទៀតថា “ទិដ្ឋភាពដ៏សែនកក់ក្តៅនៅក្រុងព្រះសីហនុ នៅពេលដែលអ្នកដំណើរចាប់ផ្តើមចុះពីកប៉ាល់ Westerdam ជាមួយនឹងការសម្តែងយ៉ាងពេញលេញនូវបដិសណ្ឋារកិច្ចបែបខ្មែរ។”
ស្ថានទូតនៃប្រតិភូសហភាពអឺរ៉ុបនៅកម្ពុជាក៏បានសរសេរនៅលើ Facebook របស់ខ្លួនថា «ប្រតិភូសហភាពអឺរ៉ុបនៅកម្ពុជាសូមសម្តែងអំណរគុណចំពោះអាជ្ញាធរកម្ពុជាដែលបានអនុញ្ញាតឱ្យកប៉ាល់ Westerdam ចូលចត និងបានសម្តែងនូវមនោសញ្ចេតនាអាណិតអាសូរដល់អ្នកដំណើរ និងនាវិកទាំងអស់នៅលើកប៉ាល់។ យើងសង្ឃឹមថា ពួកគេនឹងធ្វើមាតុភូមិនិវត្តន៍ប្រកបដោយសុវត្ថិភាព»។
តើពាក្យថា “សិទ្ធិមនុស្ស” មិនផ្តើមចេញពី “ជីវិតមនុស្ស” ទេឬ?
ភាពមេត្តាធម៌ មនុស្សធម៌ និងមនោសញ្ចេតនា អាណិតអាសូរ ត្រូវបានសម្តែងចេញយ៉ាងឱឡារិកពីប្រទេសកម្ពុជា។ «កម្ពុជាៈប្រទេសតូច បេះដូងធំ»។ នេះគឺជា “បេះដូងអង្គរ” ដែលជាបេះដូងធំធេងដូចមហាសាគរ ប្រកបដោយភាពមេត្តាករុណានៃប្រជាជនខ្មែរ។ ពិភពលោកពេញដោយក្តីស្រឡាញ់៕ ស៊ឹម វីរៈ ទីប្រឹក្សាយុទ្ធសាស្ត្រនៃវិទ្យាស្ថានចក្ខុវិស័យអាស៊ី (AVI)
