The Phnom Penh Post Search

Search form




Logo of Phnom Penh Post newspaper Phnom Penh Post - គួរ​យក​គំរូ​​ផ្ទេរ​មុខងារ​ការ​គ្រប់គ្រង​សំរាម​សំណល់​រឹង​ឲ្យ​ថ្នាក់​ក្រោម​ជាតិ




គួរ​យក​គំរូ​​ផ្ទេរ​មុខងារ​ការ​គ្រប់គ្រង​សំរាម​សំណល់​រឹង​ឲ្យ​ថ្នាក់​ក្រោម​ជាតិ

ស្ត្រី​កំពុង​បោស​សម្អាត​នៅ​មុខ​សាលា​ខេត្ត​បាត់ដំបង​ជា​ទីក្រុង​ស្អាត​ទទួល​បាន​រំដួល ៣ ទង​ថ្មីៗ​នេះ។
ស្ត្រី​កំពុង​បោស​សម្អាត​នៅ​មុខ​សាលា​ខេត្ត​បាត់ដំបង​ជា​ទីក្រុង​ស្អាត​ទទួល​បាន​រំដួល ៣ ទង​ថ្មីៗ​នេះ។ រូប​សុប្រាជ្ញ

គួរ​យក​គំរូ​​ផ្ទេរ​មុខងារ​ការ​គ្រប់គ្រង​សំរាម​សំណល់​រឹង​ឲ្យ​ថ្នាក់​ក្រោម​ជាតិ

តាមរយៈ​វេបសាយ​គណៈកម្មការ​ជាតិ​សម្រាប់​ការ​អភិវឌ្ឍ​តាម​បែប​ប្រជាធិបតេយ្យ​នៅ​ថ្នាក់​ក្រោម​ជាតិ (គ.ជ.អ.ប www.ncdd.gov.kh) បង្ហាញ​ពី​របាយការណ៍​សកម្មភាព និង​សមិទ្ធផល និង​ឯកសារ​ផ្សេងៗ​ពាក់ព័ន្ធ​ទៅ​នឹង​កំណែ​ទម្រង់​វិមជ្ឈការ និង​វិសហមជ្ឈការ​ (D&D) ជាពិសេស​គឺ​ការ​ផ្ទេរ​មុខងារ​តាម​បែប​ប្រគល់ ឬ​តាម​បែប​ប្រតិភូកម្ម​មក​ថ្នាក់​ក្រោម​ជាតិ​ដែល​ជា​សសរ​ស្តម្ភ​របស់​កំណែ​ទម្រង់​នេះ​ឲ្យ​ទៅ​តាម​បែប​ប្រជាធិបតេយ្យ​ហើយ​​សឹង​តែ​រាល់​សុន្ទរកថា​ថ្នាក់​ដឹកនាំ​ស្ថាប័ន​នោះ​តែងតែ​លើក​ឡើង​ថា​ប្រសិន​បើ​គ្មាន​ការ​ផ្ទេរ​មុខងារ​បែប​ប្រគល់​ពី​ស្ថាប័ន​ពាក់ព័ន្ធ​នៅ​ថ្នាក់​ជាតិ​ទៅ​ថ្នាក់​ក្រោម​ជាតិ​នោះ​ទេ​គឺ​កំណែ​ទម្រង់​ D&D ហាក់បី​ដូចជា​គ្មាន​ន័យ​។

ជាមួយ​គ្នា​នេះ​ដែរ​នៅលើ​វេបសាយ​ដដែល​នេះ​ក៏​បាន​លើក​ឡើង​ថា​មាន​តែ​ក្រសួង​បរិស្ថាន​​ដែល​បាន​ផ្ទេរ​មុខងារ​ការ​គ្រប់គ្រង​សំរាម សំណល់​រឹង​ទី​ប្រជុំជន​គឺជា​ការ​ប្រគល់​មុខងារ​ដំបូង​គេ​ទៅ​ឲ្យ​រដ្ឋបាល​រាជធានី ក្រុង និង​ស្រុក​កាលពី​ថ្ងៃ​ទី ១៦ ខែ​វិច្ឆិកា​ឆ្នាំ​ ២០១៥​​ កន្លង​ទៅ​នេះ។

ក្នុង​សុន្ទរកថា​របស់​លោក​ សាយ សំអាល់ រដ្ឋមន្ត្រី​ក្រសួង​បរិស្ថាន​បញ្ជាក់​អំពី​នីតិវិធី​ក្នុង​ការ​អនុវត្ត​មុខងារ​គ្រប់គ្រង​សំរាម សំណល់​រឹង​ទីប្រជុំជន​នេះ​ទាមទារ​នូវ​ការ​គាំទ្រ​ទាំង​ធ​ធាន និង​បច្ចេកទេស​ទើប​រាជរដ្ឋាភិបាល​បាន​ផ្តល់​នូវ​កញ្ចប់​ថវិកា​ដែល​មាន​ភ្ជាប់​នូវ​លក្ខខណ្ឌ​នៃ​សេវា​អនាម័យ​បរិស្ថាន​ចំនួន​ទឹកប្រាក់​ ៥ ពាន់​លាន​រៀល និង​បាន​ផ្ទេរ​ដល់​រដ្ឋបាល​ក្រុង​ទាំង​ ២៦ នា​ចុង​ត្រីមាស​ទី​ ៣ ​ឆ្នាំ​ ២០១៥ ​នេះ​។ ​

ក្នុង​ន័យ​នេះ​ការ​ប្រគល់​មុខងារ​នេះ​គឺ​មាន​ន័យ​ថា​ក្រសួង​បាន​ផ្ទេរ​ទាំង​មុខងារ​ ទាំង​ធនធាន​មនុស្ស និង​ថវិកា​ទៅ​ថ្នាក់​ក្រោម​ជាតិ​ដោយ​អនុវត្ត​ទៅ​តាម​នីតិវិធី​រួមមាន៖ អនុក្រឹត្យ​ស្តីពី​ការ​គ្រប់គ្រង​សំរាម​សំណល់​រឹង​ទីប្រជុំជន​ការ​ប្រកាស​អន្តរ​ក្រសួង​ស្តីពី​ការ​កំណត់​កម្រៃ​អតិបរមា​នៃ​សេវា​គ្រប់គ្រង​សំរាម​សំណល់​រឹង​ទីប្រជុំជន​គោលការណ៍​ណែនាំ​បច្ចេកទេស​ស្តីពី​ការ​គ្រប់គ្រង​សំរាម​ សំណល់​រឹង​ទីប្រជុំជន និង​ការ​ផ្តល់​អនុសាសន៍​របស់​លោក​ឧបក​នាយក​រដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ និង​ជា​ប្រធាន គ.ជ.អ.ប ក៏​បាន​ផ្តល់​អនុសាសន៍​បន្ថែម​លើ​ការ​ផ្ទេរ​មុខងារ​នេះ​អនុវត្ត​បាន​កាន់តែ​ល្អ​ប្រសើរ​ក្រសួង​ពាក់ព័ន្ធ​គួរ​រៀបចំ​យន្តការ​គាំទ្រ​នានា​ដើម្បី​ធានា​ថា​រដ្ឋបាល​រាជធានី​ រដ្ឋបាល​ក្រុង និង​រដ្ឋបាល​ស្រុក​មាន​លទ្ធភាព​ទទួល​ខុស​ត្រូវ​លើ​ការងារ​គ្រប់គ្រង​សំរាម​ទីប្រជុំជន​នេះ​ប្រកប​ដោយ​ប្រសិទ្ធភាព​ចាប់​ពី​ឆ្នាំ​ ២០១៦ ​នេះ​តទៅ​។

តែ​ផ្ទុយ​ទៅវិញ​ក្រសួង​ផ្សេងៗ​ទៀត​ដែល​នៅក្នុង​កំណែទម្រង់​នេះ​ដែរ​ដូចជា​ក្រសួង​អប់រំ ក្រសួង​សុខាភិបាល ក្រសួង​អភិវឌ្ឍន៍​ជនបទ ក្រសួង​កសិកម្ម និង​ក្រសួង​សង្គមកិច្ច​គឺ​ចាប់ផ្តើម​អនុវត្ត​មុន​ក្រសួង​បរិស្ថាន​ទៅ​ទៀត​តាំងពី​ឆ្នាំ ២០១១ មក​ម្ល៉េះ។

មក​ទល់​ពេល​នេះ​ក្រសួង​ទាំង​នេះ​នៅ​តែ​​មិន​ទាន់​មាន​មុខងារ​ណា​មួយ​ត្រូវ​បាន​ផ្ទេរ​តាម​បែប​ប្រគល់​ទៅ​ថ្នាក់​ក្រោម​ជាតិ​នៅ​ឡើយ​ទេ​គឺ​បាន​ត្រឹម​តែ​នៅ​ទៅ​មុខ​ថយ​ក្រោយៗ​នៅ​ទ្រឹង​ត្រឹម​តែ​បាន​បញ្ចប់​ការ​វិភាគ​ និង​ពិនិត្យ​បញ្ចប់​មុខងារ​មាន​ន័យ​អនុវត្ត​មិន​ទាន់​ផែនការ​អនុវត្ត​ (ផអ៣) ដំណាក់កាល​ទី​ ២ ​នៅ​ឡើយ​ទេ។

បើ​ទោះបី​ជា ​លោក​នាយករដ្ឋមន្ត្រី ហ៊ុន សែន ​ធ្លាប់​បាន​ជំរុញ​កាលពី​ដើម​ឆ្នាំ​ ២០១៥ ​នេះ​ថា​ ​ក្រសួង​ទាំង​នេះ​ឲ្យ​ផ្ទេរ​មុខងារ​យ៉ាង​ហោច​ណាស់​ឲ្យ​បាន​ ១ ​ដែរ​នៅក្នុង​ឆ្នាំ​ ២០១៥ ក៏ដោយ ក៏​ក្រសួង​ទាំង​នេះ​ហាក់បី​ដូចជា​ធ្វើ​មិន​ដឹង​មិន​ឮ​ខ្លះ​ថា​នៅ​តែ​ព្រួយ​បារម្ភ​ខ្លាច​ថ្នាក់​ក្រោម​ជាតិ​គ្មាន​សមត្ថភាព​ធ្វើ​មិន​កើត។

ជាង​នេះ​ទៀត​យ៉ាង​ហោច​ណាស់​ក៏​មាន​ក្រសួង​អភិវឌ្ឍន៍​ជនបទ​ និង​ក្រសួង​សុខាភិបាល​បាន​សាកល្បង​ផ្ទេរ​តាម​បែប​ប្រតិភូកម្ម​មុខងារ​ថែទាំ​ប្រព័ន្ធ​ផ្គត់ផ្គង់​ទឹកស្អាត​ជនបទ មុខងារ​ផ្តល់​សេវា​អនាម័យ​ជនបទ និង​មុខងារ​គ្រប់គ្រង​មណ្ឌល​សុខភាព​ទៅ​ឱ្យ​រដ្ឋបាល​ស្រុក​គោលដៅ​មួយ​ចំនួន​ផង​ដែរ តែ​ក្រសួង​ទាំង​នេះ​នៅ​តែ​អេះអុញៗ​ញញើត​ញញើម​ក្នុង​ការ​ផ្ទេរ​មុខងារ​ទៅ​ថ្នាក់​ក្រោម​ជាតិ​ដដែល​នៅ​ក្នុង​ឆ្នាំ ២០១៥ ​នេះ។

ផ្អែក​តាម​របាយការណ៍​សន្និបាត​ជាតិ​ស្តី​ពី​ការ​រៀបចំ​ផែនការ​សកម្មភាព និង​ថវិកា​ឆ្នាំ ២០១៦ របស់​ គ.ជ.អ.ប កាល​ពី​សប្តាហ៍​មុន​បាន​កំណត់​គោលដៅ​រំពឹង​ទុក​បន្ត​ទៀត​ថា​នៅ​ឆ្នាំ​ ២០១៦ ក្រសួង​ទាំង​នេះ​គ្រោង​ផ្ទេរ​មុខងារ​បែប​ប្រគល់​ជាក់លាក់​ដោយ​ភ្ជាប់​នឹង​ការ​ផ្ទេរ​មូលនិធិ​មាន​ភ្ជាប់​លក្ខខណ្ឌ​មក​ឲ្យ​រដ្ឋបាល​ក្រុង ស្រុក និង​ខណ្ឌ​ដូចជា៖ ក្រសួង​អប់រំ​នឹង​ផ្ទេរ​មុខងារ​គ្រប់គ្រង​ការ​អប់រំ​កម្រិត​បឋមសិក្សា ក្រសួង​សុខាភិបាល​នឹង​ផ្ទេរ​មុខងារ​គ្រប់គ្រង​ការិយាល័យ​ស្រុក​ប្រតិបត្តិ​សុខាភិបាល ក្រសួង​អភិវឌ្ឍន៍​ជនបទ​នឹង​ផ្ទេរ​មុខងារ​ថែទាំ ជួសជុល​ផ្លូវលំ​ជនបទ ក្រសួង​សង្គមកិច្ច​នឹង​ផ្ទេរ​មុខងារ​គ្រប់គ្រង និង​តាមដាន​ត្រួតពិនិត្យ​មណ្ឌល​ថែទាំ​កុមារ​។ លើស​ពី​នេះ​ក្រសួង​ស្ថាប័ន​មួយ​ចំនួន​ដែល​ស្ថិត​ក្នុង​វិស័យ​អាទិភាព​ផ្សេង​ទៀត​ក៏​បាន​និង​កំពុង​ខិតខំ​ប្រឹងប្រែង​ផង​ដែរ។

លទ្ធផល​ទាំង​នេះ​បង្ហាញ​ថា​ស្ថាប័ន​ដែល​មិន​ទាន់​រួចរាល់​ក្នុង​ការ​ផ្ទេរ​មុខងារ​គឺ​នៅ​មាន​ការ​ភ័យ​ខ្លាច​បាត់​អំណាច បាត់​តួនាទី​របស់​ខ្លួន​ជាពិសេស​សមី​ក្រសួង​នឹង​ត្រូវ​ផ្ទេរ​មុខងារ​មក​ថ្នាក់​ក្រោម​ជាតិ​នោះ។

តែ​បើ​តាម​ទ្រឹស្តី​របស់​កំណែ​ទម្រង់​ D&D គឺ​ផ្ទេរ​អំណាច ឬ​ការ​គ្រប់គ្រង​តាម​ខ្សែ​បណ្តោយ​មក​ឲ្យ​ថា្នក់​ក្រោម​ជាតិ​តែ​មន្ត្រី​បច្ចេកទេស​នៅ​តែ​ធ្វើការ​នៅ​ក្នុង​ស្ថាប័ន​ខ្លួន​ដែល​មិន​បាត់បង់​តួនាទី និង​ផលប្រយោជន៍​នោះ​ទេ។ គឺ​គ្រាន់​តែ​រដ្ឋបាល​មូលដ្ឋាន​ជា​អ្នក​គ្រប់គ្រង​សម្រប​សម្រួល​គ្រប់​វិស័យ​ឲ្យ​ទៅ​ជា​ធ្លុង​មួយ​ក្នុង​គោល​បំណង​អភិវឌ្ឍ​រដ្ឋបាល​របស់​ខ្លួន និង​ផ្តល់​សេវា​សាធារណៈ​ឲ្យ​នៅ​កាន់​តែ​កៀក​ទៅ​ប្រជាពលរដ្ឋ​ហើយ​ឆ្លើយតប​ទាន់​ពេលវេលា​ដើម្បី​ចូលរួម​កាត់​បន្ថយ​ភាព​ក្រីក្រ​។ កុំ​ចាំ​តែ​ស្នើ​មក​ថ្នាក់​លើ​បញ្ជា ឬ​ក៏​ចាំ​តែ​បញ្ជា​ពី​ថ្នាក់​លើ​នោះ។

ជា​ផលវិបាក​ការ​យឺតយ៉ាវ​ក្នុង​ការ​ផ្ទេរ​មុខងារ​តាម​បែប​ប្រគល់​មក​ថ្នាក់​​ក្រោម​ជាតិ​នេះ​ (ឆ្នាំ ២០១១-២០១៥) បើ​ធ្វើការ​ប្រៀបធៀប​ជាមួយ​ប្រទេស​ជិត​ខាង​យើង​ដែល​គេ​កំពុង​តែ​កែទម្រង់​ D&D ដូច​នៅ​ប្រទេស​ឥណ្ឌូនេស៊ី​ (ឆ្នាំ​ ១៩៩៨-២០០០) ​ហ្វីលីពីន​ (ឆ្នាំ​ ១៩៩០-១៩៩១) និង​ប៉ាគីស្ថាន (ឆ្នាំ ២០១៤-២០១៥) ក៏​យើង​​នៅ​មាន​ការ​យឺតយ៉ាវ​ជាង​គេ​ឆ្ងាយ​ដែរ​ (OSI, 2015)។

ចំពោះ​ការ​យឺតយ៉ាវ​​នៃ​ដំណើរការ​កំណែ​ទម្រង់​នេះ​ក៏​ពាក់ព័ន្ធ​ទៅ​​ការ​​ប្តេជ្ញា​ចិត្ត​រវាង​អ្នក​ដឹកនាំ​វ័យ​ក្មេង (​ភាសា​សាមញ្ញ​ឈាម​ថ្មី) និង​វ័យ​ចំណាស់​ផង​ដែរ​គឺ​លោក​ សាយ សំអាល់ រដ្ឋមន្ត្រី​ក្រសួង​បរិស្ថាន​មាន​អាយុ​ប្រមាណ​ជាង​ ៣០ ​ឆ្នាំ​ទេ​តែ​លោក​មាន​ការ​តាំង​ចិត្ត​ខ្ពស់​ក្នុង​​ការ​ផ្ទេរ​មុខងារ​បែប​ប្រគល់​នេះ​ចង់​ឃើញ​នូវ​ផលប៉ះពាល់​ជា​វិជ្ជមាន​ក្នុង​កំណែទម្រង់​នេះ​។

ម្យ៉ាង​វិញ​ទៀត​លោក សាយសំអាល់ ហ៊ាន​ធ្វើ​ក៏​ដោយសារ​ចង់​សាង​កេរ្តិ៍ឈ្មោះ​ឪពុក​របស់​លោក​គឺ​លោក សាយ ឈុំ ប្រធាន​ព្រឹទ្ធសភា និង​ជា​មនុស្ស​​មាន​អំណាច​ទី​ ៣ នៅក្នុង​បក្ស​កាន់​អំណាច​ CPP ផង​ដែរ​។

រីឯ ​រដ្ឋមន្ត្រី​ក្រសួង​ដែល​កំពុង​ស្ថិត​នៅក្នុង​កំណែ​ទម្រង់​ D&D នេះ​សុទ្ធតែ​ជា​មនុស្ស​វ័យ​ចំណាស់​អ៊ីចឹង​មាន​​ការ​លំបាក​ក្នុង​ការ​ទទួល​នូវ​​អ្វី​ដែល​ថ្មី​ណាស់​នៅ​រារែក​អល់អែក​ចង់​បន្តិច​មិន​ចង់​បន្តិច​ខ្លាច​នេះ​ខ្លាច​នោះ​ក្នុង​ការ​ផ្ទេរ​មុខងារ​ទៅ​ថ្នាក់​ក្រោម​​ជាតិ​​នោះ​​។

នេះ​គឺជា​លទ្ធផល​អ្វី​ដែល​ម្នាក់ៗ​ចាំ​អ៊ុត​មើល​រឿង​ឈាម​ថ្មី​ហក់​ចូល​ទៅក្នុង​​ឆាក​នយោបាយ​គឺ​អាច​មាន​លក្ខណៈ​​ខុស​គ្នា និង​លឿន​ជាង​​អ្នក​ដឹកនាំ​វ័យ​ចំណាស់​ហើយ​ខ្លះ​ទៀត​នោះ​ចាស់​ចង់​ពពីម​ពពើម​រក​កន្លែង​ចុះ​ហត្ថលេខា​មិន​ចង់​ឃើញ​ផង​ក្នុង​​ការ​​សម្រេច​ចិត្ត​ធ្វើ​កំណែ​ទម្រង់​លើ​​បញ្ហា​អ្វី​មួយ​នោះ៕

ចូលរួម​ផ្តល់​យោបល់​តាមរយៈ​ soprach.tong@phnompenhpost.com

អត្ថបទគួរចាប់អារម្មណ៍