The Phnom Penh Post Search

Search form




Logo of Phnom Penh Post newspaper Phnom Penh Post - ករណី​ពុល​សាច់​ឆ្កែ​នៅ​​ ក្រចេះ ​ជា​មេរៀន​សម្រាប់​អ្នក​ចូលចិត្ត​សាច់​សត្វ​សុនខ




ករណី​ពុល​សាច់​ឆ្កែ​នៅ​​ ក្រចេះ ​ជា​មេរៀន​សម្រាប់​អ្នក​ចូលចិត្ត​សាច់​សត្វ​សុនខ

សត្វ​ឆ្កែ​ដែល​គេ​ដោះដូរ​ជាមួយ​ឆ្នាំង ខ្ទះ ចានដែក នៅ​ក្រុង​ពោធិ៍សាត់​កាលពី​សប្តាហ៍​មុន។
សត្វ​ឆ្កែ​ដែល​គេ​ដោះដូរ​ជាមួយ​ឆ្នាំង ខ្ទះ ចានដែក នៅ​ក្រុង​ពោធិ៍សាត់​កាលពី​សប្តាហ៍​មុន។ រូបថត តុង សុប្រាជ្ញ

ករណី​ពុល​សាច់​ឆ្កែ​នៅ​​ ក្រចេះ ​ជា​មេរៀន​សម្រាប់​អ្នក​ចូលចិត្ត​សាច់​សត្វ​សុនខ

ទៅ​ណា​មក​ណា​សព្វ​ថ្ងៃ​នេះ​ឮ​តែ​អួត​ដាក់​គ្នា​ពី​រឿង​ហូបចុក​ហើយ​និង​ផឹក​ដោយ​ចេះ​តែ​បែក​គំនិត​តៗ​ជោរ​តាម​គ្នា​ទៅ​តាម​ឋានានុក្រម​អ្នក​ធំៗ​អ្នក​ធូរធារ​ទៅ​ដោយ​គេ​អួត​ពី​រឿង​ការ​ហូប​សាច់​សត្វ​ប្លែកៗ​ដូច​ជា​ពពួក​សត្វ​ព្រៃ​ថា​ប៉ូវ​សាច់ដុំ​ខ្លះ​ថា​ប៉ូវ​ផ្លូវ​ភេទ​ហើយ​មាន​ខ្លះ​ទៀត​ក៏​បែរ​ជា​មក​ចូលចិត្ត​សាច់​ឆ្កែ​ដែល​ជា​សត្វ​ចិញ្ចឹម​ក្នុង​ផ្ទះ​ក៏​ពោល​ថា​ឆ្ងាញ់​ក៏​មាន​ដែរ​ជាមួយ​នឹង​ការ​ក្លែម​ជាមួយ​ស្រា​ និង​ស្រា​បៀរ​ល្បីៗ​។

រីឯ​អ្នក​ក្រ​ខ្វះខាត​វិញ​គឺ​អួត​ថា​ឲ្យ​តែ​មាន​សាច់​អី​ហូប​គឺ​ហូប​ហ្នឹង​មិន​ថា​ឆ្កែ ឬ​ឆ្មា​នោះ​ទេ​រីឯ​ស្រា​វិញ​គឺ​មាន​តែ​ស្រាស​ហ្នឹង​ហើយ​ដែល​មាន​តម្លៃ​ថោក​ហើយ​រក​តែ​អា​ខ្លាំង​ទៀត​ព្រោះ​អី​ស្រវឹង​ដូច​តែ​គ្នា។

ការ​ខំ​ផឹក​ស្រាស​នៅ​តាម​ភូមិ​គឺ​ហាក់​ដូចជា​មាន​បំណង​ធ្វើ​ឲ្យ​ដូច​ក្នុង​ចម្រៀង​ខារ៉ាអូខេ​ដែល​ផលិតកម្ម​ហង្សមាស​បាន​ផ្សាយ​មាន​ដូចជា​បទចម្រៀង​ «ឃើញ​សង្សារ​ខ្ញុំ​ទេ​ពូកែ​មែន​ និង​ប៉ា​ដឹង​ប៉ា​វ៉ៃ» ជាដើម។

ជា​ផល​វិបាក​ការ​ដែល​ចេះ​តែ​ហូប និង​ផឹក​ពាស​ទឹក​ពាស​ដី​មិន​បាន​គិត​អំពី​សុវត្ថិភាព​នៃ​ចំណី​អាហារ​ជាពិសេស​សាច់​ឆ្កែ និង​ស្រាស​ដែល​ធ្វើ​ឲ្យ​ពុល​មនុស្ស​នៅ​ក្នុង​ស្រុក​ស្នួល និង​ស្រុក​ចិត្រ​បុរី​ខេត្ត​ក្រចេះ​ក្នុង​រយៈពេល​ ៣ ​សប្តាហ៍​ចុង​ក្រោយ​នេះ​បាន​បង្ក​ឲ្យ​មាន​ចំនួន​អ្នក​ស្លាប់​កើន​ឡើង​ដល់​ ១៩ ​នាក់ និង​អ្នក​ជំងឺ​ ១៧២ ​នាក់​ទទេៗ​ហើយ​ក្រសួង​សុខាភិបាល​បាន​ខិតខំ​ផ្សព្វផ្សាយ​ដោយ​អំពាវនាវ​ឲ្យ​ឈប់​ហូប​ស្រាស និង​ស្រា​ថ្នាំ​ដែល​ផលិត​ដោយ​គ្មាន​គុណភាព​ត្រឹមត្រូវ និង​ត្រូវ​បញ្ឈប់​ការ​បរិភោគ​សាច់​សត្វ​ដែល​ឈឺ​ ឬ​ងាប់។

ក្នុង​ករណី​នេះ​គ្រាន់តែ​ពុល​សាច់​ឆ្កែ​ដែល​គេ​ដាក់​ថ្នាំ​បំពុល​ហើយ​អ្នក​ភូមិ​នាំ​គ្នា​ចែក​គ្នា​ហូប​កាលពី​សប្តាហ៍​មុន​នេះ​គឺ​មាន​អ្នក​ស្លាប់​ដល់​ទៅ​ ៥ ​នាក់ និង​អ្នក​ឈឺ​ជិត​ ៤០ ​នាក់​។ នេះ​គឺជា​សញ្ញា​គ្រោះថ្នាក់​ដែល​ជា​មេរៀន​ដ៏​ជូរចត់​មួយ​សម្រាប់​អ្នក​ចូលចិត្ត​ហូប​សាច់​អា​ភក្តី​ (ឆ្កែ) ទាំង​អ្នក​នៅ​ទីក្រុង​ទាំង​អ្នក​នៅ​ជនបទ ទាំង​អ្នក​ធំ ទាំង​អ្នក​តូច​ផង​ដែរ​។

បញ្ហា​នេះ​ត្រូវ​បាន​គេ​ចោទ​ជា​សំណួរ​ថា​តើ​អ្នក​ហូប​សាច់​ឆ្កែ​នឹង​បន្ត​ហូប​តទៅ​ទៀត​ដែរ​ឬ​ទេ​បើ​មិន​ដឹង​ថា​សាច់​ឆ្កែ​នោះ​បាន​មកពី​ការ​សម្លាប់​ដោយ​ដាក់​ថ្នាំ​ពុល​ឬ​ក៏​បាន​មក​ពី​ការ​ដោះដូរ​ជាមួយ​ចាន​ឆ្នាំង​?

ជាទូទៅ​សាច់​ឆ្កែ​ដែល​លក់​តាម​ចិញ្ចើម​ថ្នល់​ល្ងាចៗ​ក្រោម​ស្លាក​លក់​ «​សាច់​ពិសេស» ទាំង​នោះ​គឺ​គ្មាន​បាន​យក​ទៅ​ចូល​កុង​ស៊ី​ជា​កន្លែង​សត្តឃាត​ត្រួតពិនិត្យ​ដូច​សាច់​ជ្រូក សាច់​គោ​ឲ្យ​បាន​ត្រឹមត្រូវ​ទេ​ហើយ​ក៏​គ្មាន​ស្ថាប័ន​ណា​មួយ​ទទួល​ខុស​ត្រូវ​ដែរ​ពោល​គឺ​សាច់​អាភក្តី​នេះ​បាន​មក​ពី​ការ​ដើរ​ទាក់​ឆ្កែ​តាម​ថ្នល់​ការ​ជិះ​ម៉ូតូ​តាម​ភូមិ​ធ្វើការ​ដោះដូរ​ជាមួយ​នឹង​ចាន​ដែក​ឆ្នាំង និង​ខ្លះ​ដាក់​ថ្នាំ​ពុល​ឆ្កែ​យក​មក​លក់ ឬ​ក៏​ចែក​គ្នា​ហូប​ក៏​មាន​ដូចជា​ករណី​នៅ​ស្រុក​ស្នួល​ខេត្ត​ក្រចេះ​ជាដើម។ ការ​ដែល​ធ្វើ​ដូច​នេះ​ព្រោះ​ខ្មែរ​មាន​ជំនឿ​ថា​បើ​លក់​សត្វ​ឆ្កែ​ធ្វើ​ឲ្យ​អ្នក​លក់​ដាក់​រកស៊ី​មិន​បាន​។

រីឯ​ម្ចាស់​ឆ្កែ​ភាគច្រើន​ដែល​បាត់​សត្វ​ជា​ទី​ស្រឡាញ់​របស់​គេ​ដែល​ខ្លះ​បាន​ចាត់​ទុក​សត្វ​ប្រភេទ​នេះ​ជា​សមាជិក​ក្នុង​គ្រួសារ​រហូត​ហៅ​ថា​ «​អាភក្តី​» តែង​មាន​ការ​ខឹង​សម្បា​ជា​ខ្លាំង​ដោយ​ខ្លះ​ដាក់​បណ្តាសា​ ខ្លះ​ដាក់​ទំនាយ​ទៅ​តាម​ពាក្យ​ដែល​គេ​ចង់​ហើយ​ម្ចាស់​ខ្លះ​ដែល​មាន​ជីវភាព​ធូរធារ​បាន​និយាយ​ថា​ពួកគាត់​បាន​ចាក់​វ៉ាក់សាំង​ឲ្យ និង​ខ្លះ​ទៀត​ចាក់​ប្រភេទ​មេរោគ​ម្យ៉ាង​ដែល​អាច​ផ្សាំង​ជាមួយ​ឆ្កែ​ដើម្បី​បង្ការ​ជំងឺ​តែ​មិន​ធានា​ថា​ប្រភេទ​មេរោគ​មាន​សកម្មភាព​ក្នុង​ខ្លួន​មនុស្ស​នោះ​ទេ​។ ចំពោះ​ម្ចាស់​ខ្លះ​ជឿ​ថា​អាភក្តី​អាច​ជួយ​ការពារ​ផ្ទះ និង​ភូមិ​ហើយ​បាន​ហៅ​ថា​ «​សន្តិសុខ​ភូមិ​» ​ផង​ដែរ​។

ចុះ​បើ​អ្នក​ចូលចិត្ត​នាំ​គ្នា​ហូប​សាច់​ឆ្កែ​យូរៗ​ទៅ​សត្វ​ឆ្កែ​នឹង​ស្ងាត់​ភូមិ​បាន​អី​ការពារ​ផ្ទះ​ និង​ភូមិ​អ៊ីចឹង​ចង់​ចោរ​ចូល​លួច ចូល​ប្លន់​ក្នុង​ផ្ទះ និង​ចូល​ភូមិ​ក៏​មិន​ដឹង​ដែរ​ព្រោះ​គ្មាន​ឮ​សំឡេង​សន្តិសុខ​ភូមិ​ព្រុស​សោះ​។ បញ្ហា​នេះ​គឺ​ពាក់ព័ន្ធ​នឹង​តម្រូវការ និង​អ្នក​ផ្គត់ផ្គង់​សាច់​ឆ្កែ​អ៊ីចឹង​សួរ​ថា​តើ​គួរ​អ្នក​ហូប​សាច់​ឆ្កែ​ឈប់​មុន​ឬ​ក៏​អ្នក​ផ្គត់ផ្គង់​សាច់​ឆ្កែ​ឈប់​មុន​?

ករណី​នេះ​រដ្ឋ​គួរ​តែ​ប្រកាស​ទូទាំង​ប្រទេស​ពី​ការ​បញ្ឈប់​ការ​ជួញដូរ​ និង​ភោជនីយដ្ឋាន​ដែល​លក់​សាច់​ឆ្កែ​ផង​ដែរ​គឺ​ទី​ ១ ) អាភក្តី​ចូលរួម​អនុវត្ត​គោលនយោយ​បាយ​ភូមិ-ឃុំ​មាន​សុវត្ថិភាព​ជាមួយ​អាជ្ញាធរ​ដែនដី និង​សមត្ថកិច្ច​ដែរ​។ ទី​ ២) សត្វ​ឆ្កែ​ជា​ប្រភេទ​សត្វ​ចិញ្ចឹម​ក្នុង​ផ្ទះ និង​ជា​សត្វ​ជា​ទីស្រឡាញ់​មិន​គួរ​ទទួល​ទាន​ដូច​សត្វ​ស្រុក គោ ជ្រូក មាន់​ ទា នោះ​ទេ​។ ទី​ ៣) ផលវិបាក​ពី​ការ​ហូប​សាច់​ឆ្កែ​ព្រោះ​អ្នក​ហូប​មិន​បាន​ដឹង​ថា​តើ​សត្វ​ឆ្កែ​នោះ​មាន​អនាម័យ​ប៉ុន​ណា​ទេ​ព្រោះ​បើ​ប៉ះ​ចំ​អ្នក​ចម្អិន​មិន​បាន​ល្អ​ហើយ​សត្វ​ឆ្កែ​មាន​ជំងឺ​ឆ្កួត ជំងឺ​ក្នុង​ខ្លួន ឬ​ក៏​ជំងឺ​អង្គែ​ស៊ី​ដំបៅ​ខ្លួន​ជ្រុះ​រោម​អនាថា​នោះ​អាច​ធ្វើ​ឲ្យ​អ្នក​ទទួល​ទាន​សាច់​វា​ប្រឈម​នឹង​ជំងឺ​ឆ្លង​បាន​ហើយ​បើ​គ្រោះថ្នាក់​ទាន់ហន់​ទៀត​នោះ​គឺ​ប្រសិន​បើ​សត្វ​ឆ្កែ​ដែល​គេ​សម្លាប់​ដោយ​បំពុល​យក​មក​លក់​ ឬ​ក៏​ចែក​គ្នា​ហូប​គឺ​បណ្តាល​ឲ្យ​ស្លាប់ ឬ​រងគ្រោះ​ធ្លាក់​ខ្លួន​ឈឺ​ជា​ទម្ងន់​។

មួយ​វិញ​ទៀត ​បើ​មើល​ទៅ​គេ​ឃើញ​ថា​ធ្លាក់​ខ្លួន​ឈឺ​ដោយសារ​ហូប​សាច់​ឆ្កែ​ទាំង​ប្រុស ទាំង​ស្រី​យ៉ាង​ហ្នឹង​ធ្វើ​ឲ្យ​ខ្មាស​គេ​ទៀត​ផង​ព្រោះ​ប្រពៃណី​ទម្លាប់​ពលរដ្ឋ​ខ្មែរ​ជា​ជាតិសាសន៍​មួយ​មិន​យក​សាច់​ឆ្កែ​ធ្វើ​ជា​ត្រីមុខ​ដូច​ជនជាតិ​កូរ៉េ ចិន និង​វៀតណាម​ដែល​យក​សាច់​ឆ្កែ​ធ្វើ​អាហារ​ប្រចាំ​ត្រកូល​ហើយ​មាន​មុខ​មាន​មាត់​នោះ​ទេ​។

ម្យ៉ាង​វិញ​ទៀត​នៅ​ស្រុក​ខ្មែរ​កាលពី​សង្គម​រាស្ត្រ​និយម​បើ​នរណា​ហូប​សាច់​ឆ្កែ​នោះ​ត្រូវ​ចាត់​ទុក​ជា​មនុស្ស​ថា្នក់​ទាប​ក្នុង​សង្គម​។ ចុះ​ឥឡូវ​នេះ​តើ​ត្រូវ​បញ្ឈប់​ការ​ហូប​សាច់​ឆ្កែ​យ៉ាង​ដូច​ម្តេច​បើ​អ្នក​ធំៗ​ទាំង​អ្នក​ធ្វើ​ច្បាប់​មួយ​ចំនួន​សុទ្ធតែ​អ្នក​ចូលចិត្ត​ហូប​សាច់​ឆ្កែ​ដែរ​យ៉ាង​ហ្នឹង​? សូម្បី​តែ​លោក កែប ជុតិមា ​អតីត​អភិបាល​រាជធានី​ភ្នំពេញ​ក៏​ធ្លាប់​សរសើរ​ថា​សាច់​អាភក្តី​ឆ្ងាញ់​ដែរ​ហើយ​លើក​ទឹកចិត្ត​ពលរដ្ឋ​ឲ្យ​ហូប​សាច់​ឆ្កែ​ទៀត​ផង​ព្រោះ​កាល​នោះ​លោក​ថា​ចំនួន​សត្វ​ឆ្កែ​អនាថា​ច្រើន​នៅ​ទីក្រុង​។

អ៊ីចឹង​ទាល់តែ​អ្នក​ធំៗ​ទាំង​អ្នក​ផលិត​ច្បាប់​ដែល​នៅ​ហូប​សាច់​ឆ្កែ​ឈប់​ហូប​មុន​ហើយ​បង្កើត​ច្បាប់​បញ្ឈប់​ហូប​សាច់​ឆ្កែ​តាម​ក្រោយ​បាន​ការ​អនុវត្ត​ច្បាប់​ប្រឆាំង​នឹង​ការ​ទទួល​ទាន​សាច់​អាភក្តី​មាន​ប្រសិទ្ធភាព​។ រវាង​ការ​បង្កើត​ច្បាប់ និង​ផ្លាស់ប្តូរ​ឥរិយាបថ​របស់​មនុស្ស​មួយ​ណា​ត្រូវ​កែប្រែ​ជា​វិជ្ជមាន​មុន​ក៏​បាន​ឲ្យ​តែ​មាន​ឆន្ទៈ​​ក្នុង​ការ​ធ្វើ​ និង​អនុវត្ត​ឲ្យ​បាន​ច្បាស់លាស់​នោះ​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

អត្ថបទគួរចាប់អារម្មណ៍