The Phnom Penh Post Search

Search form




Logo of Phnom Penh Post newspaper Phnom Penh Post - តើ​បុរស​គួរ​រៀប​ផែន​ការ​យ៉ាង​ណា​ដើម្បី​ធ្វើ​ឲ្យ​ជីវិត​ចុង​ក្រោយ​ខ្លួន​ល្អ?




តើ​បុរស​គួរ​រៀប​ផែន​ការ​យ៉ាង​ណា​ដើម្បី​ធ្វើ​ឲ្យ​ជីវិត​ចុង​ក្រោយ​ខ្លួន​ល្អ?

តើ​បុរស​គួរ​រៀប​ផែន​ការ​យ៉ាង​ណា​ដើម្បី​ធ្វើ​ឲ្យ​ជីវិត​ចុង​ក្រោយ​ខ្លួន​ល្អ?

ភ្នំពេញ : សុភាសិត​មួយ​បាន​ចែង​ថា «ខ្ញី​កាន់​តែ​ចាស់ កាន់​តែ​ហឹរ!»។ តើ​ពិត​មែន​ទេ​? តាម​ការ​សង្កេត និង​តាម​រយៈ​វិប សាយ​ www.beat-richner.ch យើង​ឃើញ​សកម្ម​ភាព​ដ៏​សស្រាក់​សស្រាំ​របស់​លោក​វេជ្ជ​បណ្ឌិត ប៊ីត រីជន័រ (Dr Beat Richner)​ មាន​អាយុ​ ៦៤ ឆ្នាំ​ ជា​ជន​ជាតិ​ស្វ៊ីស​ ដែល​ជា​អ្នក​ចូល​រួម​ស្ថាបនា និង ជា​អ្នក​គ្រប់​គ្រង​មន្ទីរ​ពេទ្យ​គន្ធ​បុប្ជា​ទាំង​៤​ និង​មន្ទីរ​ពេទ្យ​ជ័យ​វ័រ្ម័ន​ទី ៧ ចាប់​តាំង​ពី​ឆ្នាំ​ ១៩៩២ មក​ម្ល៉េះ។

ក្នុង​មួយ​ឆ្នាំ​ៗ ​មន្ទីរ​ពេទ្យ​នេះ​បាន​ជួយ​ជីវិត​កុមារ​កម្ពុជា​រាប់​ម៉ឺន​នាក់ និង​បណ្តុះ​បណ្តាល​ធន​ធាន​មនុស្ស​និស្សិត​ដែល​ទើប​តែ​ចេញ​ពី​ សាកល​វិទ្យាល័យ​វិទ្យា​សាស្រ្ត​សុខាភិបាល​ ហើយ​មិន​ត្រឹម​តែ​គ្រប់​គ្រង​ប៉ុណ្ណោះ​ទេ លោក​វេជ្ជ​បណ្ឌិត​ថែម​ទាំង​ខិត​ខំ​ស្រាវ​ជ្រាវ​រក​មេ​រោគ​ថ្មី​ៗ​​ផ្តល់​ព័ត៌​មាន​ទៅ​រាជ​រដ្ឋាភិបាល​ទៀត​ផង និង​បាន​លើក​សំណើ​ជា​មូល​និធិ​ទាំង​ក្នុង​ស្រុក​និង​ក្រៅ​ស្រុក ដើម្បី​ទ្រទ្រង់​មន្ទីរ​ពេទ្យ​នេះ​ឲ្យ​ដំណើរ​ការ​បាន​ក្នុង​ការ​ជួយ​រំលែក​បន្ទុក​របស់​រាជ​រដ្ឋាភិបាល​មួយ​ផ្នែក​ធំ។

ជាង​នេះ​ទៅ​ទៀត លោក​វេជ្ជ​បណ្ឌិត ក៏​បាន​រៀប​ចំ​កម្ម​វិធី​ការ​ប្រគំ​តន្ត្រី គឺ​លោក​លេង​កូត​វីយូឡុង​ផ្ទាល់ រៀង​រាល់​ល្ងាច​ថ្ងៃ​សៅរ៍​នៅ​មន្ទីរ​ពេទ្យ​ជ័យ​វរ្ម័ន​ទី​៧ នៅ​ខេត្ត​សៀម​រាប ដើម្បី​ទាក់​ទាញ​ភ្ញៀវ​ទេសចរ​ជួយ​ផ្តល់​ថវិកា​សម្រាប់​សកម្ម​ភាព មន្ទីរ​ពេទ្យ​ទាំង​នេះ ហើយ​ការងារ​លោក​មាន​ការ​មមា​ញឹក​ស្ទើរ​តែ​ពុំ​មាន​ពេល​លំហែ​កាយ​ជីវិត​របស់​លោក។​ ទង្វើ​ដ៏​ប្រពៃ​និង​សប្បុ​រស​ធម៌​របស់​លោក​វេជ្ជ​បណ្ឌិត​ធ្វើ​ឲ្យ​ប្រជា​ពល​រដ្ឋ​កម្ពុជា​បាន​លើក​សរសើរ​គុណ​តម្លៃ ហើយ​ខ្លះ​ក៏​បាន​ថ្លែង​អំណរ​គុណ​ដ៏​ជ្រាល​ជ្រៅ​ចំពោះ​កិច្ច​ខិត​ខំ​របស់​លោក​ បើ​ទោះ​បី​ជា​អាយុ​លោក​វេជ្ជ​បណ្ឌិត​ចូល​និវត្តន៍​ក៏​ដោយ។

សូម្បី​អតីត​ព្រះ​មហា​ព្រះ​វីរក្សត្រ​សម្តេច​ឪ នរោត្តម សីហនុ ក៏​បាន​ចូល​រួម​អបអរ​សាទរ​​ចំពោះ​សកម្ម​ភាព​របស់​លោក​វេជ្ជ​បណ្ឌិត​ដែរ។​ តែ​ទោះ​បី​ជា​លោក​វេជ្ជ​បណ្ឌិត​​ខិត​ខំ​យ៉ាង​ដូច្នេះ​ក៏​ដោយ​ក៏​នៅ​មាន​បុគ្គលិក​មួយ​ចំនួន​តូច​នៅ​មន្ទីរ​ពេទ្យ​គុន្ធ​បុប្ជា មិន​ទាន់​ប្រើ​ពាក្យ​សមរម្យ​ជា​មួយ​បង​ប្អូន​មក​ពី​ជន​បទ​ដែល​ពួក​គាត់​មិន​បាន​ដឹង​ពី​របៀប​របប​នៅ​ទីនោះ​នៅ​ឡើយ។

តើ​មាន​បុរស​វ័យ​ចំ​ណាស់​ៗ​ ដែល​មាន​តួនាទី​ និង​មាន​ទ្រព្យ​សម្បត្តិ និង​មន្ត្រី​ចូល​និវត្តន៍​ស្រុក​ខ្មែរ​យើង​មាន​ប៉ុន្មាន​នាក់ ដែល​បូជា​ទាំង​កាយ​ ទាំង​ចិត្ត​ដូច​លោក វេជ្ជបណ្ឌិត ប៊ីត រីជន័រ ក្នុង​កិច្ចការ​អភិវឌ្ឍន៍​កម្ពុជា?

បើ​តាម​រយៈ​ការ​សិក្សា​ស្រាវ​ជ្រាវ​របស់​អង្គការ​ភីអេសអាយ (PSI) ឆ្នាំ​២០០២:​ «ទំនាក់​ទំនង​ស្នេហា​ និង​ការ​រួម​ភេទ»​ ក៏​បាន​រក​ឃើញ​ថា មាន​សកម្ម​ភាព​របស់​តាតា ​គឺ​សំដៅ​ទៅ​លើ​បុរស​មាន​តួនាទី​ធំ​ដំ​ក្នុង​ជួរ​រដ្ឋាភិបាល ឬ​ក៏​បុរស​មាន​ទ្រព្យ​ធន​វ័យ​ចំណាស់​មួយ​ចំនួន​ដែល​ថ្នាក់​ថ្នម​ស្រី​កំណាន់​ម្នាក់ គឺ​គាត់​មិន​រៀប​ការ​ជាមួយ​ទេ​ គ្រាន់​តែ​សម្រាប់​ការ​រួម​ភេទ​តែ​ប៉ុណ្ណោះ។ ហើយ​ថ្មី​ៗ​នេះ​​ ​លោក​នាយក​រដ្ឋ​មន្ត្រី​ធ្លាប់​បាន​ព្រមាន​ថា មាន​មន្ត្រី​ជាន់​ខ្ពស់​ខ្លះ​ប្រើ​ប្រាស់​រថយន្ត​ស៊ីរ៉ែន​មិន​ត្រឹម​ត្រូវ ដើម្បី​ទៅ​ជួប​ជា​មួយ​ស្រី​ស្នេហ៍​សោះ ធ្វើ​ឲ្យ​រំខាន​ប្រជា​ពលរដ្ឋ​ធ្វើ​ដំណើរ។​ លោក​ក៏​ធ្លាប់​លើក​ផង​ដែរ​ថា​ពេល​ខ្លះ​បើក​ភ្លើង​ក្នុង​បន្ទប់​ខារ៉ាអូខេ ឃើញ​សុទ្ធ​តែ «តាតា​ក្បាល​ទំពែក​»​ នៅ​ជា​មួយ​ស្រី​ក្មេង​ទៀត។

សកម្ម​ភាព​នេះ​មើល​ទៅ​ហាក់​ដូច​ជា​មាន​ភាព​មមាញឹក​គួរ​សម​ដែរ ចំពោះ​រឿង​រ៉ាវ​តាតា​ចិញ្ចឹម​ស្រី​ក្មេង​ៗ ឬ​ក៏​តារា​ៗ​មួយ​ចំនួន ដែល​បញ្ចេញ​សម្ញែង​ដាក់​គ្នា​ថា ពួក​គេ​ខ្លះ​ត្រូវ​បាន​តាតា​ចិញ្ចឹម ទិញ​ឲ្យ​នូវ​ ផ្ទះ​វីឡា​កូន​កាត់ ផ្ទះ​មួយ​ជុង រថយន្ត​ទំនើបៗ ចេញ​លុយ​ឲ្យ​ដើរ​លេង​ប្រទេស​នានា។

តាម​ពិត​ទៅ​មិន​មែន​ឲ្យ​តែ​បុរស​ចំណាស់​ខ្មែរ​សុទ្ធ​តែ​បែក​ឆ្វេង​យ៉ាង​ដូច្នេះ​ទេ តែ​មាន​បុរស​ចំណាស់​មួយ​ចំនួន​ក៏​ ធ្វើ​បាន​ល្អ​ដែរ​ បើ​ទោះ​បី​ជា​ពួក​គាត់​ចូល​និវត្តន៍​ក៏​ដោយ។​ ជា​ឧទាហរណ៍ បុរស​ចំណាស់​ចូល​និវត្តន៍​ជា​គំរូ​ម្នាក់​ គឺ ​លោក​គ្រូ យិន សុខឃីម ដែល​អតីត​គ្រូ​បង្រៀន​គណិត​វិទ្យា​សម្រាប់​សិស្ស​ពូក​ទូទាំង​រាជ​ធានី​ភ្នំពេញ នៅ​វិទ្យាល័យ​បាក់​ទូក។​ កាល​ពី​សម័យ​អ៊ុន​តាក់​​ នៅ​ពេល​សម្រាក​វិស្សមកាល លោក​គ្រូ​ក៏​ឆ្លៀត​ពេល​បម្រើ​ការ​ឲ្យ​អ៊ុន​តាក់​ជា​អ្នក​យក​ព័ត៌​មាន​ និង​អាន​ព័ត៌​មាន​តាម​វិទ្យុ។

រីឯ​កាល​ពី​ចុង​ទសវត្សរ៍​ឆ្នាំ​៩០ និង​ដើម​ឆ្នាំ​២០០០​លោក​គ្រូ​ក៏​ជា​អ្នក​​ធ្លាប់​បង្រៀន​គណិត​វិទ្យា​រៀង​រាល់​ល្ងាច​នៅ​លើ​កញ្ចក់​ទូរទស្សន៍​មួយ​ផង​ដែរ។​​ បន្ទាប់​ពី​បាន​ចូល​និវត្តន៍​មក និង​ដោយ​សារ​ចំណេះ​ដឹង​ដែល​​មិន​សាប​សូន្យ ផ្គួប​ផ្សំ​ជា​មួយ​ឆន្ទៈ​ចង់​ជួយ​យុវជន​ខ្មែរ​ផង លោក​គ្រូ​ក៏​ធ្លាប់​ធ្វើ​ជា​នាយក​កម្មវិធី​សិក្សា​បច្ចេក​ទេស​ថ្នាក់​វិទ្យាល័យ នៃ​អង្គ​ការ​ភាព​ញញឹម​នៃ​កុមារ​ ដើម្បី​ជួយ​ទៅ​លើ​កុមារ​ក្រីក្រ។ បន្ទាប់​ពី​បាន​ចូល​និវត្តន៍​ជា​លើក​ទី​២​មក បច្ចុប្បន្ន​នេះ​លោក​គ្រូ​កំពុង​​ចែក​រំលែក​ចំណេះ​ដឹង​នេះ ​ទៅ​យុវសិស្ស​​​​​នៅ​សាសា​ឯក​ជន​វែស​ស្ទើន​ទៀត។

គុណូបការៈ​របស់​លោក​គ្រូ មិន​ត្រឹម​តែ​ជួយ​សង្គម​ទេ លោក​គ្រូ​ចំណាយ​ពេល​អប់រំ​កូន​ៗ​របស់​លោក​គ្រូ​​ ទទួល​បាន​ជោគ​ជ័យ​ក្នុង​ជីវិត​ទាំង​អស់​ផង​ដែរ។​ ឥឡូវ​មាន​អតីត​កូន​សិស្ស​របស់​លោក​គ្រូ​មួយ​ចំនួន ដែល​ជា មន្ត្រី​រាជ​ការ បុគ្គលិក​អង្គ​ការ និង​បុគ្គលិក​ក្រុម​ហ៊ុន​នានា តែង​តែ​នឹក​ឃើញ​អនុស្សាវរីយ៍ និង​សរសើរ​ពី​គុណ​បំណាច់​ដ៏​ប្រពៃ​របស់​លោក​គ្រូ​ខ្លះ​ក៏​មាន​គំនិត​ផ្តួច​ផ្តើម​បង្កើត​កម្ម​វិធី​ធ្វើ​បុណ្យ​រឭក​គុណ​គ្រូ​ទៀត​ផង។

ខ្ញុំ​យល់​ឃើញ​ថា បុរស​វ័យ​ចំណាស់​ៗ គួរ​ណាស់​តែ​មាន​ផែន​ការ​ថា តើ​ដល់​វ័យ​ហឹ្នង ចង់​ធ្វើ​អី្វ​ខ្លះ​បាន​ដើម្បី​ជួយ​ដល់​សង្គម ជា​ពិសេស​បញ្ហា​យុវជន​។​ ដូច​បទ​ពិសោធ​របស់​បុរស​វ័យ​ចំណាស់​គំរូ​ល្អ​ទាំង​ពីរ​នាក់​គឺ លោក​វេជ្ជបណ្ឌិត ប៊ីត រីជន័រ (Dr Beat Richner)​​ និង​លោក​គ្រូ​ យិន​ សុខ​ឃីម នេះ​ស្រាប់៕

(soprach.tong@phnompenhpost.com)

អត្ថបទគួរចាប់អារម្មណ៍