The Phnom Penh Post Search

Search form




Logo of Phnom Penh Post newspaper Phnom Penh Post - គ្មាន​ប័ណ្ណ​បើកបរ​ មិន​យក​ថ្លៃ​បង់​ប្រាក់​លើ​ផ្លូវ​សេដ្ឋកិច្ច​ មិន​ត្រូវ​ស្ដង់ដារ ASEAN




គ្មាន​ប័ណ្ណ​បើកបរ​ មិន​យក​ថ្លៃ​បង់​ប្រាក់​លើ​ផ្លូវ​សេដ្ឋកិច្ច​ មិន​ត្រូវ​ស្ដង់ដារ ASEAN

នគរបាល​ចរាចរណ៍​ក្នុង​ពេល​រៀបចំ​សណ្ដាប់​ធ្នាប់​តាម​ផ្លូវ​ក្បែរ​វិមាន​ឯករាជ្យ​កន្លង​មក។
នគរបាល​ចរាចរណ៍​ក្នុង​ពេល​រៀបចំ​សណ្ដាប់​ធ្នាប់​តាម​ផ្លូវ​ក្បែរ​វិមាន​ឯករាជ្យ​កន្លង​មក។ ផា លីណា

គ្មាន​ប័ណ្ណ​បើកបរ​ មិន​យក​ថ្លៃ​បង់​ប្រាក់​លើ​ផ្លូវ​សេដ្ឋកិច្ច​ មិន​ត្រូវ​ស្ដង់ដារ ASEAN

ខណៈ​ដែល​ការ​បោះឆ្នោត​ឃុំ សង្កាត់ ឆ្នាំ​ ២០១៧ និង​បោះឆ្នោត​សកល​ឆ្នាំ​ ២០១៨ ជិត​ចូល​មក​ដល់​គណបក្ស​នយោបាយ​នីមួយៗ​កំពុង​តែ​រូតរះ​គិតគូរ​ពី​រឿង​ទាក់ទាញ​សន្លឹក​ឆ្នោត​ពី​ប្រជាពលរដ្ឋ​តាមរយៈ​ការ​ធ្វើ​ប្រជាភិថុតិ​រៀងៗ​ខ្លួន​។

ចាប់​តាំងពី​ថ្ងៃ​ទី​ ០១ ខែ​មករា​ឆ្នាំ​ ២០១៦ រាជរដ្ឋាភិបាល​ចាប់ផ្តើម​អនុវត្ត​ច្បាប់​ចរាចរណ៍​មក​ទល់​សប្តាហ៍​កន្លង​ទៅ​នេះ​មាន​ការ​រិះគន់​ជាច្រើន​ទៅ​លើ​ការ​អនុវត្ត​ច្បាប់​នេះ​ដូចជា​វ៉ល់ៗ​អស់​ហើយ​ទៅ​មុខ​ថយ​ក្រោយៗ​មិន​ដឹង​ថា​យក​អ្វី​ជា​គោល​ច្បាស់លាស់​។

បន្ទាប់ពី​លោក​នាយក​រដ្ឋមន្ត្រី ហ៊ុន សែន លូក​ដៃ​ចូល​ក្នុង​កិច្ចការ​សមត្ថកិច្ច​កំពុង​តែ​អនុវត្ត​ច្បាប់​នេះ​ដើម្បី​ទាក់ទាញ​ប្រជាប្រិយភាព​ផង និង​ទាក់ទាញ​ការ​ចាប់​អារម្មណ៍​ដោយ​ផ្តោត​ការ​យក​ចិត្ត​ទុក​ដាក់​ធ្វើ​យ៉ាង​ណា​ឲ្យ​ប្រជាពលរដ្ឋ​ទូទៅ​បំភ្លេច​នូវ​បញ្ហា​ធំៗ​ក្តៅ​គគុក​ដែល​ជា​ចំណុច​ខ្សោយ​របស់​គណបក្ស​កាន់​អំណាច​ដូចជា​ការ​បង្ក្រាប​ចោរកម្ម​ការ​កាប់​បំផ្លាញ​ព្រៃឈើ ការ​ទន្ទ្រាន​យក​ដី ការ​បណ្តេញ​ចេញ​លំនៅឋាន ចំណាក​ស្រុក​ជនអន្តោប្រវេសន៍​ការ​បញ្ចុះ​តម្លៃ​សាំង​ជាដើម​។

ដូច​ប្រសាសន៍​លោក ជាម យៀប សមាជិក​សភា​ធ្លាប់​លើក​ឡើង​ថា​ការ​អនុវត្ត​ច្បាប់​ពេល​ខ្លះ​អាស្រ័យ​ទៅ​នឹង​អារម្មណ៍​សម្តេច ហ៊ុន សែន មាន​ប្រសាសន៍​ហើយ​ការ​ប្រែប្រួល​នៃ​អនុវត្ត​ច្បាប់​លឿន​ដូច​ផ្លេក​បន្ទោរ​យ៉ាង​នេះ​រហូត​ធ្វើ​ឲ្យ​មាន​មតិ​មហាជន​រិះគន់​ថា​បើ​លោក​នាយក​រដ្ឋមន្ត្រី​យក​ចិត្ត​ទុក​ដាក់​ស្តាប់​មតិ​ប្រជាពលរដ្ឋ​តាមរយៈ​បណ្តាញ​សង្គម​ហ្វេសប៊ុក​ដូច​ការ​អនុវត្ត​ច្បាប់​ចរាចរណ៍​នេះ​ម្ល៉េះ​សម​ព្រៃឈើ​មិន​រលាយ​រលត់ អ្នក​ភូមិ​បឹងកក់ អ្នក​ភូមិ​បុរីកីឡា និង​ពលរដ្ឋ​ដែល​រងគ្រោះ​ដោយ​ការ​បណ្តេញ​ចេញ​ពី​លំនៅឋាន​កន្លែង​ផ្សេងៗ​មិន​វេទនា​ដល់​សព្វ​ថ្ងៃ​ទេ​។

ដូច​កាលពី​សប្តាហ៍​មុន​នេះ​ដើម្បី​ជា​ចំណង​ដៃ​ថ្ងៃ​អាពាហ៍​ពិពាហ៍​ថ្ងៃ​ទី​ ០៥ ខែ​មករា​ផង និង​ថ្ងៃ​ជ័យជំម្នះ​ ៧ ​មករា​ផង​លោក​នាយ​រដ្ឋមន្ត្រី ហ៊ុន សែន បាន​សម្រេច​ចិត្ត​ឲ្យ​បញ្ឈប់​​បង់​ប្រាក់​កន្លែង​បញ្ជរ​ឆ្លងកាត់​​ផ្លូវ​ជាតិ​លេខ​ ៤ ​ពី​ក្រុង​ភ្នំពេញ​ទៅ​​ខេត្ត​ព្រះសីហនុ ចំពោះ​ប្រជាពលរដ្ឋ​ដែល​រស់នៅ​តាម​បណ្តោយ​ផ្លូវ​ជាតិ​នេះ​ដែល​​ចម្ងាយ​ពី​ចិញ្ចឹម​ផ្លូវ​ ៣០០ ​ម៉ែត្រ​តែ​រថយន្ត​ដឹក​ទំនិញ​ និង​គ្រួសារ​ទៅ​លេង​កំពង់សោម​ត្រូវ​បង់​លុយ និង​ការ​បញ្ឈប់​ធ្វើ​ប័ណ្ណ​បើកបរ​ចំពោះ​អ្នក​បើក​ម៉ូតូ​ចាប់ពី​កម្លាំង​​ ១២៥CC ចុះ​ក្រោម​។

ការ​សម្រេច​ចិត្ត​តាម​របៀប​ឲ្យ​ត្រី​ហូប​ជា​ជាង​បង្ហាញ​ពី​របៀប​រក​ត្រី​នេះ​គឺ​មិន​ត្រឹមត្រូវ​ទៅ​តាម​និយាម​បណ្តា​ប្រទេស​នៅ​លើ​ពិភពលោក​ និង​អាស៊ាន​ទេ។

ការ​បង់​ប្រាក់​លើ​ផ្លូវ​សេដ្ឋកិច្ច​មាន​សារៈសំខាន់​ណាស់​គឺ​ដើម្បី​យក​ថវិកា​ដែល​បាន​មក​ទៅ​អភិវឌ្ឍ​ថែទាំ​​កែលម្អ និង​ជួសជុល​ផ្លូវ​ដែល​ខូច​ ឬ​ដាក់​​ស្លាក​សញ្ញា​ជាដើម​នេះ​គឺ​​រៀន​របៀប​រស់នៅ​ដោយ​ខ្លួន​មិន​ខ្ចី​ពឹង​អ្នក​ដទៃ​។

កុំ​ចាំ​ដល់​ពេល​ខូច​ទាំង​ស្រុង​ធ្វើ​ម្តង​ទាំង​ខ្សែៗ​តែ​ម្តង​ដូច​នៅ​ផ្លូវ​ជាតិ​លេខ​ ៥ និង​​លេខ​ ៦ ធ្វើឲ្យ​ខាត​ពេលវេលា​ដូច​លោក ព្រហ្ម ម៉ាញ​អ្នក​ច្រៀង​អាយ៉ៃ​ ថា «ផ្លូវ​ស្រុក​ខ្មែរ​ធ្វើ​ជាប់» មាន​ន័យ​ថា​បើក​ភ្នែក​ឡើង​ស្រុក​យើង​ឃើញ​តែ​ធ្វើ​ផ្លូវ​រហូត​​តាំងពី​ដូនតា​មក​ហើយ​តាំង​ដើរ​ស្មុំ​ជំនួយ​គេ​ ជំពាក់​គុណ​គេ​ហើយ​ដដែល​ជា​ដែល​ជាពិសេស​គឺ​ប្រទេស​ចិន​។ ចំពោះ​បញ្ឈប់​ការ​បង់​ប្រាក់​ផ្លូវ​ជាតិ​លេខ​ ៤ ​នេះ​មិន​ដឹង​ជា​គិតគូរ​សង​យ៉ាង​ម៉េច​ជាមួយ​ក្រុមហ៊ុន AZ Investment បើ​ផ្អែក​តាម​កិច្ចសន្យា​គឺ​រហូត​ដល់​ ៣៥ ​ឆ្នាំ​ពី​ឆ្នាំ​ ២០០២ ​មក​។

របៀប​រកស៊ី​ស្រុក​ខ្មែរ​ពេល​ខ្លះ​ធ្វើ​ឲ្យ​គេ​ធុញ​ទ្រាន់​នៅពេល​វិនិយោគ​អស់​លុយ​រាប់​លាន​ដុល្លារ​បន្ទាប់​មក​គេ​កំពុង​តែ​ស្រង់​ដើម​វិញ​បែរ​រាជរដ្ឋាភិបាល​ក៏​បញ្ឈប់​​កិច្ចសន្យា​គេ​ដូច​ការ​បញ្ឈប់​យក​លុយ​ឆ្លងកាត់​ផ្លូវ​វេងស្រេង​ជាដើម​។ លេង​រកស៊ី​អ៊ីចឹងៗ​នរណា​ទៅ​​ចង់​មក​រកស៊ី​នៅ​ស្រុក​ខ្មែរ​? ឬ​ក៏​ចាំ​ដល់​ពេល​ខូចខាត​ទាំង​ស្រុង​ទើប​ឲ្យ​អាមេរិក​ជួយ​សាងសង់​ឡើង​វិញ​ទៀត​? បើ​អាមេរិក​មិន​ជួយ​ទេ​គឺ​មាន​តែ​ចិន​ជួយ​? ហើយ​ការ​មិន​យក​លុយ​បង់​នេះ​ធ្វើឲ្យ​មាន​ភាព​រញ៉េរញ៉ៃ​ពិបាក​វិនិច្ឆ័យ​អ្នក​រស់នៅ​ចូល​ក្នុង​លើស​ពី​​ ៣០០ ​ម៉ែត្រ​បែរ​ទៅ​ជា​យក​​លុយ​ទៅវិញ​ហើយ​អ្នក​ជិះ​ឡាន​ពី​ភ្នំពេញ​ទៅ​មើល​ចម្ការ​នៅ​កំបូល ឬ​ខេត្ត​កំពង់ស្ពឺ​ក៏​មិន​យក​លុយ​ដែរ​តែ​បើ​ទៅ​ដល់​កំពង់​សោម​យក​លុយ​។ ចុះ​អ្នក​តំណាងរាស្ត្រ និង​មន្ត្រី​ចុះ​ពង្រឹង​បក្ស​នៅ​មណ្ឌល​ខេត្ត​កំពង់ស្ពឺ​ជិះ​ឡាន​ពី​ភ្នំពេញ​ទៅ​យក​លុយ​ដែរ​ឬ​អត់​?

នេះ​គឺជា​វិធីសាស្ត្រ​ថ្មី​ជួយ​ដោះ​បន្ទុក​​អ្នក​មាន​ខ្លាច​អ្នក​ក្រ​តែ​តាមពិត​ទៅ​គាត់​មាន​លុយ​ទិញ​ឡាន​ខាត​ម្តងៗ​រាប់​ពាន់​រាប់​ម៉ឺន​ដុល្លារ​រឿង​អី​គាត់​ខ្លាច​នឹង​​បង់​ប្រាក់​សម្រាប់​ថែទាំ​ផ្លូវ​ដែល​តម្លៃ​ឆ្លង​កាត់​នោះ​រដ្ឋ​បាន​បញ្ចុះ​ឲ្យ​ត្រឹម​ ១៨០០ ​រៀល​រួច​ហើយ​? បញ្ហា​ដែល​សំខាន់​បើ​ចង់​ជួយ​គាត់ ​រាជរដ្ឋាភិបាល​ជួយ​​ឲ្យ​តែ​បញ្ចុះ​តម្លៃ​ប្រេងសាំង​ទៅ​តាម​ស្តង់ដារ​លើ​ពិភពលោក​​ទៅ​វា​គ្រប់គ្រាន់​ហើយ​មិន​ចាំបាច់​​យក​ប្រជាភិថុតិ​តាមរយៈ​មិន​ឲ្យ​គាត់​បង់​នៅ​លើ​ផ្លូវ​សេដ្ឋកិច្ច​សំខាន់​នេះ​ទេ​។

បើ​នៅ​ប្រទេស​អាស៊ាន​គឺ​ឲ្យ​តែ​រថយន្ត​បើក​​ឆ្លង​ផ្លូវ​ត្រូវ​តែ​បង់​លុយ​ទាំងអស់​ចំពោះ​រថយន្ត​តាក់ស៊ី​មាន​ម៉ាស៊ីន​គិត​លុយ​ METER គឺ​អ្នក​ជិះ​ជា​អ្នក​បង់​លុយ​ទៀត​ផង​។

រីឯ​ការ​ដែល​រាជរដ្ឋាភិបាល​សម្រេច​មិន​ឲ្យ​មាន​​ប័ណ្ណ​បើកបរ​សម្រាប់​អ្នក​បើកបរ​ម៉ូតូ​ដែល​កម្លាំង​ចាប់ពី​ ១២៥ ​CC ចុះ​ក្រោម​នេះ​គឺ​មិន​ត្រឹមត្រូវ​ទៅ​​តាម​ច្បាប់​ចរាចរណ៍​ផ្លូវគោក​ផង​ហើយ​ខាត​ថវិកា​ជាតិ​ទៀត​ព្រោះ​អ្នក​ធ្វើ​ប័ណ្ណ​ហើយ​ទៅ​ដក​យក​​លុយ​វិញ​បាន​។

បើ​សាកល្បង​​គណនា​តាម​ធម្មតា​យក​ចំនួន​សរុប​របស់​ម៉ូតូ​ទូទាំង​ប្រទេស​ជាង​ ២,៧ ​លាន​ដែល​បាន​ចុះ​បញ្ជី និង​ភាគ​ច្រើន​បំផុត​មាន​កម្លាំង​ ១២៥CC ​ចុះ​ក្រោម​នោះ​គុណ​នឹង​តម្លៃ​រៀន​បើកបរ និង​តម្លៃ​ធ្វើ​ប័ណ្ណ​បើកបរ​តម្លៃ​សរុប​ ៧ ​ម៉ឺន​រៀល​ (​ប្រហែល​ជា​ ១៧,៥ ​ដុល្លារ​) យើង​នឹង​ឃើញ​តម្លៃ​សរុប​ជិត ៥០ ​លាន​ដុល្លារ​ដែល​រដ្ឋ​ត្រូវ​ខាត​បង់​។

ចុះ​បើ​ផ្ទេរ​កិច្ចការ​នេះ​មក​រដ្ឋបាល​ថ្នាក់​ក្រោម​ជាតិ​កម្រិត​ក្រុង-ស្រុក-ខណ្ឌ​ដែល​នៅ​កៀក​នឹង​ពលរដ្ឋ​ជា​អ្នក​រៀបចំ​វិញ​ហើយ​យក​ថវិកា​ចំណូល​នេះ​មក​ដំឡើង​ប្រាក់​ខែ​ជូន​មន្ត្រី​រាជការ និង​កងកម្លាំង​ប្រដាប់​អាវុធ​វិញ​មិន​ប្រសើរ​ជាង​? នៅពេល​ដែល​ស្តង់ដារ​ការ​ធ្វើ​ចរាចរណ៍​បើកបរ​ចេញ និង​ចូល​ឆ្លង​បណ្តា​ប្រទេស​សហគមន៍​អាស៊ាន​គឺ​អ្នក​​បើកបរ​ត្រូវ​តែ​មាន​ប័ណ្ណ​បើកបរ​នៅពេល​អ្នក​បើក​ម៉ូតូ​យើង​អត់​មាន​ប័ណ្ណ​បើកបរ​គឺ​មិន​អាច​បើក​ឆ្លង​ទៅ​ប្រទេស​ជិត​ខាង​បាន​ទេ​។

ម្យ៉ាង​វិញ​ទៀត​ប័ណ្ណ​បើកបរ​មាន​ន័យ​ថា​អ្នក​បើកបរ​បាន​ចូល​រៀន​នូវ​ច្បាប់​ចរាចរណ៍​ពេញលេញ និង​បាន​អនុវត្ត​ជាក់​ស្តែង​ដែល​មាន​គ្រូ​ចាំ​ហ្វឹកហ្វឺន​បន្ថែម។

ជាង​នេះ​ទៅ​ទៀត​វា​មាន​សារៈសំខាន់​ស្មើ​នឹង​អត្តសញ្ញាណ​ប័ណ្ណ​នៅ​ពេល​បោះឆ្នោត ឬ​ក៏​តម្រូវការ​ចាំបាច់​មួយ​ចំនួន​បំពេញ​សំណុំ​ឯកសារ​ផ្សេង​ទៀត​។

បើ​ពុំ​ដូច្នេះ​ទេ​អ្នក​បើកបរ​ម៉ូតូ​នៅ​តែ​បើកបរ​មិន​ត្រឹម​​ត្រូវ​ដដែល​ដូចជា​ការ​បត់​ឆ្វេង​បត់​ស្តាំ​ការ​ឈប់​កុំ​ឲ្យ​វិល​កង់ ការ​មិន​យល់​ផ្លូវ​អាទិភាព​ជាដើម​ដែល​ជា​ឫសគល់​នៃ​បញ្ហា​ធ្វើ​ឲ្យ​គ្រោះថ្នាក់​ និង​កកស្ទះ​ចរាចរណ៍​ដដែល​មិន​អាច​ដោះ​ចេញ​ទេ​ហើយ​កំណើន​អ្នក​ស្លាប់​លើស​ពី ៦ ​នាក់​ក្នុង​ ១ ​ថ្ងៃ​ដូច​សព្វ​ថ្ងៃ​​ទៀត​។

ការ​សម្រេច​ទាំង​ ២ ​ចំណុច​ដូច​នេះ​គឺ​មិនមែន​ជា​យុទ្ធសាស្ត្រ​កាត់​បន្ថយ​ភាព​ក្រីក្រ​នោះ​ទេ​គឺ​មាន​តែ​ដាក់​បន្ទុក​ទៅ​អ្នក​បើកបរ​បន្ថែម​ទៅ​វិញ​ទេ​បើ​គណនា​តម្លៃ​ទៅ​លើ​ការ​គ្រោះថ្នាក់​ចរាចរណ៍​ទូទាំង​ប្រទេស​ដែល​ ១ ​ឆ្នាំៗ​ខាត​បង់​ ៣៣៧ លាន​ដុល្លារ​នៅក្នុង​ឆ្នាំ (HIB, 2013) ​និង​តាមរយៈ​សាលា​រាជធានី​ភ្នំពេញ​បាន​រកឃើញ​ថា​ការ​ខាតបង់​ដោយសារ​តែ​កកស្ទះ​ចរាចរណ៍​ ១ ​ខែៗ​អស់​ទឹកប្រាក់​ចំនួន​ ៦ ​លាន​ដុល្លារ​នៅ​រាជធានី​ភ្នំពេញ​ថ្មីៗ​នេះ​។ នេះ​ព្រោះ​តែ​ចង់​បាន​ប្រជាប្រិយភាព​របស់​ថ្នាក់​ដឹកនាំ​តែ​ប៉ុណ្ណោះ​តែ​គ្មាន​បាន​កែប្រែ​ឥរិយាបថ​អ្នក​បើកបរ​នោះ​ទេ​។

ហេតុ​ដូចនេះ​ការ​សម្រេច​របស់​រាជរដ្ឋាភិបាល​គិត​ពិចារណា​នូវ​ការ​ធ្វើ​ប័ណ្ណ​ឡើង​វិញ​ដែល​សិក្សា​ជា​ថ្មី​នូវ​តម្លៃ​សមរម្យ​ដោយ​យក​ថ្លៃ​តាម​តំបន់​ទីក្រុង ឬ​ជនបទ​ និង​ការ​ឆ្លងកាត់​ផ្លូវ​សេដ្ឋកិច្ច​សំខាន់ៗ​គួរ​តម្រូវ​ឲ្យ​បង់​លុយ​វិញ​ទាំងអស់​គ្នា​គ្រាន់តែ​ថា​បើ​អាច​គឺ​ចុះ​តម្លៃ​ឲ្យ​បាន​សមរម្យ​ជូន​ពួកគាត់​ដែល​មាន​រថយន្ត​រស់​​នៅ​តាម​ដង​ផ្លូវ​ជាតិ​លេខ​ ៤ ​នោះ​ជា​ជាង​ការ​សម្រេច​ចិត្ត​ផ្លាស់ប្តូរ​ភ្លាមៗ​ទាន់​ហន់​ពេក​ហើយ​នេះ​ក៏​ជា​មេរៀន​មួយ​ដែរ​ដែល​បង្កើត​ច្បាប់​មិន​បាន​សិក្សា​អំពី​ផលវិបាក និង​ផលប៉ះពាល់​ដែល​អាច​កើត​មាន​នៅ​ពេល​អនុវត្ត​៕

ចូលរួម​ផ្តល់​យោបល់​តាមរយៈ ​soprach.tong@phnompenhpost.com

អត្ថបទគួរចាប់អារម្មណ៍