នៅក្នុងប្រទេសកម្ពុជាបើនិយាយអំពីមជ្ឈមណ្ឌលបច្ចេកវិទ្យាហិរញ្ញវត្ថុហាក់នៅមិនទាន់ទូលំទូលាយនៅឡើយទេ ប៉ុន្តែនៅទូទាំងតំបន់អាស៊ីអាគ្នេយ៍ អត្ថប្រយោជន៍នៃការប្រើប្រាស់ប្រព័ន្ធបច្ចេកវិទ្យាហិរញ្ញវត្ថុឌីជីថលនេះ កើនឡើងគួរឲ្យកត់សម្គាល់។ និយាយជារួមជំហានប្រើប្រាស់បច្ចេកវិទ្យានេះ អាចបង្កើនកម្រិតទទួលបានដើមទុន និងហិរញ្ញវត្ថុដែលជាតម្រូវការចាំបាច់នៅក្នុងប្រទេសដែលកំពុងអភិវឌ្ឍន៍នៅតំបន់អាស៊ី។
ប៉ុន្ដែការទូទាត់រូបិយប័ណ្ណឌីជីថលដូចជា blockain, cryptocurrencies, Bitcoin និង Ethereum ក៏ដូចជាសេវាផ្តល់សាច់ប្រាក់ដំបូង ឬហៅថា ICOs គឺជាមធ្យោបាយថ្មីមួយនៃការវិវឌ្ឈការប្រើប្រាស់រូបិយប័ណ្ណឌីជីថល ដែលវាអាចនឹងបង្អាក់ដល់លំហូរឧស្សាហកម្មធនាគារ និងសេវាកម្មហិរញ្ញវត្ថុកាន់តែច្រើន។
ការឲ្យនិយមន័យជាទូទៅលើពាក្យថា បច្ចេកវិទ្យាហិរញ្ញវត្ថុ (fintech) គឺសំដៅលើបច្ចេកវិទ្យា ដែលកំពុងផ្តល់ការច្នៃប្រឌិតថ្មីក៏ដូចជាការប្រកួតប្រជែងថ្មី និងឱកាសថ្មីចំពោះវិស័យធនាគារ និងហិរញ្ញវត្ថុ ហើយវាក៏កំពុងជំរុញឱ្យមានការកើនឡើងនៃក្រុមហ៊ុនអាជីវកម្មថ្មីៗផងដែរ។
ទាំងនេះគឺជាទស្សនៈមួយដែលគេបានលើកយកទៅចែករំលែក និងពិភាក្សាគ្នានៅក្នុងប្រទេសថៃ ខណៈដែលវិទ្យាស្ថាន Milken Institute នឹងធ្វើជាសហម្ចាស់ផ្ទះរៀបចំសន្និសីទ «អនាគតហិរញ្ញវត្ថុ» ជាមួយធនាគារកណ្តាលរបស់ថៃកាលពីថ្ងៃសុក្រ និងនៅឯសន្និសីទសកលប្រចាំឆ្នាំរបស់វិទ្យាស្ថាន Milken Institute ដែលនឹងចាប់ផ្តើមនៅចុងខែមេសាក្នុងទីក្រុងឡូសអេនជឺលេស។
ឧទាហរណ៍មួយនៅក្នុងតំបន់អាស៊ីអាគ្នេយ៍ដែលកំពុងបង្ហាញអំពីការប្រើប្រាស់បច្ចេកវិទ្យាហិរញ្ញវត្ថុគឺការប្រើកម្មវិធីហៅម៉ូតូឌុបជិះតាមអនឡាញ Go-Jek ដែលវាជាចលនាហិរញ្ញវត្ថុមួយនៅក្នុងសេវាដឹកជញ្ជូនហើយបច្ចុប្បន្នបច្ចេកវិទ្យាថ្មីនេះមានតម្លៃរហូតដល់ជាង ១ ពាន់លានដុល្លារ។
ជាមួយនឹងការទិញយកសេវាកម្មទូទាត់សាច់ប្រាក់ Kartuku និង Midtrans របស់ក្រុមហ៊ុន Go-Jek និងបណ្តាញទូទាត់សាច់ប្រាក់ និងសន្យំប្រាក់ Mapan ក្រុមហ៊ុននេះមិនត្រឹមតែជាក្រុមហ៊ុនឈានមុខគេក្នុងការទូទាត់សាច់ប្រាក់តាមប្រព័ន្ធឌីជីថលប៉ុណ្ណោះទេ ប៉ុន្តែក្រុមហ៊ុននេះក៏កំពុងមានឥទ្ធិពលទាំងលើទ្រង់ទ្រាយ និងវិសាលភាពនៃបច្ចេកវិទ្យាហិរញ្ញវត្ថុនៅប្រទេសឥណ្ឌូនេស៊ីផងដែរ។
ស្របពេលដែលអាជីវកម្ម និងអ្នកប្រើប្រាស់បានយកឈ្នះការភ័យខ្លាច និងការព្រួយបារម្ភអំពីការប្រើប្រាស់ម៉ាស៊ីនអេធីអឹមនោះ ការភ័យខ្លាចអំពីផលប៉ះពាល់នៃបច្ចេកវិទ្យាថ្មីនេះទៅលើឧស្សាហកម្មហិរញ្ញវត្ថុគឺមិនគួរមើលរំលងទេ។ បច្ចេកវិទ្យាហិរញ្ញវត្ថុគឺជារឿងមួយដែលយើងត្រូវស្វែងយល់នឹងដោះស្រាយ។
លោក Taizo Son អ្នកចង្អុលបង្ហាញអំពីប្រព័ន្ធឌីជីថលថ្មីនេះបានឲ្យយើងដឹងថា៖ «យើងគឺជាអ្នកជឿជាក់ដ៏ខ្លាំងក្លានៅក្នុងការផ្លាស់ប្តូរប្រព័ន្ធឌីជីថលថ្មីនេះដែលត្រូវបានបង្កើតឡើងដោយកត្តាសេដ្ឋកិច្ច និងការបង្កើតថ្មីនៃបច្ចេកវិទ្យាហិរញ្ញវត្ថុ»។ លោក Son ថ្លែងថា វិនិយោគិន និងស្ថាបនិកក្រុមហ៊ុន Mistletoe គឺជាសហគ្រិន និងជាអ្នកចាប់ផ្តើមធ្វើដំបូងគេ។ លោក Taizo គឺជាប្អូនប្រុសពៅរបស់លោក Masayoshi Son ដែលជាអ្នកចង្អុលបង្ហាញអំពីបច្ចេកវិទ្យាថ្មី និងជាស្ថាបនិកក្រុមហ៊ុន Softbank ។
លោក Son ថ្លែងថា៖ «ទោះជាយ៉ាងណាក៏ដោយបច្ចេកវិទ្យាបែបនេះក៏មានសក្តានុពលចូលរួមលើកកម្ពស់គម្លាតប្រាក់ចំណូលដែលកំពុងកើនឡើងនៅក្នុងសង្គមរបស់យើងដែរ»។
ក្នុងនាមជាសហគ្រិន និងជាអ្នកបង្កើតការច្នៃប្រឌិតថ្មីនេះយើងត្រូវយល់ដឹងអំពីតួនាទីសំខាន់ដែលយើងកំពុងធ្វើនៅក្នុងការកសាងសង្គមជាតិរបស់យើងសម្រាប់មនុស្សគ្រប់គ្នានៅក្នុងយុគសម័យបច្ចេកវិទ្យាស្វយ័តដែលកំពុងកើនឡើងខ្លាំងនេះ»។
ពិតណាស់នៅពេលមួយនៃវិសមភាពកើនឡើងតើយើងធ្វើដូចម្តេចដើម្បីធានាផលវិជ្ជមាន និងមានន័យពីបច្ចេកវិទ្យាហិរញ្ញវត្ថុសម្រាប់ប្រជាជនកម្ពុជា និងអាស៊ី? តម្រូវការដែលមិនត្រូវបានបំពេញសម្រាប់សេវាធនាគារមូលដ្ឋានគឺសំខាន់ណាស់នៅអាស៊ីអាគ្នេយ៍។ មានតែប្រហែល ២៧ ភាគរយនៃប្រជាជន ៦០០ លាននាក់នៅក្នុងតំបន់នេះមានគណនីធនាគារក្នុងឆ្នាំ ២០១៦។ នេះបើតាមការប្រឹក្សាយោបល់ពីក្រុមហ៊ុន KPMG។
ការសិក្សាស្រាវជ្រាវស្តីពីការបង្កើនការរួមបញ្ចូលហិរញ្ញវត្ថុឆ្នាំ ២០១៧ នៅអាស៊ីអាគ្នេយ៍ជាមួយហិរញ្ញវត្ថុឌីជីថលដែលធ្វើឡើងដោយធនាគារអភិវឌ្ឍន៍អាស៊ី និងក្រុមហ៊ុនប្រឹក្សាយោបល់ Oliver Wyman និង MicroSave បានរកឃើញថាការបើកទ្វារទទួលយកសេវាហិរញ្ញវត្ថុចំពោះអ្នកដែលមិនប្រើសេវាធនាគារអាចបង្កើន GDP របស់ប្រទេសហ្វីលីពីន និងឥណ្ឌូនេស៊ីរហូតដល់ចំនួន ៣ ភាគរយ និង GDP របស់កម្ពុជារហូតដល់ចំនួន ៦ ភាគរយ។
នៅក្នុងសេដ្ឋកិច្ចដែលកំពុងរីកចម្រើនដូចជាកម្ពុជាមានតែ ៥ ភាគរយប៉ុណ្ណោះនៃប្រជាជនកម្ពុជាដែលមានលទ្ធភាពប្រើប្រាស់សេវាធនាគារផ្លូវការ។
ខណៈលទ្ធភាពប្រើប្រាស់សេវាធនាគារលក្ខណៈផ្លូវការនៅមានកម្រិតតិចតួចប្រជាជនជាច្រើននៅអាស៊ីមិនទទួលបានការការពារនៃគណនីសន្សំ ពួកគេក៏អាចប្រឈមមុខនឹងការចំណាយខ្ពស់ជាងមុនចំពោះការផ្ញើប្រាក់ ឬទទួលប្រាក់។ នៅក្នុងតំបន់នេះការផ្ញើប្រាក់ទៅសាច់ញាតិគឺមានចំនួន ២៣៦ ពាន់លានដុល្លារក្នុងឆ្នាំ ២០១៦។ នេះបើតាមធនាគារពិភពលោក។
ម្ចាស់ក្សត្រិយ៍ Ma''xima របស់ប្រទេសហូឡង់ដែលជាអ្នកតស៊ូមតិពិសេសរបស់អគ្គលេខាធិការអង្គការសហប្រជាជាតិដើម្បីឲ្យមានការរួមបញ្ចូលសេវាហិរញ្ញវត្ថុសម្រាប់ការអភិវឌ្ឍបានថ្លែងនៅក្នុងសុន្ទរកថារបស់ម្ចាស់ក្សត្រិយ៍ទៅកាន់អ្នកចូលរួមនៅពិធីបុណ្យបច្ចេកវិទ្យាហិរញ្ញវត្ថុនៅសិង្ហបុរីឆ្នាំ ២០១៧ ថា៖ «ការមានលទ្ធភាពប្រើប្រាស់សេវាហិរញ្ញវត្ថុមូលដ្ឋានអាចកាត់បន្ថយភាពអត់ឃ្លានបង្កើនការអប់រំ ហើយជាទូទៅធ្វើឲ្យគុណភាពជីវិតប្រសើរឡើង»។
លោក Spiros Margaris ដែលជាអ្នកឯកទេសខាងមូលធន និងបច្ចេកវិទ្យាហិរញ្ញវត្ថុបានថ្លែងថា៖ «ខ្ញុំជឿជាក់ថាសមិទ្ធផលដ៏ប្រសើររបស់បច្ចេកវិទ្យាហិរញ្ញវត្ថុនឹងមិនត្រឹមតែជួយអ្នកដែលមិនប្រើសេវាធនាគារទេ ប៉ុន្តែថែមទាំងជួយអ្នកដែលមិនមានលទ្ធភាពគ្រប់គ្រាន់ក្នុងការប្រើសេវាធនាគារ ដើម្បីរស់នៅក្នុងជីវិតប្រសើរជាងមុន។
ពិតណាស់វិធានការពិតប្រាកដនៃភាពជោគជ័យសម្រាប់បច្ចេកវិទ្យាហិរញ្ញវត្ថុក្នុងប្រទេសកម្ពុជា និងកន្លែងដទៃៗទៀត គួរពង្រីកឲ្យបានខ្លាំង។
ភាពជោគជ័យពិតប្រាកដគឺនៅពេលបច្ចេកវិទ្យាហិរញ្ញវត្ថុជួយដល់កសិករក្រីក្រឲ្យទទួលបានហិរញ្ញវត្ថុដើម្បីធ្វើស្រែចម្ការ ហើយបានផលលក់ទៅទីផ្សារ ឬជួយអ្នកបើកហាងតូចៗឲ្យបង្កើនអាជីវកម្មរបស់ខ្លួនកាន់តែខ្លាំង ឬផ្តល់ហិរញ្ញវត្ថុដោយសហគ្រិនវ័យក្មេងដែលត្រៀមខ្លួនរួចរាល់នៅក្នុងការសម្រេចក្តីសុបិនរបស់ខ្លួន។ ជាងនេះទៀតធាតុនៃមនុស្សនៅក្នុងបច្ចេកវិទ្យាហិរញ្ញវត្ថុ មិនគួរត្រូវបានភ្លេចទេនៅក្នុងប្រទេសកម្ពុជា ខណៈប្រទេសនេះកំពុងវិវឌ្ឍទៅមុខ៕ PS/NS
ដោយ Curtis S Chin ដែលជាអតីតឯកអគ្គរដ្ឋទូតអាមេរិកប្រចាំនៅធនាគារអភិវឌ្ឍន៍អាស៊ីជានាយកគ្រប់គ្រងនៃក្រុមហ៊ុនប្រឹក្សាយោបល់ RiverPeak Group LLC និង Jose B Collazo ដែលជាអ្នកវិភាគនៅអាស៊ីអាគ្នេយ៍ជាដៃគូការងារនៅ RiverPeak Group LLC។