.jpg)
សកម្មភាពដុតបំផ្លាញគ្រឿងញៀនរបស់សមត្ថកិច្ច កាលពីឆ្នាំមុន។ ហុង មិនា
ក្នុង ១ ថ្ងៃៗបើមើលសារព័ត៌មាន ឬបណ្តាញសង្គមហ្វេសប៊ុក ភាគច្រើនឃើញសមត្ថកិច្ចឃាត់ខ្លួនជនល្មើសពាក់ព័ន្ធនឹងបទជួញដូរ និងប្រើប្រាស់គ្រឿងញៀនជាហូរហែមិនថា ខ្មែរ ឬបរទេស មិនថាចាស់ ឬក្មេងទេ ហើយបើផ្អែកតាមរយៈរបាយការណ៍របស់មន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិក្រសួងមហាផ្ទៃវិញ បានឲ្យដឹងថា នៅឆ្នាំ ២០១៩ សមត្ថកិច្ចបង្ក្រាបករណីជួញដូរ និងការប្រើប្រាស់គ្រឿងញៀនបានជិត ១ ម៉ឺនករណី និងរឹបអូសថ្នាំញៀនបានជិត ១ តោន ដែលតួលេខនេះ តិច ឬច្រើន វាបានបង្ហាញពីសញ្ញានៃការប៉ះពាល់ដល់សង្គមរួចទៅហើយ។
ប៉ុន្តែអ្វីដែលជាការព្រួយបារម្ភខ្លាំងនោះ គឺអ្នកបន្តវេនដែលជាយុវវ័យតែម្តង ព្រោះថាសកម្មភាពនាំគ្នាជក់ ហិត ចាក់គ្រឿងញៀនបែបនេះ វាមិនមែនមានតែនៅតាមសហគមន៍ ឬក៏សិស្សសាលាទេ ប៉ុន្តែនៅស្ទើរគ្រប់ភូមិ-ឃុំ កន្លុកកន្លៀត ចុងកាត់មាត់ញកណាក៏មានដែរ។
រឹតតែស្មានមិនដល់ទៀតនោះ គឺយូរៗម្តង គេក៏ឃើញមានការលេចឮពីករណីមន្ត្រីប៉ូលិសប្រឆាំងគ្រឿងញៀនសេពគ្រឿងញៀនរបៀបគីង្គក់លក់ថ្នាំស្រែងទៀតផង។ រីឯសមត្ថកិច្ចកងរាជអាវុធហត្ថក៏ដូចគ្នាដែរ ឲ្យតែញៀន ឬក៏មានគ្រឿងស្រវឹងចូលខ្លួនហើយ មានខ្លះហ៊ានប្រើកាំភ្លើងបាញ់បោះសេរីដោយបង្ហាញកាយវិការលែងខ្លាចអ្វីៗទាំងអស់។
ដូចករណីនៅសង្កាត់បឹងសាឡាងមានមន្ត្រីប៉ូលិសប្រឆាំងគ្រឿងញៀន បែរជាខ្លួនឯងប្រើប្រាស់គ្រឿងញៀន ហើយពេលបែកថ្នាំក៏ដកកាំភ្លើងខ្លីបញ្ជាបក្ខពួកឲ្យប្លន់ពលរដ្ឋនៅខណ្ឌពោធិ៍សែនជ័យ រាជធានីភ្នំពេញកាលពីដើមខែនេះ តែត្រូវសមត្ថកិច្ចប្រចាំការនៅទីនោះចាប់ខ្លួនកសាងសំណុំរឿងបញ្ជូនទៅតុលាការ។ រីឯកាលពីខែធ្នូ ឆ្នាំ ២០១៩ កន្លងទៅមានករណីមន្ត្រីប៉ូលិសប៉ុស្តិ៍សង្កាត់បឹងសាឡាងដែលញៀនថ្នាំពេញបន្ទុក គ្រាន់តែខឹងអ្នកជិតខាងក៏ទាញកាំភ្លើង AK របស់អង្គភាពបាញ់ពលរដ្ឋភាគីម្ខាងទៀតដែលមានតែដៃទទេត្រូវរបួសធ្ងន់ តែក៏ត្រូវបានសមត្ថកិច្ចខណ្ឌចាប់ខ្លួនយកទៅកសាងសំណុំរឿងទាំងនៅកំពុងញៀនថ្នាំដោយមិនដឹងខ្លួនផងដែរ។
ចំណែកករណីមួយទៀតគឺការញៀននឹងគ្រឿងស្រវឹងរបស់អធិការរងក្រុងបាវិតវ័យក្មេងម្នាក់ដែលផឹកស្រវឹងវង្វេងវង្វាន់ហើយគ្រាន់តែឃ្នើសចិត្តនឹងស្ត្រីម្ចាស់ហាងតែបន្តិច ក៏ដកកាំភ្លើងបាញ់សម្លាប់ផងដែរនាពេលថ្មីៗនេះ។
តាមការពិតទៅអាវុធជាតិផ្ទុះ និងសម្លៀកបំពាក់តាមច្បាប់ឯកសណ្ឋានសមត្ថកិច្ចគឺគេមិនអនុញ្ញាតឲ្យចូលទៅក្នុងភោជនីយដ្ឋានផឹកស៊ីទេ ព្រោះងាយនឹងប៉ះទង្គិចពាក្យសម្តីគ្នាក្លាយទៅជារឿងរ៉ាវ និងបាញ់បោះសេរីណាស់។
បញ្ហាពុតគ្រូកុំត្រាប់ច្បាប់គ្រូសឹមយក ដូចករណីសមត្ថកិច្ចសេពគ្រឿងញៀនខ្លះបែកថ្នាំស្រែកឡូឡាពេញភូមិ ឬក៏អុកឡុកតាមហាងបែបនេះគឺធ្វើឲ្យខូចកេរ្តិ៍ឈ្មោះដល់ស្ថាប័នរបស់ខ្លួនមិនថា ប៉ូលិស ឬក៏ប៉េអឹមនោះទេ។ ករណីបែបនេះបើនៅប្រទេសថៃ គឺរដ្ឋគេឲ្យមន្ត្រីសមត្ថកិច្ចហាត់ប្រាណសម្រកទម្ងន់ សម្រកខ្លាញ់ក្បាលពោះ ពិនិត្យសុខភាព និងធ្វើតេស្តរកសារធាតុញៀនក្នុងគោលបំណងចង់ឲ្យមន្ត្រីទាំងនេះមានការអនុវត្តច្បាប់កាន់តែមានប្រសិទ្ធភាព និងធ្វើជាគំរូល្អដល់ពលរដ្ឋ និងយុវជនក៏ដូចជាសិស្សានុសិស្សផងដែរ។
ជាពិសេសការហាត់កីឡាគឺដើម្បីបង្កើនបញ្ញាញាណឲ្យខ្លាំងងាយស្រួលក្នុងការបំពេញភារកិច្ចស៊ើបអង្កេតតាមចាប់ជនល្មើសជួញដូរគ្រឿងញៀន ព្រោះបច្ចុប្បន្ននេះជនល្មើសប្រើសុទ្ធតែប្រព័ន្ធឌីជីថលក្នុងការធ្វើទំនាក់ទំនង និងប្រើប្រព័ន្ធធនាគារក្នុងការប្រព្រឹត្តល្មើស។ អ៊ីចឹងគឺមន្ត្រីសមត្ថកិច្ចត្រូវប្រើខួរក្បាល ឬបញ្ញាញាណខ្លាំងណាស់ក្នុងការតាមដានតម្រុយតាមរយៈបច្ចេកទេសទំនើបរបស់ឧក្រិដ្ឋជន ពោលគឺមិនមែនធ្វើកិច្ចការដដែលដូចមុនដោយគ្រាន់តែសួរចម្លើយដេញរកឫសគល់នោះទេ ព្រោះទម្រាំតែស្រាវជ្រាវដល់មេខ្លោងធំ គឺពួកគេរត់បាត់ទៅហើយដែលចុងក្រោយចាប់បានតែអ្នកជួញដូរតូចតាច និងអ្នកប្រើប្រាស់គ្រឿងញៀនប៉ុណ្ណោះ។
ហេតុដូច្នេះហើយរាជរដ្ឋាភិបាលគួរតែពង្រឹងប្រព័ន្ធសុវត្ថិភាព និងការបង្ក្រាបការជួញដូរគ្រឿងញៀនឲ្យកាន់តែបានល្អប្រសើរដើម្បីឈានដល់ទៅរកចាប់ខ្លួនមេខ្លោងនៃបណ្តាញចែកចាយគ្រឿងញៀន និងកន្លែងផលិតតាមរយៈការត្រួតពិនិត្យសុខភាពរបស់មន្ត្រីមានសមត្ថកិច្ចទាំងប៉ូលិសទាំងប៉េអឹមតាមវិធីធ្វើតេស្តលើទឹកនោម និងឈាមរៀងរាល់ ១ ឆមាសម្តង។
មានន័យថា បើរកឃើញមានលទ្ធផលវិជ្ជមានក្នុងខ្លួនរបស់មន្ត្រីមានសមត្ថកិច្ចណាម្នាក់គឺត្រូវព្យាបាលទាំងសុខភាពផ្លូវកាយ និងទាំងសុខភាពផ្លូវចិត្ត ហើយពួកគេមិនត្រូវឲ្យបំពាក់អាវុធនៅនឹងដៃឲ្យទៀតទេ លុះត្រាតែព្យាបាលរោគសញ្ញានោះឲ្យបានជាពេញលេញសិន។ ពិតណាស់កន្លងមកលោក ស ថេត ស្នងការនគរបាលរាជធានីភ្នំពេញធ្លាប់បានលើកពីបញ្ហាពិនិត្យរកសារធាតុញៀនទៅលើមន្ត្រីនគរបាលរាជធានីដើម្បីធ្វើជាគំរូដល់ពលរដ្ឋរួចមកហើយ ក៏ប៉ុន្តែហាក់ពុំទាន់មានការអនុវត្តនៅឡើយទេ។
ម្យ៉ាងវិញទៀតការផ្សព្វផ្សាយអំពីផលប៉ះពាល់ពីការប្រើប្រាស់គ្រឿងញៀន គួរតែបង្វែរទិសដៅទៅលើបណ្តាញសង្គមហ្វេសប៊ុកវិញដើម្បីងាយស្រួលទទួលបានទាំងសំឡេង និងរូបភាពហើយមានគ្រប់ទីកន្លែងពោលគឺឲ្យតែទីណាមានសេវាទូរស័ព្ទ គឺការផ្សព្វផ្សាយនឹងជ្រាបដល់ទីនោះ ព្រោះចរន្តនៃការជួញដូរ និងប្រើប្រាស់គ្រឿងញៀននេះឲ្យតែមានមនុស្សទៅដល់ទីណាគឺសកម្មភាពប្រព្រឹត្តបទល្មើសតែងតែទៅដល់ទីនោះផងដែរ៕
ចូលរួមផ្តល់យោបល់តាមរយៈ soprach.tong@phnompenhpost.com
