The Phnom Penh Post Search

Search form




Logo of Phnom Penh Post newspaper Phnom Penh Post - បញ្ហា​ភ្លើង​ប្រចណ្ឌ សហាយ​ស្មន់​ក្លាយ​ជា​ឧក្រិដ្ឋ​កម្ម​គួរ​ឲ្យ​តក់​ស្លុត

បញ្ហា​ភ្លើង​ប្រចណ្ឌ សហាយ​ស្មន់​ក្លាយ​ជា​ឧក្រិដ្ឋ​កម្ម​គួរ​ឲ្យ​តក់​ស្លុត

ក្រុម​ស្ត្រី​បាន​នាំ​គ្នា​ធ្វើ​ការ​តវ៉ា​ដើម្បី​លុប​បំបាត់​ការ​ប្រើ​ហិង្សា​លើ​ស្ត្រី។
ក្រុម​ស្ត្រី​បាន​នាំ​គ្នា​ធ្វើ​ការ​តវ៉ា​ដើម្បី​លុប​បំបាត់​ការ​ប្រើ​ហិង្សា​លើ​ស្ត្រី។ ហេង ជីវ័ន

បញ្ហា​ភ្លើង​ប្រចណ្ឌ សហាយ​ស្មន់​ក្លាយ​ជា​ឧក្រិដ្ឋ​កម្ម​គួរ​ឲ្យ​តក់​ស្លុត

រដូវ​កឋិនទាន​ចូល​មក​ដល់​ហើយ សំឡេង​ស្គរ​ឆៃយ៉ាំ​ក៏​ឮ​សូរ​ដូច​ជា​ថា៖ «ចាស់​ឡើង​ព្រើល​ឡើងៗ ចាស់​ឡើង​ព្រើល​ឡើងៗ ព្រើល​ឡើងៗៗៗ»។ នេះ​គឺ​ឃ្លា​ដែល​ត្រូវ​បាន​គេ​តែង​តែ​លើក​មក​ចំអក​ទៅ​បុរសៗ​ដែល​មាន​វ័យ​ចំណាស់​ហើយ​មួយ​ចំនួន ខិល​ខូច​មាន​ប្រពន្ធ​ហើយ​ទៅ​លប​លួច​មាន​ស្រី​ស្នេហ៍​ខាង​ក្រៅ​ទៀត បាន​ជា​គេ​លើក​ឡើង​ដូច​នេះ ដែល​កាល​ពី​សម័យ​សង្គ្រាម និង​បន្ទាប់​ពី​សង្គ្រាម​ភ្លាមៗ ម្នាក់ៗ​អត់​ឃ្លាន​គឺ​ធ្វើ​យ៉ាង​ណា​ឲ្យ​តែ​បាន​ម្ហូប​អាហារ​ហូប​ដើម្បី​បំពេញ​ក្រពះ​យក​រស់​សិន។

តែ​មក​ដល់​ឥឡូវ​នេះ នៅ​ពេល​មាន​អាហារ​ហូប​គ្រប់​គ្រាន់​ហើយ​សម្រាប់​ក្រពះ តែ​មាន​មនុស្ស​មួយ​ចំនួន​គិត​គូរ​ពី​ចំណង់​បំប៉ន​តណ្ហា​ផ្លូវ​ភេទ​វិញ​ម្តង ពេល​ខ្លះ​មាន​ប្រពន្ធ ឬ​ក៏​បី្ត​មួយ​ហើយ​នៅ​មិន​ស្កប់​ទេ​ទៅ​រក​អ្នក​ផ្សេងៗ​ទៀត ឬ​ក៏​ខ្លះ​ទៀត​អាក្រក់​ណាស់​បើ​ស្រឡាញ់​អ្នក​ណា​ម្នាក់​ហើយ បើ​មិន​បាន​ម្នាក់​នោះ​ទេ អ្នក​ណា​ក៏​យក​មិន​បាន​ដែរ។ គំណិត​ងប់ងុល​នឹង​តណ្ហា​ក្រាស់​បែប​នេះ ដែល​ជា​ហេតុ​ផល​ចម្បង​បង្ក​ឲ្យ​មាន​បញ្ហា​ហិង្សា​យេនឌ័រ រវាង​បុរស និង​ស្ត្រី​នៅ​ក្នុង​សង្គម​ខ្មែរ​បច្ចុប្បន្ន​នេះ។

ព្រលឹម​ឡើង​ឲ្យ​តែ​បើក​កញ្ចក់​ទូរទស្សន៍ បើក​ស្តាប់​វិទ្យុ ឬ​ក៏​អាន​កាសែត​ក្នុង​ស្រុក​គឺ​ភាគ​ច្រើន​ចេញ​មក​សុទ្ធ​តែ​គ្រោះថ្នាក់​ចរាចរណ៍ និង​ឧក្រិដ្ឋកម្ម ជា​ពិសេស​គឺ​អំពើ​ហិង្សា​យេនឌ័រ​តែ​ម្តង ជាមួយ​នឹង​ការ​បន្ថែម​បន្ថយ​លាយ​ល្បោយ​បញ្ចេញ​បញ្ចូល​ទៅ​ករណី​ដែល​កើត​ឡើង​ទៀត​ផង។

បើ​ទោះ​បី​ជា​និន្នាការ​បញ្ហា​អំពើ​ហិង្សា​ក្នុង​គ្រួសារ​មាន​ការ​ថយ​ចុះ​ពី ១ ក្នុង​ចំណោម​ស្ត្រី ៤ នាក់​មក​ម្នាក់​ក្នុង​ចំណោម​ស្ត្រី ៥ នាក់​ក៏​ដោយ (CDHS, 2005 & MOWA, 2009) ក៏​នៅ​ប៉ុន្មាន​សប្តាហ៍​ចុង​ក្រោយ​នេះ​អំពើ​ហិង្សា​យេនឌ័រ​សាហាវ​ឃោរឃៅ​ខុស​ប្លែក​ពី​ធម្មតា​កក្រើក​ឡើង​គួរ​ឲ្យ​កត់​សម្គាល់​ដូច​ជា៖ ករណី​ទាហាន​ផ្កាយ ២ សម្លាប់​ស្រី​កំណាន់​អាយុ ២៧​ឆ្នាំ និង​កូន​ខ្លួន​ឯង​អាយុ ៦​ឆ្នាំ ដោយ​សារ​ភ្លើង​ប្រចណ្ឌ​ថា មាន​សហាយ​ស្មន់​ជាមួយ​បុរស​បរទេស​តាម​រយៈ​ហ្វេសប៊ុក​ហើយ​ស្ត្រី​រង​គ្រោះ​នោះ​សុំ​បែក។

មាន​ករណី​សហាយ​ស្មន់ មេប៉ុស្តិ៍​រង​ចាក់​អង្រែ​ត្រូវ​ប្រពន្ធ​ចុង​ចាក់​ស្លាប់​នឹង​កាំបិត។ រីឯ​នៅ ខេត្ត​ព្រៃវែង វិញ ប្តី​ចាក់​ប្រពន្ធ​នឹង​កាំបិត​ស្រួច ដែល​ករណី​បង្ក​ឡើង​ពី​ការ​ប្រចណ្ឌ​ក្រោយ​ពី​លែង​លះ​គ្នា​ប៉ុន្មាន​ខែ​ហើយ​ប្តី​មក​សុំ​ជានា​គ្នា​វិញ។

មាន​ករណី​ប្តី តូច​ចិត្ត​នឹង​ប្រពន្ធ​សុំ​លែង ទិញ​សាំង​យក​មក​ដុត​ខ្លួន​ឯង​ធ្វើ​អត្តឃាត។ ករណី​ប្រចណ្ឌ​នៅ ខេត្ត​កំពង់ឆ្នាំង គឺ​ប្តី​បាន​ផឹក​ស្រា​ស្រវឹង ហើយ​យក​អង្រែ​បុក​គ្រឿង​មក​វាយ​ប្រពន្ធ​បណ្តាល​ឲ្យ​របួស​ធ្ងន់។

នៅ​ឯ ខេត្ត​កំពង់ចាម ឯ​ណោះ​វិញ​គឺ​យុវជន​ម្នាក់​ដឹង​ថា​សង្សារ​ខ្លួន​ជិត​រៀបការ​ជាមួយ​បុរស​ផ្សេង យុវជន​ហ៊ាន​ចាក់​សម្លាប់​មិត្ត​ស្រី​នោះ​ហើយ​យក​កាំបិត​នោះ​មក​ចាក់​ខ្លួន​ឯង​ធ្វើ​អត្តឃាត​តែ​ខ្លួន​ឯង​មិន​ស្លាប់​ជាដើម។

ករណី​ទាំង​អស់​នេះ​គឺ​កំពុង​ដំណើរ​កាត់​ទោស​ជន​ល្មើស និង​ខ្លះ​ទៀត​កំពុង​ស៊ើប​អង្កេត​តាម​ចាប់​ខ្លួន​នៅ​ឡើយ។ នេះ​គឺជា​បញ្ហា​ឃាតកម្ម​សង្គម​មួយ​ដែល​មិន​គួរ​កើត​មាន​សោះ​ដោយ​សារ​ការ​បំពេញ​តណ្ហា​ផ្លូវ​ភេទ​តែ​មួយ​គត់​ធ្វើ​ឲ្យ​មនុស្ស​ហ៊ាន​លើក​ដៃ​សម្លាប់​មនុស្ស​ដោយ​គ្មាន​ញញើត​ដៃ​អ្វី​បន្តិច​សោះ មិន​ថា​ឡើយ​អ្នក​មាន​ចំណេះ​ដឹង អ្នក​អវិជ្ជា ឬ​អ្នក​មាន អ្នក​ក្រ ឬ​ក៏​អ្នក​នយោបាយ អ្នក​តាក់​តែង​ច្បាប់​ទេ។

បើ​ផ្អែក​លើ​របាយ​ការណ៍​ប្រចាំ​ឆ្នាំ​របស់​ប៉ូលិស​ក្រសួង​មហាផ្ទៃ ស្តីពី​បទ​ឧក្រិដ្ឋ​មិន​បាន​យក​ទិន្នន័យ​អំពើ​ហិង្សា​យេនឌ័រ​នោះ​យក​មក​ធ្វើ​ការ​វិភាគ​លម្អិត​បែង​ចែក​ថា តើ​មាន​ប៉ុន្មាន​ភាគរយ ឬ​មួយ​ក៏​និន្នាការ​កើន​ឡើង​ឬ​ក៏​ថយ​ចុះ​នូវ​បទល្មើស​នោះ​ទេ និង​មូលហេតុ​ពិត​ប្រាកដ​របស់​វា។ បើ​និយាយ​ពី​ច្បាប់​សម្រាប់​ដោះ​ស្រាយ​អំពើ​ហិង្សា​យេនឌ័រ​សរុប​ទៅ​នឹង​ច្បាប់​រដ្ឋ​ធម្មនុញ្ញ​ក៏​បាន​ចែង​អំពី​ប្តី​មួយ​ប្រពន្ធ​មួយ​ដែរ និង​មាន​ច្បាប់​ពីរ​រួច​ហើយ​គឺ​ច្បាប់​ប្រឆាំង​នឹង​អំពើ​ហិង្សា​ក្នុង​គ្រួសារ និង​ច្បាប់​ស្តីពី​ឯក​ព័ន្ធភាព ហើយ​ច្បាប់​ទាំង ២ នេះ​ហាក់​បី​ដូច​ជា​ប្រើ​មិន​អស់​ប្រសិទ្ធភាព ឬ​ក៏​មិន​អើពើរ​ជាមួយ​សោះ​ដូច​ច្បាប់​ឯកព័ន្ធភាព​អ៊ីចឹង ប្រើ​បាន​សម្រាប់​តែ​ករណី នរោត្តម រណឫទ្ធិ និង​លោក ខែក រ៉ាវី អតីត​រដ្ឋលេខាធិកា​ក្រសួង​ពាណិជ្ជកម្ម និង​ប្រធាន​សហព័ន្ធ​បាល់ទាត់?

ពេល​ខ្លះ​មើល​ទៅ​សកម្មភាព​បទ​ឧក្រិដ្ឋ​នៃ​អំពើ​ហិង្សា​យេនឌ័រ​ទាំង​នេះ​នៅ​លើ​សារ​ព័ត៌មាន ឬ​ក៏​វីដេអូ​ឃ្លីប​ដែល​គេ​បង្ហោះ​នៅ​តាម​ហ្វេសប៊ុក​អ៊ីចឹង គឺ​ហាក់​ដូច​រៀន​ពី​ភាព​ហិង្សា​តាម​ខ្សែ​ភាពយន្ត និង​បទ​ចម្រៀង​ខារ៉ាអូខេ​អ៊ីចឹង។ ឧទាហរណ៍​បទ​ចម្រៀង​ខារ៉ាអូខេ​របស់​ផលិតកម្ម​ថោន ចេញ​បទ៖ «កុំ​ទាន់​ស្រឡាញ់​គេ ឲ្យ​ខ្លាំង​ជាង​បង» ដោយ​អ្នក​ចម្រៀង ខេម។

នៅ​ក្នុង​រូបភាព​បទ​នេះ បង្ហាញ​យ៉ាង​ច្បាស់​ភ្លើង​ប្រចណ្ឌ និង​ការ​ប្រើ​ប្រាស់​អាវុធ​ខុស​ច្បាប់​ដោយ​ជន​ស៊ីវិល បាញ់​បោះ​សេរី​បែប​អនាធិបតេយ្យ តាំង​ពី​ចាប់​ផ្តើម និង​នៅ​វគ្គ​បញ្ចប់​តួ​ប្រុស​លើក​កាំភ្លើង​ប៉ុន​ប៉ង​សម្លាប់​បុរស ទី២ កំពុង​រៀបការ​ជាមួយ​នឹង​សង្សារ​របស់​ខ្លួន តែ​ត្រូវ​សង្សារ​ចាស់​ស្រី​បាន​បាញ់​សម្លាប់​តួ​ប្រុស​នៅ​ក្នុង​រោងការ​ឡើង​ផ្អើល​អ្នក​ចូល​រួម​អាពាហ៍​ពិពាហ៍​នោះ​រត់​ជាន់​ជើង​គ្នា។

បើ​មើល​ទៅ​លើ​ទិដ្ឋភាព​ទូទៅ​វិញ មូល​ហេតុ​ចម្បង​ខ្លះ​ទៀត​ដែល​បង្ក​ឲ្យ​មាន​អំពើ​ហិង្សា​យេនឌ័រ​នេះ គឺ​បណ្តាល​មក​ពី​ឪពុក​បង្កើត ឬ​ក៏​ឪពុក​ចុង​មាន​សហាយ​ស្មន់​ជាមួយ​កូន​ស្រី ឬ​ក៏​រំលោភ​សេពសន្ថវៈ​កូន​ស្រី ដល់​ពេល​ប្រពន្ធ​ដឹង​ក៏​កើត​ទៅ​ជា​បញ្ហា​ប្រចណ្ឌ​ចាប់​ផ្ទុះ​អំពើ​ហិង្សា​យេនឌ័រ​ភ្លាម​ដែរ។

ជាមួយ​គ្នា​នេះ​ដែរ មាន​អំពើ​ហិង្សា​យេនឌ័រ​ខ្លះ​ទៀត កើត​ឡើង​ដោយ​សារ​តែ​បុរស​ជា​ប្តី​ខ្លួន​មាន​ប្រពន្ធ​ហើយ​ទៅ​រក​ស្រី​ក្រៅ​ទៀត ហើយ​ខ្លួន​ឈរ​មើល​ធ្វើ​ព្រងើយ​នៅ​ពេល​ប្រពន្ធ​ដើម​និង​ប្រពន្ធ​ចុង​វ៉ៃ​កាប់​ចាក់​គ្នា​ឬ​ក៏​ពេល​ខ្លះ​ទៅ​វ៉ៃ​ប្រពន្ធ​ដើម​ថែម​ទៀត​នៅ​ឯ​ផ្ទះ​វិញ ឬ​ក៏​ជេរ​បញ្ចោរ​គ្នា​អស់​សាច់ ហើយ​សឹង​តែ​ជា​ទូទៅ​ទៅ​ហើយ អំពើ​ហិង្សា​យេនឌ័រ​នេះ សុទ្ធ​តែ​មាន​ធាតុ​ផ្សំ​ពី​សុរា ឬ​ក៏​ស្រាបៀរ​ផង​ដែរ ដែល​ជា​កាតាលិករ​ជំរុញ​ឲ្យ​មាន​ការ​ប្រព្រឹត្ត​អំពើ​ហិង្សា។

ជា​ផល​វិបាក​នៃ​អំពើ​ហិង្សា​យេនឌ័រ​នេះ មិន​ត្រឹម​តែ​បំផ្លាញ​គ្រួសារ ឬ​ក៏​កិត្តិយស​ខ្លួន​ឯង​ទេ គឺ​ថែម​ទាំង​បំផ្លាញ​ថវិកា​ជាតិ​ទៀត​នៅ​ពេល​ដែល​ពួក​គេ​ប្រព្រឹត្ត​បទ​ឧក្រិដ្ឋ ហើយ​ជាប់​ពន្ធនាគារ​ដេក​ស៊ី​រាប់​ឆ្នាំ​នោះ ដោយ​សារ​តែ​បញ្ហា​តណ្ហា​ផ្លូវ​ភេទ​សោះ។ រីឯ​កូន​ចៅ​ពួក​គេ​វិញ រតាត់​រតាយ​ដើរ​ហើរ​សុំ​ជ្រក​កោន​ផ្ទះ​បង​ប្អូន ឬ​ក៏​ធ្លាក់​ខ្លួន​ទៅ​ជា​ក្មេង​អនាថា​តាម​ចិញ្ចឹម​ថ្នល់។ នេះ​គឺ​ជា​បញ្ហា​សង្គម​មួយ​ដែល​ត្រូវ​គិត​គូរ​និង​ចូល​រួម​ដោះស្រាយ​ទាំង​អស់​គ្នា ហើយ​អ្វី​ដែល​ធ្វើ​បាន​នោះ​គឺ៖ ក្រសួង​កិច្ចការ​នារី និង​ដៃគូ​អភិវឌ្ឍន៍​បាន​ចូល​រួម​តាក់​តែង​ច្បាប់ គោល​នយោបាយ យុទ្ធសាស្ត្រ គោល​ការណ៍​ណែនាំ និង​ការ​សិក្សា​ស្រាវជ្រាវ​បាន​ច្រើន​ហើយ​ដើម្បី​ចូល​រួម​ទប់​ស្កាត់​អំពើ​ហិង្សា​យេនឌ័រ។ តែ​ឯកសារ​ទាំង​នោះ​ភាគ​ច្រើន​សុទ្ធ​តែ​ភាសា​អង់គ្លេស​ធ្វើ​ឲ្យ​មន្ត្រី​និង​អ្នក​ពាក់​ព័ន្ធ​ដោះ​ស្រាយ​បញ្ហា​នេះ​អាច​អត់​យល់​ហេតុ។

ដូច​នេះ​ហើយ​ដើម្បី​ឲ្យ​ការ​អនុវត្ត​កម្មវិធី​មាន​ប្រសិទ្ធភាព​គឺ​រាល់​ឯកសារ​ទាំង​នោះ​គួរ​តែ​ជា​ភាសាខ្មែរ ហើយ​គួរ​តែ​បង្វែរ​ថវិកា​មួយ​ចំនួន​ធំ​នៃ​ការ​ចំណាយ​ទៅ​លើ​ការ​ផលិត​ច្បាប់​ទាំង​នេះ មក​ធ្វើ​ការ​ផ្សព្វ​ផ្សាយ​ការ​ទប់​ស្កាត់​អំពើ​ហិង្សា​យេនឌ័រ​នេះ តាម​រយៈ​សារ​ព័ត៌មាន​ការ​អប់រំ​ដល់​មន្ត្រី​ជាន់​ខ្ពស់​តាម​រយៈ​មន្ត្រី​បង្គោល​យេនឌ័រ នៅ​តាម​ស្ថាប័ន​នីមួយៗ​និង​អប់រំ​តាម​សហគមន៍​ដោយ​ឈរ​លើ​គោល​នយោបាយ​ជាតិ​ស្តីពី​ការ​អភិវឌ្ឍ​ថ្នាក់​ក្រោម​ជាតិ​ដែល​មាន​ថ្នាក់​ស្រុក​ក្រុម​ប្រឹក្សា​ឃុំ​ដែល​នៅ​កៀក​នឹង​ប្រជា​ពលរដ្ឋ​ស្រាប់។

អាជ្ញាធរ​គួរ​តែ​បញ្ឈប់​ការ​សម្រប​សម្រួល​ឬ​ក៏​ធ្វើ​មិន​ដឹង​មិន​ឮ​ចំពោះ​ករណី​ហិង្សា​យេនឌ័រ​ធ្ងន់​ធ្ងរ ឬ​ក៏​មាន​ភាគី​ណា​មួយ​ករណី​ទ្រាំ​លែង​បាន​គឺ​បញ្ជូន​សំណុំ​រឿង​នេះ​ទៅ​តុលាការ​ដើម្បី​កាត់​ទោស​ឬ​ក៏​សុំ​លែងលះ​ដើម្បី​កុំ​ឲ្យ​គ្រាំ​ទ្រូង​រាល់​ថ្ងៃ​ដែល​ធ្វើ​ឲ្យ​ជីវិត​គ្មាន​ន័យ។ ដូច​នៅ​សហរដ្ឋ​អាមេរិក ការ​លែង​លះ​គឺ​ជា​រឿង​សាមញ្ញ​នៃ​ជីវិត​បើ​ប្តី-ប្រពន្ធ​រស់​នៅ​មិន​ចុះ​សម្រុង​នឹង​គ្នា​ហើយ​នោះ ប្រហែល​ជា ៥០ ភាគរយ​នៃ​ដៃគូ​រៀបការ​រួច​ហើយ​បាន​លែង​លះ​គ្នា។

ទូរទស្សន៍​ក្នុង​ស្រុក​បាន​ចូល​រួម​ជួយ​អប់រំ​សង្គម​តិច​តួច​ណាស់ គឺ​គិត​គូរ​តែ​រឿង​សប្បាយៗ​ច្រើន​ហួស​ហេតុ។ ម្ចាស់​ស្ថានីយ​ទូរទស្សន៍​នីមួយៗ គួរ​តែ​ចាប់​ផ្តើម​ការ​ផ្សាយ​ជួយ​អប់រំ​ផ្តល់​ជា​សារ​ដែល​ទាក់ទង​ទៅ​នឹង​សេចក្តី​ស្រឡាញ់​ពិតៗ​ដើម្បី​ចូល​រួម​លុប​បំបាត់​អំពើ​ហិង្សា​យេនឌ័រ​នេះ។ ខ្សែ​ភាពយន្ត និង​ខារ៉ាអូខេ ដែល​បង្ហាញ​ពី​ហិង្សា​គួរ​តែ​បញ្ឈប់​ការ​ចាក់​ផ្សាយ។

ពង្រីក​ការ​ផ្សាយ​តាម​វិទ្យុ និង​ការ​ផ្តល់​សេវា​ប្រឹក្សា​ផ្នែក​ចិត្តសាស្ត្រ​ដើម្បី​ដោះ​ស្រាយ​វិបត្តិ​ស្នេហា​ឲ្យ​បាន​ច្រើន​ថែម​ទៀត។

យុវជន​គ្នា​ឯង​សំខាន់​ណាស់​គឺ​មិត្ត​អប់រំ​មិត្ត គួរ​តែ​ជួយ​រក​ដំណោះ​ស្រាយ​មិត្តភក្តិ​ដែល​មាន​វិបត្តិ​ស្នេហា កុំ​ឲ្យ​ចេះ​តែ​លង់​ខ្លួន​ជ្រៅ​ទៅៗ ឈាន​ដល់​ការ​ធ្វើ​អត្តឃាត ឬ​ក៏​ក្លាយ​ជា​ឃាតករ​ដោយ​សារ​តែ​ស្នេហា។

តើ​ពេល​ណា​បាន​សេចក្តី​ព្រាង​ច្បាប់​គ្រប់​គ្រង​សុរា​ត្រូវ​បាន​សភា​អនុម័ត?

ចូល​រួម​ផ្តល់​យោបល់​តាម​រយៈ soprach.tong@phnompenhpost.com

អត្ថបទគួរចាប់អារម្មណ៍