The Phnom Penh Post Search

Search form

Logo of Phnom Penh Post newspaper Phnom Penh Post - ឆ្មា​ និង​កណ្ដុរ​វគ្គ​ទី​ ១៧: បើ​ជ្រុល​ជា​ស្នើ​លើកលែង​ទោស​ឲ្យ​ដៃគូ​កណ្តុរ​ ឆ្មា​គួរ​តែ​ដោះលែង​អ្នក​ទោស​នយោបាយ​ទាំងអស់​តែ​ម្តង​ទៅ

ឆ្មា​ និង​កណ្ដុរ​វគ្គ​ទី​ ១៧: បើ​ជ្រុល​ជា​ស្នើ​លើកលែង​ទោស​ឲ្យ​ដៃគូ​កណ្តុរ​ ឆ្មា​គួរ​តែ​ដោះលែង​អ្នក​ទោស​នយោបាយ​ទាំងអស់​តែ​ម្តង​ទៅ

Content image - Phnom Penh Post
លោក កឹម សុខា ថ្លែង​ក្នុង​វេទិកា​នៅឯ​ស្នាក់ការ​កណ្ដាល​គណបក្ស​សង្គ្រោះ​ជាតិ​កាលពី​ថ្ងៃ​អាទិត្យ​។ រូប ហ្វេសប៊ុក

ឆ្មា​ និង​កណ្ដុរ​វគ្គ​ទី​ ១៧: បើ​ជ្រុល​ជា​ស្នើ​លើកលែង​ទោស​ឲ្យ​ដៃគូ​កណ្តុរ​ ឆ្មា​គួរ​តែ​ដោះលែង​អ្នក​ទោស​នយោបាយ​ទាំងអស់​តែ​ម្តង​ទៅ

ពាក្យចាស់​តែងតែ​លើក​យូរ​ហើយ​រឿង​ក្តីក្តាំ​នៅ​តុលាការ​ថា​ឲ្យ​ប្រយ័ត្ន​តែ​ដោះលែង​ជនជាប់ចោទ​ស្រួល​មិន​ស្រួល​ហ្នឹង​វា​ទៅ​ជា​ចោរ​រួច​ខ្លួន​រីឯ​ម្ចាស់​ជាប់គុក​ទៅ​វិញ។

ឥឡូវ​នេះ​ចូល​ក្រឡា​ពាក្យ​ចាស់​ហ្នឹង​ហើយ​ល្បែង​នយោបាយ​ដាក់​អន្ទាក់​ដូច​រឿង​តុក្កតា​ឆ្មា និង​កណ្តុរ (Tom & Jerry) អ្នក​ដែល​ត្រូវ​បាន​គេ​ចោទ​ថា​បាន​ប្រព្រឹត្ត​រឿង​ល្បែង​ស្នេហា​​សហាយ​ស្មន់​រួច​ខ្លួន​រីឯ​អ្នក​ជួយ​អន្តរាគមន៍​បែរ​ទៅ​ជា​ជាប់គុក​ទៅ​វិញ។ ជាក់ស្តែង​កាលពី​សប្តាហ៍​មុន​នេះ​ឆ្មា​បាន​ស្នើសុំ​លើក​លែង​ទោស​ឲ្យ​ដៃគូ​កណ្តុរ​ដែល​ត្រូវ​បាន​គេ​គំរាម​តាម​ចាប់​ឡោមព័ទ្ធ​ទាំង​ផ្លូវ​គោក ផ្លូវ​ទឹក និង​ផ្លូវ​អាកាស​ឡើង​ផ្អើល​រាជធានី​ភ្នំពេញ​ហើយ​ឆ្មា​បាន​ចំអក​ឲ្យ​ថា​នៅ​ហូប​បាយ​តែ​ជា​មួយ​នឹង​ចាន​ស្រាក់​ក្នុង​ស្នាក់ការ​ហ្នឹង​ទៅ។

ការ​ដែល​ដោះលែង​ដៃគូ​នេះ​បន្ទាប់ពី​ខ្សែ​អាត់​ជជែក​គ្នា​តាម​ទូរស័ព្ទ​រវាង​លោក ហ៊ុន ម៉ានិត និង​កញ្ញា ធី សុវណ្ណថា ក្នុង​ការ​កម្ចាត់​ដៃ​គូ​កណ្តុរ​ចេញ​ពី​បក្ស​ភាសា​សាមញ្ញ​ថា​ធ្វើ​ស៊ី​តែ​ម្តង​ត្រូវ​បាន​គេ​ធ្វើ​ឲ្យ​បែកធ្លាយ​ចេញ​ជា​សាធារណៈ​តាម​ហ្វេសប៊ុក និង​ក្នុង​គោលបំណង​បង្រួប​បង្រួម​ជាតិ។ ចំណែកឯ​អ្នក​ដែល​កំពុង​ទទួល​រង​ថ្ម​បាក់​ពី​ដៃគូ​កណ្តុរ​ក្នុង​ការ​ធ្វើ​អន្តរាគមន៍​ពាក់ព័ន្ធ​ក្នុង​ករណី​រឿង​សហាយស្មន់​របស់​ដៃគូ​កណ្តុរ និង​កញ្ញា​ ស្រីមុំ តាមរយៈ​សិទ្ធិ​មនុស្ស​នៅ​តែ​ជាប់គុក​ដដែល​មិន​ត្រឹម​តែ​ប៉ុណ្ណឹង​ទេ​ជាប់​ដោយ​ទាំង​អ្នក​តវ៉ា (Black Monday) ឲ្យ​ដោះលែង​មេឃុំ មន្ត្រី​សិទ្ធិ​មនុស្ស និង​មន្ត្រី​ គ.ជ.ប ដែល​រង​ថ្ម​បាក់​នោះ​ក៏​ជាប់គុក​ដែរ​ដោយ​ទាំង​និរទេស​ជនបរទេស​ម្នាក់​ទៀត។ នេះ​ដោយសារ​តែ​ហេតុផល​នយោបាយ​មួយ​មុខ​តែ​ប៉ុណ្ណោះ។

បើ​តួឯក​ត្រូវ​បាន​ឆ្មា​ស្នើ​ឲ្យ​លើក​លែង​ទោស​ពី​បទ​គេចវេះ​មិន​ចូល​ធ្វើ​ជា​សាក្សី​នៅ​តុលាការ​បាន​មាន​សេរីភាព​រួច​ហើយ​ចុះ​ហេតុ​អ្វី​បាន​ជា​នៅ​តែ​ឃុំ​ខ្លួន​អ្នកទោស​ដោយសារ​តែ​តួឯក​ដល់​ណា​ទៀត? បើ​ទោះបី​ជា​ពួកគេ​ប្តឹង​តវ៉ា​ដល់​តុលាការ​កំពូល​ហើយ​នៅ​តែ​មាន​ទោស​ដដែល? ករណី​នេះ​ត្រូវ​បាន​គេ​មើល​ឃើញ​លើ​គោក​ពេក​ហើយ​ដូចជា​មិន​ឡូហ្ស៊ិក​សោះ​តែ​ម្តង​បំបិទ​សិទ្ធិ​សេរីភាព​គ្នា​រីឯ​ម្តាយ​ ស្រីមុំ នឹក​កូន​មិន​ដឹង​ជា​កូន​នៅ​ទី​ណា? សុខទុក្ខ​យ៉ាង​ណា? តើ​ទុក​ពួកគាត់​នៅ​ធ្វើ​អ្វី​ទៀត? តើ​ចំណេញ​អ្វី​ខ្លះ​ពី​ការ​ឃុំ​ខ្លួន​ពួកគាត់​នោះ? ម្យ៉ាង​វិញ​ទៀត​ការ​ឃុំ​ខ្លួន​ពួកគាត់​ធ្វើ​ឲ្យ​សហគមន៍​អន្តរជាតិ​មើល​ឃើញ​ស្ថានការណ៍​នយោបាយ និង​សិទ្ធិ​មនុស្ស​នៅ​ស្រុក​ខ្មែរ​កាន់តែ​អាក្រក់​ទៅៗ​វិញ​ទេ។

តែ​ការ​ដោះលែង​ដៃគូ​កណ្តុរ​នេះ​គឺ​ឆ្មា​នៅ​តែ​ដាក់​អន្ទាក់​កណ្តុរ​ដដែល​គឺ​ព្យាយាម​បំបែក​កណ្តុរ​ពី​ដៃគូ និង​ការ​បំបាក់​ស្មារតី​របស់​ដៃគូ​កណ្តុរ​ដែល​តែងតែ​ក្អេងក្អាង​មិន​ខ្លាច​នេះ​មិន​ខ្លាច​នោះ​ហើយ​ថា​បើ​ឆ្មា​ចាញ់​ឆ្នោត​ហើយ​មិន​ចុះ​ចេញ​ពី​តំណែង​គឺ​មាន​តែ​ដាក់​ជណ្តើរ​ឡើង​ទាញ​ទម្លាក់​ចុះ។ ឥឡូវ​ឆ្មា​ស្នើ​លើកលែង​ទោស​ឲ្យ​ហើយ​តិច​លោ​ចុះ​មូលដ្ឋាន​កោកកាកៗ​ឌឺដង​ឲ្យ​ឆ្មា​ទៀត ឆ្មា​ចាំ​តែ​ដាក់​អន្ទាក់​ដៃគូ​កណ្តុរ​ទៀត​​ទេ រក​បទ​ចោទ​រឿង​សហាយស្មន់​ជាមួយ​ ស្រីមុំ ​មក​ចោទ​ដដែល។ រីឯ​កណ្តុរ​វិញ​គឺ​បាន​ត្រឹម​តែ​ខ្វិចខ្វិលៗ​រក​វិធី​ចូល​រន្ធ​វិញ​ខំ​រិះគន់​ផង​យក​ចិត្ត​ឆ្មា​ផង​ដូចជា​ការ​ខំ​យល់ស្រប​ជាមួយ​ឆ្មា​ថា​ល្អ​ហើយ​ចំណេញ​លើ​ករណី​យក​ខ្នាត​លើ​ផែន​ទី ១ ​លើ ៥០ ​ពាន់​ដើម្បី​ជា​រង្វាស់​លើ​ផែនដី​ជាក់ស្តែង។ បើ​ទោះបី​ជា​រង្វាស់​នេះ​មិន​ដូច​​ទៅ​នឹង​ច្បាប់​រដ្ឋធម្មនុញ្ញ​ដែល​កំណត់​យក​ខ្នាត​លើ​ផែន​ទី ១ ​លើ​ ១០០ ​ពាន់ និង​ផ្ទុយ​ពី​គំនិត​របស់​សមាជិក​ក្នុង​បក្ស​ក៏ដោយ​ក៏​កណ្តុរ​សុខ​ចិត្ត​យល់​​ស្រប​តាម​ឆ្មា​ដែរ​ដើម្បី​ធ្វើ​យ៉ាង​ណា​ឲ្យ​ឆ្មា​ស្នើ​ឲ្យ​មាន​ការ​​លើក​​លែង​ទោស​ដែរ។ តែ​ឆ្មា​ដាក់​អន្ទាក់​​មួយ​ទៀត​ដែល​តែងតែ​អះអាង​ថា​បើ​ចុះហត្ថលេខា​លើ​លិខិត​ស្នើសុំ​លើកលែង​ទោស​ឲ្យ​កណ្តុរ​គឺ​កាត់​ដៃ​ចោល​ហើយ​ឆ្មា​សម្លុត​កណ្តុរ​បើ​ចាញ់​ឆ្នោត​ខាង​មុខ​នេះ​សង្គ្រាម​នឹង​កើត​មាន​ឡើង​បើ​ទោះបី​ជា​ផ្ទុយ​ទៅ​នឹង​ឆន្ទៈ​របស់​ឆ្មា​ដែល​តែងតែ​ស្វះស្វែង​រក​សន្តិភាព​ដើម្បី​ប្រទេស​ជាតិ​ក៏ដោយ។

ដោយសារ​តែ​ល្បែង​នយោបាយ​នៅ​ស្រុក​ខ្មែរ​បែប​ឆ្មា និង​កណ្តុរ និង​ដៃគូ​កណ្តុរ​ហ្នឹង​ហើយ​នៅ​ទីបញ្ចប់​ស្លាប់​អ្នក​ក្លាហាន កែម ឡី ទទេ បន្ទាប់ពី​បាន​ជួប​សន្ទនា​ជាមួយ​ដៃគូ​កណ្តុរ​មក។ អ្នក​ជាប់​ពន្ធនាគារ​ដោយសារ​តែ​ស្នេហា​សហាយស្មន់​ដៃគូ​​កណ្តុរ​នៅ​តែ​ជាប់​ទោស​ដដែល​ហើយ​អ្នក​ស្នេហា​ជាតិ​សមាជិក​សភា និង​ព្រឹទ្ធសភា​តវ៉ា​រឿង​ផែនទី និង​ព្រំដែន​​ក៏​នៅ​តែ​ជាប់​ទោស​ដដែល។ ទាំង​ឆ្មា ទាំង​កណ្តុរ ទាំង​ដៃគូ​កណ្តុរ​ម្នាក់ៗ​សុទ្ធ​តែ​អះអាង​ធ្វើអ្វីៗ​គឺ​ដើម្បី​ជាតិ​តែ​ដល់​ពេល​អនុវត្ត​នៅ​តែ​ធ្វើការ​ជាមួយ​គ្នា​មិន​បាន​ឈ្លោះ​តែ​គ្នា​ឯង​ដល់​ពេល​ចំណេញ​ពី​ការ​បាក់បែក​គ្នា​ហ្នឹង​គឺ​បាន​ទៅ​លើ​ប្រទេស​ជិត​ខាង​ទៅ​វិញ។ ទី​បំផុត​នាំ​គ្នា​យក​ផែនទី​មក​ជជែក​គ្នា​ដដែល​បើ​ទោះបី​ជា​ច្បាប់​កំណត់​រង្វាស់​ខ្នាត​ផែន​ទី ១​លើ ១០០ ពាន់​ដែល​មាន​ហើយ​ក៏ដោយ។

រាល់​ថ្ងៃ​ហ្នឹង​អ្នក​នយោបាយ​អះអាង​ថា​ការ​អនុវត្ត​តាម​បែប​លទ្ធិប្រជាធិបតេយ្យ​តាម​ស្តង់ដារ​ក៏​មិន​ច្បាស់​យ៉ាង​ណា​មិញ​ការ​អនុវត្ត​វប្បធម៌​សន្ទនា​ (Dialogue) ក៏​បន្លែ​បន្លំ​ភ្នែក​ប្រជាពលរដ្ឋ​ដែល​ជា​ម្ចាស់​ឆ្នោត​ដែរ​។

ឆ្មា​តែងតែ​អះអាង​ថា​ខ្លួន​ជា​អ្នក​បង្កើត​វប្បធម៌​សន្ទានា​ហេតុ​អ្វី​ក៏​មិន​បន្ត​វប្បធម៌​សន្ទានា​ទៀត​ទៅ​ដើម្បី​ស្វែងរក​ដំណោះស្រាយ​ជូន​ជាតិ​នោះ? ជា​ជាង​នៅ​តែ​ចាំ​មើល​បំណាំ​គ្នា​រក​តែ​វិធី​ដាក់​អន្ទាក់​គ្នា​ចាក់​គូទ​គ្នា​ទៅវិញ​ទៅមក​ដូច​ល្បែង​រឿង​តុក្កតា​ឆ្មា និង​កណ្តុរ ចេញ-ចូលៗ​ដដែល​នោះ? មើលៗ​ប្រទេស​ជិត​ខាង​វិញ​ផង​គេ​ដើរ​ដល់​ណា​ហើយ​តើ​ទាំង​ឆ្មា​ទាំង​កណ្តុរ​មាន​ផែនការ​កំណត់​ទុក​កេរ​ដំណែល​ឲ្យ​កូន​ខ្មែរ​ជំនាន់​ក្រោយ​អ្វី​ខ្លះ​ហើយ​ឬ​នៅ? ឬ​ក៏​មិន​ខ្វល់​ទេ​គ្រាន់​តែ​ចេះ​តែ​ដឹកនាំ​ប្រទេស​ជាតិ​ឲ្យ​តែ​បានៗ​ទៅ​រួច​គ្នា​ហើយ?

ចូលរួម​ផ្តល់​យោបល់​តាមរយៈ soprach.tong@phnompenhpost.com

អត្ថបទគួរចាប់អារម្មណ៍