The Phnom Penh Post Search

Search form




Logo of Phnom Penh Post newspaper Phnom Penh Post - ការ​កែ​ទម្រង់​ប្រជា​សាស្រ្ត អាច​ជួយ​ដោះ​ស្រាយ​បញ្ហា​ចិត្ត​សាស្រ្ត និង​យេនឌ័រ​បាន




ការ​កែ​ទម្រង់​ប្រជា​សាស្រ្ត អាច​ជួយ​ដោះ​ស្រាយ​បញ្ហា​ចិត្ត​សាស្រ្ត និង​យេនឌ័រ​បាន

ការ​កែ​ទម្រង់​ប្រជា​សាស្រ្ត អាច​ជួយ​ដោះ​ស្រាយ​បញ្ហា​ចិត្ត​សាស្រ្ត និង​យេនឌ័រ​បាន

ភ្នំពេញ : តាម​រយៈ​គេហ​ទំព័រ​របស់​វីគី​ផិដៀ​ (​en.wikipedia.org​)​ ធម្ម​ជាតិ​របស់​មនុស្ស​ប្រុស និង​ស្រី​ក្នុង​​សកល​លោក​គឺ​កើត​មក​មាន​សមាមាត្រ​ប្រហាក់​ប្រហែល​គ្នា​។​​ ជា​ទូទៅ​ប្រុស​​ និង​ស្រី​ ចាប់​ផ្តើម​មាន​គម្លាត​ប្រជា​សាស្រ្ត​​ឃ្លាត​គ្នា​គឺ​ស្រី​​ច្រើន​ជាង​ប្រុស ​ដោយ​សារ​ ការ​រស់​នៅ​អាយុ​របស់​ស្រ្តី​យូរ​​ជាង​បុរស​ ​​(​បុរស​ជក់​និង​​ ផឹក​ស្រា​ជាង​ស្រ្តី​)​ ការ​ប្រយុទ្ធ​​គ្នា​​​ក្នុង​​ពេល​សង្រ្គាម​ បុរស​ធ្វើ​ការ​កន្លែង​គ្រោះ​ថ្នាក់​ ការ​គ្រោះ​ថា្នក់​ចរា​ចរណ៍​​។​ បើ​ទោះ​បី​ជា​មាន​របក​គំហើញ​ជា​បញ្ហា​ធម្មតា​សម្រាប់​ពិភព​លោក​ហើយ​ក៏​ដោយ​ បែរ​ជា​មាន​ប្រទេស​ខ្លះ​មាន​ប្រជា​ជន​​ប្រុស​ច្រើន​ជាង​ស្រី​ទៅ​វិញ​​ដូច​ ជា​ ប្រទេស​ចិន​ ប្រទេស​ឥណ្ឌា​ និង​ប្រទេស​កូរ៉េ​ខាង​ត្បូង​ ដែល​មាន​ការ​អនុវត្ត​​ និង​បញ្ហា​​ដូច​គ្នា​។ នេះ​បើ​យោង​តាម​ព្រឹត្តិ​បត្រ​ស្រាវ​ជ្រាវ​របស់​សមាគម​គ្រូ​ពេទ្យ​នៅ​កាណាដា​(​CMAJ, 2011​)។

អ្នក​ស្រាវ​ជ្រាវ (​CMAJ, 2011) ​បាន​បញ្ជាក់​ថា ​បុរស​នៅ​ប្រទេស​ទាំង​នេះ​ដែល​មិន​អាច​រៀប​ការ​បាន​​ដោយ​សារ​តែ​កង្វះ​ស្រ្តី​នោះ​ នឹង​ធ្វើ​ឲ្យ​ប៉ះ​ពាល់​​បញ្ហា​ផ្លូវ​ចិត្ត​ ការ​ប្រឈម​មុខ​នឹង​​ការ​កើន​ឡើង​នូវ​អំពើ​ហិង្សា​​ និង​បទ​ឧក្រិដ្ឋ​ផ្សេង​ៗ​។​​ ចុះ​ចំណែក​ឯ​ប្រទេស​កម្ពុជា​វិញ​ តើ​មាន​គម្លាត​គ្នា​​យ៉ាង​ដូច​ម្តេច​​ដែរ​រវាង​ប្រុស​ និង​ស្រី​?

ប្រទេស​កម្ពុជា​មិន​ខុស​ពី​របក​គំ​ហើញ​ជា​បញ្ហា​ធម្មតា​ដែល​ជា​ទ្រឹស្តី​ សម្រាប់​ពិភព​លោក​មាន​គម្លាត​ប្រជា​សាស្រ្ត​​ឃ្លាត​គ្នា​ គឺ​​ស្រី​​​ ច្រើន​ជាង​ប្រុស​ទេ​ គឺ​ហេតុ​ផល​ដែល​គម្លាត​សំខាន់​នៅ​គឺ​កម្ពុជា​ទទួល​រង​សង្រ្គាម​ជាមួយ​ប្រទេស ​ជិត​ខាង​ និង​សង្រ្គាម​ស៊ីវិល​រ៉ាំរ៉ៃ​​ជិត​៤​ ទស​វត្សរ៍​ ធ្វើ​ឲ្យ​បុរស​មាន​ការ​ស្លាប់​ច្រើន​ជាង​ស្រី​។​​ តែ​ពុំ​មាន​ឯក​សារ​ជាក់​លាក់​ណា​មួយ​បង្ហាញ​​ពី​ការ​រំលូត​កូន​​ដោយ​ជ្រើស​ រើស​ភេទ​ប្រុស​ ដោយ​សារ​ជំនឿ​ងប់​ងុល​ដូច​នៅ​ប្រទេស​ចិន​ដែល​ឲ្យ​តម្លៃ​លើ​កូន​ប្រុស​ ជា​អ្នក​ទទួល​កេរមរ​កត​ច្រើន​ជាង​កូន​ស្រី ​និង​ជា​មេ​គ្រួសារ​នៃ​​សែស្រ​ឡាយ​ស្នង​ត្រកូល​ ការ​កាន់​ជើង​ធូប​ ​ហើយ​កូន​ស្រី​ត្រូវ​ទៅ​បម្រើ​នៅ​ផ្ទះ​ខាង​ប្រុស​។

តាម​រយៈ​ជំរឿន​ឆ្នាំ​ ២០០៨​ បាន​បង្ហាញ​ថា​ ពុំ​មាន​ទិន្នន័យ​ពី​សមា​មាត្រ​កូន​កើត​ស្រី​ ឬ​ប្រុស​ទេ​​ តែ​គ្រាន់​​តែ​មាន​សមា​មាត្រ​ភេទ​​នៃ​ប្រជា​ជន​សរុប​គឺ​ប្រុស ​(៩៤,៧​នាក់​)​ តិច​ជាង​ស្រី​ (១០០​នាក់​)​។​ ​ឯ​ប្រជា​ជន​ប្រុស​មាន​ការ​ប្រសើរ​បើ​ប្រៀប​ធៀប​ទៅ​នឹង​ជំរឿន​ឆ្នាំ​​ ២០០០​ គឺ​បុរស​មាន​តែ​​(៩៣,០​នាក់​)​ ធៀប​ទៅ​នឹង​ស្រី​​(​១០០​នាក់​)​។ ​ការ​កើន​ឡើង​នេះ​មិន​បាន​ធ្វើ​ឲ្យ​សមា​មាត្រ​ប្រុស​​ និង​ស្រី​ប្រហែល​គ្នា​ទេ​ ក្នុង​ចំណោម​ប្រជា​ជន​សរុប​ចំនួន ​​១៣,៤​ លាន​នាក់​​ គឺ​ចំនួន​ប្រជាជន​ស្រី​​លើស​ប្រុស​ដល់​ទៅ​​ចំនួន​ជាង​​៣​សែន​កន្លះ ​​(​ជំរឿន ២០០៨​)​។

ស្រី្ត​ខ្មែរ​ជាង​៣​សែន​កន្លះ​នេះ​នឹង​អាច​មិន​មាន​គូ​ស្រករ​​និង​ពុំ​មាន​ កូន​គឺ​ខ្វះ​ខាត​​ចំនួន​បុរស​។ ​កាន់​តែ​ច្បាស់​ជាង​នេះ​ទៅ​ទៀត​ដោយ​សារ​មាន​ច្បាប់​២​ គឺ​ច្បាប់​ឯក​ព័ន្ធ​ភាព​​ និង​ច្បាប់​ថ្មី​មួយ​កាល​ពី​ខែ​មីនា​ ដែល​រឹត​បន្តឹង​ទៅ​លើ​បុរស​បរ​ទេស​រៀប​ការ​ជា​មួយ​ស្រ្តី​ទាល់​តែ​បុរស​ទាំង ​នោះ​មាន​អាយុ​ក្រោម​៥០​ឆ្នាំ​ និង​ប្រាក់​បៀវត្សរ៍​​លើស​ពី​ ២ ៥៥០ ​ដុល្លារ​ក្នុង​១​ខែ​​។​​ ឯ​តាតា​ខែ្មរ​មួយ​ចំនួន​ដែល​ភ្លើត​ភ្លើន​នឹង​ល្បែង​ស្នេហា​ ចិញ្ចឹម​ស្រី​ក្មេង​ៗ​ក្រៅ​​ដើម្បី​​រួម​ភេទ​បាន ​(PSI,២០០២)​ តែ​ទង្វើ​របស់​តា​តា​ ច្បាប់​​មិន​ត្រូវ​បាន​ដាក់​ទោស​ផ្ទាល់​ទេ​ ប្រសិន​បើ​ប្រពន្ធ​គាត់​មិន​ប្តឹង​។ ​ចុះ​ហេតុ​អ្វី​បាន​ជា​បុរស​​បរ​ទេស​​អាយុ​លើស​ ៥០​ ឆ្នាំ​ មិន​អាច​មាន​សិទ្ធិ​រៀប​ការ​ស្រប​​ច្បាប់​ជា​មួយ​ស្រី្ត​ខ្មែរ​?​ ក្នុង​ករណី​នេះ​​ តើ​រាជ​រដ្ឋា​ភិបាល​អាច​ពង្រឹង​ទំនាក់​ទំនង​ការ​ទូត​ជា​មួយ​ ប្រទេស​ដែល​បុរស​ទាំង​នោះ​រៀប​ការ​ ដើម្បី​លុប​បំបាត់​​ការ​ជួញ​ដូរ​នោះ​ ជា​ជាង​ការ​បិទ​សិទ្ធិ​សេរី​ភាព​ក្នុង​ការ​ជ្រើស​រើស​គូស្រករ​នោះ​?​ ធ្វើ​បែប​នេះ​បាន​ជា​​ប្រជា​ពល​រដ្ឋ​​ចេះ​តែ​សួរ​ថា ​តើ​អ្នក​បង្កើត​ច្បាប់​មួយ​ចំនួន​ ​(បុរសៗ)​ចែង​ច្បាប់​​សម្រាប់​ខ្លួន​ឯង​​ ឬ​មួយ​សម្រាប់​បម្រើ​ប្រជា​ពល​រដ្ឋ​ទូទៅ​?

ជាង​នេះ​ទៅ​ទៀត​ ច្បាប់​ទាំង​នេះ​ធ្វើ​ឲ្យ​ឱកាស​មាន​គូស្រករ​សម្រាប់​ស្រី្ត​កាន់​តែ​ចង្អៀត​ ទៅ​ៗ​។​ តាម​ការ​អង្កេត​របស់​ខ្ញុំ​ ឯ​បុរស​វិញ​​ហាក់​ដូច​ជា​មាន​ឱកាស​ច្រើន​ជាង​​ស្រី្ត​ក្នុង​ការ​ជ្រើស​រើស​គូ ​ស្រករ​ បើ​ទោះ​បី​បុរស​នោះ​ខុស​ខ្នាត​ ចាស់​​ ប្រមឹក​ ឬ​ក៏​អក្ខរ​ជន​ក៏​ដោយ​។​​ នេះ​មិន​ត្រឹម​តែ​កត្តា​ប្រជា​សាស្រ្ត​ និង​ច្បាប់​នានា​​ តែ​កត្តា​ប្រពៃណី​ខ្មែរ​បុរស​ចូល​ដណ្តឹង​ស្រី្ត​​ ក៏​ជា​ឧប​ស័គ្គ​រារាំង​ចំពោះ​ស្រី្ត​ផង​ដែរ​ ដែល​ផ្ទុយ​ពី​តម្រូវ​ការ​ផ្លូវ​ភេទ​ធម្ម​ជាតិ​របស់​មនុស្ស​ស្រី្ត​-​ប្រុស​ ដើម្បី​បន្ត​ពូជ​មនុស្ស​​ជំនាន់​​ក្រោយ​ទៀត​។​​ បើ​សូម្បី​សត្វ​ដំរី​ក៏​វា​ចុះ​​ប្រេង​ដែរ​​ ចុះ​មនុស្ស​វិញ​?

ស្រី្ត​មិន​ទាន់​រៀប​ការ​ម្នាក់​វ័យ​អាយុ​៥០​ឆ្នាំ​ដែល​មាន​កម្រិត​អប់​រំ​ទាប​បាន​ផ្តល់​បទ​សម្ភាស​ថា​៖​ «​ខ្ញុំ​ធ្លាប់​ចាស់​ៗ​គេ​​បង្អាប់​នៅ​ពេល​ ខ្ញុំ​មាន​អាយុ​ច្រើន​មិន​ទាន់​រៀប​ការ​ ចង់​បង្កើត​ស្រី​ល្វ័រ​អី​?​...​ពេល​ខ្លះ​ខ្ញុំ​មាន​អារ​ម្មណ៍​ឆាប់​ខឹង​ មួម៉ៅ មាន​ភាព​​រញាំ​រញូវ​​​...​​ហើយ​ពេល​ខ្លះ​ទៀត​ ខ្ញុំ​មាន​អារម្មណ៍​គិត​ថា​ពេល​ខ្ញុំ​ចាស់​ជាង​ហ្នឹង​ តើ​បាន​កូន​ចៅ​ឯ​ណា​ជួយ​ថែ​ទំា​ខ្ញុំ​ទេ​?.​..​ឥឡូវ​នេះ​​ខ្ញុំ​ចង់​សប្បាយ​ ច្រើន​ជាង​មុន​ ពេល​មាន​កម្ម​វិធី​ជប់​លៀង​ជា​មួយ​បង​ប្អូន​ និង​អ្នក​​ភូមិ​»​​។​ ចំណែក​ឯ​ស្រី្ត​មាន​​ការ​អប់រំ​ខ្ពស់​អាយុ​ ៥២ ​ឆ្នាំ​​វិញ​មាន​​ទស្សនៈ​ផ្ទុយ​ថា​៖​«​ខ្ញុំ​ធ្លាប់​មាន​បុរស​ចូល​ដណ្តឹង​ ដែរ​ តែ​អ្នក​ចូល​ដណ្តឹង​មើល​ទៅ​យ៉ាប់​ពេក​ គឺ​ជក់​បារី​ ហើយ​ផឹក​ស្រា​.​..​ហើយ​ប្រុស​ៗ​ខ្លះ​ប្រើ​អំពើ​ហិង្សា​ និង​មាន​ប្រពន្ធ​ហើយ​នៅ​មាន​ស្រី​ឯ​ណេះ​ឯ​ណោះ​ក្រៅ​ទៀត​...​ ពេល​ខ្លាច​ឆ្លង​​ជំងឺ​អេដស៍​ពី​ប្តី​ដូច​នេះ​ទៀត​ផង​...​សូវ​នៅ​ព្រៅ​ល្អ​ជាង​»​។

នេះ​ជា​ផល​ប៉ះ​ពាល់​ចំពោះ​ស្រ្តី​ដែ​ល​មិន​មាន​ឱកាស​រៀប​ការ​​មួយ​ចំនួន​​ដូច​បទ​ពិសោធ​ស្រី្ត​អាយុ​៥០​ឆ្នាំ​នេះ​ស្រាប់​ បើ​ទោះ​បី​ជា​មិន​ប៉ះ​ពាល់​ធ្ងន់​ធ្ងរ​ដូច​ប្រទេស​ចិន​ក៏​ដោយ​ក៏​ប៉ះ​ពាល់​ ផ្នែក​ផ្លូវ​ចិត្ត​មួយ​ចំនួន​ធំ​ដែរ​។​​ តែ​សម័យ​ទំនើប​ ពេល​ខ្លះ​គេ​មិន​ចង់​រៀប​ការ​តែម្តង​​ វា​ជា​រឿង​ធម្មតា​ហើយ​សម្រាប់​ប្រទេស​ជឿន​លឿន​។

តាម​មេ​រៀន​ពី​ប្រទេស​ចិន​ ករណី​ស្រី្ត​អាយុ​៥០​ឆ្នាំ​នេះ​ និង​កត្តា​ធម្ម​ជាតិ​របស់​មនុស្ស​ ខ្ញុំ​គិត​ថា​ រាជ​រដ្ឋា​ភិបាល​​គួរ​តែ​កែ​ទម្រង់​ប្រជា​សាស្រ្ត​ ដើម្បី​លុប​បំបាត់​គម្លាត​ចំនួន​ភេទ​ប្រុស​ និង​ភេទ​ស្រី្ត​ មិន​ត្រឹម​តែ​ដោះ​ស្រាយ​បញ្ហា​ចិត្ត​​សាស្រ្ត​​សង្គម​​ប៉ុណ្ណោះ​ទេ​ គឺ​ថែម​ទាំង​ជួយ​បង្កើន​កង​កម្លាំង​ការ​ពារ​ជាតិ​ទៀត​គឺ ​ទី១​ ជំរឿន​ថ្នាក់​ជាតិ​លើក​ក្រោយ​ឆ្នាំ​២០១៨​ គួរ​តែ​បង្ហាញ​ទិន្ន​ន័យ​អត្រា​សមាមាត្រ​ភេទ​ប្រុស​-​ស្រី​របស់​កុមារ​ ដែល​បាន​កើត​ ដើម្បី​ឲ្យ​អ្នក​ធ្វើ​​គោល​នយោ​បាយ​​រៀប​ចំ​​ដោះ​ស្រាយ​បញ្ហា​​នេះ​​។​​ ទី២​ លើក​ទឹក​ចិត្ត​គ្រួសារ​​ឲ្យ​មាន​​កូន​​ប្រុស​​ច្រើន​​ជាង​​កូន​ស្រី​ ប្រសិន​បើ​គេ​​ចង់​បាន​កូន​តែ​១​ ៣​​ ឬ​៥​​ តាម​រយៈ​​ការ​ពិគ្រោះ​​​យោបល់​​ជា​មួយ​នឹង​វេជ្ជ​បណ្ឌិត​ជំនាញ​ខាង​ការ​ ជ្រើស​ភេទ​កូន​ (តែ​មិន​មែន​រំលូត​ដូច​ប្រទេស​ចិន​ទេ​)​។​ ទី៣​ ពង្រឹង​បន្ថែម​ទៀត​នូវ​​សុវត្ថិ​ភាព​ចរាចរណ៍​ និង​ភូមិ​-​ឃុំ​មាន​សុវត្ថិ​ភាព​ជា​ពិសេស​លុប​បំបាត់​អំពើ​ហិង្សា​​ដែល​អាច​ បណ្តាល​ឲ្យ​ស្លាប់​ទាំង​ក្មេង​​ទំនើង​ និង​ទាំង​តារា​​ៗ​ទំនើង​​។​ ទី៤​ លុប​បំបាត់​គ្រប់​ទម្រង់​​​ នៃ​ការ​រើស​អើង​ផ្នែក​យេន​ឌ័រ​នៅ​ក្នុង​សង្គម​៕

ចូល​រួម​ផ្តល់​យោបល់​តាម​រយៈ soprach.tong@phnompenhpost.com

អត្ថបទគួរចាប់អារម្មណ៍