The Phnom Penh Post Search

Search form




Logo of Phnom Penh Post newspaper Phnom Penh Post - ដូចម្ដេច​ដែល​ហៅ​ថា​និស្សិត? ធ្វើ​អ្វី​ខ្លះ​ក្នុង​សង្គម? អាច​គ្រោះថ្នាក់​អ្វី​ខ្លះ?




ដូចម្ដេច​ដែល​ហៅ​ថា​និស្សិត? ធ្វើ​អ្វី​ខ្លះ​ក្នុង​សង្គម? អាច​គ្រោះថ្នាក់​អ្វី​ខ្លះ?

ក្រុម​និស្សិត​ដែល​ដឹកនាំ​ដោយ​លោក ស្រី ចំរើន ក្នុង​ពេល​ស្ដាប់​លទ្ធផល​នៅ​អង្គភាព​ប្រឆាំង​អំពើ​ពុករលួយ​កន្លង​មក។
ក្រុម​និស្សិត​ដែល​ដឹកនាំ​ដោយ​លោក ស្រី ចំរើន ក្នុង​ពេល​ស្ដាប់​លទ្ធផល​នៅ​អង្គភាព​ប្រឆាំង​អំពើ​ពុករលួយ​កន្លង​មក។ រូបថត ហ្វេសប៊ុក

ដូចម្ដេច​ដែល​ហៅ​ថា​និស្សិត? ធ្វើ​អ្វី​ខ្លះ​ក្នុង​សង្គម? អាច​គ្រោះថ្នាក់​អ្វី​ខ្លះ?

បើ​តាម​អត្ថន័យ​ទូទៅ​គឺ​និស្សិត​មាន​ន័យ​ថា​អ្នក​ដែល​រៀន​នៅ​សាកល​វិទ្យាល័យ ឬ​ក៏​ផ្នែក​ណា​មួយ​នៅ​ក្នុង​កម្រិត​ឧត្តម​សិក្សា​។

ក្រៅពី​ការ​សិក្សា​ពួកគេ​ក៏​អាច​ចូលរួម​ក្នុង​ការ​អភិវឌ្ឍ​សង្គម​ផង​ដែរ​តាមរយៈ​ការងារ​ស្ម័គ្រ​ចិត្ត​ធ្វើការ​ដោយ​មិន​យក​កម្រៃ ស្ម័គ្រ​ចិត្ត​អភិវឌ្ឍ​សហគមន៍ ស្ម័គ្រ​ចិត្ត​ចូលរួម​យុទ្ធនាការ​ផ្សេងៗ​ដូចជា​យុទ្ធនាការ​ ១៦ ​ថ្ងៃ​បំពាក់​បូ ស​ដើម្បី​លុប​បំបាត់​អំពើ​ហិង្សា​ប្រឆាំង​នឹង​ស្ត្រី និង​ទិវា​ប្រយុទ្ធ​ប្រឆាំង​នឹង​ជំងឺ​អេដស៍​ជា​ដើម​។

ក្រៅពី​នោះ​និស្សិត​ក៏​មាន​សិទ្ធិ​តវ៉ា​ដូច​ប្រជាពលរដ្ឋ​ធម្មតា​មាន​លក្ខណៈ​សមហេតុ​សមផល​ផង​ដែរ​ដូចជា​ការ​ដាក់​ញត្តិ ការ​តវ៉ា បាតុកម្ម និង​កូដកម្ម​ជាដើម​តែ​ប្រទេស​ខ្លះ​គឺ​មាន​ការ​រៀបចំ​ដោយ​រឹត​បន្ដឹង​បិទ​សិទ្ធិ​និស្សិត​តាមរយៈ​បែងចែក​សាកលវិទ្យាល័យ​ឲ្យ​នៅ​ឆ្ងាយៗ​ពី​គ្នា​ដើម្បី​កុំ​ឲ្យ​ឧស្សាហ៍​ជួប​គ្នា​ធ្វើ​បាតុកម្ម​ដូច​នៅ​ប្រទេស​ម៉ាឡេស៊ី​ដែល​មាន​លក្ខណៈ​ខុស​ប្លែក​ពី​ប្រទេស​កូរ៉េ​ខាង​ត្បូង​មាន​សាកលវិទ្យាល័យ​នៅ​ក្បែរៗ​គ្នា​ងាក​បាតុកម្មៗ​។

តែ​បើ​ស្រុក​ខ្មែរ​វិញ​គឺ​និស្សិត​ត្រូវ​តែ​សុំ​ច្បាប់​ធ្វើ​បាតុកម្ម​តែ​បើ​បាតុកម្ម​មាន​លក្ខណៈ​ប្រឆាំង​នឹង​រដ្ឋាភិបាល ឬ​ក៏​មេដឹកនាំ​គឺ​សមត្ថកិច្ច​បង្ក្រាប​យ៉ាង​ចាស់​ដៃ​ហើយ​គ្រាន់​តែ​និស្សិត គង់ រ៉ៃយ៉ា ថា​ធ្វើ​បដិវត្តន៍​ពណ៌​សោះ​ក៏​ជាប់​គុក​ ១៨ ​ខែ​លេង​ដែរ​តែ​ផ្ទុយ​ទៅ​វិញ​រដ្ឋាភិបាល​បើក​ដៃ​ឲ្យ​និស្សិត​មួយ​ក្រុម​ផ្សេង​ធ្វើ​ញត្តិ​បាតុកម្ម​តវ៉ា​យ៉ាង​សេរី​ទៅ​កូរ​គណបក្ស​នយោបាយ​ណា​ដែល​ប្រឆាំង​នឹង​រដ្ឋាភិបាល​ទៅ​វិញ​។

ឧទាហរណ៍​ប៉ុន្មាន​ថ្ងៃ​ចុង​ក្រោយ​នេះ​ឃើញ​មាន​សកម្មភាព​របស់​ក្រុម​យុវជន​មាន​គ្នា​ជាង​ ២០ ​នាក់​ដែល​តាំង​ខ្លួន​ជា​និស្សិត​ (​មិន​ដឹង​មកពី​សាកលវិទ្យាល័យ​ណា​ទេ​តែ​ត្រូវ​បាន​អ្នក​ខ្លះ​ឲ្យ​ឈ្មោះ​ថា​និស្សិត​ជំនាញ​ខាង​សិច​សាស្ត្រ​) និង​តំណាង​និស្សិត និង​យុវជន​ដោយ​យក​សំឡេង​ដែល​ត្រូវ​បាន​គេ​ហ៊ែក​ (Hack) ​ចូល​ និង​បញ្ចេញ​ពី​ហ្វេសប៊ុក​របស់ កញ្ញា ខុម ចាន់តារាទី ហៅ​ស្រី​មុំ បាន​សាសង​គ្នា​ជាមួយ​លោក កឹម សុខា ប្រធាន​ស្តីទី​គណបក្ស​សង្គ្រោះ​ជាតិ (CNRP) ហើយ​សារព័ត៌មាន​ចុះ​ផ្សាយ​បន្ត​ជា​សេរី។

នាង​ស្រី​មុំ​បាន​អះអាង​តាម​សារព័ត៌មាន និង​មន្ត្រី​សិទ្ធិ​មនុស្ស​ថា​គាត់​មិន​ដឹង​អី​ផង​ហើយ​បើ​តាម​ម្ចាស់​ហាង​កាត់​សក់​របស់​កញ្ញា​ស្រីមុំ​វិញ​ក៏​បាន​ប្រាប់​វិទ្យុ​អាស៊ី​សេរី​ថា​គាត់​ក៏​មាន​ការ​ងឿង​ឆ្ងល់​ដែរ​ថា​នៅ​គណនី​ហ្វេសប៊ុក​ស្រីមុំ​សរសេរ​រៀបចំ​អក្សរ​បាន​ល្អ​ម្ល៉េះ​ខុស​ពី​សព្វ​ដង​ដែល​ស្រីមុំ​ថា​មិន​ដឹង​របៀប​ប្រើ​ហ្វេសប៊ុក​ស្រួល​បួល​ផង​ហើយ​តែង​តែ​សួរ​អ្នក​ធ្វើការ​ជាមួយ​គ្នា​ពេល​គាត់​វាយ​អក្សរ​ខ្មែរ​ម្តងៗ​នោះ​។

ទន្ទឹម​នឹង​នេះ​ក៏​មាន​ក្រុម​និស្សិត​អត់​ស្គាល់​ឈ្មោះ​សាលា​បាន​ចាប់ផ្តើម​ដើរ​ដាក់​ញត្តិ​ឲ្យ​លោក កឹម សុខា បកស្រាយ​នូវ​ខ្សែអាត់​នោះ​តាំង​ពី​ស្នាក់ការ​គណបក្ស​ទៅ​ដល់​ខេត្ត​ដែល​លោក កឹម សុខា ចុះ​ពង្រឹង​បក្ស និង​មហាសន្និបាត​បក្ស​ពី​ក្បាល​មេក្រូ​កាន់​ដៃ​រហូត​ដល់​មាន​មេក្រូ​ផ្កា​ត្រកួន​ស្រែក​បង្ក​ការ​រំខាន​រហូត​ដោយ​រាប់​តាំង​ពី​ការ​នាំ​គ្នា​ជិះ​ម៉ូតូ​ឌុប​គ្នា​ហ្វូង​ហ្វាយ​រហូត​ដល់​ជិះ​ Lexus 470​ទៀត។

មិន​ត្រឹម​តែ​ប៉ុណ្ណោះ​ថែម​ទាំង​យក​ញត្តិ​ទៅ​ដាក់​នៅ​រដ្ឋសភា និង​ប្តឹង​​ទៅ​អង្គភាព​ប្រឆាំង​អំពើ​ពុករលួយ​រហូត​ដល់​អង្គភាព​នេះ​បើក​ស្រោម​សំបុត្រ​ធ្វើការ​ស៊ើប​អង្កេត​ករណី​ពុករលួយ​របស់​លោក កឹម សុខា ទៅ​តាម​ខ្សែ​អាត់​ដែល​បាន​បែក​ធ្លាយ​ក្នុង​ហ្វេសប៊ុក​នោះ​ខណៈ​ដែល​ប្រធាន​សភាជាតិ​ក៏​កោះ​អញ្ជើញ​លោក កឹម សុខា មក​បំភ្លឺ​ដែរ​ស្រប​គ្នា​នឹង​ប៉ូលិស​ក៏​បាន​អញ្ជើញ​កញ្ញា ស្រី មុំ មក​សួរ​នៅ​ក្រសួង​មហាផ្ទៃ​ផង​នោះ។

ករណី​សកម្មភាព​ដែល​និស្សិត​ធ្វើ​នេះ​ទំនង​ជា​មិន​មាន​ការ​គិត​ដោយ​សមហេតុ​សមផល​នោះ​ទេ​ដែល​មើល​ទៅ​ហាក់​បី​ដូច​ក្រុម​និស្សិត​អត់​ឈ្មោះ​សាលា​នោះ​ត្រូវ​បាន​អ្នក​នយោបាយ​កេង​ប្រវ័ញ្ច​ឲ្យ​សម្តែង​ជំនួស​អ៊ីចឹង​ដូចជា​៖

ទី​ ១-និស្សិត​ខ្លួនឯង​តាំង​ខ្លួន​តំណាង​ឲ្យ​និស្សិត​តែ​មិន​ប្រាប់​ឈ្មោះ​មកពី​សាកលវិទ្យាល័យ​ណា​ខ្លះ​? ទៅ​ខ្លាច​អី​បើ​ហ៊ាន​ធ្វើ​ប៉ុណ្ណឹង​ហើយ​គ្រាន់​តែ​ប្រាប់​ឈ្មោះ​សាលា​នោះ?

ទី​ ២-មាន​សមាគម​សាលកវិទ្យាល័យ​ណា​ខ្លះ​គាំទ្រ​ពួកគាត់​ឲ្យ​ធ្វើ​ជា​តំណាង​នោះ​?

ទី​ ៣- ក្រុម​របស់​ខ្លួន​បាន​មូល​និធិ​ពី​ណា​ធ្វើ​តាំងពី​ជិះ​ម៉ូតូ​មក​ជិះ​ឡាន ​Lexus 470 មាន​អង្គរក្ស​ទៀត​?

ទី​ ៤- ដំបូង​គ្រាន់តែ​ដាក់​ញត្តិ​ទេ​យូរៗ​ទៅ​ចេញ​ជា​ប្តឹង​ហើយ​ចេញ​ពី​ប្តឹង​ក៏​ឈាន​ទៅ​ចោទប្រកាន់​ដោយ​ចេតនា​ទៅ​អុកឡុក​វេទិកា​សាធារណៈ​ដោយ​គ្រាន់​តែ​យក​ខ្សែ​អាត់​ដែល​មិន​ដឹង​ប្រភព​មក​នោះ​។ និស្សិត​មិន​នាំ​គ្នា​ទៅ​រៀនសូត្រ​យក​ចំណេះដឹង​ទេ​គឺ​ខំប្រឹង​កូរ​គេ​រហូត​ដល់​សមត្ថកិច្ច​ទ្រាំ​លែង​បាន​ដេញ​ចេញ​ឲ្យ​ឆ្ងាយ​ពី​ទី​កន្លែង​សន្និបាត​កាលពី​ចុងសប្តាហ៍​មុន​នេះ​។

ទី​ ៥-ការ​អះអាង​ថា​ខុស​សីលធម៌ ប្រពៃណី​ខ្មែរ​ក្នុង​នាម​ជា​អ្នក​ដឹកនាំ​បក្ស​នោះ​គឺ​ធ្វើ​ឡើង​តែ​គណបក្ស​ប្រឆាំង​មួយ​ចំហៀង​ហេតុ​អ្វី​បាន​ជា​មិន​ធ្វើការ​បើក​កកាយ​ដូច​គ្នា​ទៅ​នឹង​គណបក្ស​កាន់​អំណាច​ដែល​ដឹង​តាំង​ពី​ឈ្មោះ​អ្នក​ប្រព្រឹត្ត​ជា​មន្ត្រី​ជាន់​ខ្ពស់​រដ្ឋាភិបាល​ដឹង​តាំងពី​​ស្ត្រី​ដែល​ជា​ជនរងគ្រោះ​ទៀត​នោះ​?

ទី​ ៦- នៅពេល​ដែល​អ្នក​និពន្ធ​សាច់​រឿង​ត្រូវ​ប្រញាប់ៗ​ដើម្បី​ឲ្យ​អ្នក​សម្តែង​កុំ​ឲ្យ​បញ្ឈប់​សកម្មភាព​នោះ​គឺ​ធ្វើ​ឲ្យ​ក្រុម​និស្សិត​ធ្វើការ​កូរ​នៅ​កន្លែង​សន្និបាត​បក្ស​សង្គ្រោះ​ជាតិ​ផង​ទៅ​ប្តឹង​នៅ​រដ្ឋសភា​ផង​ដោយ​ចោទ​លោក កឹម សុខា ជំនួស​កញ្ញា ស្រី មុំ ថា​ឲ្យ​សម្លាប់​គភ៌​ក្នុង​ផ្ទៃ​ដោយសារ​គាត់​បង្ខំ​ដៃគូ​របស់​ខ្លួន​កញ្ញា​ ស្រី មុំ​ឲ្យ​រម្លូត​កូន​ចេញ​គឺ​ខុស​ច្បាប់​ស្តីពី​រម្លូត​ឥឡូវ​ពួកគេ​ឈឺ​បណ្តើរៗ​មកពី​អ្នក​ដឹកនាំ​រឿង​បង្ខំ​ការងារ​ប្រញឹក​ខ្លាំង​ពេក​ឬ?

ទី​ ៧- តិច​ស្រួល​មិន​ស្រួល​អ្នក​និពន្ធ​ឲ្យ​ក្រុម​និស្សិត​ទៅ​ប្តឹង​តុលាការ​ជំនួស​ភរិយា​លោក កឹម សុខា ដោយ​យក​ច្បាប់​ឯកព័ន្ធភាព​ទៀត​គ្រប់​តែ​ម្តង​។

ទី​ ៨- ឥឡូវ​នេះ​អ្នក​និពន្ធ​កំពុង​តែ​រក​នឹក​ច្រក​មើល​ថា​តើ​អាច​ចេញ​ជា​ការ​ធ្វើ​តេស្ត​ DNA ទឹកកាម​របស់​លោក កឹម សុខា ​ដែល​អាច​នៅ​ជាប់​នឹង​កន្សែង ឬ​ក៏​រ៉ូប​ដេក​យប់​របស់​កញ្ញា ស្រី មុំ បាន​ឬ​អត់​ដើម្បី​យក​មក​ឲ្យ​វិទ្យាស្ថាន ​ប៉ាស្ទ័រ​ ធ្វើការ​វិភាគ​ពិត ឬ​មិន​ពិត​? តែ​អ្វី​ដែល​គួរ​ឲ្យ​ឆ្ងល់​នោះ​គឺ​ហេតុ​អ្វី​បាន​ជា​និស្សិត​មិន​ទៅ​ប្តឹង​ប៉ូលិស​ឲ្យ​ស៊ើប​អង្កេត​រក​អ្នក​បញ្ចេញ​សំឡេង​របស់​គេ​មក​បង្ហោះ​ក្នុង​ហ្វេសប៊ុក​សិន​? ឲ្យ​ដឹង​សខ្មៅ​តែ​អ្នក​ដឹកនាំ​រឿង​មិន​ហ៊ាន​ឲ្យ​ក្រុម​និស្សិត​ធ្វើ​ដូច្នេះ​ទេ​ ព្រោះ​បើ​រក​ទៅ​ឃើញ​វា​ខុស​នឹង​ល្បែង​គឺ​ខុស​ក្រម​ព្រហ្មទណ្ឌ​ត្រង់​មាត្រា ៣១៨ បទ​ប៉ះពាល់​ដល់​ការ​សម្ងាត់​នៃ​ការ​សន្ទនា​តាម​ទូរស័ព្ទ​។

គ្រូពេទ្យ​ព្យាបាល​លោក ចំរើន ដែល​មាន​បញ្ហា​សុខភាព។
គ្រូពេទ្យ​ព្យាបាល​លោក ចំរើន ដែល​មាន​បញ្ហា​សុខភាព។ រូបថត ហ្វេសប៊ុក

តែ​សុំ​សរសើរ​ដោយ​ស្មោះ​និស្សិត​អត់​បង្ហាញ​សាលា​ផង​ចេះ​ដឹង​ច្បាប់​គ្រប់​សព្វ​ឲ្យ​តែ​សំឡេង​បញ្ចេញ​មក​គឺ​ដឹង​តែ​មាន​ច្បាប់​អី​មួយ​យក​មក​ប្តឹង​បាន​តែ​ម្តង​បើ​ឆ្លាត​អី​ឆ្លាត​ម្លឹងៗ​កុំ​ភ័យ​រឿង​អក្ខរកម្ម​ស្រុក​ខ្មែរ​នោះ​លែង​នៅ​បាត​តារាង​ក្នុង​តំបន់​អាស៊ាន​ដូច​មុន​ទៀត​ហើយ​។

ម្យ៉ាង​វិញ​ទៀត​​អង្គភាព​ប្រឆាំង​អំពើ​ពុករលួយ​ (ACU) ​គ្រាន់​តែ​យក​សំឡេង​ដែល​គេ​បញ្ចេញ​​មក​វិភាគ​ហើយ​សន្មត​ និង​សម្រេច​ថា​ ជា​សំឡេង​លោក កឹម សុខា ហើយ​បើក​ស្រោម​សំបុត្រ​ពិនិត្យ​ទ្រព្យ​សម្បត្តិ​ភ្លាម និង​ចាប់​ផ្តើម​ដំណើរការ​ស៊ើប​អង្កេត​សំណុំ​រឿង​​ពុករលួយ​ដោយសារ​មាន​សំឡេង​ទិញ​ផ្ទះ​ឲ្យ​ស្រី​ស្នេហ៍។

ការ​ដែល​ថ្នាក់​ដឹកនាំ​មាន​ស្រី​ស្នេហ៍​ត្រូវរ៉ូវ​គ្នា​ក្រៅ​ពី​ប្រពន្ធ​ហើយ​ប្រពន្ធ​មិន​ទៅ​ប្តឹង​ គឺ​គ្មាន​អ្វី​ខុស​ច្បាប់​ទេ ​តែ​គ្រាន់​តែ​អ្នក​នយោបាយ​ច្រើន​តែ​អុជអាល​គ្នា​ទៅវិញ​ទៅមក​ ដោយ​យក​ទម្លាប់​រស់​នៅ​បែប​អភិរក្ស​។

រឿង​អាស្រូវ​ផ្លូវ​ភេទ​នេះ​មិនមែន​កើត​មាន​តែ​អ្នក​នយោបាយ​នៅ​កម្ពុជា​នោះ​ទេ​ដែល​អ្នក​ដឹកនាំ​ត្រូវតែ​ប្រយ័ត្ន​ប្រយែង​នោះ​គឺ​នៅ​ប្រទេស​ផ្សេងៗ​ក៏​យក​មក​ធ្វើ​ដូចជា​រឿង​ធំ​ណាស់​ដែរ​ឧទាហរណ៍​ដូច​ករណី​រឿង​អាស្រូវ​ផ្លូវ​ភេទ​លោក ប៊ីល គ្លីនតុន អតីត​ប្រធាន​ធិបតី​សហរដ្ឋអាមេរិក និង​កញ្ញា​ ឡូវិនស្គី អ្នក​ហាត់ការ​នៅ​បណ្ណាល័យ​សេតវិមាន​។

បន្ទាប់ពី​ធ្វើ​ប្រជាមតិ​មក​គឺ​អ្នក​គាំទ្រ​លោក​ គ្លីនតុន មាន​ចំនួន​ភាគរយ​ច្រើន​ជាង​អ្នក​មិន​គាំទ្រ​អ៊ីចឹង​គាត់​នៅ​តែ​បន្ត​ដឹកនាំ​ដដែល​សម្រាប់​សង្គម​អាមេរិក​សម័យ​ថ្មី​គេ​និយាយ​ថា​៖ «I don’t care!» មាន​ន័យ​ថា​ខ្ញុំ​មិន​ខ្វល់​ទេ​រឿង​ធម្មជាតិ​បែប​អ៊ីចឹងៗ​។ តែ​ផ្ទុយ​ទៅ​វិញ​ក៏​មាន​មន្ត្រី​ជាន់​ខ្ពស់​នៅ​សហរដ្ឋ​អាមេរិក​ក៏​ត្រូវ​បាន​បង្ខំ​ឲ្យ​ចុះ​ចេញ​ពី​តំណែង​ដោយសារ​តែ​មាន​ស្នេហ៍​សហាយស្មន់​នេះ​ដែរ​ដូច​លោក David Petraeus មេប៉ូលិស​ស៊ើប​អង្កេត​ CIA បាន​លា​ឈប់​ពី​តំណែង​ដោយសារ​ពាក់ព័ន្ធ​សន្តិសុខ​ជាតិ​គឺ​អ៊ីមែល​កន្លែង​ធ្វើការ​សម្រាប់​ទាក់ទង​ជាមួយ​ស្រី​ស្នេហ៍​របស់​គាត់​ដែល​ជា​អ្នក​សរសេរ​ជីវប្រវត្តិ​របស់​គាត់​ផង​នោះ​។

ប៉ុន្តែ​សម្រាប់​ស្រុក​ខ្មែរ​វិញ​មាន​មន្ត្រី​ជាន់​ខ្ពស់​រាជរដ្ឋាភិបាល​ជាច្រើន​ដែល​ពាក់ព័ន្ធ​ជាមួយ​ស្រីស្នេហ៍​ក្រៅពី​ប្រពន្ធ​របស់​ខ្លួន​នោះ​មក​ទល់​ពេល​នេះ​រក​អ្នក​បាញ់​សម្លាប់​អតីត​តារា​ភាពយន្ត និង​អ្នក​ចម្រៀង​មិន​ទាន់​ឃើញ​ផង​ដូចជា​សព​អ្នកស្រី ពិសិដ្ឋ ពិលិកា ជនពិការ ទូច ស៊ុននិច ជនពិការ ពៅ បញ្ញាពេជ្រ ជនពិការ​ដោយសារ​ទឹក​អាស៊ីត តាត ម៉ារីណា ជា​ដើម​បើ​ទោះ​បី​ជា​គេ​ដឹង​ជា​ស្រី​ស្នេហ៍​របស់​មន្ត្រី​ណា​ក៏​ដោយ​។

ចំណុច​នេះ​​បើ​សាកល្បង​ប្រៀបធៀប​គ្នា​រវាង​គណបក្ស​ទាំង​ ២ ​គឺ CPP និង​ CNRP គឺ​មន្ត្រី​ជាន់​ខ្ពស់​ CPP ​មាន​រឿង​អាស្រូវ​ផ្លូវភេទ​ច្រើន​ជាង​ CNRP មាន​តាំង​ពី​ទិញ​ព្រហ្មចារី​ក៏​មាន​ដែរ​បើ​មិន​ជឿ​សួរ​ទៅ​ទណ្ឌិត​អតីត​តារាចម្រៀង អូ រស្មី ជាប់​រឿង​ជួញដូរ​ភេទ​អនីតិជន និង​ទណ្ឌិត ចែ មុំ មីកាហ្សា ជា​ម្ចាស់​ហាង​កែ​សម្ផស្ស​មីកាហ្សា​ទៅ​ដឹង​ហើយ​ថា​មន្ត្រី​រដ្ឋាភិបាល និង​អ្នក​ឧកញ៉ា​ណា​ខ្លះ​ដែល​ជា​អតិថិជន​របស់​គាត់​មុន​ចាប់​ខ្លួន​នោះ​?

ជាង​នេះ​ទៅ​ទៀត​តាមរយៈ​ការ​សិក្សា​ស្រាវជ្រាវ​របស់​អង្គការ PSI នៅ​ឆ្នាំ​ ២០០២ បាន​សិក្សា​អំពី​ទំនាក់​ទំនង​ស្នេហា​ផ្លូវភេទ និង​ការ​ប្រើប្រាស់​ស្រោម​អនាម័យ​ក្នុង​នោះ​ក៏​រក​ឃើញ​មាន​ទំនាក់​ទំនង​រវាង​ស្នេហា​តាតា និង​ស្រី​តាតា​ចិញ្ចឹម​ដែល​ជា​តារា​ស្រី​ចម្រៀង និង​តារា​ភាពយន្ត​ថា​តាតា​បាន​ឲ្យ​លុយ​ពួកគេ​ច្រើន​ក្រាស់ក្រែល និង​ទិញ​សម្ភារ​ទំនើបៗ​ដូចជា ឡាន វីឡា ឬ​ជួល​ខុនដូ​ឲ្យ​នៅ​ឲ្យ​ដើម្បី​រួមភេទ​មិន​ចាំបាច់​ប្រើ​ស្រោម​អនាម័យ និង​ការ​រួមភេទ​តាម​មាត់​។

ពាក្យ​ថា​ «​តាតា​» ក៏​ត្រូវ​បាន​អ្នក​ស្រាវជ្រាវ​ឲ្យ​និយមន័យ​ផង​ដែរ​ថា​គឺជា​បុរស​ដែល​មាន​វ័យ​ចំណាស់​មាន​ប្រពន្ធ​រួច​ហើយ ហើយ​មាន​ទ្រព្យសម្បត្តិ​ច្រើន​សល់​លុយ​ចិញ្ចឹម​ស្រី​ក្មេង​ដើម្បី​រួមភេទ (​ភាសា​សាមញ្ញ​គឺ​យោង​ទៅ​លើ​មន្ត្រី​ជាន់​ខ្ពស់​សមាជិក​សភា សមាជិក​ព្រឹទ្ធសភា ឬ​ក៏​ឧកញ៉ាៗ​មាន​សម្បត្តិ​ដែល​យក​លុយ​ទៅ​ចិញ្ចឹម​ស្រី​កាលីប​នោះ​)​។

នៅ​ពេល​ដែល​តាតា​ធ្លាប់​ចូលចិត្ត​ស្រី​ក្មេងៗ​នោះ​បាន​ស្លាប់​ម្តង ១ ​ៗ​ថា​ ស្លាប់​ដោយសារ​ជំងឺ​ថ្លើម មហារីក​ក្រពះ​សួត គ្រលៀន ឬ​ក៏​ឈាម​ស​ស៊ី​ឈាម​ក្រហម​ជាដើម​។ តាមពិត​ទៅ​មួយ​ចំនួន​នៃ​ពួកគាត់​គឺ​ស្លាប់​ដោយសារ​តែ​មេរោគ​អេដស៍ និង​ជំងឺ​អេដស៍​ទៅ​វិញ​ទេ​នៅពេល​ដែល​ភាព​ស៊ាំ​នៅ​ក្នុង​ខ្លួន​របស់​គាត់​ធ្លាក់​ចុះ​ហើយ​មេរោគ​អេដស៍​ចាប់​ផ្តើម​វាយប្រហារ​ក្នុង​ពេល​ដែល​ការ​ប្រើប្រាស់​ថ្នាំ​ពន្យារ​ជីវិត​ទប់​មិន​ជាប់​ក៏​ស្លាប់​ទៅ​ហើយ​ដើម្បី​កុំ​ឲ្យ​ខ្មាស​គេ​ក៏​ប្រឹង​លើក​ឡើង​ថា​ស្លាប់​មក​ពី​ជំងឺ​ផ្សេង​ទៅ​វិញ​ក៏​មាន​។

តាមពិត​ទៅ​រឿង​អាស្រូវ​ផ្លូវ​ភេទ​នេះ​ត្រូវ​បាន​លោក សម រង្ស៊ី ប្រធាន​គណបក្ស សម រង្ស៊ី ធ្លាប់​ធ្វើការ​វាយប្រហារ​ខ្លាំងៗ​មក​លើ​លោក​នាយក​រដ្ឋមន្ត្រី ហ៊ុន សែន និង​សព​អ្នកស្រី ពិសិដ្ឋ ពិលិកា ដើម្បី​ទាក់ទាញ​សន្លឹក​ឆ្នោត​កាល​ពី​ឆ្នាំ​ ២០០៨ ​ដែរ​តែ​ផ្ទុយ​ទៅ​វិញ​គណបក្ស​ប្រជាជន​បាន​កើន​សំឡេង​កាន់​តែ​ខ្លាំង​ដល់​ ៩០ ​កៅអី​ព្រោះ​ប្រជាពលរដ្ឋ​ខ្មែរ​គិតគូរ​រឿង​ក្រពះ​ច្រើន​ជាង​រឿង​អាស្រូវ​ផ្លូវភេទ​។

តែ​ឆ្នាំ​ ២០១៣ គណបក្ស​សង្គ្រោះ​ជាតិ​លែង​សម្រុក​លើ​ការ​វាយប្រហារ​រឿង​អាស្រូវ​ផ្លូវ​ភេទ​មក​លើ​លោក ហ៊ុន សែន តែ​បែរ​ជា​បក្ស​ CPP ធ្វើការ​វាយប្រហារ​មក​លើ​លោក កឹម សុខា ជាមួយ​ស្ត្រី​ម្នាក់​ពី​ព្រៃវែង​តាំង​ខ្លួន​ថា​ជា​ស្រីស្នេហ៍​លោក កឹម សុខា ដែល​បញ្ហា​នេះ​ទៅ​ជា​ប្រជាពលរដ្ឋ​កាន់​តែ​ស្គាល់​លោក កឹម សុខា ​ហើយ​អាណិត​ទៅវិញ​ធ្វើឲ្យ​ CNRP ទាញ​សន្លឹក​ឆ្នោត​ពី​ CPP បាន​ ២២ ​កៅអី​មក​វិញ​។

បទពិសោធ​បរាជ័យ​រឿង​អាស្រូវ​ផ្លូវ​ភេទ​ដដែល​នេះ​ត្រូវ​បាន​យក​មក​វាយប្រហារ​ទៅ​លើ​លោក កឹម សុខា ជា​លើក​ទី​ ២ ជាមួយ​នឹង​កញ្ញា ស្រីមុំ ហើយ​មាន​ក្រុម​យុវជន​តាំង​ខ្លួន​ជា​និស្សិត​មក​តាម​កូរ​លោក កឹម សុខា ដោយ​មិន​សមហេតុ​ផល​បែប​ហ្នឹង​ថា​តើ​អាច​ធ្វើ​ឲ្យ​ប្រជាប្រិយភាព​លោក កឹម សុខា កើន​ឡើង​ និង​អាច​ទាញ​កៅអី​ឲ្យ​ CNPR បន្ថែម​ពី​លើ​ ២២ ​កៅអី​នេះ​ទៀត​ទេ​នៅ​ឆ្នាំ​ ២០១៨​ ខាង​មុខ​នេះ​? បើ​គ្រប់​សារព័ត៌មាន​និយាយ​តែ​ពី​រឿង​នេះ​អាច​ធ្វើ​ឲ្យ​គេ​កាន់​តែ​ស្គាល់​គាត់​បន្ថែម​ទៀត​ដែរ​ឬ​ទេ​បើ​សារ​ជា​សំឡេង​នោះ​មិន​មាន​ប្រភព​ច្បាស់​លាស់ និង​មិន​មាន​លក្ខណៈ​ស្រប​ច្បាប់​ផង​នោះ​?

បញ្ហា​និស្សិតៗ​នេះ​តាំង​ពី​ខ្ញុំ​នៅ​ជា​និស្សិត​ក៏​ឃើញ​មាន​ការ​បែងចែក​គ្នា​ទៅ​តាម​គណបក្ស​ដែល​ខ្លួន​ពេញ​ចិត្ត​ដែរ​តែ​ពេល​ខ្លះ​មិន​ត្រឹម​ប៉ុណ្ណឹង​ទេ​គឺ​និស្សិត​គ្នា​ឯង​បាន​អ្នក​នយោបាយ​បញ្ជោរ​ លិច-កើត​ ទៅ​គឺ​ចាប់​ផ្តើម​លាប​ពណ៌​ឲ្យ​គ្នា​ហើយ​គេ​រាយការណ៍​ពី​និស្សិត​រៀន​ជាមួយ​គ្នា​ទៅ​ឲ្យ​មេ​គេ​រៀងៗ​ខ្លួន​មើល​ទៅ​ហាក់​បី​ដូចជា​យក​ឈ្មោះ​មិត្ត​រួម​ថ្នាក់​ខ្លួន​ឯង​ហ្នឹង​ធ្វើ​អាជីវកម្ម​នយោបាយ​អ៊ីចឹង​ព្រោះ​ពួកគេ​សង្ឃឹម​ថា​ចេញ​ពី​សាកលវិទ្យាល័យ​ទៅ​គេ​នឹង​បាន​តំណែង​ណា​មួយ​ក្នុង​ស្ថាប័ន​រដ្ឋាភិបាល​ប្រសិន​បើ​បក្ស​គេ​ជាប់​ឆ្នោត​។

ការ​បែងចែក និង​ការ​លាប​ពណ៌​ឲ្យ​គ្នា​ក្នុង​ចំណោម​និស្សិត​គ្នា​ឯង​អាច​ធ្វើ​មាន​ការ​ស្អប់​គ្នា​គុំ​គ្នា​តាំង​ពី​នៅ​រៀន​ហើយ​នៅ​ពេល​ដែល​គេ​ឡើង​ធំ​គេ​នឹង​សងសឹក​គ្នា​ដោយ​យក​គំនុំ​អតីតកាល​មក​ទូទាត់​ដែល​បញ្ហា​នេះ​អាច​ធ្វើ​ឲ្យ​មាន​គ្រោះថ្នាក់​ដល់​សង្គម​ជាតិ​ទាំង​មូល​ហើយ​ក៏​អាច​ឈាន​ដល់​ការ​សម្លាប់​រង្គាល​។ ដូច​កាលពី​ជំនាន់​មុន​របប​ខ្មែរ​ក្រហម​គឺ​និស្សិត​ដែល​ទទួល​បាន​អាហារូបករណ៍​ទៅ​រៀន​នៅ​ប្រទេស​បារាំង​គឺ​ទៅ​ដល់​ទី​នោះ​ចុះ​ពី​លើ​យន្តហោះ​មិន​ទាន់​ទេ​គឺ​ត្រូវ​បាន​គេ​មក​បញ្ចុះ​បញ្ចូល​ភ្លាម​ថា​ឯង​យក​ពណ៌​ខៀវ (​គាំទ្រ​លោក​ខាង​លិច) ឬ​ពណ៌​ក្រហម (​គាំទ្រ​ខ្មែរ​កុម្មុយនីស្ដ)។

មាន​អតីត​និស្សិត​ខ្លះ​បាន​គេច​ចេញ​ពី​ពណ៌​ទាំង​ ២ ​ហ្នឹង​បាន​ក៏​និយាយ​ប្រាប់​ខ្ញុំ​ដែល​ជា​ក្មេង​ជំនាន់​ក្រោយ​ឲ្យ​បាន​ដឹង​ពី​ចរិត​របស់​និស្សិត​នៅ​ក្រៅ​ប្រទេស​ផង​ដែរ​។ នៅ​ពេល​និស្សិត​ខ្មែរ​និយម​ខ្មែរ​ក្រហម​ដែល​មាន ប៉ុល ពត អៀង សារី និង​បណ្ឌិត ខៀវ សំផន ជា​បង​ធំ​បាន​ចង​ក្រង​និស្សិត បញ្ញវន្ត​ដែល​មកពី​សាលកវិទ្យាល័យ​ល្បីៗ​ទៀត​នៅពេល​ដែល​គេ​មាន​កំហឹង​ចង​ក្នុង​ចិត្ត​ដោយសារ​ឃើញ​ភាព​អយុត្តិធម៌​ពី​មុន​មក​ហើយ​នៅ​ពេល​ដែល​គេ​បាន​កាន់​អំណាច​របប​ ៣ ​ឆ្នាំ​ ៨ ​ខែ​ ២០ ​ថ្ងៃ​ក៏​សម្លាប់​ខ្មែរ​គ្នា​ឯង​សរុប​ជិត​ ២ ​លាន​នាក់​ហើយ​សង្គ្រាម​បាន​បន្ត​បន្ថែម​ ២ ​ទសវត្សរ៍​ធ្វើ​ខ្មែរ​កាន់​តែ​ស្លាប់ និង​រង​ទុក្ខ​កាន់តែ​ធំ​ទៅៗ​ដោយសារ​ការ​ប្រយុទ្ធ​គ្នា​ឯង​រហូត​ភ្លេច​ពី​របៀប​កសាង​ប្រទេស និង​ស្តារ​នីតិសម្បទា​ឡើង​វិញ​ចង់​យ៉ាប់​។ ហ្នឹង​និស្សិត​មាន​សាលា​ផង​ប៉ុណ្ណឹង​ទៅ​ហើយ​ចុះ​ទម្រាំ​និស្សិត​អត់​សាលា​? ប្រសិន​បើ​ម្នាក់ៗ​គិត​ថា​វា​មិន​អី​ទេៗ​នៅពេល​ដែល​មាន​អី​កើត​ឡើង​ភ្លាម​បាន​ធ្វើ​ភ្នែក​សព្រាត​ដាក់​គ្នា​។

ចុង​ក្រោយ​អ្នក​នយោបាយ​ខ្មែរ​សម័យ​ណា​ក៏​ដូច​សម័យ​ណា​ដែរ​ចូលចិត្ត​តែ​កេងប្រវ័ញ្ច​ពី​និស្សិត និង​យុវជន​ណាស់​តែ​ដល់​ពេល​មាន​ការ​យក​តែ​រួច​ខ្លួន​រៀងៗ​ខ្លួន​គឺ​បាន​ត្រឹម​ទម្លាក់​កំហុស​ដាក់​គ្នា​តែ​ប៉ុណ្ណោះ​ហើយ​បាន​ត្រឹម​តែ​អួតអាង​ប្រៀប​ដូច​កង្កែប​ក្នុង​អណ្តូង​អ៊ីចឹង​។

សរុប​មក​វិញ​ក្នុង​នាម​ជា​និស្សិត​គឺ​ខំប្រឹង​រៀន​ក្រេប​យក​ចំណេះ​វិជ្ជា និង​ចូលរួម​សកម្មភាព​អភិវឌ្ឍន៍​សង្គម​ឲ្យ​ស្រប​ទៅ​នឹង​គោល​នយោបាយ​ជាតិ​អភិវឌ្ឍន៍​យុវជន​ជា​ជាង​ដើរ​កកូរកកាយ​រឿង​ផ្ទាល់​ខ្លួន​របស់​គេ​មិន​សម​ហេតុផល​ចំណាយ​ពេល​អត់​ប្រយោជន៍​ហើយ​ធ្វើ​យ៉ាង​ណា​ដើម្បី​បញ្ចៀស​ឲ្យ​នូវ​អំពើ​ហិង្សា​ដែល​អាច​ឈាន​ការ​សម្លាប់​រង្គាល (R2P)៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

អត្ថបទគួរចាប់អារម្មណ៍