The Phnom Penh Post Search

Search form




Logo of Phnom Penh Post newspaper Phnom Penh Post - គួរ​យក​យុទ្ធ​សាស្ត្រ​ជោគ​ជ័យ​ ៥ ​ឆ្នាំ​នៅ​ស្រុក​ប្រតិបត្តិ​អង្គរជុំ ក្នុង​ការ​លុប​បំបាត់​សេវា​សុខភាព​ខុស​ច្បាប់​និង​ឱសថ​ក្លែងក្លាយ​មក​ធ្វើ​គំរូ

គួរ​យក​យុទ្ធ​សាស្ត្រ​ជោគ​ជ័យ​ ៥ ​ឆ្នាំ​នៅ​ស្រុក​ប្រតិបត្តិ​អង្គរជុំ ក្នុង​ការ​លុប​បំបាត់​សេវា​សុខភាព​ខុស​ច្បាប់​និង​ឱសថ​ក្លែងក្លាយ​មក​ធ្វើ​គំរូ

ខិត​្តប័ណ្ណ​របស់​ក្រុម​ហ៊ុន​ក្លែង​ក្លាយ​គ្មាន​អាសយ​ដ្ឋានផ្សព្វ​ផ្សាយ​លក់​ថ្នាំ​ពេទ្យ​ដែល​អ្នក​ភូមិ​ទទួល​បាន​​ក្នុង​ខែ​នេះ​។ រូបថត តុង សុប្រាជ្ញ
ខិត​្តប័ណ្ណ​របស់​ក្រុម​ហ៊ុន​ក្លែង​ក្លាយ​គ្មាន​អាសយ​ដ្ឋានផ្សព្វ​ផ្សាយ​លក់​ថ្នាំ​ពេទ្យ​ដែល​អ្នក​ភូមិ​ទទួល​បាន​​ក្នុង​ខែ​នេះ​។ រូបថត តុង សុប្រាជ្ញ

គួរ​យក​យុទ្ធ​សាស្ត្រ​ជោគ​ជ័យ​ ៥ ​ឆ្នាំ​នៅ​ស្រុក​ប្រតិបត្តិ​អង្គរជុំ ក្នុង​ការ​លុប​បំបាត់​សេវា​សុខភាព​ខុស​ច្បាប់​និង​ឱសថ​ក្លែងក្លាយ​មក​ធ្វើ​គំរូ

កាលពី​ឆ្នាំ ២០១០ អង្គការ​យូអរស៊ី (URC) បាន​ផ្សព្វ​ផ្សាយ​នូវ​របាយ​ការណ៍​ស្តី​អំពី​សមិទ្ធផល​ក្នុង​ការ​លុប​បំបាត់​សេវា​សុខាភិបាល​ខុស​ច្បាប់ និង​ឱសថ​ក្លែងក្លាយ របស់​ស្រុក​ប្រតិបត្តិ​សុខាភិបាល អង្គរជុំ​ ខេត្ត​សៀមរាប ពីឆ្នាំ ២០០៥ ដល់ ២០០៩ ជា​ភាសា​ខ្មែរ​និង​ភាសា​អង់គ្លេស។

ដើម្បី​បង្ហាញ​ស្នាដៃ​ជោគជ័យ​រយៈពេល ៥ ឆ្នាំ​នោះ ស្រុក​ប្រតិបត្តិ​អង្គរជុំ​បាន​រៀបចំ​យុទ្ធ​សាស្ត្រ​ច្បាស់​លាស់​ក្នុង​ការ​អនុវត្ត​ទៅ​តាម​ផែន​ការ​របស់​ខ្លួន ជាពិសេស​ គឺ​កិច្ច​សហការ​គ្នា​ល្អ​ជាមួយ​អាជ្ញាធរ​ដែន​ដី​តាមរយៈ​ការ​អនុវត្ត​សេចក្តី​​សម្រេច​​របស់​រាជ​រដ្ឋាភិបាល​លេខ ​ ៣៣/សសរ ចុះថ្ងៃទី​២៩ ខែសីហា ឆ្នាំ ២០០៥ ដើម្បី​ទប់ស្កាត់​ភាព​អនា​ធិបតេយ្យ​ នៅ​ក្នុង​ជំនួញ​វេជ្ជសាស្ត្រ និង​ការ​ចរាចរ​ឱសថ​ក្លែងក្លាយ។

ជាង​នេះ​ទៅទៀត​​សមិទ្ធផល​ចម្បង​ៗ​នៅ​ក្នុង​របាយ​ការណ៍​នោះ មាន​ដូចជា៖ ឆ្មប​បុរាណ​ស្ទើរតែ​ទាំងអស់​ត្រូវ​បាន​បញ្ឈប់​ឲ្យ​សម្រាល​កូន​ បញ្ឈប់​​ទាំង​អស់​អ្នក​លក់​ថ្នាំ​តាម​កញ្រែ្ចង​ចាប់​ហួយ ​និង​ក្នុង​ទូ​ខុស​ច្បាប់ ចំណែក​ឯ​អ្នកដើរ​លក់ថ្នាំ ​និង​ចាក់ថ្នាំ​តាម​ភូមិ​ខុស​ច្បាប់​ ត្រូវ​បាន​បង្ក្រាប​ស្ទើរតែ​អស់ សូម្បី​បុគ្គលិក​ពេ​ទ្យរដ្ឋ​មក​ដើរ​ចាក់ថ្នាំ​តាមផ្ទះ ​មាន​ខ្លះ តែ​ទាល់​ត្រឹម​បង​ប្អូន​គ្រូ​ពេទ្យ​ម្តង​ម្កាល​ទេ ហើយ​មាន​ទាំង​ករណី​ដាក់​ពាក្យ​ប្តឹង​ឡើង​ដល់​តុលា​ការ​ ជំនួស​គ្រួសារ​ជន​រងគ្រោះ​ក្នុង​ករណី​អ្នកដើរ​ចាក់​ថ្នាំ​តាម​ភូមិខុស​ច្បាប់​បណ្តាល​ឲ្យ​អ្នក​ជំងឺ​ស្លាប់​ក៏​មាន។

ខិត​្តប័ណ្ណ​របស់​ក្រុម​ហ៊ុន​ក្លែង​ក្លាយ​គ្មាន​អាសយ​ដ្ឋានផ្សព្វ​ផ្សាយ​លក់​ថ្នាំ​ពេទ្យ​ដែល​អ្នក​ភូមិ​ទទួល​បាន​​ក្នុង​ខែ​នេះ​។ រូបថត តុង សុប្រាជ្ញ
ខិត​្តប័ណ្ណ​របស់​ក្រុម​ហ៊ុន​ក្លែង​ក្លាយ​គ្មាន​អាសយ​ដ្ឋានផ្សព្វ​ផ្សាយ​លក់​ថ្នាំ​ពេទ្យ​ដែល​អ្នក​ភូមិ​ទទួល​បាន​​ក្នុង​ខែ​នេះ​។ រូបថត តុង សុប្រាជ្ញ

ចំណុច​សំខាន់​នោះ គឺ​ការ​ពង្រឹង​សេវា​សុខាភិបាល​រដ្ឋប្រចាំការ ២៤ ម៉ោង​នៅ​ទី​នោះ​បាន នៅ​ពេល​បោស​សម្អាត​សេវាខុស​ច្បាប់​អស់​ហើយ អ្នក​ជំងឺ​នាំ​គ្នា​ងាក​មក​ប្រើ​សេវា​សុខាភិបាល​របស់​រដ្ឋ​វិញ​ម្តង ធ្វើ​ឲ្យ​មាន​កំណើន​ប្រាក់​ចំណូល​ហិរញ្ញប្បទាន​ប្រចាំ​ឆ្នាំ​កើន​ឡើង​ ៥ ដង​ ដែល​កាល​នោះ​​របាយ​ការណ៍​ពុំសូវ​មាន​អ្នក​ចាប់​អារម្មណ៍​យក​មក​អនុវត្ត​ទេ។

ម្យ៉ាង​ទៀត ផ្អែក​តាមបទ​ពិសោធ​ជោគជ័យ​នៅ​ស្រុក​ប្រតិបត្តិ​អង្គរជុំ នេះ​កំពុង​ឆ្លើយតប​បន្ថែម​ទៀត ទៅនឹង​លិខិត​មួយ របស់​ក្រសួង​សុខា​ភិបាល​​ចុះ​ថ្ងៃ​ទី ១៨ ​ខែ​ធ្នូ​ថ្មីៗ​នេះ ដើម្បី​ធ្វើ​ការ​ណែនាំ​ដល់​ប្រធាន​មន្ទីរ​សុខាភិបាល​រាជធានី ខេត្ត​ទាំង​អស់ ឲ្យ​ចាត់​វិធាន​ការ​លុប​បំបាត់​សេវា​សុខាភិបាល​ខុស​ច្បាប់ នៅ​ទូទាំង​ប្រទេស។ បន្ទាប់ពី​ផ្ទុះ​ការ​ឆ្លង​មេ​រោគ​អេដស៍​នៅ​ភូមិ​រកា​ ក្នុង​ខេត្ត​បាត់​ដំបង ដែល​សមត្ថកិច្ច​កំពុង​សង្ស័យ​​ទៅលើ​​អ្នកដើរ​​ចាក់ថ្នាំ​តាម​ភូមិ​​ខុស​ច្បាប់​ម្នាក់​ឈ្មោះ យ៉ែម ជ្រិន​នោះ។

សព្វថ្ងៃ​នេះ ការ​ផ្តល់​សេវា​សុខាភិបាល​ឯកជន​ទាំងខុស​ច្បាប់ ​និង​ទាំងស្រប​ច្បាប់មួ​យ​ចំនួន​កំពុង​មាន​​ភាព​រញ៉េ​រញ៉ៃ ភូតកុហក​បោក​ប្រាស់​ពេញ​បន្ទុក​ហើយ តាំង​ពី​រាជធានី​ ភ្នំពេញ ​រហូត​ដល់​ជនបទ​ចុង​កាត់​មាត់​ញក ហើយ​ទាល់​តែ​មាន​កន្លែង​ណា​មាន​បញ្ហា​ធំៗ​​កើត​ឡើង​បាន​នំាគ្នា​​ដុត​ដៃ​ដុត​ជើង​រត់ជាន់​ជើងគ្នា​ដោះស្រាយ​នៅ​កន្លែង​កើត​ហេតុនោះ។

ឧទាហរណ៍ មាន​គ្លីនិក​ ឬ​ក្រុមហ៊ុន​បម្រើ​សេវាថ្នាំ​ពេទ្យ​ឬក៏​គ្រឿង​សម្អាង​ពាក់ព័ន្ធ​នឹង​សុខភាព​ខ្លះ​មាន​ច្បាប់​តែ​អនុវត្ត​ខុសច្បាប់​ និង​បច្ចេក​ទេស​ ដែល​មាន​លក្ខណៈ​កុហក ឬក៏​បំភិត​បំភ័យ​អ្នកជំងឺ​ដើម្បី​ឲ្យ​ទិញ ឬក៏​លក់​ផលិតផល​របស់​ខ្លួន ហើយ​ក្រុម​ហ៊ុន​ដែល​មាន​លក្ខណៈ​បោកប្រាស់​ទាំងនោះ ខ្លះ​ផ្សព្វ​ផ្សាយ​នៅ​តាម​ទូរទស្សន៍ និង​ហ្វេស​ប៊ុក​សម្រាប់​អ្នក​អាច​​មើល​តាម​ព័ត៌មាន​បច្ចេកវិទ្យា​បាន​។

ជាទូទៅ​នៅតាម​ភ្លើង​ស្តុបនៅ​ភ្នំពេញ​វិញ កាលពី​មុនសម្បូរ​ទៅ​ដោយ​ការ​ផ្សព្វ​ផ្សាយ​ការ​សិក្សា​វគ្គថ្មីៗ​ តាម​រយៈ​ការចែក​ខិត្ត​ប័ណ្ណ តែ​ឥឡូវ​សម្បូរ​តែ​ខិត្ត​ប័ណ្ណ​ឃោសនា​សុខភាព​វិញ​ម្តង គឺ​គេជួល​នារី​ក្មេង​ស្អាតៗ​ឈរ​ចែក​នៅ​កន្លែង​ភ្លើង​ស្តុបធំៗ គឺ​គ្លីនិក​របស់​ពួក​គេ​ផ្តល់​សេវា​ពិគ្រោះ និង​ពិនិត្យ​ជំងឺ​មិន​យក​លុយ​ទេ តែ​នៅពេល​ទៅ​ដល់​គ្លីនិក​នោះ គឺ​សេវា​ពិគ្រោះ​មិន​យក​លុយ​មែន តែ​ពេល​នោះ​គ្រូ​ពេទ្យ​គេ​ចាប់​ផ្តើម​បំភ័យ​អ្នកមក​ពិគ្រោះ​ជំងឺ​ថា​ ជំងឺ​ហ្នឹង​មិន​យូរ​ទេ​ វា​ប៉ះ​ពាល់​សុខភាព​ធ្ងន់ធ្ងរ​ហើយ ចេញ​មកវិញ​យ៉ាងហោច​ណាស់​អស់​ថ្លៃ​ពិនិត្យ​ឈាម និង​ទិញ​ថ្នាំយក​មក​ប្រើ​ដែរ ដែល​​សរុប​លេងៗ​យ៉ាង​តិច​ក៏​អស់ ២០ ដុល្លារ​ម្នាក់​ដែរ​ឲ្យ​តែ​ទៅ​គ្មាន​អ្នក​រត់​រួច​ទេ។

រីឯ​ក្រុម​ហ៊ុន​ថ្នាំពេទ្យ​ខ្លះ ក៏​ឃោសនា​សុទ្ធតែ​ថ្នាំ​របស់​ពួកគេ​ព្យាបាល​មហារីក​ និង​ទឹក​នោម​ផ្អែមជា​ដាច់​ជាដើម។ ពាក្យ​ក្រុមហ៊ុន​ត្រូវ​បាន​យកទៅ​បោក​ប្រាស់ ប្រជា​ពលរដ្ឋ​នៅតាម​ភូមិតាម​បណ្តា​ខេត្ត​នានា​ ក្រុម​ហ៊ុន​ថ្នាំពេទ្យ​របស់​ពួក​គេ​ សុទ្ធ​តែមក​ពី​សហ​រដ្ឋអាមេរិក​។ ​ វិធីសាស្រ្ត​របស់​ពួកគេ​យក​លិខិត​អនុញ្ញាត​ក្លែង​ក្លាយ​ដែល​មាន​ស្គែន​និមិត្ត​សញ្ញា​ក្រសួង​សុខា​ភិបាល​អនុញ្ញាត​ឲ្យ​ចុះ​លក់ថ្នាំ​ព្យាបាល​តាមភូមិ​ នៅពេល​ទៅ​ស្រុក​ណា​មួយ គឺ​ពួកគេ​មិន​ហ៊ាន​ទៅ​ជួប​ជាមួយ​ស្រុកប្រតិបត្តិ​សុខាភិបាល​ទេ​ ព្រោះ​ខ្លាចគេ​ចាប់​ អ៊ីចឹង​មានតែ​យក​លិខិត​ក្លែងក្លាយ​នោះ​ ទៅ​ស៊ីស​ស៊ុស​គ្នា​ជាមួយ​អាជ្ញាធរ​ស្រុក ​ឬក៏ឃុំ ​ឬក៏​ប៉ូលិស​ប៉ុស្តិ៍​ឲ្យលុយ​ឲ្យកាក់​ខ្លះទៅ​អាជ្ញា​ធរ​ នៅ​ពេល​បានការ​អនុញ្ញាតមាន​លក្ខណៈ​ស្រប​ច្បាប់​ហើយ ​ពួកគេ​ជួលមេ​ភូមិឲ្យ​ដើរ​ប្រមូល​មនុស្ស​ឲ្យ​ពួក​គេ ​ព្រោះ​មេភូមិ​បាន​ឃើញ​ចំណារ​ពី​ថ្នាក់​លើ​គាត់​មក​ហើយ​គាត់​ក៏​អនុវត្ត​​តាម​ប្រមូល​អ្នក​ភូមិ​មកស្តាប់​ការ​ឃោសនា​របស់​ក្រុមហ៊ុន​មក​ផ្សព្វ​ផ្សាយ​ថ្នាំ​នេះ។ នៅពេល​បាន​ឱកាស​ឃោសនា​ហើយ​ គឺ​ក្រុមហ៊ុន​គេមាន​ឡានមួយ​ដើម្បី​ទាក់​ទាញ ហើយ​នឹង​ខិត្ត​ប័ណ្ណ​ផ្សព្វ​ផ្សាយ ពី​ថ្នាំ​របស់​ពួកគេ​នោះ​សុទ្ធ​មក​ពី​សហរដ្ឋ​អាមេរិក​ផ្ទាល់​ព្យាបាល​បាន​ជំងឺជា​ច្រើន​ដូចជា ថ្លើម លើស​ឈាម ទឹក​នោម​ផ្អែម ក្រពះ និង​ពោះវៀន​ ជាដើម។​​ ក្រុមហ៊ុន​ពួក​គេ​មិន​មាន​ដាក់​អាសយដ្ឋាន​ពិត​ប្រាកដ​នោះទេ​គឺមាន​តែ​លេខ​ទូរស័ព្ទ​ទេ​ ពេល​ពួកគេ​ចេញ​ពី​ភូមិ​ហើយ​ទូរស័ព្ទ​ឃោសនា​នោះ​មិន​អាច​ហៅ​ចូល​បាន​ទេ។

នៅ​ពេល​មាន​អ្នក​ភូមិមក​ចូល​រួម​ហើយ​គឺ​គេ​ចាប់​ផ្តើម​ប្រូ​ពី​ថ្នាំ​ពេទ្យ​រប​ស់​​ពួកគេគឺ​ជំនួយ​កម្លាំង​ឆាប់ជា​ជំងឺ​រ៉ាំរ៉ៃ​ទាំង​អស់​ ពេល​នោះ​គេមាន​អ្នកពិនិត្យ​​ជំងឺ ឬក៏​មាន​ម៉ាស៊ីន​ពិនិត្យ​ជំងឺ​​។​​ នៅ​ពេល​មានអ្នក​ជំងឺ​ហើយ​គឺ​គេចាប់​ផ្តើម​​បំភ័យ​អ្នកជំងឺ​នោះ​ភ្លាម​ថា​ បើមិន​ប្រើ​ថ្នាំ​របស់​ពួកគេ​ទេ​ គឺ​រយៈពេល​តែ ​២ ទៅ​ ៣ ថ្ងៃទៀត​ ​​អ្នកជំងឺ​នោះនឹង​ឈឺធ្ងន់ធ្ងរ​ហើយ​អាច​ស្លាប់​បាន​ទៀត។​ ពេល​នោះ​​អ្នក​ជំងឺ​ចាប់​ផ្តើម​ភ័យ​ស្លន់​ស្លោ​សួររក​តម្លៃ ​និង​ទិញ​ថ្នាំនោះ​ភ្លាមៗ ​បើ​ខ្វះ​លុយ ក៏​ខំប្រឹង​ខ្ចីបុល​គេដែរ​ដើម្បី​ទិញថ្នាំ​នោះតម្លៃ​មានតាំង​ពី ៤០ ​ទៅ​ដល់​ ៧០ ដុល្លារ​ក្នុង ​១ដប ​ឬក៏​១កូន​កែវ​ ឬក៏ជា​ប្រភេទ​ថ្នាំបន្ទះៗ។

នៅ​ពេល​ពួកគេ​លក់ថ្នាំ​រួចហើយ ​ចាប់ផ្តើម​ចាកចេញ​ពី​ស្រុក​បាត់​ទៅ ​បន្ទាប់​មក​អ្នកភូមិ​ចាប់​ផ្តើម​ជជែក​គ្នា​ផ្អើល​ឈុល​ទម្រាំ​តែដឹង​យក​ប្រភេទ​ថ្នាំដែលបានទិញរួចនោះ​មក​​សួរ​​គ្រូពេទ្យ​​នៅ​តាម​មណ្ឌល​​សុខភាព​​វិញ​ គាត់​ថា ថ្នាំ​​ទាំង​នោះ​ មួយ​ចំនួន​គ្រាន់តែ​​ជាថ្នាំ​​​អាហារ​បំប៉ន​បន្តិច​បន្តួច​មិនអាច​ធ្វើឲ្យ​ជាជំងឺ​រ៉ាំរ៉ៃ​ទាំងនោះ​បានទេ ហើ​យ​​ថ្នាំ​នោះ បើ​ទិញ​ចូលមក​តម្លៃតែ​៥​ដុល្លារ​ទេ​ ថ្នាំ​ខ្លះទៀត​គ្រូពេទ្យ​មិនដឹង​ជាប្រភេទ​ថ្នាំឲ្យ​ពិតប្រាកដ​ជាអ្វីដែរ តែ​ថ្នាំនោះ​​ អាច​បណ្តាល​ឲ្យ​គ្រោះថ្នាក់​បាន។

គ្រាន់​តែឮ​​គ្រូពេទ្យ​ពន្យល់​ដូច្នេះ​ភ្លាម​ ធ្វើឲ្យ​គាត់ភ្ញាក់​ខ្លួនព្រើត​លែង​ហ៊ាន​ហូប​ថ្នាំនោះ​ទៅវិញ​ មានអ្នក​ភូមិខ្លះ​ទិញអស់​ថ្លៃ​រាប់រយ​ដុល្លារ​ក៏​មាន​ដែរ​​ នេះគឺ​ជាវិធី​សាស្ត្របោ​កប្រាស់អ្នក​ភូមិ​ថ្មីៗ។​ របៀប​បោក​ប្រាស់​តាមរយៈ​សេវា​សុខា​ភិបាល​ខុសច្បាប់​នេះ ​ហាក់ដូច​ល្បីសុសសាយ​គួរសម​មួយ​ដែរ​ បន្ទាប់ពី​ការ​បោក​ប្រាស​់ថា​ រក​ការងារ​ធ្វើ ​និង​គណបក្ស​នយោបាយ។

ចំពោះ​កិច្ចសហការ​គ្នារវាង​ស្រុក​ប្រតិបត្តិ​សុខាភិបាល ​និង​អាជ្ញាធរ​ដែន​ដី​ដែល​មាន​សមត្ថកិច្ច​កន្លង​មក​គឺហាក់​បី​ដូចជា​មាន​គម្លាត​នឹង​គ្នា​នៅ​តាម​បណ្តា​ខេត្ត​ ព្រោះ​ខាង​មន្ត្រី​សុខាភិបាល​ភាគ​ច្រើន​ជា​អ្នក​រក​លុយ​បាន​ធូរធារ​រាង​ខែង​រ៉ែង​ជាង​អាជ្ញាធរ​ដែន​ដីដែល​មាន​ការ​​ព្រងើយ​កន្តើយ​នឹងគ្នា​ចំពោះ​ការ​ដោះ​ស្រាយ​ការលុប​បំបាត់​សេវា​សុខាភិបាល​ខុសច្បាប់​នេះ​នៅ​តាមតំបន់​របស់ពួក​គាត់​ ​ព្រោះ​អាជ្ញាធរ​តែងតែ​យល់ថា ​រឿង​ទាក់​ទង​ទៅ​នឹង​ពេទ្យ​គឺ​រក​ស៊ី​មាន​បាន​តែ​ពួក​គាត់​ តែដល់​ពេល​ចុះ​ចាប់​អ្នក​ចាក់​ថ្នាំ​តាម​ភូមិ ​ឬក៏​ក្រុមហ៊ុន​ខុសច្បាប់​ឲ្យ​ពួកគាត់​ធ្វើ ​តែ​បាន​ផល​មក​គ្រូពេទ្យ។ ​អ៊ីចឹង​គាត់​ស៊ីស​ស៊ុស​គ្នា​ជាមួយ​នឹង​ក្រុមហ៊ុន​ខុស​ច្បាប់​ទៅ​មិន​បាន​លុយ​ក្រៅផង​ ហើយ​ធ្វើ​មិន​ដឹង​មិនឮទៅ​ចប់​​ អ៊ីចឹង​បើកាល​ណា​​ធ្វើ​ដូច​នេះ​គឺ​បរាជ័យ​ហើយ​ ក្នុងការ​លុប​បំបាត់​សេវា​ខុស​ច្បាប់​នោះ។

សរុប​មក​វិញ​ ដំណោះ​ស្រាយ​ភ្លាមៗ​បច្ចុប្បន្ន​នេះ​ ចំពោះ​ការ​លុប​បំបាត់​ភាព​អនាធិប​តេយ្យ​នៅក្នុង​ជំនួញ​វេជ្ជសាស្ត្រ និង​ការ​ចរាចរ​ឱសថ​ក្លែង​ក្លាយ គឺ​មាន​តែ​យក​មេរៀន​ជោគ​ជ័យ ៥ ឆ្នាំ​របស់​ស្រុក​ប្រតិបត្តិ​អង្គរជុំ​មក​អនុវត្ត​ទេ។

រីឯ ​ដំណោះ​ស្រាយ​បន្ទាប់​មក​ទៀត​ គឺតាម​រយៈ​កំណែ​ទម្រង់​វិមជ្ឈការ​ និង​វិសហមជ្ឈការ​ (D&D)​ នៅពេល​ដែល​មុខងារ​គ្រប់គ្រងមួ​យ​ចំនួន​របស់​វិស័យ​សុខា​ភិបាល​ត្រូវផ្ទេរ​មក​ថ្នាក់​ក្រោម​ជាតិ​ដែ​លមាន​រដ្ឋបាល ​ក្រុង​-ស្រុក ​ជាអ្នក​គ្រប់​គ្រង​ផ្ទាល់ ​ហើយនៅ​កៀក​នឹង​ប្រជាពលរដ្ឋ​ផង​ពេលនោះ​ដំណោះស្រាយ​ក្នុង​ការ​លុប​បំបាត់​សេវាសុខា​ភិបាលខុ​ស​ច្បាប់​នឹង​បាន​ជោគ​ជ័យ​ពិតប្រាកដ៕

ចូល​រួម​ផ្តល់​យោ​បល់​តាម​រយៈ​ soprach.ton​g@phnompenh​post.com

អត្ថបទគួរចាប់អារម្មណ៍