The Phnom Penh Post Search

Search form




Logo of Phnom Penh Post newspaper Phnom Penh Post - តារា​កំប្លែង​ទំនើង​បាញ់​បោះ​គួរ​ត្រូវ​បាន​ពិន័យ​ដូច​ករណី​ស្ត្រី​ទំនើង ខែ តារា​ដែរ




តារា​កំប្លែង​ទំនើង​បាញ់​បោះ​គួរ​ត្រូវ​បាន​ពិន័យ​ដូច​ករណី​ស្ត្រី​ទំនើង ខែ តារា​ដែរ

តារា​កំប្លែង​ទំនើង​បាញ់​បោះ​គួរ​ត្រូវ​បាន​ពិន័យ​ដូច​ករណី​ស្ត្រី​ទំនើង ខែ តារា​ដែរ

Content image - Phnom Penh Post

ភ្នំពេញ :  ​«​អាង​កោង​អាង​កាច​ អាង​កាប់​អាង​ចាក់​ អាង​គុក​ អាង​ច្រវាក់​.​.​.​​​» កំណាព្យ​របស់​កវី​ ព្រះ​ភិរម្យ​អ៊ុក អ៊ូ ហៅ «​ង៉ុយ» ​បាន​ឆ្លុះ​បញ្ចាំង​ទិដ្ឋ​ភាព​ កាល​សម័យ​ដើម​ដែល​មិន​ទាន់​មាន​កាំភ្លើង​ទេ​ គឺ​មាន​តែ​ដាវ​ កាំបិត​​ និង​លំពែង​ធ្វើ​ជា​អាវុធ​​ ​ធ្វើ​ឲ្យ​​អ្នក​ប្រព្រឹត្ត​បទ​ល្មើស​អាង​។​​ តើ​ការ​អាង​សម័យ​នេះ​ ដូច​ការ​អាង​សម័យ​ដើម​ដែរ​ឬ​ទេ​?

ចាប់​តាំង​ពី​ក្រសួង​មហា​ផ្ទៃ​បាន​បង្កើត​ឈ្មោះ​ថា​​ «​ក្មេង​ទំនើង​» ​មក​ ក្រោយ​មក​មាន​លេច​ឮ​ពាក្យ ​«​ទំ​នើង​»​ ​ត្រូវ​ប្រជា​ពលរដ្ឋ​និយម​ប្រើ​សម្រាប់​ជន​ប្រព្រឹត្ត​ល្មើស​ច្បាប់ ដូច​ជា​ ស្ត្រី​ទំនើង និង​ចាស់​ទំនើង​ជា​ដើម​។​ តែ​ថ្មី​នេះ​ចេញ​ ​តារា​ទំ​នើង​មួយ​ទៀត​ គឺ​បន្ទាប់​ពី​តារា​ៗ​​ និង​តារា​កំប្លែង​ បាន​គំរាម​​បាញ់​ និង​បាញ់​បោះ​ គំរាម​​គូ​ភា​គី​ម្ខាង​ទៀត​ ក្នុង​ពេល​មាន​ជម្លោះ​តាម​ផ្លូវ​សាធារណៈ។ ​​ ករណី​នេះ​ ធ្វើ​ឲ្យ​ប្រជា​ពល​រដ្ឋ​ចេះ​តែ​ឆ្ងល់​​ថា​ តើ​បុណ្យ​ស័ក្តិ​​ត្រឹម​តារា​ៗ​សោះ​ មាន​អាវុធ​ទំនើប​ៗ​កាន់​ ឲ្យ​តែ​ហា​ឡើង​យក​ឈ្មោះ​មន្ត្រី​ជាន់​ខ្ពស់​មក​គំរាម​បាញ់​​គេ​ឯង​ និង​​ដើរ​ប្រមាថ​​ជីវិត​​គេ​​ឯង​អី​ចឹង​?​ បន្ទាប់​ពី​យុទ្ធ​នា​ការ ភូមិ​-​ឃុំ​សុវត្ថិ​ភាព​របស់​រាជ​រដ្ឋា​ភិបាល​បាន​អនុវត្ត​កន្លង​មក​ ខ្ញុំ​សង្កេត​ឃើញ​សកម្ម​ភាព​​របស់​​ក្មេង​ទំនើង​​មាន​ការ​ថយ​ចុះ​បន្តិច​ ម្តង​ៗ ​តែ​បែរ​ជា​កើន​ឡើង​​នូវ​សកម្ម​ភាព​តារា​ទំនើង​គួរ​ឲ្យ​កត់​សម្គាល់​ទៅ​វិញ​ ។​​ តើ​ក្មេង​ទំនើង​ និង​តារា​ទំនើង​​ខុស​គ្នា​ដូ​ច​ម្តេច​?​​ តើ​សមត្ថ​កិច្ច​ត្រូវ​ធ្វើ​ដូច​ម្តេច​ ដើម្បី​បង្ក្រាប​តារា​ទំនើង​ទាំង​អស់​នេះ​ឲ្យ​មាន​តម្លា​ភាព​ កុំ​ឲ្យ​ខូច​ឈ្មោះ​តារា​ល្អ​ៗ​ផ្សេង​ទៀត​ដែល​គេ​មិន​បាន​ប្រព្រឹត្ត​នោះ​?

ជា​ទូ​ទៅ​ តារា​ៗ​មួយ​ចំនួន​ឲ្យ​តែ​បាន​ឡើង​លើ​​ឆាក​​ ឲ្យ​ក្លាយ​ជា​តារា​អស់​អី​អស់​ទៅ​។​​ ដូច​លោក​នាយក​រដ្ឋ​មន្ត្រី​​ ហ៊ុន សែន ធ្លាប់​បាន​រិះ​គន់​អ្នក​គ្រប់​គ្រង​កម្មវិធី​ទូរ​ទស្សន៍​​ក្នុង​ការ​ ជ្រើស​រើស​ តារា​ចម្រៀង​ឡើង​ឆាក​តាម​ចិត្ត​ចង់​ឲ្យ​​តែ​បាន​សិច​ស៊ី​គឺ​​ បាន​ឡើង​ហើយ​។​​ យោង​តាម​​ការ​ចុះ​ផ្សាយ​របស់​ព័ត៌​មានជាតិ និង​អន្តរ​ជាតិ​ ​គេ​បាន​សង្កេត​ឃើញ​ថា​ ក្រោយ​ពី​ពួក​គេ​បាន​ក្លាយ​ជា​តារា​ ក៏​ចាប់​ផ្តើម​ដើរ​ពើង​ទ្រូង​ បូស​ឃ្លៀក​ វាយ​ឫក​ពាមួយ​ប្រាវ​ ច្រងេង​ច្រងាង​ជា​មួយ​នឹង​ទូរ​ស័ព្ទ​ពីរ-​បី ខ្លះ​លែង​ស្គាល់​បង​ប្អូន​ និង​មិត្ត​ភក្តិ​អស់​ហើយ​ ដូច​ភាសា​បារាំង​គេ​ថា «​C'est moi le coq!» «​ទី​នេះ​មាន​តែ​អាញ់​!​»​។​​ ហើយ​ខ្លះ​ទៀត​បើ​បាន​តាតា​ ឬ​យាយ​ៗ​ ចិញ្ចឹម​ និង​នៅ​ពី​ក្រោយ​ខ្នង​ទៀត​រឹត​តែ​ផ្គើន​​លើស​ដើម​ ហើយ​​បើ​បាន​គេ​ឲ្យ​ស័ក្តិ​ពាក់​ទៀត​រឹត​តែ​ក្អេង​ក្អាង​ ដើរ​យក​​ឈ្មោះ​​ថ្នាក់​ដឹក​នំា​ធ្វើ​ជា​បង្អែក​ ដើរ​គម្រាម​គេ​ឯង​។​ តាម​ពិត​ទៅ​​ពួក​គេ​មាន​ខ្នាយ​មែន​ ភាគ​ច្រើន​សុទ្ធ​តែ​មាន​ស័ក្តិ​ពាក់​ បាន​ជា​គេ​ហា​ឡើង​បាញ់​ៗ​។

និយាយ​ពី​ការ​កំប្លែង​វិញ​ គឺ​គ្មាន​អ្វី​ក្រៅ​ពី​ការ​ប្រើ​ពាក្យ​ចម្អេះ​ចំអាស​ យាយី​ផ្លូវ​ភេទ​ បញ្ឆិត​បញ្ឆៀង​ផ្លូវ​ភេទ​ និង​ការ​ប្រើ​ហិង្សា​តាម​រយៈ​កាយ​វិការ និង​ពាក្យ​សម្តី​ផង​ដែរ​។ ការ​កំប្លែង​បែប​នេះ​ អាច​ពី​រោះ ​កាល​ពី​សម័យ​ទសវត្យរ៍​ឆ្នាំ​ ៨០​ តែ​បច្ចុប្បន្ន​នេះ​ គឺ​ហួស​សម័យ​ និង​លែង​សម​ទៀត​ហើយ​។ ពេល​ខ្លះ​អ្នក​មើល​ទូរ​ទស្សន៍​ឲ្យ​តែ​ចេញ​មុខ​មក​ គឺ​​គេ​បិទ​ទូរ​ទស្សន៍​ភ្លាម​​ ព្រោះ​គេ​ខ្លាច​កូន​ៗ​គេ​យក​តម្រាប់​ដ៏​អាក្រក់​ៗ​ទាំង​នោះ​តាម​។​ តើ​ពេល​ណា​បាន​ពួក​គាត់​ លេង​តាម​របៀប​អប់រំ​វិញ​ ដើម្បី​ផ្តល់​ចំណេះ​ដឹង​ និង​ចំណេះ​ធ្វើ​ទៅ​ទស្ស​និក​ជន​?​ តារា​ៗ​ស្រុក​ខ្មែរ​មាន​ចរិត​លក្ខណៈ​ខុស​ពី​ តារា​ៗ​បរ​ទេស​ តែ​​កាល​ណា​គេ​កាន់​តែ​ល្បី​ កាន់​តែ​​ធ្វើ​ឲ្យ​គេ​ចូល​ចិត្ត​​ជួយ​សង្គម​ និង​ផ្តល់​ជា​​សប្បុ​រស​ធម៌​ ដូច​ជា ​លោក​ស្រី​អែន​ ជូ​លី​ណា​ លោក​ឈី​គី​ ចាន់​​ (ឈិន​ ឡុង​)​ និង​លោក​ បូណូ (​U2) ជា​ដើម​។​ល​។​ ចំណែក​ឯ​តារា​ៗ​មួយ​ចំនួន​ធំ​ ស្រុក​ខ្មែរ​វិញ ​ឲ្យ​តែ​បាន​ល្បី​ គឺ​ចេញ​របៀប​ទំនើង​ភ្លាម​។

តែ​ផ្ទុយ​ទៅ​វិញ​ មិន​មែន​ឲ្យ​តែ​តារា​ៗ​ស្រុក​ខ្មែរ​យើង​សុទ្ធ​តែ​ទំនើង​នោះ​ទេ​​ ក៏​មាន​តារា​ល្បី​ៗ​ធ្វើ​បាន​ល្អ​ទាំង​ក្នុង​​ឆាក​ ទាំង​ក្រៅ​ឆាក​ផង​ដែរ​។​ ឧទា​ហរណ៍​ តារា​ល្បី​ ហើយ​ក៏​ជា​តារា​គំរូ​ គឺ​លោក​វេជ្ជ​បណិ្ឌត​ ជា​ សំ​ណាង​ ដែល​ស្ម័គ្រ​ចិត្ត​ចូល​រួម​ជួយ​សង្គម​​ (មិន​យក​ប្រាក់​កម្រៃ​) ​ចាប់​តាំង​ពី​ឆ្នាំ​ ២០០០​ រហូត​មក​ដល់​បច្ចុប្បន្ន​នេះ​ ក្នុង​នាម​ជា​តារា​ឆ្នើម​របស់​មូល​និធិ​សហ​ប្រជា​ជាតិ​សម្រាប់​ប្រជាជន (UNFPA)​ ដើម្បី​ផ្តល់​ជា​បទ​ពិសោធ​ល្អ​ៗ​ និង​ចំណេះ​ដឹង​ ដើម្បី​ចែក​រំលែក​ទៅ​យុវវ័យ​នូវ​សុខ​ភាព​បន្ត​ពូជ​ សុខ​ភាព​ផ្លូវ​ភេទ​ ជំងឺ​អេដស៍​ និង​យេន​ឌ័រ​ ជា​ដើម​ហើយ​ចំណុច​ដ៏​ល្អ​មួយ​ទៀត​គឺ​​លោក​វេជ្ជ​បណ្ឌិត​ មាន​ការ​ប្តេជ្ញា​ចិត្ត​មិន​ទទួល​ការ​ផ្សាយ​ពាណិជ្ជ​កម្ម​ណា​ដែល​​ធ្វើ​ឲ្យ ​ប៉ះ​ពាល់​សុខភាព​ទេ​។

ជា​ការ​ល្អ​ ខ្ញុំ​ទទូច​ដល់​តារា​ៗ​ទាំង​ប្រុស​ ទាំង​ស្រី​ បើ​មិន​បាន​ជួយ​សប្បុ​រស​ធម៌​ និង​ជា​តារា​គំរូ​ដូច​លោក​វេជ្ជ​បណ្ឌិត​ ជា​ សំណាង​​ ទេ​ តែ​សូម​កុំ​បង្ក​បរិយា​កាស​អាប់​អួ និង​អសន្តិ​សុខ​សង្គម​បាន​ហើយ​។

ខ្ញុំ​គិត​ថា ​រាជ​រដ្ឋា​ភិបាល​គួរ​តែ​លុប​បំបាត់​និទ្ទណ្ឌ​ភាព​ និង​ចាត់​វិធាន​ការ​​តាម​ផ្លួវ​ច្បាប់​ចំពោះ​តារា​ៗ​ទំនើង​ ឲ្យ​មាន​តម្លា​ភាព​ផង​។ គឺ​មិន​ខុស​ពី​សម័យ​​ដើម​ទេ​ ដូច​ដែល​អាង​របៀប​តារា​ៗ​ទំនើង​សម័យ​បច្ចុប្បន្ន​អាវុធ​ទំនើប​ៗ​​ និង​ប្រើ​ឈ្មោះ​ថ្នាក់​ដឹក​នំា ​«អាង​គ្នី​អាង​គ្នា ​អាង​ខ្នង​អាង​ខ្នាយ ​អាង​បាញ់​អាង​បោះ​ អាង​កាង​គុក​ព្រៃ​ស​បាន​ទេ?»៕

សូម​ចូល​រួម​ផ្តល់​យោបល់​តាម​រយៈ soprach.tong@ phnompenhpost.com

អត្ថបទគួរចាប់អារម្មណ៍