The Phnom Penh Post Search

Search form




Logo of Phnom Penh Post newspaper Phnom Penh Post - បើ​អសន្តិសុខ​ដូច​សព្វថ្ងៃ តើ​អ្នក​ណា​ចុះ​ចេញ​ពី​តំណែង​មុន​គេ?




បើ​អសន្តិសុខ​ដូច​សព្វថ្ងៃ តើ​អ្នក​ណា​ចុះ​ចេញ​ពី​តំណែង​មុន​គេ?

Content image - Phnom Penh Post
កិច្ច​ប្រជុំ​ទាក់ទង​នឹង​ការ​ពង្រឹង​សន្តិសុខ... និង​រូប​តូច​ជា​ទូ​លក់​មាស​ក្រោយ​ចោរប្លន់​វាយ​បំបែក ។ ផា លីណា

បើ​អសន្តិសុខ​ដូច​សព្វថ្ងៃ តើ​អ្នក​ណា​ចុះ​ចេញ​ពី​តំណែង​មុន​គេ?

បើក​តែ​ភ្នែក​ព្រលឹម​ឡើង​ប្រជាពលរដ្ឋ​កម្រ​និយាយ​គ្នា​រឿង​កិច្ចការ​អភិវឌ្ឍន៍​ណាស់​មាន​ឮ​សូរ​តែ​ព័ត៌មាន និង​ការ​ជជែក​គ្នា​តែ​ពី​រឿង​គ្រឿង​ញៀន ចោរប្លន់ ការ​បាញ់​ប្រហារ​គ្រោះថ្នាក់​ចរាចរណ៍ និង​ការ​សម្លាប់​ផ្សេងៗ​​។

ម្តង​ឮ​ថា​ប្លន់​នៅ​ស្រុក​នេះ​ម្តង​នៅ​ស្រុក​នោះ​ខេត្ត​នេះ​ខេត្ត​នោះ​រាល់​ថ្ងៃ​ពេល​ខ្លះ​ផ្ទួនៗ​គ្នា​នៅក្នុង​តំបន់​តែ​មួយ​ដូច​កាល​ពី​សប្តាហ៍​កន្លង​ទៅ​នេះ​ប្លន់​ចូល​គាស់​ផ្ទះ​លក់​មាស​ដូរ​លុយ​នៅ​ស្រុក​បវេល ខេត្ត​បាត់ដំបង​មិន​បាត់​សូរ​ផង​ក៏​ស្រាប់​តែ​ចេញ​ឮ​ប្លន់​ទូ​មាស​នៅ​ផ្សារ​ខេត្ត​បន្ទាយមានជ័យ​ធ្វើឲ្យ​អ្នក​ផ្សារ​នាំ​គ្នា​បិទ​តូប​អស់​ហើយ​ឲ្យ​តែ​ម៉ោង​ ៤ ​រសៀល​​មិន​ទាន់​ពលរដ្ឋ​នាំ​គ្នា​បិទ​ទ្វារ​ផ្ទះ​អស់​ដោយសារ​មាន​ការ​ភ័យ​ខ្លាច​ចោរប្លន់​ឆៅៗ​ដូច​កាលពី​ជំនាន់​អសន្តិសុខ​ទសវត្សរ៍​ឆ្នាំ​ ៨០ នៅ​តំបន់​ប្រយុទ្ធ​គ្នា​ជាមួយ​ទាហាន​ខ្មែរ​ក្រហម​អ៊ីចឹង​។

សំណួរ​សួរ​ថា​នៅ​ពេល​អសន្តិសុខ​ដូច​សព្វ​ថ្ងៃ តើ​អ្នក​ណា​ត្រូវ​ចុះ​ចេញ​ពី​តំណែង​ឬ​ក៏​ដក​ចេញ​ពី​តំណែង​មុន​គេ​? អធិការ​ស្រុក​? ស្នងការ​ខេត្ត-រាជធានី​? ចៅហ្វាយ​ខេត្ត​? មេប៉េអឹម ឬ​អគ្គស្នងការ​? រដ្ឋមន្ត្រី​ក្រសួង​មហាផ្ទៃ​? ឬ​ក៏​នាយក​រដ្ឋមន្ត្រី​? ឬ​ក៏​ដក​ចេញ​តាំងពី​លើ​ចុះ​មក​ក្រោម​វិញ​? ពីព្រោះ​បើ​ធ្វើការ​ប្រៀប​ធៀប​ការ​អនុវត្ត​គោលការណ៍​ភូមិ-ឃុំ​មាន​សុវត្ថិភាព និង​គោលនយោបាយ​ ៣ ​មិន​ ១ ​រាយការណ៍​កាលពី​សម័យ​កុម្មុយនីស្ត​ទសវត្សរ៍​ឆ្នាំ​ ៨០ គឺ​ខុស​គ្នា​ដាច់​ដែល​​កាល​នោះ​មាន​តែ​ឆ្កែ និង​គោះត្រដោក​នាំ​គ្នា​ចេញ​តាម​​ចាប់​ចោរ​ចូល​ភូមិ​ហើយ​ឲ្យ​តែ​បើ​មាន​អ្នក​ចម្លែក​ចូល​ភូមិ​រាយការណ៍​ទៅ​អាជ្ញាធរ​ដែនដី​ភ្លាម​។ ឥឡូវ​នេះ​ម្នាក់ៗ​សន្សំ​យក​​តែ​សុខ​រៀងៗ​ខ្លួន​។

តើ​បក្ស​កាន់​អំណាច​សង្ឃឹម​ឲ្យ​គេ​បោះឆ្នោត​ដើម្បី​កំណើន​កៅអី​វិញ​ដែរ​ឬ​ទេ​? បើ​ម្នាក់ៗ​ដែល​ដេក​តែ​ពី​ព្រួយបារម្ភ​អំពី​អសន្តិសុខ​នោះ​ក្រុម​ចោរប្លន់​ចេញ​ប្លន់​ដូច​ណាត់​គ្នា​ហើយ​មិន​មែន​អ្នក​ក្រ​ទេ​គឺ​សុទ្ធតែ​មាន​ឡាន​ជា​បណ្តាញ​​ទៀត​ដែល​​ពី​មុន​មាន​ទ័ព​ខ្មែរ​ក្រហម​គ្រាន់​តែ​​បាន​ចោទ​មាន​ការ​អី​ទម្លាក់​កំហុស​មក​ទ័ព​ខ្មែរ​ក្រហម​ហើយ​តែ​សព្វ​ថ្ងៃ​នេះ​បន្ទោស​អ្នក​ណា​?

បើ​តាម​របាយការណ៍​របស់​ក្រសួង​​មហាផ្ទៃ​ឆ្នាំ​ ២០១៥ បទល្មើស​ព្រហ្មទណ្ឌ​មាន​ចំនួន​ ២៧០៩ ​លើក​មាន​ការ​​ថយ​​ចុះ​ ១០៥ ​លើក​បើ​ប្រៀប​ធៀប​ជាមួយ​ឆ្នាំ​ ២០១៤ តែ​បទឧក្រិដ្ឋ​មាន​ ៧៥១ ​លើក​បាន​កើន​ឡើង​ ៣៥ លើក​វិញ​។

ម្យ៉ាង​វិញ​ទៀត​បើ​ធ្វើការ​ប្រៀបធៀប​មួយ​ទៀត​រវាង​បុណ្យ​ស័ក្តិ​ប៉ូលិស និង​បទ​ឧក្រិដ្ឋ​គឺ​មេៗ​ប៉ូលិស​ក៏​កាន់តែ​ឡើង​ឋានៈ​ស័ក្តិ​ដែរ​សុទ្ធតែ​ផ្កាយ​ព្រោងព្រាត។ កាល​ពី​សប្តាហ៍​មុន​នេះ​យ៉ាង​ហោច​ណាស់​ក៏​មាន​ការ​ដំឡើង​នាយ​ឧត្តម​សេនីយ៍​ផ្កាយ​ ៤ បាន​ ៣ ​រូប​​ដែរ​គ្រាន់​តែ​តំណែង​អគ្គស្នងការ​រង​សល់​គរ​ជើង​តើ​ការ​ដែល​ចេះ​តែ​ដំឡើង​ឋានៈ​ ឬ​បុណ្យ​ស័ក្តិ​មេៗ​មាន​ន័យ​ថា​យ៉ាង​ម៉េច​? បើ​ផ្កាយ​លើ​ស្មា​ប៉ូលិស​​កាន់​តែ​ច្រើន ប្រជាពលរដ្ឋ​កាន់​តែ​មាន​ការ​ភ័យ​ខ្លាច​​ពី​អសន្តិសុខ​នៅ​សល់​ ២ ​ពាន់​ករណី​នៃ​បទល្មើស​កំពុង​តែ​តាម​ចាប់​ខ្លួន​ទៀត ខណៈ​ដែល​អ្នក​ពាក់ព័ន្ធ​ករណី​នេះ​ក៏​កំពុង​ធ្វើ​សកម្មភាព​ដែរ​ព្រោះ​ពេល​​ខ្លះ​សួរ​ទៅ​សុទ្ធ​តែ​ធ្លាប់​ប្លន់​ ៧-៨ ​ដង​ហើយ​​គឺជា​មុខ​សញ្ញា​ចាស់​ទៀត​។ ម្តងម្កាល​ឃើញ​មាន​ការ​ដក ឬ​ក៏​បញ្ឈរ​ជើង​ប៉ូលិស​តូច​តាច​ដូច​កាល​ពី​ខែ​មុន​ដក​​អធិការ​ស្រុក​កំរៀង​ ខេត្ត​បាត់ដំបង​ដោយសារ​តែ​មាន​ចោរកម្ម​នៅ​តំបន់​គាត់​គ្រប់គ្រង​ហើយ​គាត់​មិន​នៅ​ប្រចាំការ​។

លោក​នាយក​រដ្ឋមន្ត្រី ហ៊ុន សែន បាន​ត្រឹម​តែ​ព្រមាន​ចោល​ពី​រឿង​ចោរ រឿង​សន្តិសុខ​ក្នុង​សង្គម រឿង​រុះរើ​គណៈរដ្ឋមន្ត្រី​ហាក់បី​ដូចជា​គ្មាន​ប្រសិទ្ធភាព​ហើយ​​ពេល​ខ្លះ​លោក​មិន​គួរ​យក​មក​និយាយ​​ជា​សាធារណៈ​ទេ​ព្រោះ​អត់​ប្រយោជន៍​បើ​ត្រូវ​ដោះដូរ​ទៅ​លើ​រដ្ឋមន្ត្រី ឬ​ក៏​មន្ត្រី​ជាន់​ខ្ពស់​ណា​អសកម្ម​ព្រោះ​ស្ថិត​នៅ​ក្រោម​ការ​គ្រប់គ្រង​របស់​​លោក​គឺ​លោក​មាន​សិទ្ធិ​គ្រប់គ្រាន់​ធ្វើ​តែ​ម្តង​ទៅ​។

ឧទាហរណ៍​ការ​ដក​​តំណែង​លោក​ កែ គឹមយ៉ាន អតីត​អគ្គបញ្ជាការ​​កងទ័ព​កាលពី​ផ្ទុះ​ការ​ប្រយុទ្ធ​គ្នា​ជាមួយ​ប្រទេស​ថៃ​នៅ​តាម​ព្រំដែន​នោះ​។ ចុះ​ហេតុអ្វី​បាន​ជា​ស្រុក​អសន្តិសុខ​ដោយសារ​អំពើ​ចោរកម្ម អំពើ​គ្រឿង​ញៀន បទ​ឧក្រិដ្ឋ​កើត​មាន​គ្រប់​តែ​កន្លែង​ដែល​​ប្រជាពលរដ្ឋ​មាន​ការ​ត្អូញត្អែរ​នោះ​មិន​ដក​តំណែង​អគ្គស្នងការ​នគរបាល​ជាតិ​? ឬ​ក៏​រដ្ឋមន្ត្រី​ក្រសួង​មហាផ្ទៃ​? ធ្វើ​ដូច​​លោក កែ គឹមយ៉ាន ដែរ​ទៅ?

ចំពោះ​នៅ​ស្រុក​គេ​ជឿនលឿន​វិញ​គឺ​មេប៉ូលិស​គេ​ហ៊ាន​ចុះ​ចេញ​ពី​តំណែង ឬ​បង្ខំ​តែ​ម្តង​ឲ្យ​តែ​មាន​រឿង​អាស្រូវ​ដែល​ប៉ះពាល់​សន្តិសុខ​ជាតិ និង​អន្តរជាតិ​ដូចជា លោក David Petraeus មេប៉ូលិស​ស៊ើប​អង្កេត​ CIA របស់​សហរដ្ឋ​អាមេរិក​បាន​លា​ឈប់​ពី​តំណែង​ដោយសារ​ពាក់ព័ន្ធ​សន្តិសុខ និង​រឿង​អាស្រូវ​ស្នេហា​ក្រៅ​ផ្លូវការ​។

រីឯ​លោក Thomas Jackson មេប៉ូលិស​នៅ​ទីក្រុង​ Ferguson ដោយសារ​ប៉ូលិស​ទីក្រុង​នោះ​បាញ់​ទៅ​លើ​ក្រុម​យុវជន​ដែល​គ្មាន​កាំភ្លើង​។

ម្យ៉ាង​វិញ​ទៀត​ជា​រឿយៗ​មាន​ការ​ត្អូញត្អែរ​ពី​មន្ត្រី​ប៉ូលិស​វិញ​ផង​ដែរ​ពី​ករណី​ពាក់ព័ន្ធ​ទៅ​នឹង​​ចៅក្រម​ស៊ី​លុយ​ពី​ជនល្មើស​គ្រឿង​ញៀន និង​បទល្មើស​ធ្វើការ​បន្ធូរ​បន្ថយ​ទោស​ជនល្មើស​តិច​បំផុត ឬ​ក៏​ធ្វើការ​ដោះ​លែង​តែ​ម្តង​ដោយ​ខ្លួន​ប្រឈម​មុខ​នឹង​ការ​តាម​ចាប់​យ៉ាង​លំបាក និង​ប្រឈម​មុខ​នឹង​គ្រោះថ្នាក់​ដូច​ជា​ការ​ចាប់​​ពួក​ក្រុម​ជន​ជួញដូរ​គ្រឿងញៀន និង​ក្រុម​ប្លន់​ប្រដាប់​អាវុធ​បាញ់​តដៃ​។ ហេតុ​ដូច​នេះ​ហើយ​តុលាការ​ក៏​ចូលរួម​ចំណែក​​ធ្វើ​ឲ្យ​មាន​អសន្តិសុខ​នៅក្នុង​សង្គម​ផង​ដែរ​។

ទោះបី​ជា​យ៉ាង​ណា​ក៏​មាន​មន្ត្រី​ប៉ូលិស​ខ្លះ​មាន​ការ​ប្តេជ្ញា​ចិត្ត​ខ្ពស់​ក្នុង​ការ​ដោះស្រាយ​បញ្ហា​សុវត្ថិភាព​ដែល​នៅ​លើ​ទឹកដី​របស់​ខ្លួន​ដែរ​ដូចជា លោក ជួន ណារិន្ទ ស្នងការ​ប៉ូលិស​ខេត្ត​ព្រះសីហនុ​ជា​ខេត្ត​ដែល​សម្បូរ​ទៅ​ដោយ​រឿង​អាស្រូវ រញ៉េរញ៉ៃ​ទាំង​ជាតិ និង​អន្តរជាតិ​។ តើ​មាន​មេប៉ូលិស​ប៉ុន្មាន​នាក់​ដូច​លោក ជួន ណារិន្ទ​?

ចំពោះ​បញ្ហា​អសន្តិសុខ​នេះ​រង់ចាំ​ជិត​ដល់​ពេល​បោះឆ្នោត​បាន​បក្ស​កាន់​អំណាច​នាំ​គ្នា​ធ្វើ​មួយ​ប្រាវ​ទៅ ឬ​ក៏​ដក​តំណែង​មេប៉ូលិស​​ដែល​គេ​ស្អប់ ២-៣ នាក់​ទៅ​ដើម្បី​ឲ្យ​ប្រជាពលរដ្ឋ​មើល​ឃើញ​ថា​ខំប្រឹង​ធ្វើការ​ងារ​ដែរ​។ ឥឡូវ​ប្រជាពលរដ្ឋ​មួយ​ចំនួន​ធំ​គាត់​ឆ្លាត​ណាស់​នៅពេល​ដែល​គាត់​មិន​ពេញ​ចិត្ត​រដ្ឋាភិបាល​លើ​បញ្ហា​ណា​មួយ​ដែល​ប៉ះពាល់​បញ្ហ​អាយុ​ជីវិត និង​ក្រពះ​គាត់​ចាំ​ដល់​ពេល​បោះឆ្នោត​នឹង​សម្រេច​ជោគ​វាសនា​របស់​គាត់​ហើយ​មិន​ដូច​មុន​គ្រាន់​តែ​យក​ប៊ីចេង​ ២ ​កញ្ចប់ មី ១ ​កេស​ក៏​បោះឆ្នោត​ឲ្យ​ដែរ​នោះ​ទេ​។

រីឯ​បក្ស​ប្រឆាំង​​សង្គ្រោះ​ជាតិ​គឺ​គេ​មិន​បាន​ធ្វើ​អី្វ​គួរ​ឲ្យ​កត់សម្គាល់​ទេ​តែ​គេ​ចាំ​ស្រង់​ស៊ីឡាក​នៅ​ពេល​ដែល​អ្នក​មាន​សិទ្ធិ​បោះឆ្នោត​​ស្អប់​បក្ស​កាន់​អំណាច​ដូច​រឿង​បញ្ហា​អសន្តិសុខ​ពិបាក​រកស៊ី​រាប់​ឆ្នាំ​មក​ហើយ​​មក​ចាក់​ចោល​ត្រឹម​ចោរ​ប្លន់​អស់​រលីង​ពី​ខ្លួន​បញ្ហា​រំលោភ​ដីធ្លី បញ្ហា​ចាញ់​​ក្តី​តុលាការ​ពុករលួយ​ជាដើម​។ អ៊ីចឹង​​ការ​កែ​ទម្រង់​របស់​រដ្ឋាភិបាល ឬ​ការ​រុះរើ​គណៈរដ្ឋមន្ត្រី​ត្រូវ​ធ្វើ ក៏​ធ្វើ​ទៅ​កុំ​ចាំបាច់​ប្រកូក​ប្រកាស​​ទេ​ព្រោះ​មាន​រដ្ឋមន្ត្រី​ខ្លះ​ចាំ​តែ​ស៊ីឡាក​ដែរ​នៅពេល​ដែល​គណបក្ស​ប្រជាជន​ចាញ់​ឆ្នោត​ភ្លាម​គេ​ច្បាស់​ជា​នឹង​ងាក​ទៅ​បក្ស​ជាប់​ឆ្នោត​ថ្មី​ថែម​លុយ​រក​កន្លែង​អង្គុយ​ហើយ​។

ហេតុ​អ្វី​បាន​ជា​រដ្ឋាភិបាល​បាន​កសាង​សន្តិភាព​មួយ​ផ្នែក​ហើយ​តាម​ការ​បញ្ចប់​សង្គ្រាម​តែ​បែរ​ជា​អន់​ក្នុង​ការ​គ្រប់គ្រង​សន្តិសុខ​ខាង​ក្នុង​ខ្លួន​ឯង​មិន​បាន​ទៅ​វិញ​?

សូម​ចូលរួម​ផ្តល់​យោបល់​តាមរយៈ soprach.tong@phnompenhpost.com

អត្ថបទគួរចាប់អារម្មណ៍