The Phnom Penh Post Search

Search form




Logo of Phnom Penh Post newspaper Phnom Penh Post - បញ្ហា​ស្ទះ​ចរាចរណ៍ និង​ពុករលួយ ដោះ​ស្រាយ​ត្រឹម​តែ​ច្បាប់​ចរាចរណ៍​គឺ​វា​គ្រប់​គ្រាន់​ហើយ




បញ្ហា​ស្ទះ​ចរាចរណ៍ និង​ពុករលួយ ដោះ​ស្រាយ​ត្រឹម​តែ​ច្បាប់​ចរាចរណ៍​គឺ​វា​គ្រប់​គ្រាន់​ហើយ

បញ្ហា​ស្ទះ​ចរាចរណ៍ និង​ពុករលួយ ដោះ​ស្រាយ​ត្រឹម​តែ​ច្បាប់​ចរាចរណ៍​គឺ​វា​គ្រប់​គ្រាន់​ហើយ

ភ្នំពេញ : «​បើ​ខ្លា​ស៊ី​គោ​បាត់​អស់​គ្មាន​នរណា​ដឹង​ទេ​ តែ​បើ​ឆ្មា​លួច​ត្រី​អាំង​​មួយ​កន្ទុយ​វិញ​​នាំ​គ្នា​ដេញ​វាយ​ឆ្មា​ឲ្យ​រត់​​ ផាស់​​ក្រញាំ​»​ ​នៅ​ក្នុង​​ន័យ​​របស់​ពាក្យ​ទំនៀម​នេះ​គេ​ចង់​និយាយ​ថា​ ​បើ​មន្ត្រី​មាន​អំណាច​ពុក​រលួយ​លើ​ប្រាក់​ចំណូល​របស់​ជាតិ​ធំ​ៗ​ ​គេ​មើល​​មិន​​ឃើញ​​ទេ​ តែ​បើ​មន្រ្តី​តូច​តាច​យក​ប្រាក់​លើស​បន្តិច​បន្តួច​គឺ​គ្មាន​នរណា​មើល​មិន​ឃើញ ​ទេ​។

ឧទាហរណ៍​ ប្រសិន​គ្រូ​បង្រៀន​ណា​ដែល​ហ៊ាន​យក​ប្រាក់​ពី​សិស្ស​លើស​តែ​​បន្តិច​​ គឺ​មាន​ប្រតិកម្ម​ពី​មាតា​បិតា​សិស្ស​ភ្លាម​។​ ចំណែក​ឯ​មន្ត្រី​​នគរ​បាល​​ចរាចរណ៍​តូច​តាច​​ក៏​ដូច្នេះ​ដែរ​ នរណា​ក៏​ឃើញ​នឹង​មាន​បទ​ពិសោធជា​មួយ​ពួក​គាត់​ដែរ​ ពី​ការ​ទារ​​បា្រក់​​លើស​កំណត់​ និង​មិន​ឲ្យ​​វិក្ក័យ​បត្រ​​ទៅ​អ្នក​ប្រព្រឹត្ត​ខុស​ច្បាប់​ចរាចរណ៍​ ​ហើយ​ពួក​គាត់​ត្រូវ​គេ​ប្តឹង​​គ្រប់​​ច្រក​ល្ហក​ តែ​បើ​ពុក​រលួយ​ធំ​ៗ​​ដូច​ជា​ការ​ដេញ​ថ្លៃ​ធ្វើ​ការ​សាង​សង់​ហេ​ដ្ឋា​រចនា​ សម្ព័ន្ធ​ជាតិ​វិញ​ ដូច​ជា ​ផ្លូវ​ថ្នល់​ ស្ពាន​​ ប្រព័ន្ធ​ទឹក​ លូ ​​និង​អគារ​រដ្ឋា​ភិបាល​នានា​ ឬ​មួយ​ក៏​ការ​ពុក​រលួយ​ធំ​ៗ​ តាម​រយៈ​ពន្ធ​គយ​និង​ពន្ធ​​អាករ​​វិញ​​ គឺ​ពុំ​លេច​ឮ​ព័ត៌​មាន​អ្វី​សោះ​។

បើ​នរណា​ហ៊ាន​និយាយ​គឺ​គេសួរ​រក​ឯ​ណា​ភស្តុតាង​។​ ទៅ​រក​ឯ​ណា​ឃើញ​បើ​ស៊ី​បាត់​ទៅ​ហើយ​ អ្នកស៊ី​ និង​អ្នក​សូក​​ស្ងាត់​ទាំង​អស់​គ្នា​​ បើ​ដឹង​លុះ​ត្រា​តែ​ចែក​គ្នា​មិន​ស្មើ​។​ ឧបមា​ធ្វើ​ការ​សាក​ល្បង​ប្រៀប​ធៀប​រវាង​ មន្រ្តី​នគរ​បាល​ចរាចរណ៍​ពុករលួយ​ទឹក​ប្រាក់​សរុប​ទូទាំង​ប្រទេស​ទៀត​ មិន​ស្មើ​គេ​ពុករ​លួយ​រត់​ការ​មួយ​ជើង​ផង​។ ចុះ​ហេតុ​អ្វី​បាន​ជា​ ក្រុម​អង្គ​ភាព​​ប្រឆាំង​នឹង​អំពើ​ពុក​រលួយ ចាប់​ផ្តើម​លត់​នគរបាល​ចរាចរណ៍​មុន​យ៉ាង​ដូច្នេះ​? ចុះ​ចំណែក​អំពើ​ពុក​រលួយ​លើ​វិស័យ​ផ្សេង​ៗ​ទៀត​ដែល​កំពុង​តែ​កើត​ឡើង​នោះ?

យើង​ទទួល​ស្គាល់​ហើយ​ថា​ មន្ត្រី​នគរ​បាល​ចរាចរណ៍​មាន​ចំណុច​ខ្វះ​ខាត​​មួយ​ចំនួន​ហើយ​​ក្នុង​ការ​អនុវត្ត​ច្បាប់​ ចរាចរណ៍​​​ ដូច​ជា​​ការ​យក​លុយ​លើស​ពី​ចំនួន​ពិន័យ​ក្នុង​ច្បាប់​ និង​មិន​ចេញ​វិក្ក័យ​បត្រ​ជាដើម​។ ជាង​នេះ​ទៅ​ទៀត​គឺ​ការ​ធ្វើ​ឲ្យមាន​ការ​កក​ស្ទះ​ចរាចរណ៍​ផង​ដែរ​។ ឧទាហរណ៍ ​នៅ​ពេល​មាន​ហែ​ពិធី​មង្គល​ការ​ ពិធី​បុណ្យ​សព​ ឬ​ក៏​ពិធី​ហែ​ក្បួន​ថ្នាក់​ដឹក​នាំ​ និង​គណៈ​ប្រតិ​ភូ​អន្តរ​ជាតិ​នានា​ គឺ​មន្ត្រី​នគរបាល​ចរាចរណ៍​ គាត់​បាន​ជួយ​បិទ​ផ្លូវ​បាន​យ៉ាង​ល្អ​​ តែ​ដល់​ក្បួន​ទាំង​នោះ​បាន​ហែផុត​ គឺ​បើក​ឲ្យ​អ្នក​ធ្វើ​ដំណើរ​ជិះ​ម៉ា​សេរី​ច្រាស​ទិស​គ្នា​ស្ទះ​ពេញ​ផ្លូវ​ ពួក​គាត់​ បាន​បំពេញ​តួ​នាទី​រួច​ហើយ​ មិន​ខ្វល់​ទេ​។​​ ​​ នេះ​ជា​​បញ្ហា​របស់​មន្ត្រី​នគរបាល​ចរាចរណ៍​ ចុះ​មាន​អ្វី​ខ្លះ​ដែល​ចូល​រួម​ចំណែក​ធ្វើ​ឲ្យ​នគរបាល​ចរាចរណ៍​ពុករលួយ ​និង​ការ​កក​ស្ទះ​ចរាចរណ៍?

មិន​មែន​ឲ្យ​តែ​ការ​កក​រស្ទះ​ចរាចរណ៍​​ និង​ពុក​រលួយ គឺ​សុទ្ធ​តែ​មក​ពី​កំហុស​នគរបាល​ចរាចរណ៍​ទេ ​មាន​ការ​ចូល​រួម​ពី​​សកម្មភាព​ផ្សេង​ៗ​​ និង​អ្នក​បើក​បរ​ខ្លួន​ឯង​ផង​ដែរ​។​ ​ដូច​យើង​ធ្លាប់​ឃើញ​ នៅ​រាជធានី​ភ្នំពេញ​ ផ្ទះ​សាង​សង់​លយ​​ចូល​មក​ចិញ្ចឹម​ថ្នល់​ខ្លាំង​ពេក​ឡើង​អស់​ផ្លូវ​ដើរ​ ការ​លក់​ដូរ​ហៀរ​ចូល​មក​ថ្នល់ ​អ្នក​ចត​មក​ចូល​ថ្នល់​ ការ​សាង​សង់​រោង​ការ​ចូល​ថ្នល់​ ខ្លះ​បិទ​ផ្លូវ​ទៀត​ នេះ​ជា​សកម្ម​ភាព​មួយ​ចំនួន​ដែល​ធ្វើ​ឲ្យមាន​ការ​កករ​ស្ទះ​ចរា​ចរណ៍​ផង​ដែរ​ ។

ឥឡូវ​នេះ ​មាន​ការ​ឈាន​​ដល់​ការ​បិទ​ផ្លូវ​ជាត​ិធ្វើ​​រោង​ការ​ទៀត​។ កាល​ពី​ថ្ងៃ​ទី​២​​ ខែ​មេសា​នេះ​ ខ្ញុំ​បាន​ធ្វើ​ដំណើរ​ពី​ខេត្ត​ស្ទឹង​ត្រែង​​មក​ភ្នំពេញ​​ ស្រាប់​តែ​​ឃើញ​​មាន​រោង​ការ​មួយ​ដាក់​ចំ​កណ្តាល​កំណាត់​ផ្លូវ​ជាតិ​លេខ ​៧៣​ ​ពី​​ខេត្ត​ក្រចេះ​ ​មក​ជិត​ដល់​ទី​ប្រជុំ​ជន​របស់​ស្រុក​ឆ្លូង​។ ​អ្វី​ដែល​​ហួស​​ចិត្ត​នោះ​គឺ​បិទ​ផ្លូវ​ ឲ្យ​អ្នក​ដំណើរ​ទាំង​​អស់​ត្រូវ​បើក​ចុះ​តាម​វាល​ស្រែ​ ផ្លូវ​លំ​ហុយ​ដី​សំពោង​ ​ហើយ​កក​ស្ទះ​​អ្នក​ដំណើរ​​មក​ពី​ធ្វើ​បុណ្យ​​ឆេង​ម៉េង​ទៀត​ផង ​ ហើយ​​មាន​អ្នក​​ដំណើរ​ខ្លះ​បាន​ត្អូញ​ត្អែរ​ថា​ ដូច​ជា​ហួស​ហេតុ​ពេក​ រោង​ការ​សម័យ​ឥឡូវ​ចម្លែក​ណាស់​ ​មិន​ត្រឹម​សង់​តាម​គែម​ផ្លូវ​ទេ​ បិទ​ផ្លូវ​ជាតិ​ទៀត​តែ​ម្តង​។​ ​នេះ​គឺ​ចង់​បង្ហាញ​សាច់​ដុំ​ច្រើន​ជាង​​ឬ​? ​ហើយ​សកម្ម​ភាព​នេះ​​ក៏​ហួស​ពី​សមត្ថ​កិច្ច​របស់​មន្ត្រី​នគរបាល​ចរាចរណ៍​ផង​ដែរ​។ ​ចុះ​បើ​មាន​មេដឹក​នាំ​ណា​ម្នាក់​ជិះ​កាត់​​ឃើញ​ តើ​ត្រូវ​ធ្វើ​ដូច​ម្តេច​ទៅ​?

ម្យ៉ាង​វិញ​ទៀត​ ​លោក​នាយក​រដ្ឋ​មន្ត្រី​ធ្លាប់​បាន​ព្រមាន​ផង​ដែរ​ថា ​មាន​ឧកញ៉ា​មួយ​ចំនួន​​ដែល​ឲ្យ​លុយ​ទៅ​​មន្ត្រី​ នគរបាល​ចរាចរណ៍​ដើម្បី​ឲ្យ​បញ្ចៀស​ពួក​គេ​ចេញ​ផុត​ពី​ការ​កក​ស្ទះ​ ដែល​រឹត​តែ​ធ្វើ​ឲ្យ​ស្ទះ​ថែម​ទៀត​នោះ​​ ហើយ​​ឥឡូវ​ លែង​ចេញ​ឮរថយន្ត​ស៊ី​រ៉ែន​របស់​មន្ត្រី​ជាន់​ខ្ពស់​ បែរ​ជា​ចេញ​ជា​ស៊ី​ផ្លេ​ឮៗ​​ និង​បាញ់​ភ្លើង​ហ្វា​ដែល​បាន​ច្នៃ​ឡា​ហ្សែ​ពណ៌​ស​​​ ដាក់​ភ្នែក​ប្រជា​ពល​រដ្ឋ​ដែល​ធ្វើ​ដំណើរ​តាម​ផ្លូវ​ទៀត​ផង​។ អ៊ីចឹង​ហើយ​ទើប​​បាន​គេ​ចង់​​ធ្វើ​ធំ​ ដើម្បី​​មាន​អាទិ​ភាព​​លើ​ប្រជា​ជន​​ក្រីក្រ​​តូច​តាច​។ ​ខ្ញុំ​គិត​ថា ​អំពើ​ទាំង​នេះ ​គឺ​ហួស​ពី​សមត្ថ​កិច្ច​របស់​នគរបាល​ហើយ​ ហើយ​អំពើ​ទាំង​នេះ​ គឺ​ផ្គើន​នឹង​ប្រសាសន៍​លោក​នាយក​រដ្ឋ​មន្ត្រី​ហាម​ករណី​នេះ​កុំ​ឲ្យ​រំខាន​ពល​រដ្ឋ​ បែរ​ទៅ​ជា​ចេញ​​ករណី​​ ឬ​រូបភាព​​ផ្សេង​ តែ​រំខាន​ដូច​គ្នា​ ​ហើយ​ចេះ​តែ​នាំគ្នា​បន្ទោស​​មន្ត្រី​នគរ​បាល​ចរាចរណ៍​ទៅ​វិញ​ថា មិន​ចេះ​មើល​ទេ​អី​។

ជា​សរុប​មក​វិញ​ខ្ញុំ​យល់​ឃើញ​ថា​ ការ​ពុក​រលួយ​របស់​មន្ត្រី​នគរបាល​ចរាចរណ៍​ មិន​គួរ​ស្ថាប័ន​ប្រឆាំង​នឹង​អំពើ​ពុក​រលួយ​ ចាប់​​ផ្តើម​​យក​​មន្ត្រី​នគរបាល​ទាំង​នេះ​ មក​​ធ្វើ​ជា​គោល​ និង​អាទិភាព​ខ្លាំង​ក្នុង​ការ​អនុវត្ត​ច្បាប់​​ប្រឆាំង​នឹង​អំពើ​ពុក​រលួយ​ទេ ​។ ​គម្រោង​​សកម្ម​ភាព​នេះ​ គឺ​ហាក់​បី​ដូច​ជា​យក​ប៉័ង​តោ​មក​កាត់​ក​កូន​មាន់​អី​ចឹង​ ខណៈ​អំពើ​ពុក​រលួយ​ត្រូវ​បាន​ដឹង​ឮនៅ​តាម​ស្ថាប័ន​រដ្ឋ​សំខាន់​ៗ​នានា។​ ជាការ​ប្រសើរ​ដែល​ ការ​ប្រយុទ្ធ​ប្រឆាំង​នឹង​អំពើ​ពុក​រលួយ​ត្រូវ​ធ្វើ​ឡើង​គ្រប់​មុខ​ព្រួយ ​និង​គ្រប់​វិស័យ​ទាំង​អស់ ​ចៀសវាង​ការ​ធ្វើ​ ឡើង​តែ​មួយ​មុខ​ព្រួញ​។

ខ្ញុំ​គិត​ថា ​ស្ថាប័ន​គួរ​តែ​ចាប់​ផ្តើម​ធ្វើ​ការ​ស៊ើប​អង្កេត​ដំណាល​គ្នា និង​ផ្តោត​ទៅ​លើ​អំពើ​ពុក​រលួយ​ធំ​ៗ​​ផ្សេង​ទៀត​ ដូច​ជា​ការ​ធ្វើ​លទ្ធ​កម្ម​​ដេញ​ថ្លៃ​សាង​សង់​ហេដ្ឋា​រចនា​សម្ព័ន្ធ​ និង​ស្ថាប័ន​គយ​ និង​ពន្ធ​ដារ ឬ​អំពើ​ពុករលួយ​នៅ​ក្នុង​ប្រព័ន្ធ​តុលាការ​ជា​ដើម​។ តាម​ពិត ការ​កាត់​បន្ថយ​អំពើ​ពុក​រលួយ​ក្នុង​ចំណោម​មន្ត្រី​នគរបាល​ចរាចរណ៍​អាច​ ធ្វើ​បាន​ដោយ​ស្រួល។ ​យើង​​អ្នក​បើក​បរ​នាំ​គ្នា​គោរព​ច្បាប់​ចរាចរណ៍ ត្រូវ​ពាក់​​មួក​សុវត្ថិ​ភាព​ គោរព​ភ្លើង​សញ្ញា​ កុំ​ដឹក​លើស​ទម្ងន់ ​កុំ​​ចត​កន្លែង​ហាម​ឃាត់​ ...​ ក៏​ពួក​គាត់​មិន​បាន​លុយ​ពុករ​លួយ​ផង​ដែរ​ វា​ជា​ការ​ងាយ​ស្រួល​បំផុត​​ ហើយ​ត្រឹម​កម្រិត​មន្ត្រី​នគរបាល​ចរាចរណ៍​ គឺ​គ្រាន់​តែ​ចេញ​ ស.ជ.ណ​​ (​សេចក្តី​ជូន​ដំណឹង​) ឲ្យ​អនុវត្ត​ច្បាប់​ចរាចរណ៍​ផ្លូវ​គោក​ គឺ​គ្រប់​គ្រាន់​ហើយ​។

ចំណែក​ការ​កក​ស្ទះ​វិញ ​គឺ​ត្រូវ​ចូល​រួម​ទាំង​អស់​គ្នា ​ទាំង​នគរបាល​ ទាំង​ប្រជា​ពល​រដ្ឋ​ផង​ដែរ​ ត្រូវ​គោរព​ផ្លូវ​អាទិ​ភាព​ ​និង មិន​ត្រូវ​ចត​ហៀ​រចូល​ផ្លូវ​ ហើយ​រាជ​រដ្ឋា​ភិបាល​គួរ​តែ​ផ្សព្វ​ផ្សាយ​អំពី​ច្បាប់​ចរាចរណ៍​ផ្លូវ​គោក​ គ្រប់​រូប​ភាព​តាម​រយៈ​វិទ្យុ​ និង​ទូរទស្សន៍​ទាំង​អស់​ឲ្យ​មាន​ប្រសិទ្ធ​ភាព​កាន់​តែ​ខ្លាំង​ ប្រសើរ​ជាង​ការ​ផ្សព្វ​ផ្សាយ​ពី​ការ​កក​ស្ទះ​ ឬ​ក៏​អត្រា​គ្រោះ​ថ្នាក់​ចរាចរណ៍៕

អត្ថបទគួរចាប់អារម្មណ៍