The Phnom Penh Post Search

Search form




Logo of Phnom Penh Post newspaper Phnom Penh Post - ការ​ផ្ទេរ​អំណាច​មក​រដ្ឋបាល​ថ្នាក់​ក្រោម​ជាតិ​ស្វិត​ដូច​ស្បែក​ក្របី

ការ​ផ្ទេរ​អំណាច​មក​រដ្ឋបាល​ថ្នាក់​ក្រោម​ជាតិ​ស្វិត​ដូច​ស្បែក​ក្របី

កម្រង​ឯកសារ​ច្បាប់ និង​លិខិត​បទដ្ឋាន​គតិយុត្តិ សម្រាប់​ការ​អភិវឌ្ឍ​រដ្ឋ​បាល​ថ្នាក់ក្រោមជាតិ​​។ រូប តុង​ សុប្រាជ្ញ
កម្រង​ឯកសារ​ច្បាប់ និង​លិខិត​បទដ្ឋាន​គតិយុត្តិ សម្រាប់​ការ​អភិវឌ្ឍ​រដ្ឋ​បាល​ថ្នាក់ក្រោមជាតិ​​។ រូប តុង​ សុប្រាជ្ញ

ការ​ផ្ទេរ​អំណាច​មក​រដ្ឋបាល​ថ្នាក់​ក្រោម​ជាតិ​ស្វិត​ដូច​ស្បែក​ក្របី

ពាក្យ​កំណែ​ទម្រង់​តាម​បែប​លទ្ធិប្រជាធិប​តេយ្យ ត្រូវបាន​ថ្នាក់​ដឹក​នាំ យក​មក​ទន្ទេញ​ពេញៗ​មាត់​ដដែលៗ​ឲ្យ​តែបាន​ឡើង​វេទិកា​ម្តងៗ សឹង​តែ​ថា​ អ្វី​ៗ​របស់​រាជ​រដ្ឋាភិបាល​ធ្វើ​សុទ្ធ​តែ​កំណែ​ទម្រង់។ តែ​ធាតុ​ពិត​កំណែ​ទម្រង់​ស៊ី​ជម្រៅ​ទាំងនោះ​សព្វ​ថ្ងៃ​នេះ ​មាន​លក្ខណៈ​ខុសៗ​គ្នា ​ខ្លះមាន​លក្ខណៈ​អភិវឌ្ឍន៍​មាន​លទ្ធផល​ល្អ​បណ្តើរៗ​ ខ្លះ​មាន​លក្ខណៈ​យឺត​យ៉ាវ​ កំណែ​ទម្រង់​ខ្លះ​ គ្រាន់តែ​ផ្គាប់​ចិត្ត​ម្ចាស់​ជំនួយ​ទេ ​មើល​ទៅ​ហាក់​បី​​ដូចជា​គ្មាន​ឆន្ទៈ​ពិត​ប្រាកដ​ក្នុងការ​អភិវឌ្ឍ​កំណែ​ទម្រង់​ យូរៗ​ទៅ គ្រាន់​តែ​ដំឡើង​ប្រាក់​ខែ​ជូន​មន្ត្រី​បន្តិច​បន្តួច​ធម្មតា​សោះក៏​លើក​ឡើង​ថា​ ជា​កំណែទម្រង់​ដែរ។

បច្ចុប្បន្ន​នេះ​ កំណែ​ទម្រង់​ដែល​ត្រូវ​បាន​គេ​មើល​ឃើញ​ថា មាន​ដំណើរ​ការ​ល្អ​ គួរសម​គឺ​ ច្រក​ចេញ​ចូល​តែ​មួយ​ ដែល​បាន​បង្កើត​តាំងពី​ឆ្នាំ​ ២០០៥​ ដើម្បី​បង្ក​ភាព​ងាយ​ស្រួល​រហ័ស​ មាន​តម្លៃទាប​ និង​តម្លាភាព​ ដែល​ក្រសួង ​និង​ស្ថាប័ន​ចំនួន​ ១០ ​បានធ្វើ​ប្រតិភូកម្ម​សេវា​មួយ​ចំនួន​មក​ក្រុង ​ស្រុក ​និង​ខណ្ឌ ដែ​ល​មានទីតាំង​នៅជិត​នឹង​ប្រជាពលរដ្ឋ។

ឧទាហរណ៍​ដូចជា​ សេវា​ធ្វើស្លាក​លេខ​ម៉ូតូ ​ដែល​កាល​ពីមុន​មកធ្វើ​តែ​មួយ​កន្លែង​នៅ​រាជធានី​​ភ្នំពេញ ​​ឬក៏​​នៅ​តាម​ទីរួម​ខេត្ត​ ឥឡូវ​មក​ធ្វើ​នៅ​ត្រឹម​សាលា​ខណ្ឌ​ ឬ​ក្រុង ​ឬ​ស្រុក​ដែល​មាន​ទីតាំង​នៅជិត​ផ្ទះ​ជាការ​ស្រេច ហើយ​ការងារ​រត់​ឯកសារ​ទៅ​តែម្តង​ហើយចាំ​​តែ​យក​ទៅ ​មិន​ចាំ​បាច់​យក​ឯកសារ​ទៅដាក់​ពីមួយ​ទៅ​មួយ​ដោយ​ខ្លួន​ឯង​រកេតរកូត​ដូច​លើក​មុន​ទេ ហើយ​មាន​ការិយា​ល័យ​ប្រជា​ពលរដ្ឋ​មួយ​ទៀតចាំ​ទទួល​ពាក្យ​បណ្តឹង ​និង​ពិនិត្យ​មើល​ពីភាព​មិន​ប្រក្រតី​​របស់​ដំណើរ​ការ​ការិយាល័យ​​ច្រក​​នេះ​ផង​ដែរ​។

ក្រៅពី​នោះ​ក៏​មាន​បម្រើ​សេវា​កម្ម​ផ្សេងៗ​ទៀត​ ដូចជា​ការស្នើ​សុំ​បើក​ធ្វើ​អាជីវកម្ម​សិប្បកម្ម អាហារ​ដ្ឋាន​តូចល្មម ​ផ្ទះ​សំណាក់​ និង​ការ​ចុះបញ្ជី​សាង​សង់​ផ្ទះ​ល្វែង​ជា​ដើម​ គឺ​មិន​ចាំ​បាច់​ទៅ​ចុះ​បញ្ជីនៅ​សាលា​រាជធានី ​ឬ​នៅ​ក្រសួង​ពាក់ព័ន្ធ​នោះទេ​។​

រហូត​មក​ទល់​ពេលនេះ​ កា​រិយាល័យ​ច្រក​ចេញ​ចូលតែ​មួយ​ត្រូវ​បាន​ពង្រីក​ចំនួន ៣៦ ​ការិយា​ល័យ​ហើយ​នៅ​ទូទាំង​ប្រទេស ​ហើយ​គ្រាន់​តែ​រយៈ​ពេល​ ១០ ខែ​​ឆ្នាំ ២​០១៤ ​កន្លង​ទៅ ​ការិយា​ល័យ​ច្រកចេញ​ចូល​តែ​មួយ​​ទទួល​ប្រាក់​ចំណូល​ដែល​បាន​​មកពី​ការ​បម្រើ​សេវា​ទាំងនោះ​​ចំនួន​ជាង ​១,៥ លានដុល្លារ​ដែល​កាលពី​មុន​ទឹក​ប្រាក់​ទាំង​នេះ​មិនដឹង​ជាទៅ​ទីណា​ទេ​?​ តែផ្ទុយ​ទៅវិញ​ពាក្យ​កំណែ​ទម្រង់​នេះ​ត្រូវ​បាន​គេ​ប្រើ​ដើម្បី​បំភាន់​ភ្នែក​មន្ត្រី​រាជ​​ការ​ និង​​ប្រជា​ពលរដ្ឋ​ទេ ​ដូចជា​ការ​ដំឡើង​ប្រាក់​ខែ​ជូន​មន្ត្រី​រាជការ​ និង​ក្រុម​ប្រឹក្សា​ឃុំ​ជាដើម​ ដូច​មាន​ចែង​នៅ​ក្នុង​យុទ្ធ​សាស្ត្រ​ទី​ ៣​ គឺ​ ការកែ​ទម្រង់​ប្រាក់​បៀវត្សរ៍​ និង​ប្រាក់​ឧបត្ថម្ភ​ផ្សេងៗ​​របស់​មន្ត្រី​រាជការ​ ដែល​មាន​នៅ​ក្នុង​កំណែ​ទម្រង់​រដ្ឋបាល​សាធារណៈ ដែល​ទីស្តីការ​គណៈ​រដ្ឋ​មន្ត្រី​បាន​​អនុម័ត​កាលពី​សប្តាហ៍​មុន​នេះ​។​

តាម​ពិតការ​ដំឡើង​ប្រាក់ខែ ​និង​ប្រាក់​ឧបត្ថម្ភ​ ៤ ម៉ឺន​រៀល ក្នុង ១​ ឆ្នាំម្តង​នេះ​​ សួរ​ថា វាសម​​ស្រប​​ទៅនឹង​​អតិផរណា​នៃ​ការ​ឡើង​ថ្លៃ​ទំនិញ​បន្លែ​ត្រី​សាច់ ​និង​សម្ភារ​ប្រើ​ប្រាស់​ជា​ប្រចាំ​ហើយ​ឬនៅ?​ ហើយ​ការ​ដំឡើង​ប្រាក់​ខែ​នេះ​បាន​តែ​មន្ត្រី​រាជ​ការ​ទេ ​តែ​គ្មាន​ទេ ការ​ដំឡើង​ប្រាក់​ខែ​​ឬក៏​ប្រាក់​ឧបត្ថម្ភ​ដល់​និវត្ត​ជន ​ព្រោះ​ពួកគាត់​ប្រើ​ការ​លែង​កើត​ហើយ? ឈ្មោះ​ថា​ ដំឡើង​ប្រាក់​ខែ​ ដូច​ជា​ពីរោះ​​ពិសា​ណាស់​សុទ្ធ​តែ​មាន​នៅ​ក្នុង​យុទ្ធ​សាស្ត្រ​ជាតិ​​ទៀត​ផង​​ តែ​​ដល់​ពេល​សួរ​ថា​ បាន​ប៉ុន្មាន​ ៤​ ម៉ឺន​រៀល​ស្មើ​នឹង​ ១០ ដុល្លារ​ គ្រាន់​តែ​ឲ្យកូន​ទៅ​រៀន​ញ៉ាំ​អាហារ​ពេលព្រឹក​មិន​គ្រាន់ផង​។​

ការ​ដំឡើង​ប្រាក់​ខែជា​ប្រចាំ​ឆ្នាំ​ធម្ម​តា​បែប​នេះ​ មិន​មែន​ហៅ​​ថា​កំណែ​ទម្រង់​​ឬឆន្ទៈ​នយោបាយ​ (political will)​ អ្វីនោះ​ទេ តែវា​គឺ​ជា​កាតព្វកិច្ច​​របស់​រាជ​រដ្ឋាភិបាល​ដែល​ត្រូវតែ​ធ្វើ។

រីឯ ​កំណែ​ទម្រង់​ពិត​ប្រាកដ​នោះគឺ​ការធ្វើ​វិមជ្ឈការ​ និង​វិសហមជ្ឈការ ​(D&D) ​ជាការ​ផ្តល់​អំណាច​មក​រដ្ឋបាល​​ថ្នាក់​ក្រោម​ជាតិ​ឯណោះ​ទៅ​វិញ​ទេ ដែល​កំពុង​នៅទ្រឹង​ទៅ​មុខ​មិន​ទៅ​ ថយ​ក្រោយ​មិន​ថយ​ចាប់​តាំង​ពីការ​បង្កើត​ច្បាប់ស្តីពី​ការ​គ្រប់​គ្រង​រដ្ឋបាល​ រាជធានី ​ខេត្ត ក្រុង ស្រុក និង​ខណ្ឌ (Organic Law) ​ត្រូវ​បាន​អនុម័ត​ឆ្នាំ ២០០៨​ និង​ផែនការ​អនុវត្ត ​៣ ​ឆ្នាំ ​(ផអ៣) ​ដំណាក់​កាល​ទី ១​ របស់​កំណែ​ទម្រង់​នេះ​តាំង​ឆ្នាំ ២០១០​ រហូត​មក​ដល់ពេល​នេះ​ឆ្នាំ ២០១៥ ​(ផអ៣)​ ដំណាក់​កាល​ទី​ ២​ ហើយ​ពុំទាន់​ឃើញ​មាន​មុខ​ងារ​​ណា​មួយ​ត្រូវ​បាន​ផ្ទេរ​ពី​ក្រសួង ​និង​ស្ថាប័ន​ថ្នាក់​ជាតិ​មក​រដ្ឋបាល​ថ្នាក់​ក្រោម​ជាតិ​ទេ ជា​ពិសេស​គឺ​ ក្រុង-ស្រុក ​ដែល​មាន​ទីតាំង​ធំល្មម​ ហើយ​នៅ​ជិត​ប្រជា​ពលរដ្ឋ​ទៀត​ កំពុង​រង់ចាំ​ម្ហបៗ ពេល​ណា​បាន​ខាង​ថ្នាក់​ជាតិ​ហ្នឹង​ ផ្តល់​អំណាច​ឲ្យ​មក​តាម​រយៈ​ការ​ផ្ទេរ​មុខងារ ​ធន​ធាន ​និង​ថវិកា​?

ចំណែក​ឯ​ថ្នាក់ជាតិ​វិញ​ គឺក្រសួង ​និង​ស្ថាប័ន​ពាក់ព័ន្ធ​ដូច​ជា វិស័យ​សុខាភិបាល អប់រំ អភិវឌ្ឍជន​បទ និង​បរិស្ថាន ជាដើម ដែល​​ត្រូវ​ផ្ទេរមុខ​ងារ​​តាមរយៈ «ការ​ប្រគល់​ឲ្យ» ​វិញគឺ​មួយ​ចំនួន​ធំ​នៅ​តែ​យក​លេសថា រដ្ឋបាល​ថ្នាក់​ក្រោម​ជាតិ​មិនទាន់​មាន​សមត្ថភាព​និង​ទទួល​យក​មុខ​ងារ​​នោះទេ​ ហើយ​ខ្លះ​ទៀត​ចង់​ផ្ទេរ​តែ​មុខងារ​​ទេ​ តែ​ថវិកា​នៅគិត​​អេះ​​អុញៗ​​មិន​ព្រម​ផ្ទេរឲ្យ​ទេ​ដោយ​លើក​ហេតុ​ផល​រដ្ឋបាល​ក្រុង-ស្រុក ​មិន​ទាន់​មាន​សមត្ថភាព​គ្រប់​គ្រង​ថវិកា ​ឬក៏​យក​លេសអ៊ីចេះ​អ៊ីចុះ​​មិន​ចេះ​ចប់។

តើ​ពេល​ណា​បាន​ថ្នាក់​ជាតិហ្នឹង​ សម្រេចចិត្ត​ផ្ទេរ​អំណាច​មក​ថ្នាក់​ក្រោម​ជាតិ​ពិត​ប្រាកដ​នោះ​​?​ បើ​និយាយ​ពី​ច្បាប់ គោ​លន​យោបាយ​ គោល​ការណ៍​ណែ​នាំ​ ឯកសារ​ស្រាវ​ជ្រាវ និង​លិខិត​បទដ្ឋាន​គតិយុត្តិ​ផ្សេងៗ​ទាក់​ទិន​ទៅនឹង​ការ​អភិវឌ្ឍ​រដ្ឋបាល​ថ្នាក់​ក្រោម​ជាតិ​គឺសឹង​តែថា​ស្អីក៏​មាន​ដែរ​ គឺ​គ្រាន់តែ​ចង់​សួរ​ថា​តើចង់​ផ្ទេរ​អំណាច​ឲ្យ​ឬក៏​អត់?

ជាក់​ស្តែង​សម្រាប់​កំណែទម្រង់​វិមជ្ឈ​ការ​នៅ​ស្រុក​ខ្មែរ​យើង​ចាប់​ផ្តើម​ពីឆ្នាំ​ ២០០០ ​ហើយ​មាន​ការ​បោះ​ឆ្នោត​ឃុំ-​សង្កាត់​លើក​ដំបូង​នៅឆ្នាំ ២០០២​ គឺ​ប្រហាក់​ប្រហែល​គ្នា​ទៅ​នឹង​ប្រទេស​ឥណ្ឌូ​នេស៊ី​ ដែល​ចាប់​ផ្តើម​ពី​ឆ្នាំ ១៩៩៩ ​គឺ​បន្ទាប់​មក​មាន​ការ​ផ្លាស់​ប្តូរ​របប​ក្រោយ​ពីរបប​ផ្តាច់​ការ​លោក​ប្រធានាធិបតី​ ស៊ូហាតូ​ ត្រូវ​បានគេ​ទម្លាក់​ចេញពី​តំណែង​កាលពី​ឆ្នាំ​១៩៩៨ ​មក​ គឺ​ឥណ្ឌូនេ​ស៊ី​មាន​ឆន្ទៈ​ធ្វើ​កំណែ​ទម្រង់​វិមជ្ឈ​ការដោ​យ​ខ្លួនឯង​​តែម្តង​ ដែល​គេ​ឲ្យ​ឈ្មោះ​ថា​ កំណែ​ទម្រង់​ដ៏​គំហុក​ «Big Bang!» ​ធ្វើឲ្យ​ការ​អភិវឌ្ឍ​នៅថ្នាក់​ក្រោម​ជាតិ​តាម​រយៈ​ការ​ផ្តល់​អំណាច​គឺគេ​ធ្វើ​បាន​ល្អជាង​ប្រទេស​យើង​ច្រើន​ណាស់ ​ជាពិសេស​ការ​ផ្ទេរ​មុខ​ងារ​វិស័យ​សុខាភិបាល និង​អប់រំ​ទៅ​តាមកម្រិត។

ជាង​នេះ​ទៅ​ទៀត​នោះគឺ​ការដំឡើង​ប្រាក់​បៀវ​ត្សរ៍​ និង​ប្រាក់​ឧត្ថម្ភ​ទៅ​មន្ត្រី​​ថ្នាក់​ក្រោម​ជាតិ​​ឲ្យមាន​​លក្ខណៈ​​ប្រហាក់​ប្រហែល​​ទៅ​នឹង​មន្ត្រី​​ថ្នាក់​ជាតិ ​(ការ​ដំឡើង​ប្រាក់ខែ​បែបនេះ ​បាន​គេ​ហៅ​ថា​​កំណែ​ទម្រង់​) ​ធ្វើ​ឲ្យ​មន្ត្រី​រាជការ​របស់គេ​ដែល​ទើប​នឹង​ប្រឡង​ជាប់​គឺ​ចង់​ទៅ​ធ្វើការ​នៅ​ថ្នាក់​ក្រោមជាតិ​មាន​ចំនួន​ច្រើន​ជាង​មន្ត្រីដែល​ចង់​ធ្វើការ​នៅ​ថ្នាក់​ជាតិ​ទៅវិញ​​ ហើយ​ការធ្វើ​កំណែ​ទម្រង់​នេះ​ធ្វើ​ឲ្យ​មាន​ផល​ប៉ះពាល់​ដ៏ធំ​មួយ​ទៀត​នោះ ​លោក​ចូកូ វីដូដូ​ (Joko Widodo)​ ប្រធានា​ធិបតី​ដែល​ទើបតែឡើង​កាន់​អំណាច​ថ្មីៗ​នេះ​ កើត​ឡើងពី​ការ​បោះ​ឆ្នោត គាត់​គឺជា​តំណាង​ប្រជាព​លរដ្ឋ​ពិត​ប្រាកដ​ តាម​រយៈ​ការ​អភិវឌ្ឍ​​របស់​លោក​ចេញពី​អភិបាល​​ក្រុង​សូឡូ ​បន្ទាប់​មក​ធ្វើជា​អភិបាល​រដ្ឋធានី​ ហ្សាកាតា មុន​នឹង​​ក្លាយជា​ប្រធានា​ធិបតី​នោះ​។

យ៉ាង​ណា​មិញ ​កំណែ​ទម្រង់​វិមជ្ឈការ​ នៅ​ប្រទេស​ ហ្វីលីពីន ​វិញ ក៏​មិន​ខុសគ្នា​ពី​ប្រទេស​​ឥណ្ឌូនេ​ស៊ី​ដែរ​ គឺចា​ប់​តាំង​ពីការ​ទម្លាក់​មេដឹកនាំ​ផ្តាច់​ការ​ លោក​ ហ្វេដឺ​ណង់ ​ម៉ាកូស ​កាលពីឆ្នាំ​ ១៩៨៦ ​មករដ្ឋាភិបាល​ថ្មី​របស់​ហ្វីលីពីន ​ចាប់​ផ្តើម​ធ្វើការ​កែទម្រង់​ផ្តល់​អំណាច​ទៅ​ថ្នាក់​ក្រោម​ជាតិ​នៅឆ្នាំ​ ១៩៨៩ ​មក​ម្ល៉េះ ​ដោយ​ចាប់​ផ្តើម​​ផ្ទេរ​មុខ​ងារ​ពី​ថ្នាក់​ជាតិមក​រដ្ឋបាល​ថ្នាក់​ក្រោម​ជាតិ​ជា​លើក​ដំបូង​ពី​វិស័យ​បរិស្ថាន​មុនគេ ​ព្រោះ​ធ្លាប់​ទទួល​រង​គ្រោះ​ធម្មជាតិ​ញឹកញ៉ាប់​ ហេតុ​ដូច​នេះ​ហើយ​ មាន​តែ​អាជ្ញាធរ​ថ្នាក់​ក្រោម​ជាតិ​ហ្នឹង​ទេ ដែល​នៅកៀក​នឹង​ប្រជាពលរដ្ឋ​ក្នុង​ការ​ដោះ​ស្រាយ​បញ្ហា​នេះ​។ ​

តាម​រយៈ​បទ​ពិសោធ​កំណែ​ទម្រង់​វិមជ្ឈ​ការ​បាន​ល្អ​ដូច​ប្រទេស​ឥណ្ឌូ​នេស៊ី ​និង​ហ្វីលីពីន​នេះ​ហើយ​ តើ​ស្រុក​ខ្មែរ​នៅ​តែ​បន្ត​ដំណើរ​យឺត​យ៉ាវ​​ជាង​គេ​នេះគឺ​ចាំ​រហូត​ទាល់​តែមាន​ការ​​ផ្លាស់​ប្តូរ​របប​ចាស់​​ចេញ​ដូច​នៅ​ប្រទេស​ទាំង​ ២ ហ្នឹងបាន​នាំគ្នា​ខ្នះ​ខ្នែង​ធ្វើការ​កំណែ​ទម្រង់​វិមជ្ឈការ​ដ៏​គំហុក​នឹង​គេ​ដែរឬ​?​

សរុប​មក​វិញ ​បើ​ក្រសួង ​និង​ស្ថាប័ន​ថ្នាក់​ជាតិ​នៅ​​តែ​មិន​ផ្ទេរ​មុខ​ងារ ​ថវិកា​ និង​ធនធាន ​រួម​ទំាង​ធនធាន​មនុស្ស​​ផង​មក​រដ្ឋ​បាល​ថ្នាក់​ក្រោម​ជាតិ​ និង​​មិន​ផ្តល់​បច្ចេក​ទេស​បណ្តុះ​បណ្តាល​ក្នុង​ការ​អភិវឌ្ឍ​សមត្ថភាព​មន្ត្រី​ថ្នាក់​ក្រោម​ជាតិ​នោះទេ ​គឺ​ការ​ផ្តល់​អំណាច​មក​រដ្ឋបាល​ថ្នាក់​ក្រោម​ជាតិ​ តាមរយៈ​កំណែ​ទម្រង់​វិមជ្ឈការ​​ និង​វិសហមជ្ឈការ​គឺ​បាន​ត្រឹម​តែ​នៅ​លើ​ក្រដាស​តែ​ប៉ុណ្ណោះ ​បាន​ត្រឹម​ល្អ​​មើល​ដើម្បី​ឲ្យម្ចាស់​ជំនួយ​ត្រជាក់​ចិត្តជា​ការ​ស្រេច គ្រាន់​តែ​ផែន​ការ​ចំណាយ​ថវិកា​សម្រា​ប់​ថ្នាក់​ក្រោម​ជាតិ​នៅ​ឆ្នាំ ​២០១៤​ អស់ទឹក​ប្រាក់​ប្រមា​ណ​ជា​​ ២៣៣ ​លាន​ដុល្លារ​។ បើ​​ដូច្នេះ​មែន​​កម្ពុជា​​នៅតែ​អនុវត្ត​តាម​បែប​មជ្ឈការ​​ប្រមូល​ផ្តុំ​អំណាច​ថ្នាក់ជាតិ​ដដែល៕

ចូល​រួម​ផ្តល់​យោបល់​តាម​រយៈ​ soprach.ton​g@phnompenhpost.com

អត្ថបទគួរចាប់អារម្មណ៍