.jpg)
ពលរដ្ឋក្រីក្រដែលរដ្ឋាភិបាលចាត់ទុកជាអាទិភាពសម្រាប់ជួយពេលមានកូវីដ។ រូបថត ហ្វេសប៊ុក
គិតមកទល់ថ្ងៃទី ១៥ ខែមិថុនា មានអ្នកឆ្លងជំងឺកូវីដ ១៩ នៅលើពិភពលោកជិត ៨ លាននាក់ និងមានអ្នកស្លាប់កើនដល់ជាង ៤៣ ម៉ឺននាក់។ ក្នុងកាលៈទេសៈនេះ មនុស្សភាគច្រើនសុទ្ធតែរងផលប៉ះពាល់ពីជំងឺដ៏កាចសាហាវមួយនេះគ្រាន់តែតិច ឬក៏ច្រើនតែប៉ុណ្ណោះ។ រីឯនៅប្រទេសកម្ពុជាបើទោះបីជាមានការឆ្លងមេរោគកូវីដ ១៩ នេះតែ ១២៨ នាក់ហើយមានអ្នកជាសះស្បើយដល់ទៅ ១២៥ នាក់ នៅសល់តែ ៣ នាក់ទៀតកំពុងសម្រាកនៅមន្ទីរពេទ្យក៏ដោយ ក៏មានការទទួលរងផលប៉ះពាល់សង្គមសេដ្ឋកិច្ចគួរសមដែរពីឥទ្ធិពលនៃជំងឺកូវីដ ១៩ នេះ។
ម្យ៉ាងវិញទៀតប្រទេសកំពុងអភិវឌ្ឍន៍នៅតែប្រឈមមុខនឹងការលំបាកជាងប្រទេសជឿនលឿនដដែល ខណៈរដ្ឋាភិបាលនៃប្រទេសជឿនលឿននៅមានលទ្ធភាពជួយប្រជាពលរដ្ឋរបស់គេ ដើម្បីសម្រាលក្ដីវេទនាដោយមានអាហារទំនុកបម្រុង និងប្រាក់កាសប្រចាំខែជួយ នៅពេលដែលការងារពលរដ្ឋត្រូវបានបាត់បង់។ សម្រាប់កម្ពុជាថ្មីៗនេះរាជរដ្ឋាភិបាលបានចេញវិធានដល់ជុំទី ៤ ហើយ ដើម្បីជួយស្រោចស្រង់ទាំងថៅកែ ទាំងកម្មករ-កម្មការិនី និងសហគ្រិន និងវិស័យទេសចរណ៍សណ្ឋាគារ និងភោជនីយដ្ឋានដែលស្ថិតក្នុងប្រព័ន្ធរងផលប៉ះពាល់ដោយសារតែជំងឺកូវីដ១៩នេះ។ រីឯអ្នកនៅក្រៅប្រព័ន្ធវិញ រដ្ឋកំពុងតែត្រៀមបញ្ចេញទឹកប្រាក់ ៣០០ លានដុល្លារ សម្រាប់ជួយកិច្ចគាំពារសង្គមផងដែរ។
ទោះជាយ៉ាងណា ទំហំទឹកប្រាក់នេះនៅតែជាបញ្ហាចោទសម្រាប់ប្រជាពលរដ្ឋ ដែលរងផលប៉ះពាល់ខ្លាំង បន្ទាប់ពីខែទី ៣ ឡើងទៅ ខណៈនៅមានការបិទច្រកចេញចូល ការធ្វើដំណើរអន្តរជាតិពីប្រទេសមួយចំនួន ការបិទការ៉ាអូខេ កាស៊ីណូ ភោជនីយដ្ឋាន ការសម្តែង សិល្បៈ ប្រគំតន្ត្រី បិទសាលារៀន និង បម្រាមថា បើមិនចាំបាច់មិនចេញពីផ្ទះជាដើម។ បញ្ហាទាំងនេះធ្វើឲ្យចរន្តសាច់ប្រាក់ដើរយឺត ហើយអ្នកចាយត្រូវមានកម្រិត ខណៈអ្នកខ្លះនៅបន្តការងារតែត្រូវកាត់ប្រាក់ខែ ៥០ ភាគរយ និង អ្នកខ្លះទៀតបាត់បង់ការងារតែម្ដង ដោយសារថៅកែទប់ទល់នឹងចំណូលតិចចំណាយច្រើន មិនជាប់។
ផលប៉ះពាល់ទាំងនេះសូម្បីតែពូស៊ីក្លូដែលធ្លាប់តែដឹកភ្ញៀវទេសចរជិះកម្សាន្តនៅរាជធានីភ្នំពេញក៏ជួបការលំបាកកាន់តែធ្ងន់ធ្ងរដែរ នៅពេលដែលភ្ញៀវទេសចរផ្អាកការធ្វើដំណើរកម្សាន្តនោះ។ ជាងនេះទៅទៀតគឺជនចំណាកស្រុកដែលមិនបានវិលត្រឡប់មកស្រុកកំណើតវិញ កំពុងជាប់គាំងនៅបរទេសពិសេសក្នុងប្រទេសថៃ ដោយពួកគេខ្លះបាននិងកំពុងជួបការលំបាកតាំងពីថ្លៃឈ្នួលស្នាក់នៅ ម្ហូបអាហារ កន្លែងការងារបិទទ្វារ ហើយមានអ្នកខ្លះទប់ទល់នឹងបញ្ហាប្រឈមលែងជាប់ក៏បានស្នើឲ្យបងប្អូនផ្ញើលុយពីស្រុកខ្មែរទៅចាយនៅទីនោះក៏មាន។
ចំណែកអ្នកខ្លះទៀតដូចជា អ្នកសុំទាននៅទីក្រុងបាងកកជាដើម ហាក់រឹតតែយ៉ាប់ខ្លាំងនៅពេលគេបិទទីក្រុង ដោយគេឃើញមានមន្ត្រីថៃបានដាក់ទានដែលមើលទៅវេទនាណាស់។ ចំពោះពលករដែលវិលត្រឡប់មកស្រុកវិញប្រមាណ ៩ ម៉ឺននាក់តាំងពីចុងខែមីនា មុនការបិទប្រទេសថៃក៏មិនទាន់ត្រូវបានអនុញ្ញាតឲ្យត្រឡប់ទៅធ្វើការនៅប្រទេសថៃ វិញដែរ ដោយក្រសួងមហាផ្ទៃបានបញ្ជាបិទច្រករបៀងទាំងអស់សិន ដើម្បីកុំឲ្យមានជនអន្តោប្រវេសន៍ចេញពីប្រទេសជិតខាងពេលកំពុងមានករណីឆ្លងកូវីដ ១៩ និងផ្នែកសេដ្ឋកិច្ចជាច្រើននៅបិទមិនទាន់អនុញ្ញាតឲ្យមានដំណើរការនៅឡើយ។ ទាំងនេះសុទ្ធតែជាបន្ទុករបស់រដ្ឋ និងជាបញ្ហាលំបាកកាន់តែខ្លាំងឡើងរបស់ប្រជាពលរដ្ឋ ប្រសិនបើការអូសបន្លាយនៃជំងឺកូវីដ ១៩ នេះកាន់យូរទៅៗនោះ។
ក៏ប៉ុន្តែផ្ទុយទៅវិញក្នុងខណៈពេលដែលពលរដ្ឋភាគច្រើនកំពុងជួបប្រទះនឹងការលំបាកដោយសារជំងឺកូវីដ ១៩ បែបនេះ បែរជាមានអ្នកមានជីវភាពធូរធារជាតារាៗ ឬតារាសម្តែងខ្លះបានបង្ហាញភាពហ៊ឺហាតាមរយៈបណ្តាញសង្គម និងតាមរយៈអត្ថបទសារព័ត៌មានអនឡាញដែលមើលទៅហាក់មានលក្ខណៈបញ្ឈឺចិត្តហើយសកម្មភាពបែបនេះ ចង់មិនចង់ធ្វើឲ្យអ្នករងផលប៉ះពាល់ ឬក៏អ្នកបាត់បង់ការងារទាំងស្រុងកាន់តែឈឺចាប់ឡើង។
ក្នុងកាលៈទេសៈនេះមានពលរដ្ឋមួយចំនួនបានខំត្រដររស់យ៉ាងវេទនារកតែអង្ករច្រកឆ្នាំងសឹងពុំចង់បានផង តែងាកមកមើលតារាៗខ្លះវិញមិនត្រឹមតែមិនចូលរួមចំណែកដោះស្រាយវិបត្តិកូវីដ ១៩ ទេ តែបែរជានាំគ្នាបង្អួតឡានទំនើបស៊េរីថ្មីៗមានដាក់ឈ្មោះផ្ទាល់ខ្លួនក៏មាន ដូចជា Rolls Royce, Lexus 570, Range Rover and Porsche បញ្ឈរ ៣-៤ គ្រឿងបង្ហាញទ្រព្យសម្បត្តិតាមហ្វេសប៊ុកកម្សាន្តលេងជាមួយនឹងរូបភាពហ៊ឺហាឡូយឆាយរបស់ខ្លួនទៅវិញ។
ដោយឡែកចំពោះអ្នកលក់ឡេតាមអនឡាញដែលគ្មានម៉ាកយីហោក្រុមហ៊ុនរោងចក្រណាមួយជាក់លាក់ក៏បានបង្ហាញគ្រឿងអលង្ការ មាស ពេជ្រស្រោចខ្លួនផងដែរ ដោយឆ្លៀតកេងប្រវ័ញ្ចពីអ្នកជាវតាមអនឡាញទាំងមិនបានដឹងពីគុណភាព ឬក៏ក្រុមហ៊ុនណាមួយដែលលក់ license ឬក៏ជាប្រភេទ Franchise អនុញ្ញាតឲ្យលក់នោះទេ ហើយថែមគ្មានបង់ពន្ធជូនរដ្ឋទៀតផង ដែលករណីនេះរដ្ឋមិនទាន់មានវិធានការបង្ក្រាបនៅឡើយទេ។
យ៉ាងណាមិញខណៈអ្នករងផលប៉ះពាល់កំពុងតែខ្វះខាតម្ហូបអាហារ ឬក៏ហូបអាហារមិនមានថាមពលផងស្រាប់តែមានអ្នកធូរធារខ្លះបង្ហាញម្ហូបអាហារ នៅក្នុងហាងក្តី ឬក៏នៅផ្ទះក្តីយ៉ាងហូរហៀរ ដោយមានតាំងពីដុតគោ ខ្វៃជ្រូក ដុតមាន់ ខ្វៃទា និងម្ហូបឆ្ងាញ់ៗដែលឥរិយាបថបែបនេះប្រៀបបានទៅនឹងការញ៉ែមគ្នាដូចកូនក្មេងឲ្យលេបទឹកមាត់អ៊ីចឹង ជាហេតុធ្វើឲ្យអ្នកក្រីក្រលំបាកពីវិបត្តិជំងឺកូវីដ ១៩ រឹតតែឈឺចាប់ខ្លាំង ខណៈកើតមកជាជាតិសាសន៍ដូចគ្នាតែការរស់នៅខុសគ្នាស្រឡះដែលសូម្បីតែបំពេញតម្រូវការចាំបាច់ជាមូលដ្ឋាន តាមទ្រឹស្តី ម៉ាស្លូ ដូចជា ជម្រក សម្លៀកបំពាក់ និងអាហារ ក៏មិនទាន់បានបំពេញផង។
ហេតុដូច្នេះសូមអ្នកមានៗ ឧកញ៉ាៗ តារាៗ ឬអ្នកមានជីវភាពធូរធារល្មមៗ គួរតែចូលរួមចំណែកធ្វើបុណ្យដាក់ទានដល់អ្នករងផលប៉ះពាល់ពីវិបត្តិកូវីដ ១៩ នេះសិន ប្រសើរជាងការបង្អួតពីភាពទាន់សម័យ និងភាពហ៊ឺហាព្រមទាំងចំណីអាហារជាសាធារណៈ ព្រោះការជួយរបស់រាជរដ្ឋាភិបាលបានតែមួយផ្នែកនៃតម្រូវការរបស់ពលរដ្ឋទេ ថ្វីបើមានការធានាមិនឲ្យនរណាម្នាក់ស្លាប់ដោយសារអត់បាយក៏ដោយ៕
ចូលរួមផ្តល់យោបល់តាមរយៈ soprach.tong@phnompenhpost.com
