The Phnom Penh Post Search

Search form

Logo of Phnom Penh Post newspaper Phnom Penh Post - ទីលាន​បាល់ទាត់​មិនមែន​ជា​កន្លែង​ទាត់​ធាក់​គ្នា​ទេ!

ទីលាន​បាល់ទាត់​មិនមែន​ជា​កន្លែង​ទាត់​ធាក់​គ្នា​ទេ!

Content image - Phnom Penh Post
កីឡាករ ចាន់ វឌ្ឍនាកា (អាវខៀវ) កំពុង​ដណ្តើម​បាល់​ក្នុង​ការ​ប្រកួត​កន្លង​មក​។ ស្រេង ម៉េងស្រ៊ុន

ទីលាន​បាល់ទាត់​មិនមែន​ជា​កន្លែង​ទាត់​ធាក់​គ្នា​ទេ!

ថ្ងៃ​នេះ​គឺជា​ការ​ប្រកួត​បាល់ទាត់​លក្ខណៈ​មិត្តភាព​អន្តរជាតិ​រវាង​កម្ពុជា និង​ហុងកុង​ដែល​សំបុត្រ​កន្លែង​អង្គុយ​មាន​ដំបូល​​​ត្រូវ​បាន​លក់​អស់​តាំង​ពី​ថ្ងៃ​ចន្ទ​ដើម​សប្តាហ៍​មក​ម្ល៉េះ។​ នេះ​បើ​តាម​ហ្វេសប៊ុក​​របស់​សហព័ន្ធ​កីឡា​បាល់ទាត់​កម្ពុជា​ (FFC)​។

នេះ​ក៏​ដោយសារ​ការ​រីក​ចម្រើន​វិស័យ​បាល់ទាត់​ប្រកួត​ជា​លក្ខណៈ​អន្តរជាតិ​គួរ​ឲ្យ​កត់សម្គាល់​ជា​ពិសេស​ក្នុង​ចំណោម​ស្រទាប់​យុវជន​នាំ​គ្នា​ពពាក់​ពពូន​ទៅ​ទស្សនា​នៅ​ពេល​ក្រុម​ជម្រើស​ជាតិ​លេង​ម្តងៗ​ឡើង​ណែន​ស្តាត​អូឡាំពិក។

ចំនួន​កើនឡើង​នេះ​ត្រូវ​បាន​សហព័ន្ធ​កីឡា​បាល់ទាត់​ប្រចាំ​អាស៊ី (AFC) រាយការណ៍​ថា​អត្រា​ជា​មធ្យម​នៃ​អ្នក​ទស្សនា​បាល់​ទាត់​នៅ​ពហុកីឡដ្ឋាន​ជាតិ​អូឡាំពិក​​ជាប់​លំដាប់​លេខ​ ២ ប្រចាំ​អាស៊ី​បន្ទាប់ពី​ប្រទេស​ជប៉ុន​។

ការ​រីកចម្រើន​នេះ​ក៏​មាន​ការ​ចូលរួម​រៀបចំ​ពី​សហព័ន្ធ​បាល់ទាត់​តាំងពី​ទីលាន​បាល់ទាត់​របៀប​លេង​ពេល​យប់​កីឡាករ​យើង​លែង​ខ្វាក់​មាន់​ និង​ការ​កម្ចាត់​នូវ​អំពើ​ពុករលួយ​លក់ដូរ និង​ការ​កំណត់​គ្រាប់​បាល់​បញ្ចូល​ទី​ថ្មីៗ​នេះ​ផង​​ដែរ។

តែ​ការ​ប្រកួត​ក្នុង​ក្របខ័ណ្ឌ​ខេមបូឌៀលីក​ដណ្តើម​ពាន​រង្វាន់​ក្នុង​ស្រុក​ប្រចាំ​ឆ្នាំ និង​ពាន​រង្វាន់​សម្តេច​ ហ៊ុន សែន ដែល​ដើរ​តួនាទី​សំខាន់​ក្នុង​ការ​ពង្រឹង​សមត្ថភាព និង​ទេពកោសល្យ​កីឡាករ​របស់​ក្លិប​នីមួយៗ​សម្រាប់​ជ្រើសរើស​ចូល​​ជម្រើស​ជាតិ​នៅ​មិន​ទាន់​មាន​ការ​ចាប់​អារម្មណ៍​អ្នក​ចូលរួម​ទស្សនា​នៅ​ឡើយ​ទេ​។

ម្យ៉ាង​វិញ​ទៀត​ការ​លេង​នៅ​ក្លិប​អាច​ធ្វើ​ឲ្យ​កីឡាករ​សំខាន់ៗ​មាន​របួស​រយៈពេល​យូរ​ហើយ​បញ្ហា​ប៉ះពាល់​ដល់​ការ​លេង​ឲ្យ​ជម្រើស​ជាតិ​ទៀត​បើ​ទោះបី​ជា​ក្លិប​មាន​លទ្ធភាព​ក្នុង​ការ​ធានា​ការ​ព្យាបាល​ដល់​កីឡាករ​ក៏ដោយ​។ ការ​ដែល​បណ្តាល​ឲ្យ​កីឡាករ​រងរបួស​ធ្ងន់ធ្ងរ​នេះ​មាន ២ កត្តា​គឺ ទី​ ១- ករណី​អចេតនា​គឺ​កីឡាករ​ប៉ះទង្គិច​ជាមួយ​កីឡាករ​ភាគី​ម្ខាង​ទៀត​ដោយ​ចៃដន្យ​បណ្តាល​​ឲ្យ​កីឡាករ​របួស ឬ​ក៏​កីឡាករ​រត់ ឬ​ក៏​លេង​ខុស​ទំនង​ក៏​អាច​ឲ្យ​របួស​រយៈពេល​វែង​បាន​ដែរ​វា​ជា​រឿង​ធម្មតា​របស់​កីឡា​បាល់ទាត់។ កត្តា​ទី ២- កីឡាករ​រងរបួស​ដោយសារ​កីឡាករ​ភាគី​ម្ខាង​ទៀត​មាន​ចេតនា​បង្ក​ឲ្យ​មាន​របួស​ដោយ​កំហឹង ឬ​ក៏​គ្រូបង្វឹក​មាន​ចេតនា​​រំខាន​​ដល់​កីឡាករ​សំខាន់ (Key player) ភាគី​ម្ខាង​ទៀត​មាន​លក្ខណៈ​ធ្ងន់ធ្ងរ​ឲ្យ​កូន​សិស្ស​លេង​ធាក់​បន្លំ​ទៅ​ជាមួយ​នឹង​បាល់​ដើម្បី​កាច់​បំបាក់​គូ​បដិបក្ខ​ឲ្យ​ចុះ​ទន់ខ្សោយ​។

ករណី​មាន​ចេតនា​ធ្វើឲ្យ​កីឡាករ​រងរបួស​ធ្ងន់ធ្ងរ​​នេះ​នៅក្នុង​ពិភព​បាល់ទាត់​នៅ​ប្រទេស​អង់គ្លេស​គឺ​សហព័ន្ធ​បាល់ទាត់​ (The FA) គេ​ចាក់​មើល​ឡើង​វិញ​ថា​តើ​ការ​លេង​ហ្នឹង​មាន​បំណង​ធាក់ ឬ​ក៏​ជាន់​ឲ្យ​របួស​ដែរ​ឬអត់?​ ដូច​កាល​ពី​ខែ​មុន​នេះ​ករណី​កីឡាករ​ Aguero របស់​ក្លិប​មេនឆេស្ទ័រស៊ីធី​បាន​លេង​ហិង្សា​ទៅ​លើ​កីឡាករ​ Winston របស់​ក្លិប​វែសហ៊ែម​ដែល​អាជ្ញា​កណ្តាល​មើល​មិន​ឃើញ​ចេតនា​តែ​បន្ទាប់​មក​សហព័ន្ធ​បាន​ធ្វើការ​ចាក់​ឡើង​វិញ​មើល​ការ​ប្រព្រឹត្ត​របស់​ Aguero ​តែ​ភ្លាមៗ​សហព័ន្ធ​បាន​ព្យួរ​ការ​ប្រកួត​ Aguero បី​ប្រកួត​។

កាលពី​​ឆ្នាំ​ទៅ​កីឡាករ​ Costa របស់​ក្លិប​ឆែលស៊ី​ក៏​ត្រូវ​សហព័ន្ធ​ពិន័យ​ព្យួរ​ ៣ ប្រកួត​ដែរ​បន្ទាប់ពី​ប្រកួត​ចប់ សហព័ន្ធ​ចាក់​មើល​សកម្មភាព​ឡើង​វិញ​ឃើញ​ថា​មាន​ប្រើ​ហិង្សា​លើ​កីឡាករ​ Koscielny ​របស់​ក្លិប​អាសឺណាល (thefa.com)។ រីឯ​គ្រូបង្វឹក​ដែល​គ្រប់គ្រង​ដែល​ចូល​រៀបចំ​លេង​របៀប​តាក់ទិច​រំខាន​ភាគី​បដិបក្ខ​ត្រូវ​បាន​គេ​មើល​ឃើញ​នោះ​គឺ​លោកគ្រូ Mourinho អ្នក​ចាត់ការ​ក្លិប​មែនឆែស្ទឺយូណាយធីត​សព្វ​ថ្ងៃ​នេះ និង​លោកគ្រូ Simeone របស់​អាទិលីកូម៉ា ឌ្រីដ នៅ​ប្រទេស​អេស្ប៉ាញ​។

សម្រាប់​នៅ​ស្រុក​ខ្មែរ​ដែល​ខ្ញុំ​បាន​ទស្សនា​ការ​ប្រកួត​បាល់ទាត់​ជាង​ ៣០ ​ឆ្នាំ​ទៅ​ហើយ​គ្មាន​ការ​ចាក់​ឡើង​វិញ​ធ្វើការ​ពិន័យ​លើ​កីឡាករ​នោះ​ទេ​តែ​អាជ្ញា​កណ្តាល​កាត់​សេចក្តី​ហើយ​គឺ​ចប់​ហើយ​។

ទោះបី​ជា​គ្មាន​ការ​ចាក់​ឡើង​វិញ​ក្តី​ក៏​ទស្សនិកជន​មាន​ការ​ជជែក​គ្នា​ពី​បញ្ហា​កីឡាករ​ខ្លះ​លេង​ហិង្សា​កាចៗ​ទាត់ធាក់​គ្នា​ក្នុង​ទីលាន​បាល់ទាត់​ហាក់បី​ដូចជា​មាន​ចេតនា​ទៅ​លើ​កីឡាករ​ភាគី​ម្ខាង​ទៀត។ ដូច​រដូវកាល​នេះ​ឃើញ​មាន​កីឡាករ​ ២ ​នាក់​របួស​ធ្ងន់ធ្ងរ​មាន​ម្នាក់​គឺ​កីឡាករ​ឆ្នើម ប្រាក់ មុន្នីឧត្តម ក្លិប​ព្រះខ័នរាជ​ស្វាយរៀង​របួស​ ៣ ​ខែ​ហើយ​ខកខាន​លេង​ឲ្យ​ជម្រើស​ជាតិ​ទៀត​ផង​រីឯ​ម្នាក់​ទៀត​កីឡាករ​ Yuya ជនជាតិ​ជប៉ុន​របស់​ក្លិប​បឹងកេតអង្គរ​របួស​ ៤ ​ខែ​ទម្រាំ​លេង​បាន​ស្រួល​វិញ។

កីឡាករ​ទាំង​ ២ ​នាក់​នេះ​គឺ​ត្រូវ​បាន​ជាន់​ឲ្យ​របួស​ដោយ​កីឡាករ ស ពិសិដ្ឋ ខ្សែ​ការពារ​របស់​ក្លិប​កងទ័ព​តែ​អាជ្ញាកណ្តាល និង​សហព័ន្ធ​ FFC គ្មាន​បាន​ពិនិត្យ​ឡើង​វិញ និង​ធ្វើការ​ពិន័យ​ទៅ​កីឡាករ ពិសិដ្ឋ ​ទេ​តែ​ថែម​ទាំង​គ្រូ​ Lee ជនជាតិ​កូរ៉េ​កោះ​ហៅ​ឲ្យ​ចូល​ជម្រើស​ជាតិ​ទៀត​ផង​។

នេះ​គឺ​អាច​ករណី​សិក្សា​មួយ​ថា​តើ​ជា​តាក់ទិច​របស់​គ្រូបង្វឹក​ក្លិប​កងទ័ព​ដែរ​ឬ​ទេ​? ក្នុង​ការ​ធ្វើ​យ៉ាង​ណា​ឲ្យ​ក្លិប​របស់​ខ្លួន​ឈ្នះ​ពាន​រង្វាន់​ក្នុង​ការ​បំបាក់​កីឡករ​សំខាន់​នោះ​? ព្រោះ​ករណី​របួស​របស់​កីឡាករ​ឧត្តម របស់​ខេត្ត​ស្វាយរៀង​ដែល​ជា​កីឡាករ​សំខាន់​ (Key player) ដោយសារ​កីឡាករ ពិសិដ្ឋ គឺ​នៅ​នាទី​ទី​ ៧ ពេល​ប្រកួត​ផ្តាច់ព្រ័ត្រ​រវាង​ក្លិប​កងទ័ព និង​ខេត្ត​ស្វាយរៀង​គឺ​នៅ​ពេល​កីឡាករ​ ឧត្តម ត្រូវ​បាន​គេ​សែង​ចេញ​ពី​ទីលាន​ធ្វើ​ឲ្យ​ក្លិប​ស្វាយរៀង​ចុះ​ខ្សោយ​អស់​ឱកាស​យក​ឈ្នះ​ក្លិប​កងទ័ព​នៅ​ចប់​ការ​ប្រកួត​គឺ​ក្លិប​កងទ័ព​ជា​អ្នក​លើក​ពាន​សម្តេច​ ហ៊ុន សែន កាលពី​ដើម​ខែ​កក្កដា​កន្លង​ទៅ​នេះ​។

ដូច​គ្នា​នេះ​ដែរ​កីឡាករ Yuya ដែល​ជា​កីឡាករ​សំខាន់​របស់​បឹងកេត​ក៏​ត្រូវ​របួស​កជើង​ធ្ងន់ធ្ងរ​ដោយសារ​កីឡាករ ស ពិសិដ្ឋ ដែល​ខណៈ​ដែល​ក្លិប​ ២ ​នេះ​ប៉ះ​គ្នា​នៅ​​ពាក់​កណ្តាល​ខែ​កក្កដា​កន្លង​ទៅ​នេះ​ដែរ ដែល​ធ្វើ​ឲ្យ​ក្លិប​កងទ័ព​នៅ​ប្រដេញ​កៀក​នឹង​ក្លិប​បឹងកេត​ដែរ​តែ​ដោយសារ​ក្លិប​បឹងកេត​គេ​មាន​កីឡាករ​​ល្អៗ​អាច​ជំនួស​ Yuya បាន​ធ្វើ​ឲ្យ​ក្លិប​បឹងកេត​លើក​ពាន​ខេមបូឌៀ​លីក​ប្រចាំ​ឆ្នាំ​ ២០១៦ ​នេះ។

ជាង​នេះ​ទៅ​ទៀត​ក្លិប​ជាច្រើន​នៅ​លេង​ក្នុង​លីក​មាន​ការ​ញញើត​ញញើម​នៅ​ពេល​ដែល​ក្លិប​របស់​ខ្លួន​ប៉ះ​ជាមួយ​នឹង​ក្លិប​កងទ័ព និង​ប៉ះ​ជាមួយ​ក្លិប​ណាហ្គា​ដែល​មាន​ប្រវត្តិ​ខ្សែ​ការពារ​កាចៗ​ទាត់​ទៅ​ទាំង​បាល់​ទៅ​ទាំង​មនុស្ស។

នេះ​ជា​បញ្ហា​ដែល​សហព័ន្ធ​គួរ​តែ​ពិចារណា​ឡើង​វិញ​​ធ្វើការ​កំណែ​ទម្រង់​ប្រព័ន្ធ​លេង​បាល់ទាត់​នៅ​កម្ពុជា​នោះ​ដែល​កន្លង​មក​ធ្វើ​បាន​តែ​ការ​ឲ្យ​កាត​ក្រហម​ទៅ​កីឡាករ​ទេ​ដូច​ករណី​អ្នក​ចាំទី​របស់​ក្លិប​វេស្ទើន ឈ្មោះ សុះ ប្រុសហ៊ីម បាន​មាន​ចេតនា​ធាក់​កីឡាករ អ៊ិន សុដាវីត កីឡាករ​របស់​ក្លិប​ភ្នំពេញ​ក្រោន​គឺ​អាជ្ញា​កណ្តាល​ឲ្យ​កាត​ក្រហម​បណ្តេញ​ចេញ​ភ្លាម​ហើយ​ឲ្យ​បាល់​ប៉េណាល់ទី​ទៀត​។

ក្នុង​ករណី​នេះ​សហព័ន្ធ​ក៏​ត្រូវ​តែ​ចាក់​មើល​ឡើង​វិញ​ពី​កម្រិត​នៃ​​ការ​ប្រើ​ហិង្សា​នេះ​ដើម្បី​ដាក់​បន្ទុក​បន្ថែម​ទៀត​ដើម្បី​លុប​បំបាត់​ការ​ប្រើ​ហិង្សា​នៅ​លើ​ទីលាន​បាល់ទាត់​។ ករណី​ប៉ះ​ទង្គិច​គ្នា​ខ្លះ​សហព័ន្ធ​បាល់ទាត់​ក៏​អាច​ពិនិត្យ​ឡើង​វិញ​ដែរ​ដើម្បី​ធ្វើការ​ព្រមាន​កុំ​ឲ្យ​មាន​ការ​គុំកួន​គ្នា​ទៅ​ថ្ងៃ​ក្រោយ​នោះ​ក្នុង​ករណី​លើក​ជើង​ខ្ពស់​ជ្រុល ឬ​ស្លាយ​ខ្លាំងៗ​ដែល​បង្ក​ឲ្យ​គ្រោះថ្នាក់​បាន​ដូចជា​ករណី​ការ​លើក​ជើង​​ខ្ពស់​របស់​អ្នក​ចាំទី​ក្លិប​បឹងកេត ស៊ូ យ៉ាទី ជ្រុល​ប៉ះ​ទៅ​នឹង​ដង​ខ្លួន​កីឡាករ In Young ជនជាតិ​កូរ៉េ​ខាង​ត្បូង​របស់​ក្លិប​ភ្នំពេញ​ក្រោន​កាលពី​លេង​ជុំ​ទី​២​។ ដូច​គ្នា​នេះ​ដែរ​ករណី​ប៉ះទង្គិច​គ្នា​រវាង​កីឡាករ លី ជុងហូ ជនជាតិ​កូរ៉េ​ខាង​ត្បូង​របស់​ក្លិប​ខេត្ត​ស្វាយរៀង​បាន​ស្លាយ​យក​បាល់​យ៉ាង​ខ្លាំង​ប៉ះ​នឹង​កីឡាករ​ កុក ប៊ូរីស របស់​ភ្នំពេញ​ក្រោន​។

តែ​ទោះ​​យ៉ាង​ណា​ក្លិប​នីមួយៗ​មាន​ការ​ត្អូញត្អែរ​ពី​ក្លិប​របស់​ខ្លួន​មាន​កីឡាករ​សំខាន់​របួស​ច្រើន​ដែល​ធ្វើ​ឲ្យ​មាន​ការ​បាត់បង់​ការ​ប្រកួត​យក​តំណែង​ជើងឯក​ដែរ​។ សូម្បី​តែ​លោក មាស ចាន់ណា គ្រូ​បង្វឹក​ក្លិប​ណាហ្គា​ក៏​បាន​លើក​ឡើង​ពី​ការ​របួស​កីឡាករ​សំខាន់ៗ​របស់​ខ្លួន​ថា​បាន​បាត់បង់​ឱកាស​ដណ្តើម​ពាន​រង្វាន់​ខេមបូឌាលីក​​ឆ្នាំ​នេះ​ដែរ​គឺ​ក្លិប​របស់​លោក​បាន​ត្រឹម​តែ​ចំណាត់​​ថ្នាក់​លេខ​ ៣ ​​តែ​ប៉ុណ្ណោះ​។

សរុប​មក​វិញ​បើ​សហព័ន្ធ​ FFC មិន​ចាត់​វិធានការ​លើ​អំពើ​ហិង្សា​ដោយ​ចេតនា​នៅ​លើ​ទីលាន​បាល់ទាត់​នោះ​ទេ​គឺ​យូរៗ​ទៅ​អស់​កីឡាករ​សំខាន់ៗ​​លេង​ឲ្យ​ប្រទេស​ជាតិ​ធ្វើឲ្យ​ធា្លក់​ទម្រង់​លេង​។ ជាក់ស្តែង​កាលពី​ឆ្នាំ​ទៅ​គ្រាន់​តែ​កីឡាករ​សំខាន់​​ ២ ​នាក់​ ចាន់ វឌ្ឍនាកា និង​ ប្រាក់ មុន្នីឧត្តម ទៅ​លេង​ឲ្យ​ U23 សម្រាប់​ ASEAN GAMES 2015 នៅ​ប្រទស​សិង្ហបុរី​រីឯ​ជម្រើស​ជាតិ​ចាញ់​សិង្ហបុរី​ដល់​ទៅ​ ៤ ​ទល់​នឹង​​ 0។

នៅ​ពេល​ដែល​កីឡាករ​ ២ ​រូប​នេះ​លេង​វិញ​ឃើញ​ថា​មាន​សាច់​បាល់​លេង​ល្អ​មើល​ហើយ​អាច​រក​គ្រាប់​បាល់​បាន​ជួន​កាល​អាច​ឈ្នះ​ទៀត​ផង​បើ​សមត្ថភាព​ប្រទេស​នោះ​ប្រហាក់​​ប្រហែល​គ្នា​។ ជាពិសេស​ ខែ​តុលា​​នេះ ​ជម្រើស​ជាតិ​មាន​ការ​ប្រកួត​ថ្នាក់​អន្តរជាតិ​ដល់​ទៅ ៥ ​ប្រកួត​ការ​របួស​កីឡាករ​គឺជា​ការ​ព្រួយបារម្ភ​ដែល​អាច​ធ្វើ​ឲ្យ​ធ្លាក់​ទម្រង់​លេង​ផង​ដែរ​ហើយ​ក៏​អាច​ធ្វើឲ្យ​ប៉ះពាល់​ចំណាត់ថ្នាក់​ FIFA ដែល​កម្ពុជា​កំពុង​តែ​ឡើង​បាន​ចំណាត់​ថា្នក់​ ១៧៣ ផង​ដែរ​ពោល​គឺ​ FIFA អាច​ទម្លាក់​វិញ​បើក​ម្ពុជា​លេង​អន់​នោះ​៕

តុង សុប្រាជ្ញ
ចូលរួម​ផ្តល់​យោបល់​តាមរយៈ soprach.tong@phnompenhpost.com

អត្ថបទគួរចាប់អារម្មណ៍