The Phnom Penh Post Search

Search form




Logo of Phnom Penh Post newspaper Phnom Penh Post - ច្បាប់​ចរាចរណ៍ៈ ផាក​ពេល​ថ្ងៃ​បាន​កម្រៃ​តិច​ជាង​ពេល​យប់




ច្បាប់​ចរាចរណ៍ៈ ផាក​ពេល​ថ្ងៃ​បាន​កម្រៃ​តិច​ជាង​ពេល​យប់

Content image - Phnom Penh Post
រថយន្ត​កាត់​ត​ដឹក​លើស​ទម្ងន់​ក្នុង​ពេល​កំពុង​ដឹក​ទំនិញ​តាម​ផ្លូវ​ជាតិ​លេខ ៥ ក្នុង​ទឹកដី​ខេត្ត​ពោធិ៍សាត់​កាលពី​ថ្មីៗ​កន្លង​មក។ រូបថត តុង សុប្រាជ្ញ

ច្បាប់​ចរាចរណ៍ៈ ផាក​ពេល​ថ្ងៃ​បាន​កម្រៃ​តិច​ជាង​ពេល​យប់

ខណៈ​ពេល​ដែល​ការ​អនុវត្ត​ច្បាប់​ចរាចរណ៍​ផ្លូវ​គោក​ចូល​ជា​ធរមាន​កាលពី​ថ្ងៃ​ទី​ ០១ ខែ​មករា ឆ្នាំ​ ២០១៦ ​សប្តាហ៍​កន្លង​មក​នេះ​ឃើញ​មាន​ការ​ជជែក​គ្នា​តាម​ទីសាធារណៈ​ខ្លះ​យល់​ស្រប ខ្លះ​មាន​ការ​រិះគន់​តាម​ប្រព័ន្ធ​បណ្តាញ​សង្គម​ហ្វេសប៊ុក​អំពី​ការ​អនុវត្ត​ច្បាប់​នេះ​។

បើ​ទោះបី​ជា​លោក​នាយក​រដ្ឋមន្ត្រី ហ៊ុន សែន ឲ្យ​ផ្អាក​ការ​ផាក និង​ពិន័យ​បណ្តោះអាសន្ន​ចំពោះ​អ្នក​គ្មាន​ប័ណ្ណ​បើកបរ​ក៏ដោយ​ក៏​ការ​អនុវត្ត​ច្បាប់​នេះ​ត្រូវ​បាន​គេ​សង្កេត​ឃើញ​ថា​គឺ​ភាគ​ច្រើន​បាន​តែ​អ្នក​ក្រីក្រ​ដែល​រក​ប្រាក់​ចំណូល​ ១ ​ថ្ងៃ​មិន​ស្មើ​នឹង​ការ​ផាក​ពិន័យ​ ១ ​ករណី (១ ​ម៉ឺន​ ៥ ​ពាន់​រៀល​) ​ផង​នោះ​គឺ​ទៅ​លើ​ករណី​មិន​ប្រើប្រាស់​មួក​សុវត្ថិភាព និង​កញ្ចក់​សម្រាប់​មើល​មក​ក្រោយ​របស់​ម៉ូតូ និង​ការ​បើក​រថយន្ត​មិន​ប្រើ​ខ្សែ​ក្រវាត់​ចង្កេះ​នៅពេល​ថ្ងៃ​តែ​ប៉ុណ្ណឹង​។

តែ​សម្រាប់​ការ​ផាក​ពេល​យប់​វិញ​គឺ​មិន​ទាន់​មាន​ឃើញ​ការ​ផាក​នៅ​ឡើយ​នោះ​ទេ​ដែល​អ្នក​បើកបរ​ពេល​យប់​នោះ​គឺ​សុទ្ធតែ​អ្នក​ស្រវឹង​ជោកជាំ​បើ​យក​ឧបករណ៍​វាស់ស្ទង់​កម្រិត​ជាតិ​ស្រា​វិញ​គឺ​ដឹង​តែ​ពី​លើស​ ០,៤ ​មិល្លីក្រាម​ក្នុង​ ១ ​លីត្រ​នៃ​ខ្យល់ ឬ​ក៏​ស្មើ​នឹង​ ០,៨ ​ក្រាម​ក្នុង​ ១ ​លីត្រ​ឈាម​ឡើង​ទៅ​គឺ​ខុស​ច្បាប់​ចរាចរណ៍​ដែល​ត្រូវ​ជាប់​ពន្ធនាគារ​ពី​ ១ ​ខែ​ទៅ​ ៦ ​ខែ និង​ពិន័យ​ជា​ប្រាក់​ពី​ ៨០ ​ម៉ឺន​ឡើង​ដល់​ ៤ ​លាន​រៀល​។

ភាសា​សាមញ្ញ​ថា​បើ​ប៉ឺត​ប៉ោង​ល្មម​​ផ្លុំ​ទៅ​កម្តៅ​ចេញ​ពី​ក្នុង​ខ្លួន​អ្នក​ស្រវឹង​អាច​បែក​ប៉ឺតប៉ោង​ទៀត​ហើយ​អ្នក​បើកបរ​ល្មើស​នឹង​ច្បាប់​ដែល​​ធ្វើឲ្យ​គ្រោះថ្នាក់​ចរាចរណ៍​ពេល​យប់​នោះ​គឺ​សុទ្ធតែ​អ្នក​ស្រវឹង។ នេះ​បើ​តាម​​ព័ត៌មាន​ផ្សព្វផ្សាយ​រាល់​ថ្ងៃ​។ ការ​ផាក​វាស់​ជាតិ​អាល់កុល​ពេល​យប់​គឺ​ស្រួល​ទេ​គ្រាន់តែ​ប៉ូលិស​ដាក់​កន្លែង​ចល័ត​នៅ​មុខ​អគារ​ម៉ុងឌីយ៉ាល់​នៅ​មុខ​កោះពេជ្រ ឬ​ក៏​នៅ​មុខ​ខារ៉ាអូខេ​គឺ​ដឹង​តែ​ពី​ជាប់​យក​ទៅ​ណា​នឹង​អស់​ហើយ​បាន​ប្រាក់​ចំណូល​ច្រើន​ជាង​ពេល​ថ្ងៃ​នោះ​ទៀត​។

ហេតុ​អ្វី​មិន​អនុវត្ត​ទៅ​នៅ​ចាំ​ដល់​ណា​ទៀត​? ឬ​ក៏​បើ​អនុវត្ត​ពេល​យប់​ទៅ​ប៉ះ​អ្នក​ធំៗ​ឧកញ៉ាៗ​ច្រើន​អ្នក​ធូរធារ​បាន​ជា​មិន​ហ៊ាន​អនុវត្ត​ទេ​ខ្លាច​ប៉ះ​អ្នក​ផលិត​ច្បាប់ និង​អ្នក​អនុវត្ត​ខ្លួនឯង​?

តាមពិត​ទៅ​ការ​រឹត​បន្ដឹង​ការ​អនុវត្ត​ច្បាប់​នេះ​ដែល​ចាប់ផ្តើម​ពី​ការ​ផាក​មិន​ពាក់​មួក​សុវត្ថិភាព និង​​កញ្ចក់​លើ​ម៉ូតូ​នេះ​គឺជា​ផ្នែក​នៃ​ការ​ចូលរួម​ចំណែក​ជួយ​កាត់​បន្ថយ​គ្រោះថ្នាក់​បាន​មួយ​ចំនួន​កម្រិត​ក៏​ពិត​មែន​ហើយ​តែ​សំខាន់​បើ​សិន​រថយន្ត​បើក​លឿន​ទៅ​បុក​អ្នក​ជិះ​ម៉ូតូ​ពាក់​មួក​ទៀត​ក៏​មិន​អាច​ទប់​បាន​ដែរ​។ ហេតុ​អ្វី​ក៏​មិន​ចាំ​ផាក​ពិន័យ​រថយន្ត​ធំៗ​ដែល​ប្រើ​ល្បឿន​លើស​កំណត់​?

យ៉ាងណា​ក៏ដោយ​ក៏​ការ​អនុវត្ត​ច្បាប់​នេះ​បាន​ចាប់ផ្តើម​ចូលរួម​កាត់​បន្ថយ​អត្រា​ស្លាប់​ដោយសារ​គ្រោះថ្នាក់​ចរាចរណ៍​​គឺ​ ៦ ​នាក់​ក្នុង​ ១ ​ថ្ងៃ​ផង​ដែរ​តែ​បើ​អនុវត្ត​បាន​ត្រឹម​តែ​បន្តិច​ប៉ុណ្ណឹង​មិន​​ទាន់​គ្រប់គ្រាន់​នៅ​ឡើយ​ទេ​គឺ​នៅ​មាន​​កត្តា​មួយ​ចំនួន​ទៀត​ដែល​ចូលរួម​ចំណែក​ធ្វើឲ្យ​កើត​មាន​គ្រោះថ្នាក់​តែ​មិន​ឃើញ​មាន​ចែង​នៅក្នុង​ច្បាប់​ដែល​ជា​ឫសគល់​នៃ​បញ្ហា​ត្រូវ​តែ​ដោះស្រាយ​ផង​ដែរ​មិន​មែន​កំហុស​ទាំងអស់​សុទ្ធតែ​កើត​ពី​អ្នក​បើកបរ​នោះ​ទេ​ដូចជា​៖

Ÿ-រ៉ឺម៉ក​កង់បី (ធុកៗ) និង​រថយន្ត​តាក់ស៊ី​ចត​ជា ២ ​ជួរ​នៅ​លើ​ដង​ផ្លូវ​សាធារណៈ​តែ​ម្តង​រីឯ​អ្នក​ហៅ​ម៉ូយ​នៅ​តាម​ផ្លូវ​ក៏​ចេញ​មក​ឈរ​ចាំ​ចាប់​ម៉ូយ​ជា​អ្នក​ធ្វើ​ដំណើរ​ចូល​មក​ក្នុង​សាច់​ផ្លូវ​ ២ ​ម៉ែត្រ​ទៀត​ហើយ​បែរ​មក​មើល​អ្នក​កំពុង​បើកបរ​តាម​ផ្លូវ​វិញ​ក៏​ចេះ​តែ​នាំ​គ្នា​គេច​ពី​ពួក​អ្នក​ហៅ​ម៉ូយ​រហូត​បើក​ចូល​ដល់​កណ្តាល​ផ្លូវ​ទាំងអស់​គ្នា​ធ្វើឲ្យ​ងាយ​នឹង​ជួប​ប្រទះ​គ្រោះថ្នាក់​ចរាចរណ៍​ព្រោះ​អ្នក​បើកបរ​មិន​ដឹង​គេច​ជា​ត្រូវ​គេច​ទៅ​ណា​។ ឧទាហរណ៍​ដូចជា​នៅ​ផ្លូវ​ចុះ​ពី​លើ​ស្ពាន​នៅ​ច្បារ​អំពៅ និង​ស្ពាន​ជ្រោយចង្វារ​ជាដើម​។

Ÿ-ការ​យក​ចំណី​ផ្លូវ​សង់​រោងការ ឬ​រោងបុណ្យ​អស់​មួយ​ចំហៀង ឬ​ក៏​មួយ​​ដាច់​តែ​ម្តង​ធ្វើ​ឲ្យ​អ្នក​បើកបរ​គេច​​មិន​ផុត​ក៏​អាច​បុក​ទៅ​នឹង​រោង​ទាំងនោះ​ដូច​គ្រោះថ្នាក់​នៅ​លើ​ផ្លូវ​ជាតិ​លេខ​ ១ ដែល​រោងការ​ទាំង​​នោះ​សង់​នៅ​ផ្លូវ​ជាតិ​។

Ÿ-បញ្ហា​សាងសង់​ក្បាលនាគ ឬ​ក៏​របង​កុំ​ឲ្យ​ឆ្លង​កាត់​ទ្រូង​ផ្លូវ​ដែល​មិន​មាន​សញ្ញា​ភ្លើង​ភ្លឺ​ច្បាស់លាស់ និង​មិន​ត្រឹមត្រូវ​ទៅ​តាម​ស្តង់ដារ​ធ្វើ​ឲ្យ​អ្នក​បើកបរ​ខ្លះ​គ្រោះថ្នាក់​ដោយសារ​តែ​ក្បាល​នាគ​នោះ​ដែរ​ដូច​កាលពី​សប្តាហ៍​មុន​នេះ​មាន​រថយន្ត​ឡិចស៊ីស​ ៣៥០ មួយ​គ្រឿង​បាន​បុក​ក្បាល​នាគ​នៅ​លើ​មហាវិថី​សហព័ន្ធ​រុស្ស៊ី​ជិត​ព្រលាន​យន្តហោះ​ពោចិនតុង​ក៏​បាន​បណ្ដាល​ឲ្យ​ក្រឡាប់​ឆេះ​ខ្ទេច​ផង​ដែរ​។

Ÿ-ការ​ជួសជុល​ផ្លូវ ឬ​លូ​ក៏​ប្រឹង​ដណ្តើម​ធ្វើការ​ប្រជែង​គ្នា​នៅ​ពេល​ថ្ងៃ​ទៅ​នឹង​ស្ថានភាព​ចរាចរណ៍​កំពុង​តែ​កកស្ទះ​ខ្លះ​គេច​គ្នា​ពី​មួយ​ទៅ​មួយ​អាច​ធ្វើ​ឲ្យ​មាន​គ្រោះថ្នាក់​ចរាចរណ៍​ថែម​ទៀត។ បើ​នៅ​ប្រទេស​ជិត​ខាង​យើង​ឥឡូវ​នេះ​គេ​តែងតែ​ជួសជុល​ផ្លូវ ឬ​ក៏​លូ​តែ​នៅពេល​យប់​ប៉ុណ្ណោះ។

Ÿ-ការ​មិន​អនុញ្ញាត​ឲ្យ​សាងសង់​ផ្លូវ​កាត់​ទទឹង​ថ្នល់​ (Over pass) ដែល​ចូលរួម​ចំណែក​កាត់បន្ថយ​គ្រោះថ្នាក់​ដល់​អ្នក​ធ្វើ​ដំណើរ​ និង​ងាយស្រួល​ក្នុង​ការ​ឆ្លង​កាត់​ជាពិសេស​កូន​សិស្ស​ក្នុង​ពេល​ដែល​ពួកគេ​ត្រូវ​ឆ្លងកាត់​ថ្នល់។ ចំពោះ​ករណី​នេះ​កាលពី​ឆ្នាំ​ ២០០៦ លោក គួច ម៉េងលី នាយក​សាលា​អន្តរ​ទ្វីប​អាមេរិកាំង​ (AIS) ​សាខា​ទួលទំពូង​ធ្លាប់​បាន​លើក​គម្រោង​ប្លង់​ដើម្បី​សាងសង់ និង​មាន​ថវិកា​សម្រាប់​សង់​អស់​ទឹកប្រាក់​កាល​នោះ​ប្រមាណ​ជា​ ១៥ ​ម៉ឺន​ដុល្លារ​ទេ​ហើយ​​ផ្ញើ​ជូន​អាជ្ញាធរ​ដែនដី​ដើម្បី​បាន​​សាកសួរ​ពី​ការ​សាងសង់​នោះ​តែ​ត្រូវ​បាន​អះអាង​ថា​ប៉ះពាល់​កន្លែង​រកស៊ី​របស់​ឧកញ៉ា​មួយ​ចំនួន​ដែល​នៅ​ម្តុំ​នោះ​មិន​អនុញ្ញាត​ឲ្យ​សង់​ទេ។ កាល​នោះ​លោក​បាន​លើក​ឡើង​ថា​នៅ​លើ​ពិភពលោក​ឥឡូវ​នេះ​ប្រទេស​ណា​ក៏​គេ​សង់​ផ្លូវ​ឆ្លងកាត់​នេះ​ដែរ​ហេតុអ្វី​បាន​ជា​នៅ​ស្រុក​ខ្មែរ​យើង​មាន​លុយ​សង់​ហើយ​គេ​មិន​ឲ្យ​សង់​ទៀត​? ហើយ​ការ​សាងសង់​នេះ​ដូច​តែ​ជណ្តើរ​ឡើង​ផ្ទះ ឬ​អគារ​ការិយាល័យ​រាល់​ថ្ងៃ​ដោយ​មិន​បាន​ធ្វើ​ឲ្យ​អាប់ឱន​រាសី​ដល់​នរណា​ម្នាក់​ផង​ហ្នឹង​?

Ÿ-រឿង​យក​ផ្លូវ​ធ្វើ​ដំណើរ​មក​ធ្វើ​ជា​ទីផ្សារ​លក់​ដូរ​ទាំង​នៅ​លើ​ផ្លូវ​ជាតិ ទាំង​ផ្លូវ​តូច​ធម្មតា​មិន​ត្រឹម​តែ​ធ្វើ​ឲ្យ​មាន​ការ​កកស្ទះ​ចរាចរណ៍​ប៉ុណ្ណោះ​ទេ​ប៉ុន្តែ​ថែម​ទាំង​ងាយ​នឹង​ជួប​គ្រោះថ្នាក់​ទៀត​ផង។ ទាំង​នេះ​គឺជា​បញ្ហា​ដែល​ត្រូវ​តែ​ផ្លាស់ប្តូរ​ឥរិយាបថ​ និង​ត្រូវ​តែ​រក​ទីតាំង​លក់ដូរ​ឲ្យ​បាន​សមរម្យ​។

Ÿ-ការ​ត​រថយន្ត​ដឹក​ទំនិញ​ឡើង​ទាំង​ជញ្ជាំង​ទាំង​បណ្តោយ​រថយន្ត​ដើម្បី​ដឹក​ទំនិញ​ឲ្យ​បាន​ច្រើន​មាន​ឈ្មោះ​ថា​រថយន្ត​ដែរ​តែ​មិន​ត្រឹមត្រូវ​ទៅ​តាម​ស្តង់ដារ​ដោយ​ដឹក​លើស​ទម្ងន់ បើកបរ​ទាំង​យប់​ ទាំង​ថ្ងៃ​ងាយ​បាក់​ស្ពាន ខូច​ថ្នល់ ហ្វ្រាំង​ទប់ទល់​នឹង​ទម្ងន់​មិន​ឈ្នះ​ពេល​ចុះ​ស្ពាន​ ឬ​ចំណោត​ផ្សេងៗ​ហើយ​គ្រាន់​តែ​កម្លាំង​ខ្យល់​ក្នុង​ពេល​កំពុង​បើក​បររថយន្ត​ប្រភេទ​នេះ​គឺ​ចង់​ប៉ើង​អ្នក​បើក​ម៉ូតូ​ក្បែរ​នោះ​ដោយ​ខ្លះ​ចង់​ធ្លាក់​ពី​ផ្លូវ​ចូល​ក្នុង​ស្រែ​ក៏​មាន។

Content image - Phnom Penh Post
រថយន្ត​កាត់​ត​ដឹក​លើស​ទម្ងន់​ក្នុង​ពេល​កំពុង​ដឹក​ទំនិញ​តាម​ផ្លូវ​ជាតិ​លេខ ៥ ក្នុង​ទឹកដី​ខេត្ត​ពោធិ៍សាត់​កាលពី​ថ្មីៗ​កន្លង​មក។ រូបថត តុង សុប្រាជ្ញ

Ÿ-ពេល​ខ្លះ​អ្នក​បើក​រថយន្ត​កុងតឺន័រ​ធំៗ​បើក​មាន​តែ​ម្នាក់​ឯង​ទេ​ដែល​នេះ​ជា​បញ្ហា​ងាយ​នឹង​ជួប​គ្រោះថ្នាក់​បុក​គេ​ក្នុង​ខណៈ​ពេល​គាត់​ងងុយ​ដេក​ងោក​មួយ​ភាំង​។

Ÿ-កម្មវិធី​ផ្សព្វផ្សាយ​តាម​សហគមន៍​មាន​តិចតួច​ខ្លាំង​ណាស់​ចំពោះ​ការ​អប់រំ​អំពី​ច្បាប់​ចរាចរណ៍​ជា​មន្ត្រី​ដែល​ចុះ​មូលដ្ឋាន​បាន​ត្រឹម​តែ​ទៅ​បញ្ចុះបញ្ចូល​តែ​រឿង​ឲ្យ​គេ​បោះឆ្នោត​គណបក្ស​របស់​ខ្លួន ឬ​ក៏​ដើរ​បំបែក​សមាជិក​សកម្ម​បក្ស​គេ​ឲ្យ​ចូល​បក្ស​របស់​ខ្លួន​តែ​មិន​ដែល​ខ្វល់ខ្វាយ​រឿង​ជួយ​ផ្សព្វផ្សាយ​ច្បាប់​ចរាចរណ៍​ផ្លូវ​គោក​ឲ្យ​ពលរដ្ឋ​បាន​ជ្រួតជ្រាប​ច្បាស់​ទេ​។

Ÿ-កន្លែង​រៀន​បើកបរ​នៅ​ឆ្ងាយ​ពី​ទីកន្លែង​រស់នៅ​ពេក​ដូច​ការ​រៀន​បើកបរ​ម៉ូតូ​នៅ​ជិត​ចោមចៅ​ក្រុមហ៊ុន​ហុងដា​ និង​នៅ​ផ្លូវ​ ជា សុផារ៉ា​។ ហេតុអ្វី​បាន​ជា​មិន​ព្រម​បង្កើត​ទីតាំង​ឲ្យ​បាន​ច្រើន​ទៅ​? បើ​កាលពី​ទសវត្សរ៍​ឆ្នាំ​ ៨០ ក្រុម​ម៉ូតូ​អម​ថ្នាក់ដឹកនាំ​មក​រៀន​បើក​នៅ​ចំណត​ស្តាត​អូឡាំពិក​។

Ÿ-រីឯ​ព័ត៌មាន​តាម​ទូរទស្សន៍​ខ្លះ​បាន​ផ្សព្វផ្សាយ​ពី​ច្បាប់​នៅ​ម៉ោង​ព័ត៌មាន​គ្រោះថ្នាក់​ចរាចរណ៍​តែ​មិន​ទាន់​បង្ហាញ​ជា​តុក្កតា​ពន្យល់​ផ្លូវ​ណា​ដែល​ផ្តល់​អាទិភាព ឬ​មួយ​ផាក​ពិន័យ​នៅ​កំហុស​របស់​អ្នក​បើកបរ​នៅ​ឡើយ​ទេ​។

Ÿ-គួរ​យក​ច្បាប់​ចរាចរណ៍​ផ្លូវ​គោក​ចេញ​ជា​សំណួរ​នៅក្នុង​វិញ្ញាសា​ពេល​ប្រឡង​​ទៅ​តាម​កម្រិត​សិក្សា​នីមួយៗ​។

Ÿ-នៅពេល​ខ្លះ​ងាយ​នឹង​កកស្ទះ និង​គ្រោះថ្នាក់​ចរាចរណ៍​នៅពេល​ប៉ូលិស​ចរាចរណ៍​ដែល​ការ​ប្រមូល​លុយ​ពី​ការ​ផាក​ពិន័យ​បាន​ដល់​ ៧០ ​ភាគរយ​នៃ​ទឹកប្រាក់​ផាក​នោះ​លែង​គិតគូរ​ពី​ការ​ធ្វើ​ចរាចរណ៍​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

អត្ថបទគួរចាប់អារម្មណ៍