ផ្លូវជាតិលេខ ៤ ពីភ្នំពេញ ទៅខេត្តព្រះសីហនុ ត្រូវបានគេមើលឃើញថា ជាផ្លូវដែលកើតមានគ្រោះថ្នាក់ចរាចរណ៍ច្រើនជាងគេ គឺកើតឡើងរាល់ថ្ងៃគ្រាន់តែថា ថ្ងៃខ្លះតិច ថ្ងៃខ្លះច្រើនប៉ុណ្ណោះ ដោយសារតែផ្លូវនេះ ជាផ្លូវ ជាតិមានទំហំតូច នាពេលបច្ចុប្បន្ន ដែលចរាចរណ៍កំពុងតែកកកុញស្ទះរាល់ថ្ងៃ ហើយជាផ្លូវពាណិជ្ជកម្មមានរថយន្តកុងតឺន័រធំៗ ដឹកទំនិញ មានអ្នកធ្វើដំណើរច្រើន និងរោងចក្រកាត់ដេរ នៅតាមដងផ្លូវ ពេលកម្មករចេញពីធ្វើការមានភាពមមាញញឹក។
នៅពេលអ្នកបើកបរម្នាក់ ចេះតែចង់ប្រញាប់បើកបង្កើនល្បឿន វ៉ាជែងគេ ឯង ធ្វើឲ្យមានគ្រោះថ្នាក់ចរាចរណ៍ទៅវិញ បុករះឆ្លងទៅគំនូសនៃគន្លងផ្លូវម្ខាងទៀត ដែលគេបើកបរស្របផ្លូវសោះនោះ ដូចករណីគ្រោះថ្នាក់កាលពីចុងសប្តាហ៍មុន មានរថយន្ត ៣ គ្រឿងបុកគ្នាដោយសារតែវ៉ាគ្នាឆ្លងទៅខាងឆ្វេងដៃ ដែលកំពុងបើកបញ្រ្ចាសទិសគ្នានោះ។ គ្រោះថ្នាក់ចរាចរណ៍ដ៏រន្ធត់ដោយមានឆេះរថយន្តនេះបណ្តាលឲ្យមានមនុស្សស្លាប់ដល់ទៅ ១០ នាក់ ក្នុងនោះ មានមន្ត្រីគយផែកំពង់សោមចំនួន ៣ រូបផង។
តាមពិតទៅ កាលពីមិនទាន់ជួសជុលផ្លូវជាតិលេខ ៣ គឺអ្នកដំណើរដែលទៅកម្សាន្តនៅកំពង់សោម បើកតាមផ្លូវជាតិលេខ ៣ កាត់តាមខេត្តកំពត ទៅចេញតាមព្រៃនប់ ផ្លូវជាតិលេខ ៤ ទៅវិញ។ ឥឡូវផ្លូវជាតិលេខ ៣ កំពុងជួសជុល អ៊ីចឹងម្នាក់ៗចេះតែមកតាមផ្លូវជាតិ ៤ វិញ ធ្វើឲ្យកាន់តែស្ទះ និងងាយគ្រោះថ្នាក់ជាងគេទៅវិញ។
គ្រោះថ្នាក់ចរាចរណ៍នេះ គឺកើតឡើងតែមួយប៉ប្រិចភ្នែកទេ នៅពេលដែលអ្នកបើកបរសម្រេចចិត្តវ៉ាជែងដោយប្រើល្បឿនលើសការកំណត់នោះ នេះគឺដោយសារតែឥរិយាបថរបស់អ្នកបើកបរខ្លះ ចេះតែបង្ខំឲ្យតែបានលឿនប្រញាប់ជាងគេជាងឯងភ្លាមៗ មិនបានគិតពីផលគ្រោះថ្នាក់ខ្លួនឯងផង និងអ្នកដំណើរជាមួយនិងអ្នកដទៃទេ។
ពួកគេអាងតែឡានជាន់ស្រួល ហើយគិតថា ផុត ពេលណាវ៉ាផុតទៅរួចខ្លួន បើមិនផុតទេ គឺទៅបុកគេនៅម្ខាងបញ្រ្ចាសទិស សងគេពេញទំហឹងហើយ ខ្លួនឯងគ្រោះថ្នាក់ទៀត អាងអីបើកទ្វារឡានរត់ចោលឡានបាត់ ឬក៏បើកឡានរត់ចោលតែម្តង។ បើនិយាយរឿងរៀនទ្រឹស្តី និងប្រឡងបើកបរវិញ គឺប្រញាប់ៗ ធ្វើឲ្យតែបានៗនោះទេ មិនបានរឹតបន្តឹងតាំងពីការប្រឡងឡើយ អ៊ីចឹងហើយ ពេលខ្លះអ្នករៀនដៃចង្កូតល្អហើយ តែគាត់ខ្វះទ្រឹស្តី និងក្រមសីលធម៌ គឺមិនគិតពីផលលំបាកដល់អ្នកធ្វើដំណើរដូចគ្នានោះទេ។
កន្លងមក ផ្លូវជាតិលេខ ៤ ត្រូវបានជួសជុលកែលម្អបានធំទូលាយច្រើន រហូតដល់ខេត្តកំពង់ស្ពឺដែរ ជាងនេះទៅទៀត មានផ្លូវកាត់ទទឹងឡើងលើសម្រាប់អ្នកដំណើរឆ្លងផ្លូវដើម្បីកាត់បន្ថយគ្រោះថ្នាក់បានច្រើនដែរ រីឯផ្សារដែលនៅលើផ្លូវក៏រុញចូលខាងៗចិញ្ចើមផ្លូវដែរ។
តែមិនឈ្នះអ្នកបើកបរដែលចូលចិត្តតែបើកបរជែងគ្នាឲ្យតែបានទៅមុខមិនខ្វល់ពីការកកស្ទះចរាចរណ៍និង គ្រោះថ្នាក់ប៉ះពាល់ដល់អ្នកដទៃនោះឡើយគ្រាន់តែអត្រាស្លាប់ដោយសារគ្រោះថ្នាក់ចរាចរណ៍នេះមានរហូតដល់ ៦ នាក់ក្នុង ១ ថ្ងៃទៅហើយ។ នេះបើតាមទិន្ន័យ របស់ក្រសួងមហាផ្ទៃឆ្នាំ ២០១៨។
មួយថ្ងៃៗឮតែសំឡេងឡានសាមុយ Ambulance ស៊ីរ៉ែនដឹកអ្នករងគ្រោះថ្នាក់ ដោយសារតែចរាចរណ៍នេះ។ បើនិយាយពីការខាតបង់ ១ ឆ្នាំៗវិញ មានដល់ទៅ ៣៣០ លានដុល្លារក្នុង ១ ឆ្នាំ (HIB, 2013) និងមិនទាន់គិតដល់ការបាត់បង់ធនធានមនុស្សនិងសមាជិកក្រុមគ្រួសារផង។ ទម្រាំតែរៀនចប់ហើយប្រឡងបានជាប់ជាមន្ត្រីគយ គឺស៊ីពេលរាប់ឆ្នាំដូចមន្ត្រីគយ ៣ រូបដែលបានស្លាប់ដោយសារតែគ្រោះថ្នាក់ចរាចរណ៍កាលពីចុងសប្តាហ៍មុននេះ។
តែអ្វីដែលអាចធ្វើបានចំពោះការកាត់បន្ថយគ្រោះថ្នាក់ចរាចរណ៍នោះ គឺអ្នកបើកបរ ត្រូវមានភាពអត់ធ្មត់ និងពង្រឹងការរៀនទ្រឹស្តីការបើកបរ ជាពិសេសចំពោះការរង់ចាំផ្លូវមានល្បឿនលឿន ពីភ្នំពេញទៅខេត្តព្រះសីហនុនោះ។ តែនៅពេលនេះគឺមានតែកំណត់ល្បឿនថេរ ៨០ គីឡូម៉ែត្រក្នុង ១ ម៉ោង មិនវ៉ាគ្នាលើសល្បឿននេះទេហើយប៉ូលិសចាំធ្វើចាប់ឆ្មក់ (Spot Check) រថយន្តដែលបើកលើសគីឡូម៉ែត្រនេះ៕
ចូលរួមផ្តល់យោបល់តាមរយៈ soprach.tong@phnompenhpost.com