The Phnom Penh Post Search

Search form




Logo of Phnom Penh Post newspaper Phnom Penh Post - គាស់​ចិញ្ចើម​ផ្លូវ​ធ្វើ​ថ្មី​ចំ​ខែ​វស្សា​ ដូច​ដំបៅ​មិន​ឈឺ​យក​ឈើ​ចាក់

គាស់​ចិញ្ចើម​ផ្លូវ​ធ្វើ​ថ្មី​ចំ​ខែ​វស្សា​ ដូច​ដំបៅ​មិន​ឈឺ​យក​ឈើ​ចាក់

កម្មករ​ពេល​កំពុង​គាស់​ថ្ម​ចិញ្ចើម​ផ្លូវ​នៅ​សួន​ច្បារ​សម្តេច ជា ស៊ីម កាលពី​សប្តាហ៍​មុន។
កម្មករ​ពេល​កំពុង​គាស់​ថ្ម​ចិញ្ចើម​ផ្លូវ​នៅ​សួន​ច្បារ​សម្តេច ជា ស៊ីម កាលពី​សប្តាហ៍​មុន។ រូប តុង សុប្រាជ្ញ

គាស់​ចិញ្ចើម​ផ្លូវ​ធ្វើ​ថ្មី​ចំ​ខែ​វស្សា​ ដូច​ដំបៅ​មិន​ឈឺ​យក​ឈើ​ចាក់

«​អាគក ដូច​អាចែ​!» ក្នុង​ន័យ​នេះ​មាន​ន័យ​ថា​លោក ប៉ា សុជាតិវង្ស អភិបាល​រាជធានី​ភ្នំពេញ​ដូច​តែ​លោក កែប ជុតិមា អភិបាល​ចាស់​ដែរ​គឺ​អសមត្ថភាព​ដោះស្រាយ​ទឹក​ជំនន់​លិច​ទីក្រុង​ដូច​គ្នា​គឺ​នៅពេល​ភ្លៀង​ម្តងៗ​ដឹង​តែ​រក​កន្លែង​តំបន់​អភិវឌ្ឍន៍​។

តាម​ពិត​ទៅ​តំបន់​អភិវឌ្ឍន៍​ដែល​លោក​ទាំង​ ២ រក​កន្លែង​ឃើញ​នោះ​គឺ​បាន​ផល​ទៅ​លើ​ក្រុមហ៊ុន​ឯកជន និង​អ្នក​មាន​តែ​អ្នក​ក្រ​ក្លាយ​ទៅ​ជា​ជនរងគ្រោះ​ដោយសារ​ការ​អភិវឌ្ឍ​នោះ​ទៅ​វិញ​ជាពិសេស​បឹង និង​ទឹក​ស្រះ​។

ឧទាហរណ៍ បឹងកក់ បឹងទំពុន បឹង​ជើងឯក​ដ៏ធំ​ល្វឹងល្វើយ​ទឹក​ស្រះ​ក្នុង​ពហុកីឡដ្ឋាន​ជាតិ​អូឡាំពិក ទឹក​ស្រះ​ក្នុង​បុរី​កីឡា បឹង​ត្របែក ដែល​ជា​កន្លែង​ស្តុក​ទឹក​ពេល​ភ្លៀង​សុទ្ធ​តែ​ត្រូវ​បាន​គេ​ចាក់​ខ្សាច់​ទាំង​យប់​ទាំង​ថ្ងៃ​លុប​ពេញ​យក​ធ្វើ​កន្លែង​តំបន់​អភិវឌ្ឍន៍​រយៈពេល​វែង​ខ្លះ​លក់​ទាំង​ស្រុង​។

បឹង​កក់​ត្រូវ​បាន​ក្រុមហ៊ុន Google លុប​ផ្ទៃ​ទឹក​ចេញ​ទាំង​ស្រុង​ពី​ផែន​ទី​ហើយ​ដែរ​ខណៈ​ដែល​កំពុង​ក្លាយ​ជា​កន្លែង​អភិវឌ្ឍន៍​របស់​ក្រុមហ៊ុន​ស៊ូកាកូអ៊ីន​ហើយ​ទឹក​ស្រះ​ និង​ដី​ក្រហម​នៅ​ពហុកីឡដ្ឋាន​ជាតិ​អូឡាំពិក​បាន​និង​កំពុង​​ចេញ​ជា​រូបរាង​អគារ​ខុនដូ​ និង​ផ្សារ​ទំនើប​ដ៏​ខ្ពស់​ស្កឹមស្កៃ​ក្នុង​ពេល​ដែល​បឹង​ទំពុន​ក៏​ត្រូវ​បាន​គេ​លុប​អស់ ១ ​ផ្នែក​ធំ​ និង​កំពុង​បាន​ក្លាយ​ទៅ​សាលា​អន្តរជាតិ ISPP ដ៏ធំ​ទូលាយ​មួយ​ផង​ដែរ​នោះ។

ឥឡូវ​ដល់​ពេល​ខ្វះ​កន្លែង​រំដោះ​ទឹក​អាជ្ញាធរ​ទាំង​សាលា​ខណ្ឌ​ទាំង​សាលា​រាជធានី​ទៅ​នាំ​គ្នា​ទៅ​ឈូស​ដី និង​ផ្ទះ​សំបែង​ប្រជាពលរដ្ឋ​ ៩ ​គ្រួសារ​ដើម្បី​ពង្រីក​ប្រឡាយ​បាក់ទូក​នៅ​ខណ្ឌ​ឫស្សីកែវ​បង្ហូរ​ទៅ​បឹងបាយាប​ដោយ​គ្មាន​សំណង​អី​មួយ​រៀល​បើ​ទោះបី​ជា​ពួកគាត់​មាន​ប្លង់​ផ្ទះ​តាំង​ទសវត្សរ៍​ឆ្នាំ​ ៨០ ​​ហើយ​​ក៏​ដោយ​គឺ​អាជ្ញាធរ​គ្រាន់​តែ​ឆ្លើយ​ថា​កន្លែង​អភិវឌ្ឍន៍​គឺ​ចប់​។ រីឯ​អ្នក​ក្រីក្រ​ខ្លះ​ទៀត​​រង​ការ​លិច​ទឹក​ជា​ប្រចាំ​ដោយសារ​ការ​ចាក់​ដី​ខ្ពស់​នៅ​កន្លែង​អភិវឌ្ឍន៍ និង​តាម​បុរីៗ​ធ្វើ​ឲ្យ​ផ្ទះ​របស់​ពួកគាត់​ទាប​ជាង​លូ​ហើយ​កាលពី​សប្តាហ៍​មុន​មាន​កិច្ចប្រជុំ​មួយ​​ធ្វើ​ឡើង​ក្រោយ​ពី​ប្រជាពលរដ្ឋ​ប្រឈម​នឹង​ការ​រងគ្រោះ​ជាង ៤០០ គ្រួសារ​រស់នៅ​លើ​ដី​បណ្តោយ​ប្រឡាយ​ប្រវែង​ ១៤៩២ ម៉ែត្រ​ដែល​ស្ថាប័ន​ពាក់ព័ន្ធ​ដូចជា​ក្រសួង​ដែនដី​ក្រសួង​សាធារណការ និង​អាជ្ញាធរ​រាជធានី​ភ្នំពេញ​មាន​ផែនការ​រុះរើ​ផ្ទះ​សំបែង​របស់​ពួកគាត់​ដែល​រស់នៅ​ជា​យូរ​ឆ្នាំ​មក​ហើយ​នោះ។

ផលប៉ះពាល់​ពី​ការ​អភិវឌ្ឍ​បែប​លុប​បឹង​ និង​ស្រះ​នា​ប៉ុន្មាន​ឆ្នាំ​ចុងក្រោយ​នេះ​ត្រូវ​បាន​គេ​កត់សម្គាល់​ឃើញ​ថា​មាន​ទឹកជំនន់​កាន់​តែ​ខ្ពស់​នៅ​ពេល​ភ្លៀង​ធំ​ម្តងៗ​ដោយ​មើល​ទៅ​អាក្រក់​មើល​ណាស់​ក្នុង​ពេល​ទឹក​ហូរ​ចេញ​ពី​លូ​ស្អុយ​គគ្រុក​ជាពិសេស​សំរាម​រាវ​វេជ្ជសាស្ត្រ​ចេញ​ពី​មន្ទីរពេទ្យ គ្លីនិក ឬ​ក៏​កន្លែង​សត្តឃាត​នានា​គឺ​នាំ​សុទ្ធ​តែ​មេរោគ​មក​ជាមួយ​ដែល​ធ្វើឲ្យ​ប៉ះពាល់​សុខភាព​ប្រជាពលរដ្ឋ​នៅ​តាម​ប្រឡាយ​ទឹក​សម្អុយ​​នោះ​យ៉ាង​ធ្ងន់ធ្ងរ​។

ទន្ទឹម​នឹង​នេះ​ដែរ​ក្នុង​ពេល​ដែល​កំណើន​រថយន្ត​ទំនើប​ក៏​មាន​ព្រោងព្រាត​នៅ​ទីក្រុង​គជ់​ផង​នោះ​មើល​ទៅ​ខូច​សោភណភាព​រថយន្ត​របស់​អ្នក​ផលិត​អស់​ហើយ​ដោយ​តម្លៃ​សុទ្ធ​តែ​ ២២ ​ម៉ឺន​តែ​បែរ​ជា​មក​ជិះ​លើ​ទឹក​សម្អុយ​ទៅ​វិញ​។

ម្យ៉ាង​វិញ​ទៀត​ធនាគារ​​អភិវឌ្ឍន៍​អាស៊ី​បាន​ធ្វើការ​ទស្សន៍ទាយ​ថា​កម្ពុជា​នឹង​ក្លាយ​ជា​កូន​ខ្លា​សេដ្ឋកិច្ច​នៅ​អាស៊ី​ផង​បែរ​ជា​ទីក្រុង​ទឹក​លិច​ស្អុយ​គគ្រុក​យ៉ាង​នេះ។ រីឯ​រដ្ឋាភិបាល​វិញ​នៅ​ពេល​ដែល​ពលរដ្ឋ​រិះគន់ រអ៊ូរទាំ ខឹង​សម្បា និង​ប្តឹង​ទៅ​បាន​ត្រឹម​តែ​សុំ​អធ្យាស្រ័យ​រាល់​តែ​ឆ្នាំ​ដោយ​ថា​រដ្ឋាភិបាល​គ្មាន​លុយ​ទេ​ធ្វើ​ប្រព័ន្ធ​រង់ចាំ​គេ​ (JICA) ​ធ្វើ​ឲ្យ​ដែល​ស្ដាប់​ទៅ​គួរ​ឲ្យ​ខ្មាស​អៀន​នៅ​ពេល​លក់​បឹង លក់​ស្រះ​បាន​លុយ​ចែក​គ្នា​ចាយ និង​ដាក់​បក្ស​អស់​មិន​ដឹង​ជា​ទៅ​ទី​ណា​ហើយ​រង់ចាំ​លូ​ធំៗ​ដែល​រដ្ឋាភិបាល​ជប៉ុន​ធ្វើ​ឲ្យ​ដោយ​តែងតែ​ថា​ប្រព័ន្ធ​លូ​ជិត​ហើយ​រាល់​តែ​ឆ្នាំ​។

ការ​សាងសង់​ប្រព័ន្ធ​លូ​ថ្មី​បែប​នេះ​គឺ​ដោយសារ​រដ្ឋាភិបាល​រង់ចាំ​ជំនួយ​ពី​គេ​ធ្លាក់​មក​បើ​រដ្ឋ​ប្រើ​ថវិកា​ខ្លួន​ឯង​គឺ​វា​រួចរាល់​តាំង​ពី​យូរ​យារ​ណាស់​មក​ហើយ​តែ​មិន​អ៊ីចឹង​ឯណា​ពេល​ខ្លះ​ទុក​ជិត​ដល់​ពេល​បោះឆ្នោត​ម្តងៗ​បាន​ធ្វើ​នៅ​តាម​សង្កាត់ ខណ្ឌ បន្តិច​បន្តួច​រួច​ក៏​យក​រូបភាព​នោះ​មក​ផ្សព្វផ្សាយ​ឃោសនា​ ឬ​ក៏​ពេល​ភ្លៀង​ហើយ​ឃើញ​ប្រមូល​សំរាម និង​បារ​លូ​ម្តង​ទៅ​ ២ ​ដង​ទៅ​ហើយ​ថត​ដាក់​ទូរទស្សន៍​ឲ្យ​មើល​ទៅ​ដូច​ជា​យក​ចិត្ត​ទុក​ដាក់​រឿង​លិច​ទឹក​សម្បើម​ណាស់​។

ម្យ៉ាង​វិញ​ទៀត​បើ​បក្ស​ប្រឆាំង​វិញ​គឺ​បាន​ត្រឹម​តែ​រិះគន់​រដ្ឋាភិបាល​ធ្វើ​មិន​បាន ធ្វើ​មិន​កើត​តែ​ប៉ុណ្ណោះ​តែ​ខ្លួន​មិន​បាន​បំផុស​បំផុល​សមាជិក សមាជិកា​ដែល​មាន​នៅ​តាម​មូលដ្ឋាន​ក្នុង​នាម​ពលរដ្ឋ​សាមញ្ញ​បើ​មិន​មាន​ថវិកា​ជាតិ​ធ្វើ​ទេ​ក៏​ដើរ​ប្រមូល​សំរាម​ដែល​ធ្វើ​ឲ្យ​ស្ទះ​លូ​ក៏​បាន​ដែរ​។

ឥឡូវ​ផ្លូវ​ទឹក​សម្អុយ​នៅ​ទីក្រុង​បញ្ចេញ​កាន់​តែ​រួម​ទៅៗ​មាន​ផ្លូវ​ប្រឡាយ​បឹង​បាយាប លូ​បឹង​ត្របែក​ហូរ​ទៅ​បឹង​ទំពុន​ចាល់​ទឹក​អាច​ចូល​ទឹក​ស្ទឹង​ហើយ​នៅ​ពេល​ណែន​បង្ហូរ​ចូល​ទៅ​ទន្លេ​បំពុល​បរិស្ថាន​ក្នុង​ទឹក​ដដែល​។ នេះ​មក​ពី​រាជរដ្ឋាភិបាល​ដឹង​តែ​ពី​លក់​ដី​តំបន់​អភិវឌ្ឍន៍​តែ​អសមត្ថភាព​ក្នុង​ការ​គ្រប់គ្រង​ទឹក និង​មិន​ចេះ​កែច្នៃ​ទឹក​សម្អុយ​ឲ្យ​ទៅ​ជា​ទឹក​ស្អាត​ប្រើប្រាស់​ដូច​នៅ​ប្រទេស​ សិង្ហបុរី​ ទេ​ជាពិសេស​មន្ត្រី​ជាន់​ខ្ពស់​ស្រុក​ខ្មែរ​ទៅ​ប្រទេស​គេ​មិន​ដែល​យក​ភ្នែក​មើល​ថា​ត្រូវ​ធ្វើ​ដូចម្តេច​នោះ​ទេ​បើ​ហោច​ណាស់​ក៏​មាន​ចម្ងល់​ថា​តើ​ពេល​ភ្លៀង​ម្តងៗ​ទឹក​លូ​គេ​បង្ហូរ​ទៅ​ណា​? គេ​យក​បញ្ចូល​ទៅ​ក្នុង​ទឹក​សមុទ្រ​?

តាមរយៈ​វេបសាយ​របស់​រដ្ឋាភិបាល​សិង្ហបុរី www.pub.gov.sg នៅ​ប្រទេស​នេះ​គឺ​គេ​ធ្វើ​បឹង​សិប្បនិម្មិត​សម្រាប់​រក្សា​ទឹក​ភ្លៀង​ទុក​ប្រើ​ហើយ​ទឹក​ដែល​ហូរ​ចេញ​ពី​លូ​គឺ​រដ្ឋាភិបាល​យក​ទៅ​កែច្នៃ​ឲ្យ​ទៅ​ជា​ទឹក​ល្អ​យក​មក​ប្រើប្រាស់​វិញ​គឺ​មិនមែន​បង្ហូរ​ចូល​ទឹក​សមុទ្រ​បំពុល​បរិស្ថាន​នោះ​ទេ​។

ប៉ុន្តែ​ផ្ទុយ​ទៅ​វិញ​សាលា​រាជធានី​ភ្នំពេញ​បែរ​ជា​មាន​ថវិកា​សម្រាប់​ធ្វើ​សួនច្បារ ឬ​ក៏​គាស់​ថ្ម​ចិញ្ចើម​ផ្លូវ​ដែល​មិន​ទាន់​មាន​ការ​ខូចខាត​អ្វី​សោះ​ហើយ​ឃើញ​តែ​ធ្វើ​នៅ​កន្លែង​ដដែលៗ​ពិសេស​ត្រង់​ម្តុំ​សួន​ច្បារ​ក្បែរៗ​ផ្ទះ​លោក​នាយក​រដ្ឋមន្ត្រី ហ៊ុន សែន ក្បែរ​វិមាន​ឯករាជ្យ​ដើម្បី​យក​មុខ​មាត់​ឲ្យ​លោក​មើល​ឃើញ​ថា​សាលា​រាជធានី​ហ្នឹង​ធ្វើ​ការងារ​ច្រើន​ណាស់ និង​ជួសជុល​នៅ​ម្តុំៗ​ស្នាក់ការ​ធំ​គណបក្ស​ប្រជាជន​តែ​ប៉ុណ្ណឹង​។ ពេល​ខ្លះ​មើល​ទៅ​ការ​ចំណាយ​ថវិកា​បែប​នេះ​គឺ​មាន​ការ​ខ្ជះខ្ជាយ​ថវិកា​ជាតិ​ខ្លាំង​សម្បើម​ណាស់​ពីព្រោះ​ថ្ម​ចិញ្ចើម​ផ្លូវ ​និង​ការ៉ូឡា​ទាំង​នោះ​នៅ​មិន​ទាន់​ខូច​ផង​ហើយ​ក៏​នៅ​ស្អាត​អាច​ប្រើ​បាន​ ៣ ​ទៅ​ ៤ ​ឆ្នាំ​ទៅ​មុខ​ទៀត​តែ​ត្រូវ​គាស់​ចោល​ទៅ​វិញ។

ចុះ​ហេតុ​អ្វី​បាន​ជា​សាលា​រាជធានី​ត្រូវ​ចំណាយ​ថវិកា​ជាតិ​ដ៏ច្រើន​សន្ធឹក​សន្ធាប់​បែប​នេះ​?ឬ​ក៏​ការ​ចាយ​លើ​ការ​ជួសជុល និង​ការ​ដេញ​ថ្លៃ​ទិញ​ឥដ្ឋ​បាន​កុំ​មិស្យុង​ច្រើន​ស្រួល​ចែក​គ្នា​ចាយ​? ឬ​ក៏​ខ្លាច​តែ​ចាយ​មិន​អស់​ក្រសួង​ហិរញ្ញវត្ថុ​យក​ថវិកា​ទាំង​នោះ​ទៅ​វិញ​?

ហេតុអ្វី​បាន​ជា​សាលា​រាជធានី​មិន​យក​ថវិកា​ទាំង​នេះ​មក​ដោះស្រាយ​រឿង​ទឹក​សម្អុយ​លិច​ក្រុង​មក​ធ្វើ​ជា​ផែនការ​អាទិភាព​វិញ​? ​ព្រោះ​វា​ជា​តម្រូវការ​ចាំបាច់​របស់​ប្រជាពលរដ្ឋ​ក្នុង​ពេល​រដូវវស្សា​ចាប់ផ្តើម​មក​ដល់​នេះ​ធ្វើ​យ៉ាង​ណា​ឲ្យ​ដូច​ការ​សន្យា​របស់​លោក​អភិបាល​ក្នុង​ពេល​ដែល​គ្រាន់​តែ​ដឹង​ថា​ នឹង​ឡើង​ធ្វើ​ជា​អភិបាល​កាលពី​ខែ​មេសា​ឆ្នាំ​ ២០១៣​ ភ្លាម​គឺ​លោក​សន្យា​ថា​នឹង​ដោះស្រាយ​ទឹកជំនន់​ក្រោយ​ភ្លៀង​​មុន​គេ​ហើយ​លោក​ក៏​ឧស្សាហ៍​ទៅ​អើត​មើល​នៅ​កន្លែង​ប្រឡាយ​បង្ហូរ​ទឹក​ទៅ​បឹងបាយាប​ផង​ដែរ​ព្រោះ​វា​ក៏​ជា​សោភណភាព​ទីក្រុង​មួយ​ដែរ​តែ​ដល់​ពេល​បាន​កាន់​អំណាច​ភ្លេច​ការ​សន្យា​អស់​លែង​សូវ​ខ្វល់​ដោយ​ទឹក​នៅ​តែ​លិច​ដូច​កាលពី​សម័យ​លោក កែប ជុតិមា ដដែល។ ឬ​ មួយ​ក៏​ធ្វើ​សួន​ច្បារ និង​ចិញ្ចើម​ផ្លូវ​ម្ចាស់​ឆ្នោត​មើល​ឃើញ​ជាង​ធ្វើ​ប្រព័ន្ធ​រំដោះ​ទឹក​លិច​ក្រុង​បាន​ជា​យក​លុយ​ទៅ​ចាយ​មិន​ចំ​គោលដៅ​ទៅ​វិញ ?

ចូលរួម​ផ្តល់​យោបល់​តាមរយៈ soprach.tong@phnompenhpost.com

អត្ថបទគួរចាប់អារម្មណ៍