.jpg)
យុវសិស្ស សុំ រស្មី ដែលត្រូវបានសាលាច្រឡំលុបឈ្មោះចេញពីបញ្ជីបេក្ខជនប្រឡងបាក់ឌុប។ រូបថត ហ្វេសប៊ុក
បើទោះបីជាមិនមានសេចក្តីរាយការណ៍ពីការប្រឡងបាក់ឌុបនៅតាមប្រទេសនានា មានសិស្សសន្លប់ ឬក៏មានបញ្ហាបាត់បង់ស្មារតីនៅពេលប្រឡងបញ្ចប់ថ្នាក់វិទ្យាល័យនេះក៏ដោយ ក៏ការប្រឡងថ្នាក់បាក់ឌុបនៅស្រុកខ្មែរគឺមានបញ្ហាខុសពីប្រក្រតីរាល់ឆ្នាំ ដូចជា បេក្ខជនប្រឡងមានអាការធេងធោង ឈឺក្បាល វិលមុខ ក្អួតចង្អោរ បាត់បង់ស្មារតី និងបាត់បង់ភាពម្ចាស់ការ សន្លប់នៅថ្ងៃប្រឡងតែម្តង។
ផ្អែកតាមសេចក្តីប្រកាសព័ត៌មាន ក្រសួងអប់រំដែលបានផ្សព្វផ្សាយកាលពីថ្ងៃទី ២១ ខែសីហា ឆ្នាំ ២០១៨ ស្តីពីការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំនេះបានឲ្យដឹងថា៖ «បេក្ខជនមានបញ្ហាសុខភាពធ្ងន់ធ្ងរមានចំនួន ៦៤ ករណី តែបន្ទាប់ពីមានការសង្គ្រោះបឋមអាចបន្ដការប្រឡងទៀតបាន លើកលែងតែ ៥ ករណីត្រូវបញ្ជូនទៅព្យាបាលនៅមន្ទីរពេទ្យមិនអាចត្រឡប់មកប្រឡងវិញបាន»។
ប៉ុន្តែឆ្នាំនេះមានករណីចម្លែកមួយទៀតគឺសិស្សឈ្មោះ សុំ រស្មី នៅខេត្តកំពង់ធំ ត្រូវបានលោកនាយកសាលាលុបឈ្មោះច្រឡំ ខានបានប្រឡងជាមួយនឹងគេ។ តែក្រសួងអប់រំបានសម្រេចផ្តល់ពិន្ទុ ២៦ សម្រាប់ប្រឡងឆ្នាំក្រោយ ហើយក្រសួងបានបកស្រាយថាមិនមានគោលការណ៍ឲ្យបេក្ខជនជាប់ជាស្វ័យប្រវត្តិនោះទេ។
សម្រាប់ការបកស្រាយរបស់លោកបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំនេះក៏ដូចជាមានលក្ខណៈសមហេតុសមផលម្យ៉ាងដែរ។
ប៉ុន្តែទោះយ៉ាងណាការខាតបង់ការសិក្សាពេញ ១ ឆ្នាំរបស់យុវសិស្ស សុំ រស្មី ដែលពុំបានប្រព្រឹត្តអ្វីខុសក្រសួងគួរតែផ្តល់ដំណោះស្រាយសមរម្យមួយ។
ឧទាហរណ៍៖ ការចាប់ផ្តើមកំណែទម្រង់ដំបូងរបស់លោករដ្ឋមន្ត្រីកាលពីឆ្នាំ ២០១៤ គឺការរឹតបន្តឹងការប្រឡងបាក់ឌុបឆ្នាំនោះមានអ្នកជាប់បានតែជាង ២,៣ ម៉ឺន នាក់ស្មើនឹង ២៦ ភាគរយនៃបេក្ខជនសរុបជាង ៨ ម៉ឺននាក់ដែលចំនួនធ្លាក់ដ៏គំហុកនេះក៏មានអន្តរាគមន៍ពីលោកនាយរដ្ឋមន្ត្រី ហ៊ុន សែន បានផ្តល់ឱកាសឲ្យសិស្សានុសិស្ស ដែលបានប្រឡងធ្លាក់នោះបានប្រឡងជាលើកទី ២ គឺបេក្ខជនបានជាប់ជាង ១ ម៉ឺននាក់បន្ថែមទៀតផងដែរ។ តែការប្រឡងជាលើកទី ២ នេះក៏ក្រសួងអប់រំគ្មានគោលការណ៍ណែនាំជាក់លាក់ផងដែរ តែក្រសួងអាចធ្វើបានដោយមានចំណារពីរដ្ឋាភិបាល។
រីឯករណីនិស្សិតសាលាពេទ្យ ប្រឡងធ្លាក់សុំលោកនាយករដ្ឋមន្ត្រីជាប់កាលពីឆ្នាំ ២០១៦ ខណៈដែលក្រសួងអប់រំគ្មានគោលការណ៍ជាក់លាក់សម្រាប់និស្សិតដែលប្រឡងធ្លាក់ហើយ ឲ្យជាប់វិញនោះផងដែរ។
កន្លងមកលោករដ្ឋមន្ត្រីក្រសួងអប់រំ បានបកស្រាយ និងរកដំណោះស្រាយជូនអត្តពលិកដែលជាបេក្ខជនប្រឡងបាក់ឌុបធ្លាក់នេះផងដែរ គឺផ្តល់ឱកាសស្វែងរកការសិក្សាតាមវិទ្យាស្ថាន និងមហាវិទ្យាល័យផ្នែកបរិញ្ញាបត្ររង។
តែចំពោះករណីសុខភាពបេក្ខជន និងកំហុសបច្ចេកទេសរបស់មន្ត្រីដូចបានរៀបរាប់ខាងលើមកនេះគឺហាក់បីដូចជាការធ្វើទារុណកម្មមួយចំពោះបេក្ខជន។ បើបើកមើលទៅលើរូបភាពដែលបានចែករំលែកនៅតាមសារព័ត៌មាន ក៏ដូចជាក្នុងបណ្តាញសង្គមហ្វេសប៊ុកមានតាំងពីអ្នកគ្រូគ្រាហ៍សិស្សដែលបាត់បង់ស្មារតី សិស្សអង្គុយប្រឡងដៃព្យួរសេរ៉ូមខ្លះ អង្គុយក្រោមដើមឈើប្រឡងជាមួយនឹងសេរ៉ូម ខ្លះប្រឡងក្នុងឡានពេទ្យសង្គ្រោះបន្ទាន់ និងខ្លះទៀតបោះបង់ចោលការប្រឡងនេះតែម្តង ដោយសារប៉ះពាល់ដល់សុខភាពធ្ងន់ធ្ងរពេក។
ហេតុដូច្នេះហើយដើម្បីឆ្លើយតបទៅនឹងករណីជាក់ស្តែង ដែលមិនមែនធ្វើពុតឈឺរបស់បេក្ខជនប្រឡងភ្ជាប់ពីវេជ្ជបញ្ជាពីលោកគ្រូពេទ្យប្រចាំការនៅក្នុងមណ្ឌលស្រាប់ ឬក៏ករណីកំហុសបច្ចេកទេសរបស់មន្ត្រីអប់រំជាដើមគឺក្រសួងអប់រំគួរសិក្សាលើករណីមួយៗឡើងវិញ ដែលមានលក្ខណៈសមហេតុសមផល ហើយស្វែងរកដំណោះស្រាយដល់បេក្ខជន និងមាតាបិតារបស់បេក្ខជនឲ្យបានអស់ចិត្ត។
រាល់ដំណោះស្រាយនីមួយៗ មិនមែនមានន័យថា មិនប្រឡងឲ្យបេក្ខជននោះជាប់ដោយស្វ័យប្រវត្តិនោះទេ បើដូចករណីខាងលើនេះក្រសួងអាចចេញជាគោលការណ៍ណែនាំថ្មី ១ ជាករណីលើកលែងក្នុងការផ្តល់លទ្ធភាពឲ្យបេក្ខជនប្រឡងបាក់ឌុបដែលមានបញ្ហាសុខភាពគ្រោះថា្នក់ដោយចៃដន្យណាមួយ ឬក៏បាត់ឈ្មោះដោយចៃដន្យបែបនេះគឺបញ្ឈប់ពួកគេមិនឲ្យប្រឡងលើកទី ១ ទាំងស្រុង។ តែអនុញ្ញាតឲ្យពួកគេមកប្រឡងជាលើកទី ២ នៅសប្តាហ៍បន្ទាប់វិញ ដើម្បីឲ្យពួកគេមានឱកាសប្រឡងវិញ្ញាសាថ្មីទៅតាមខេត្ត-រាជធានីរៀងៗខ្លួន។
តែការធ្វើបែបនេះមិនមែនមានន័យថាក្រសួងអប់រំបង្កើតធ្វើឲ្យការប្រឡងមានស្តង់ដារ ២ នោះទេ (Double standards) នេះគឺជាការស្វែងរកដំណោះស្រាយ ទៅតាមករណីជាក់ស្តែងបណ្តោះអាសន្នសាកល្បងសិន ប្រសិនបើបញ្ហាបាតុភាពនេះមានការធ្លាក់ចុះគួរឲ្យកត់សម្គាល់ ឬក៏លែងកើតមានឡើងគឺអាចដកគោលការណ៍បណ្តោះអាសន្ននេះចេញវិញ។
កន្លងមកក្រសួងអប់រំត្រូវបានសាធារណជនទូទៅកោតសរសើរអំពីកំណែទម្រង់ថ្មី ជាពិសេសគឺលទ្ធផលការប្រឡងបាក់ឌុបនេះតែម្តងទៅតាមគោលនយោបាយរបស់លោករដ្ឋមន្ត្រីគឺ «អ្នកចេះគឺជាប់» និងរាល់ដំណោះស្រាយដែលអាចទទួលយកបានច្រើន ហើយប្រឡងឌីប្លូមឆ្នាំនេះក្រសួងបានធ្វើវិសហមជ្ឈការទៅមន្ទីរខេត្តអនុវត្តរៀងៗខ្លួនបានជោគជ័យរួចមកហើយ។ ថ្មីៗនេះអង្គភាពប្រឆាំងនឹងអំពើពុករលួយដែលបានចុះសង្កេតជាក់ស្តែងពេលប្រឡងបាក់ឌុបឆ្នាំនេះក៏បានកោតសរសើរ និងវាយតម្លៃខ្ពស់ពីការអនុវត្តច្បាប់ មានយុត្តិធម៌ និងមានតម្លាភាពទទួលយកបានផងដែរ៕
ចូលរួមផ្តល់យោបល់តាមរយៈ soprach.tong@phnompenhpost.com
