The Phnom Penh Post Search

Search form




Logo of Phnom Penh Post newspaper Phnom Penh Post - ទិវា​ពិភព​លោក​គ្មាន​ថ្នាំ​ជក់​នៅ​ឆ្នាំ​នេះ គួរ​តែ​លើក​យក​ការ​ដំឡើង​ពន្ធ​លើ​បារី




ទិវា​ពិភព​លោក​គ្មាន​ថ្នាំ​ជក់​នៅ​ឆ្នាំ​នេះ គួរ​តែ​លើក​យក​ការ​ដំឡើង​ពន្ធ​លើ​បារី

ទិវា​ពិភព​លោក​គ្មាន​ថ្នាំ​ជក់​នៅ​ឆ្នាំ​នេះ គួរ​តែ​លើក​យក​ការ​ដំឡើង​ពន្ធ​លើ​បារី

Content image - Phnom Penh Post
ក្រុមអ្នកធាក់ស៊ីក្លូពាក់អាវពណ៌ត្រួយចេកជាសញ្ញាថាពួកគាត់មិនពិសាបារីទៀតទេ តុង សុប្រាជ្ញ
ភ្នំពេញៈ នៅ​លើ​ពិភព​លោក​ មាន​មនុស្ស​ស្លាប់​ដោយ​​សារ​​​ការ​​ជក់​​បារី​ប្រហែល ​៥,៤ ​លាន​នាក់​នៅ​ក្នុង​​មួយ​​ឆ្នាំ​​ៗ​​ (របាយ​ការណ៍ WHO ឆ្នាំ​​ ២០០៨)​ ​ ហេតុ​​ដូច្នេះ​ហើយ​បណ្តា​​ប្រទេស​ជឿន​លឿន​បាន​ដំឡើង​ពន្ធ​លើ​បារី​ ដើម្បី​កាត់​បន្ថយ​អ្នក​ជក់​។​ ​ជាង​នេះ​ទៅ​ទៀត​នេះ​ អ្វី​ដែល​ខ្ញុំ​ធ្លាប់​​ជួប​ប្រទះ​ចម្លែក​ជាង​​ប្រទេស​​មួយ​ចំនួន​នោះ​ នៅ​ឯ​ប្រទេស​បារំាំង​ គឺ​ការ​សុំ​បារី​គេ​ជក់​ជា​រឿង​ធម្មតា​ទៅ​ហើយ​ ដោយ​មិន​មាន​​ការ​ខ្មាស​អៀន​ទេ​។ ​ ​នេះ​ដោយ​សារ​តម្លៃ​បារី​បាន​ឡើង​ថ្លៃ​ពេក​ ធ្វើ​ឲ្យ​អ្នក​ជក់​ព្យា​យាម​ផ្តាច់​ការ​ជក់​បារី​តាម​រយៈ​​ការ​ហាម​ខ្លួន​​ ឈប់​ទិញ​បារី​ ហើយ​​សុំ​គេ​ម្តង​ម្កាល​វិញ ធ្វើ​ឲ្យ​ពួក​គេ​ភ្លេច​ការ​ជក់​។

ជា​មួយ​គ្នា​នឹង​ពន្ធ​បារី​នេះ​ដែរ​ តាម​រយៈ​ការ​ស្ទង់​​មតិ​​​របស់​វិទ្យា​​ស្ថាន​ស្ថិតិ​ជាតិ​ បាន​ផ្សព្វ​ផ្សាយ​​របាយ​ការ​ណ៍​ កាល​ពីខែ​មុន​នេះ​ បង្ហាញ​ថា ​៨១​ភាគរយ​ នៃ​អ្នក​ផ្តល់​ចម្លើយ​បាន​​គំាទ្រ​​ការ​ដំឡើង​ពន្ធ​លើ​បារី​។​​ បើ​ទោះ​បី​ជា​មាន​ការ​ធ្លាក់​ចុះ​នៃ​អត្រា​មនុស្ស​ពេញ​វ័យ​ជក់​បារី​ពី​ ៤៨​ភាគ​រយ​នៅ​ឆ្នាំ​២០០៦​ មក ​៤២,៥​ភាគ​រយ​ នៅ​ ឆ្នាំ ​២០១១​ តែ​​ចំនួន​មនុស្ស​បាន​កើន​ទៅ​វិញ​ជិត ​​២ ​លាន​នាក់​ហើយ​។​​​​ ឯ​ការ​ចំ​ណាយ​លុយ​​​ទិញ​បារី​​សរុប​វិញ​ប្រហែល​ជា ​​១០០​លាន​ដុល្លារ​ក្នុង​១​ឆ្នាំ​។​​ ទោះ​យ៉ាង​ណា​ពុំ​ទាន់​មាន​ទិន្នន័យ​ជាក់​​លាក់​ណា​មួយ​បញ្ជាក់​ថា​ កម្ពុជា​មាន​មនុស្ស​​ស្លាប់​ដោយ​សារ​ការ​ជក់​បារី​នៅ​ឡើយ​ទេ​។

យ៉ាង​ណា​មិញ​ ពី​មួយ​ឆ្នាំ​ទៅ​មួយ​ឆ្នាំ​មាន​ការ​ប្រសើរ​ឡើង​ ទាំង​ច្បាប់​ស្តី​ពី​ការ​ហាម​ប្រាម​​ជក់​បារី​ និង​ទាំង​ឥរិយា​បថ​របស់​អ្នក​ជក់​។​​ កាល​ពី​ឆ្នាំ​ទៅ​ រាជ​រដ្ឋាភិបាល​បាន​ចេញ​អនុក្រឹត្យ​ពី​ការ​បិទ​សារ​​ព្រមាន​នៅ​លើ កញ្ចប់​​បារី និង​ថ្មី​ៗ​នេះ​ សារាចរ​ណែ​នាំ​របស់​រាជ​រដ្ឋា​ភិបាល​​ប្រកាស​ឲ្យ​​មន្រ្តី​រាជ​ការ​ឈប់​ ជក់​ទាំង​ស្រុង​នៅ​កន្លែង​ធ្វើ​ការ​ក្នុង​បណ្តា​សាលា​រាជ​ធានី​ ក្រសួង​ និង​មន្ទីរ​នានា​ ហើយ​ឱសាន​វាទ​នៃ​ការ​ផ្សព្វ​ផ្សាយ​ពី​បារី​ទាំង​អស់​នឹង​បញ្ចប់​​នៅ​​ដើម​​ ខែ​​សីហា​​ខាង​​មុខ​​នេះ​​​។​ ​ប៉ុន្មាន​ឆ្នាំ​ចុង​ក្រោយ​ ប្រទេស​កម្ពុជា​ហាក់​បី​ដូច​ជា​លើក​ទឹក​ចិត្ត​អ្នក​ជក់​បារី​ឲ្យ​ឈប់​ជក់​ បារី​ ប្រ​សើរ​​ជាង​នៅ​​ទស​វត្សរ៍​ទី​ឆ្នាំ​៨០​ និង​៩០​ ដែល​កាល​នោះ​ស្ថា​ប័ន​ពាក់​ព័ន្ធ​មិន​សូវ​ជា​​យក​ចិត្ត​ទុក​ដាក់​លើ​បញ្ហា​ នេះ​ ហើយ​តាម​រយៈ​​ការ​ផ្សាយ​ពាណិជ្ជ​កម្ម​ និង​​ការ​ឲ្យ​ជក់​សាក​ល្បង តាម​រយៈនារី​ស្អាត​ៗ ​ទំនង​ជា​​លើក​ទឹក​ចិត្ត​ឲ្យបុរស​​ជក់​បារី​ផង​ដែរ​។

កាល​ពី​មុន​ វា​​ជា​ប្រពៃណី​ទំនៀម​ទម្លាប់​ទៅ​​ហើយ​ចំពោះ​កូន​ក្រមុំ​ជូន​បារី​មួយ​ ដើម​ឲ្យ​ទៅ​កូន​កំ​លោះ​ នៅ​​ព្រឹក​ថ្ងៃ​​រៀប​​អាពារហ៍​ពិពាហ៍​ ហើយ​ថត​ទុក​ជា​អនុ​ស្សា​វរីយ៍​ទៀត​។​ បន្ទាប់​ពី​ទទួល​ទាន​អា​ហារ​នៅ​ថ្ងៃ​ដដែល​នោះ​ដែរ​ គឺ​ភ្ញៀវ​ទាំង​អស់​ត្រូវ​បាន​គេ​ផ្តល់​ឲ្យ​នូវ​បារី​ដាក់​តាម​តុ​នី​មួយ​ៗ​ ដោយ​មិន​គិត​ថា ​បុរស ​ឬ​ស្រ្តី​ទេ​ ទោះ​បី​អ្នក​ចូល​រួម​​ទាំង​នោះ​មិន​ចេះ​ជក់​ក៏​ដោយ​ ​។ ​ សូម្បី​តែ​ព្រះ​សង្ឃ​ ក៏​ឧបា​សក​ ឧបាសិកា​​ ប្រ​គេន​បារី​ឆាន់​ដែរ​​ ដែល​ពេល​ខ្លះ​ព្រះ​សង្ឃ​ជក់​​ពេល​កំពុង​ទេស​នា​ក៏​មាន​ ឬ​ក៏​ជជែក​លេង​ជា​មួយ​គ្រ​ហស្ថ​ផង​ដែរ​។

កាល​ពី​បី​បួន​ឆ្នាំ​មុន ​​លោក​នាយក​រដ្ឋ​មន្រ្តី​ ហ៊ុន​ សែន ​បាន​ប្រកាស​ថា​​ លោក​​គួរ​​តែ​ឈប់​ជក់​​បារី​​ បន្ទាប់​ពីចៅ​ទី​១​របស់​​លោក​បាន​ត្អូញ​ត្អែរ​​អំពី​ក្លិន​ផ្សែង​បារី​​ដែល​ ជាប់​នឹង​សម្លៀក​បំពាក់ និង​មាត់​របស់​​លោក​នៅ​ពេល​ដែល​លោក​នាយក​រដ្ឋ​មន្រ្តី​ចាប់​​ឱប​ថើប​​ចៅ​ជា​ទី ​ស្រឡាញ់​​របស់​​លោក​នោះ​។​ ចាប់​ពី​ពេល​នោះ​មក​ លោក​នាយក​រដ្ឋ​មន្ត្រី​ក៏​លែង​ឃើញ​ជក់​ជា​សាធារណៈ​ផង​ដែរ​។ ​យ៉ាង​ណា​មិញ​ឪពុក​មួយ​​ចំនួន​​​ដែល​ធ្លាប់​តែ​ជក់​ក្នុង​ផ្ទះ​ក៏​ចេញ​មក​ ក្រៅ​ផ្ទះ​ព្រោះ​ខ្លាច​ប៉ះ​ពាល់​ដល់​ប្រ​ពន្ធ​កូន​ផង​ដែរ​។

នៅ​ពេល​ធ្វើ​ដំ​ណើរ​តាម​ដង​វិថី​ ម្តង​ម្កាល​យើង​បាន​ឃើញ​ក្រុម​ពូ​ៗ​ស៊ីក្លូ​ដែល​ដឹក​ភ្ញៀវ​ទេស​ចរ​បរទេស​ ហើយ​មាន​ពាក់​អាវ​ពណ៌​បៃ​តង​ដៃ​វែង​ជា​មួយ​នឹង​ស្លាក​សញ្ញា​ហាម​ជក់​បារី។

នេះ​ជា​យុទ្ធ​នា​ការ​ដ៏​ប្រ​ពៃ​មួយ​ដែល​ទី​១​ គឺ​ជា​ការ​ប្តេ​ជ្ញា​ចិត្ត​​ឈប់​ជក់​​បារី​ចំ​ពោះ​ខ្លូន​ពួក​គាត់​ និង​ទី​២​ គឺ​ជា​ការ​ផ្តល់​សារ​ដ៏​​សំ​ខាន់​​ទៅ​អ្នក​ដ​ទៃ​ទៀត​ផង​។​​ ខណៈ​នេះ​ដែរ ​​ដោយ​សារ​​​ការ​រីក​ចម្រើន​នៃ​ការ​ផ្លាស់​ប្តូរ​ទាំង​ច្បាប់​ និង​ឥរិយាបថ​នេះ ធ្វើ​ឲ្យ​អង្គ​ការ​សុខ​ភាព​ពិភព​លោក​ នឹង​ជូន​រង្វាន់​ដល់​លោក​ ម៉ម​ ប៊ុន​ហេង​ ជា​រដ្ឋ​មន្រ្តី​ក្រសួង​សុខា​ភិបាល​ នៅ​ទិវា​ពិភព​លោក​គ្មាន​ថ្នាំ​ជក់​ ថ្ងៃ​អង្គារ​​ស្អែក​នេះ​។

តែ​គួរ​ឲ្យ​ស្តាយ​ ផ្សែង​បារី​នៅ​តែ​គំរាម​កំ​ហែង​សុខ​ភាព​សាធារណៈ​នៅ​ស្រុក​យើង​នៅ​ឡើយ​ទេ​។ ជាង​នេះ​ទៅ​ទៀត​គឺ​មាន​មនុស្ស​កាន់​តែ​ច្រើន​ឡើង​កំពុង​តែ​ជក់​នៅ​ក្នុង​ កន្លែង​បិទ​ជិត​ដូច​ជា​​ រង្គ​សាល​ បារ៍​​ ខារ៉ា​អូ​ខេ​ ភោជ​នី​យដ្ឋាន​ ឬ​ក៏​នៅ​ក្នុង​ផ្សារ​ ចំណត​រថយន្ត​ និង​កន្លែង​ទស្សនា​កម្សាន្ត​នានា​ ​ដែល​ការ​ជក់​នោះ​មិន​គិត​ដល់​ការ​​ប៉ះ​ពាល់​សុខ​ភាព​​អ្នក​នៅ​ជុំ​វិញ​ ខ្លួន​​ដែល​មិន​ចេះ​ជក់​បារី​គឺ​គ្រោះ​ថ្នាក់​ជាង​ជក់​ទៀត​ ជា​ពិសេស​អ្នក​ធ្វើ​ការ​រាល់​ថ្ងៃ​នៅ​ខាង​ក្នុង​កន្លែង​បិទ​ជិត​ទាំង​នោះ​ ពេល​ខ្លះ​​ធំ​ក្លិន​ផ្សែង​​បារី​​ដល់​ខោ​ក្នុង​​ទៀត​ផង​។

ចំណែក​ឯ​អ្នក​រត់​ម៉ូតូ​ឌុប​វិញ​ ក៏​ទំ​នង​ជា​មិន​ទាន់​ថយ​ចុះ​នូវ​ការ​ជក់​បារី​ នៅ​ឡើយ​ទេ​។ ​ពោល​គឺ​​ពេល​ទំ​នេរ​​គាត់​អង្គុយ​ជក់​បារី​ តែ​ដល់​ពេល​មាន​ភ្ញៀវ​គាត់​បោះ​កន្ទុយ​បារី​ចោល​​ភ្លាម​គាត់​ទៅ​​ឌុប​ម៉ូយ​ របស់​គាត់​ ធ្វើ​ឲ្យ​ក្លិន​ស្អុយ​ផ្សែង​​បារី​ជាតិ​​នី​កូទីន​ដែល​ជាប់​នឹង​មាត់​គាត់​ និង​​អាវ​របស់​គាត់​ជះ​​ទៅ​អ្នក​ធ្វើ​​ដំ​ណើរ​​ដែល​អង្គុយ​នៅពី​ក្រោយ​គាត់​ នោះ​។​ ម្យ៉ាង​វិញ​ទៀត នៅ​ពេល​ខ្ញុំ​សួរ​ទៅ​មិត្ត​​ភក្តិ​របស់​ខ្ញុំ​ម្នាក់​ដែល​ជា​វេជ្ជ​បណ្ឌិត​ ថា​ ​តើ​ហេតុ​អ្វី​បាន​ជា​ឯង​ធ្វើ​គ្រូ​ពេទ្យ​​ ហើយ​ជក់​​បារី​អ៊ីចឹង​? ​គាត់​ឆ្លើយ​ឌឺ​ដង​មក​ខ្ញុំ​វិញ​ថា​៖ ​«​ពុត​គ្រូ​កុំ​ត្រាប់​ ច្បាប់​គ្រូ​ស៊ឹម​យក​!​»​។​ តើ​ពុត​របស់​លោក​គ្រូ​របៀប​នេះ​​ អាច​កែ​ប្រែ​បាន​ដែរ​ឬ​ទេ​?

ជា​សរុប​មក​ ខ្ញុំ​សង្កេត​ឃើញ​ថា​ អ្នក​ជក់​ដែល​មាន​វ័យ​ចំណាស់​ ​មាន​និន្នា​ការ​ឈប់​ជក់​បារី​ដោយ​សារ​ពួក​គាត់​ទទួល​​បាន​ការ​អប់​រំ​ ផ្សព្វ​ផ្សាយ​ ​មាន​ជំងឺ​រួម​រឹត​កាយ​ជា​ប្រចាំ​​ និង​ការ​ចំ​ណាយ​ក៏​ច្រើន​ផង​​ដែរ។​​ ចំ​ណែក​ឯ​យុវ​វ័យ​វិញ​មាន​ទំនោរ​ទៅ​រក​ការ​រៀន​ជក់​ និង​នៅ​ជា​មួយ​ក្រុម​អ្នក​ជក់​ជា​មួយ​មិត្ត​ភក្តិ​ ជា​ពិ​សេស​នៅ​កន្លែង​កម្សាន្ត​បិទ​ជិត​។​ ហេតុ​ដូច្នេះ​ហើយ​ រាជ​រដ្ឋា​ភិបាល​​គួរ​តែ​​ដំឡើង​តម្លៃ​ពន្ធ​ឲ្យ​បាន​ខ្ពស់​ និង​បង្កើត​ច្បាប់​ស្តី​ពី​ការ​ហាម​ប្រាម​ការ​ជក់​បារី​នៅ​ទី​កន្លែង​បិទ​ ជិត​ និង​ទី​កន្លែង​ទី​​សាធារណៈ​នានា​​ដែល​ធ្វើ​ឲ្យ​ប៉ះ​ពាល់​ដល់​សុខ​ភាព​ អ្នក​ដទៃ​ទៀត ​ដែល​មិន​ជក់​បារី​។ ​សព្វ​ថ្ងៃ​នេះ ​មាន​ប្រទេស​ជា​ច្រើន​​នៅ​លើ​ពិ​ភព​លោក​ បាន​និង​កំពុង​អនុ​វត្ត​ច្បាប់​ហាម​ប្រាម​នេះ ហើយ​ប្រទេស​ដែល​ចាប់​ផ្តើម​នាំ​មុខ​គេ​គឺ​ប្រ​ទេស​សិង្ហ​បុរី​ និង​ប្រ​ទេស​ស្កុត​លែន​ ​រីឯ​​ប្រ​​ទេស​​ចិន​​​បាន​​ចាប់​​ផ្តើម​​អនុ​​វត្ត​​​ច្បាប់​​​នេះ​​​យ៉ាង​ ​តឹង​​រឹុង​​កាល​ពី​ខែ​មុន​នេះ​។ ​ជា​ង​នេះ​ទៅ​ទៀត​​ យើង​ម្នាក់​ៗ​ត្រូវ​ចេះ​ហ៊ាន​និ​យាយ​ទៅ​កាន់​អ្នក​ដែល​ជក់​បារី​ កុំ​ឲ្យ​បង្ហុយ​ផ្សែង​​បារី​ដាក់​យើង​។ អ្នក​ជក់​បារី​មិន​គ្រាន់​តែ​ជា​ឃាតក​​សម្លាប់​ខ្លួន​ឯង​ទេ ​តែ​ជា​ឃាតក​សម្លាប់​អ្នក​ដែល​នៅក្បែរ​គេផង​ដែរ​​៕

សូម​ចូល​រួម​ផ្តល់​យោបល់​តាម​រយៈ​ soprach.tong@phnompenhpost.com

អត្ថបទគួរចាប់អារម្មណ៍