The Phnom Penh Post Search

Search form




Logo of Phnom Penh Post newspaper Phnom Penh Post - ព្រះ​មហាក្សត្រ​ប្រទាន​ព្រះ​រាជ​ដំណាក់​ជួយ​រាស្ត្រ​ក្រីក្រ ឯ​អ្នក​ធំ​និង​សេដ្ឋី​ខ្លះ​ដណ្ដើម​ពី​អ្នក​ក្រ​ទៅ​វិញ!




ព្រះ​មហាក្សត្រ​ប្រទាន​ព្រះ​រាជ​ដំណាក់​ជួយ​រាស្ត្រ​ក្រីក្រ ឯ​អ្នក​ធំ​និង​សេដ្ឋី​ខ្លះ​ដណ្ដើម​ពី​អ្នក​ក្រ​ទៅ​វិញ!

Content image - Phnom Penh Post
ក្មេង​ៗ​ដើរ​នៅ​ក្នុង​បរិវេណនៃ​ព្រ​ះ​រាជ​ដំណាក់ នៅ​ខេត្ត​កោះ​កុង​ នា​ពេល​កន្លង​មក​។ រូបថត សហ​ការី

ព្រះ​មហាក្សត្រ​ប្រទាន​ព្រះ​រាជ​ដំណាក់​ជួយ​រាស្ត្រ​ក្រីក្រ ឯ​អ្នក​ធំ​និង​សេដ្ឋី​ខ្លះ​ដណ្ដើម​ពី​អ្នក​ក្រ​ទៅ​វិញ!

កាល​ពី​ដើម​ឡើយ​ស្រុក​ខ្មែរ​យើង ​ទឹក​ដី​ព្រៃ​ភ្នំ​អ្វីៗ​គឺ​សុទ្ធ​តែ​ជា​របស់​ស្តេច​ទាំង​អស់ តែ​នៅ​ពេល​ដែល​មាន​ការវិវត្ត​ពីរបប​មួយ​ទៅ​របប​មួយ​ទៀត​មាន​ការ​ផ្លាស់​ប្តូរ​ផង សង្គ្រាម​ផង​រហូត​មក​ទល់​សព្វ​ថ្ងៃ​នេះ ឥទ្ធិពល​និង​អំ​ណាច​របស់​ព្រះ​មហាក្សត្រ​ចេះ​តែ​ថម​ថយ​ទៅ​បន្តិច​ម្តងៗ​ទៅ​តាម​ច្បាប់​រដ្ឋ​ធម្មនុញ្ញ​គឺ​នៅ​សល់​តែ​កេរ​អាករ​ចាស់ៗ​ពី​ព្រះ​បរម​រតនកោដ្ឋ​សម្តេច​ឪ​ទេ។

ប៉ុន្តែ​ហេតុអ្វី​បាន​ជា​ព្រះ​ករុណា​សម្តេច ព្រះ​នរោត្តម សីហមុនី ព្រះ​ទ័យ​បេះ​ពី​មាត់​ពីក ប្រទាន​រាជ​ដំ​ណាក់​នៅ​ខេត្ត​កោះ​កុង​ទៅឲ្យ​​មន្ទីរ​ពេទ្យ​​គន្ធបុប្ជា​ជួយ​រាស្រ្ត​ក្រី​ក្រ​ទៅ​វិញ?

សព្វ​ថ្ងៃ​នេះ ​នៅ​ស្រុក​ខ្មែរ​មាន​ទេវតា​ចំនួន​ ២ ​​គឺ​ទេវ​តា​ទី ១ ​ទៅ​តាម​ជំនឿ​ប្រពៃណី​នៅ​ពេល​ចូល​ឆ្នាំថ្មី​​ដែល​តែង​តែ​យាង​​ចូល​មក​សោយ​រាជ្យ និង​មាន​ការ​ផ្លាស់​វេន​គ្នា​ ១ ឆ្នាំ​ម្តងៗ​ដែល​ភាសា​សាមញ្ញ​ថា​ ទទួល​ទេវតា​ឆ្នាំ​ថ្មី​ដើម្បី​សុំ​សេច​ក្តី​សុខ​ចម្រើន​ទូ​ទាំងន​គរ​នោះ។ តែ​ទេវតា​ពិត​ប្រាកដ​អនុវត្ត​ជាក់​ស្តែង​នោះ​គឺ​ទេវតា​ទី ២ ​ប្រៀប​បាន​ទៅ​នឹង​វេជ្ជបណ្ឌិត​ បេអាត រីចនើរ​​ (Dr Beat Richner) ជនជាតិ​ស្វ៊ីស​ដែល​កំពុង​តែ​ដឹក​នាំ​មន្ទីរ​​ពេទ្យ​គន្ធបុប្ជា​សព្វ​ថ្ងៃ​ឯណេះ​វិញ​ទេ កំពុង​ជួយ​កុមារ​កម្ពុជា​រាប់​លាន​នាក់​យ៉ាង​សស្រោកសស្រាំ។

ដោយ​សារ​តែ​ទេវ​តា​អនុ​វត្ត​ជាក់​ស្តែង​មែន​ទែន​នេះ​ហើយ​ ទើប​ធ្វើឲ្យ​អតីត​ព្រះ​បរមរតនកោដ្ឋ​សម្តេច​ឪ​មាន​ជំនឿ​ ហើយ​សុខ​ព្រះទ័យកាត់​ដី​បរិវេណ​ព្រះ​រាជ​វាំង​នៅ​រាជធានី​ភ្នំពេញ​ជូន​មន្ទីរ​ពេទ្យ​គុន្ធបុប្ផា​ដើម្បី​ឲ្យ​មាន​ដំណើរ​ការ​ជួយ​អាយុ​ជីវិត​កុមារ​កម្ពុជា​តាំង​ពី​ឆ្នាំ​ ១៩៩២ ​មក​ម្ល៉េះ។

រហូត​មក​ទល់​ពេល​នេះ តាម​រយៈ​វេបសាយ​របស់​លោក​បណ្ឌិត ប៊ិត រីច្ឆន័រ http://www.beat-richner.ch មន្ទីរពេទ្យ​គន្ធបុប្ជា​ទាំង​នៅ​ភ្នំ​ពេញ ​និង​នៅ​ខេត្ត​សៀមរាប បាន​ជួយ​សង្គ្រោះ​អាយុ​ជីវិត​កុមារ​ខ្មែរ​ដែល​មាន​ជំងឺ​ធ្ងន់ធ្ងរ​ដល់​ទៅ​ជាង​ ១ លាន ៥ សែន​នាក់​ទៅ​ហើយ​ដោយ​រាល់​ការ​ចំ​ណាយ​សម្រាប់​មនី្ទរពេទ្យ​នេះ​បាន​កើន​ឡើង​ដល់ ៤៣ លាន​ដុល្លារ​ដែល​ថវិកា​ទាំង​នេះបាន​មក​ពី​ជំនួយ​ពី​បរទេស​ស្ទើរ​តែ​ទាំង​ស្រុង។

ក្រៅ​ពីនោះ​ ក៏​មាន​ថវិកា​របស់​រាជរដ្ឋាភិបាល​កម្ពុជា​កើន​ឡើង​ចំនួន​ ៦ លាន​ដុល្លារ​សហរដ្ឋ​អាមេរិក​ដែរ​សម្រាប់​ឆ្នាំ ២០១៦ ដើ​ម្បី​ជួយ​ទ្រទ្រង់ ​និង​ថវិកា​ដែល​មាន​មក​ពី​សប្បុរស​ជន​តាម​រយៈ​កាក​បាទ​ក្រហម​ មូល​និធិ​ទូរទស្សន៍​បាយ័ន​និង​សប្បុរសជន​នានា​ទៀត​ក៏​បាន​ជួយ​ឧបត្ថម្ភ​គាំទ្រ​ផង​ដែរ។

ដោយ​មើល​ឃើញ​ពី​ភាព​វេទនា​ក្នុង​ការ​ដេក​រង់​ចាំ ​និង​ឈរ​ជា​ជួរ​ជុំវិញ​មន្ទីរពេទ្យ​ដើម្បី​ចូល​ក្នុង​ពិនិត្យ​ជំងឺ​កុមា​រ លោក​ឧកញ៉ា ម៉ុង ឫទ្ធី ​បាន​ជួ​យ​​សង់​កៅអី​សាធារណៈ​មាន​ដំបូល​នៅ​ជុំវិញ​មន្ទីរ​ពេទ្យ​នេះ​ដើម្បី​ជួយ​សម្រាល​ដល់​ប្រជាពលរដ្ឋ​ក្រី​ក្រ​ដែល​មក​ពី​បណ្តា​ខេត្ត។

ដោយ​ឃើញ​មាន​ការ​លំបាក​របស់​ប្រជារាស្ត្រ​និង​ចង់​កាត់​បន្ថយ​ការ​ចំណាយ​ធ្វើ​ដំ​ណើរ​ផង​ ព្រះ​ករុណា​និង​សម្តេច​ម៉ែក៏​​បាន​ប្រទាន​រាជ​ដំ​ណាក់​នៅ​ខេត្ត​កោះកុង​ជូន​មន្ទីរ​ពេទ្យគន្ធ​បុប្ផា​ដើម្បី​មាន​លទ្ធភាព​ប្រតិបត្តិ​ការ​នៅ​ទីនោះ ​និង​កាត់​បន្ថយ​ការ​​ចំណាយ​លើ​ការ​ជួលឬក៏​ទិញ​កន្លែង​​នៅ​ទី​នោះ​ផង។

ការ​បរិ​ចា្ចគ​ធ្វើ​ទាន​ព្រះ​រាជ​ដំណាក់​របស់​ព្រះ​ករុណា​ដូច​នេះ​​ គឺជា​ការ​សម្តែង​នូវ​ការ​ចូល​រួម​ជួយ​សង្គ្រោះកុមា​រកម្ពុជា​ និង​ជាគំរូ​ដ៏​ប្រពៃ​ណាស់។ តែ​ផ្ទុយ​ទៅ​វិញ បែរ​ជា​អ្នក​ធំៗ​និង​ឧកញ៉ាៗ​​ដែល​មាន​អំណាច​មួយ​ចំនួន​មិន​បាន​ជួយ​កាត់​ដី​ផ្ទាល់​ខ្លួន​ដើម្បី​ជួយ​ប្រជាពលរដ្ឋ​ក្រីក្រ​នោះ​គឺ​មាន​តែ​កាត់​ដី​និង​ប្លន់​ដី​ធ្លី​ពី​ប្រជាពលរដ្ឋ​ក្រីក្រ​ ធ្វើមាន​ធ្វើ​បាន​ខ្លួន​ឯង​ទៅវិ​ញ​ បើ​ទោះ​បី​ជា​ម្នាក់ៗ​មាន​ដី​រាប់រយ​រាប់​ម៉ឺន​ហិក​តា​ហើយ​ក៏​ដោយ។

រីឯ​សេដ្ឋីៗ​ខ្លះ​ទៀត​ក៏​ទន្ទ្រាន​យក​ដី​ព្រៃ​ដែល​អ្នក​ក្រីក្រ​ទទួល​អនុ​ផល​ពី​ព្រៃ​ឈើ​នោះដែរ។ នេះ​គឺ​ជា​ទង្វើ​អមនុស្សធម៌ និង​ជា​សោកនាដកម្ម​ថ្មី​មួយ​ដែល​កើត​មាន​នៅ​កម្ពុជា​សម័យ​នេះ​ហើយ​ក្លាយ​ទៅ​ជា​ជំងឺ​រ៉ាំរ៉ៃ​ទៅ​ហើយ​ដោយ​សារ​ទំនាស់​ដីធ្លី​កើតឡើង​ពីការ​ច្បាម​យក​ដីធ្លី​នេះ។ ប្រយ័ត្ន​ដូចលោក ព្រហ្ម ម៉ាញ ​តែង​តែ​កំប្លែង​លេង​ថា៖ «ពេល​នៅ​រស់​នាំ​គ្នា​ឈ្លោះ​ដណ្តើម​ធ្វើ​ម្ចាស់​លើ​ដី តែ​ដល់​ពេល​ស្លាប់​ទៅ​ជា​ខ្មោច​ ដី​នឹង​ធ្វើ​ជា​ម្ចាស់​លើ​មនុស្ស​វិញ​ហើយ?»។

យ៉ាង​ណា​មិញ​ សួន​ឧទ្យាន​ជាតិ​ក៏​នាំ​គ្នា​ពុះ​ច្រៀក​ចែក​គ្នា​កាប់​បំផ្លាញ​ធនធានធម្មជាតិ​ផង​ដែរ។ សូម្បី​តែ​បរិវណ​ព្រះរាជ​ដំណាក់​របស់​អតីត​សម្តេច​ឪ​នៅខេត្ត​ ស្ទឹងត្រែង ​ក៏​លេច​ឮរឿង​អាស្រូវ​ទន្ទ្រាន​យកដី​ដោយ​អតីត​អភិបាល​ខេត្ត​ស្ទឹងត្រែង លោក ​ឡូយ សុផាត ផងដែរ។ រីឯ​ព្រះ​រាជ​ដំណាក់​មួយ​ចំនួន​ក៏មិន​ត្រូវ​បាន​យក​មក​អភិវឌ្ឍ​កសាង​ឡើង​វិញ​នោះ​ទេ​គឺ​ទុក​ចោល​ក្លាយ​ទៅ​ជា​ទី​ស្មសាន​ដូច​ជា​ព្រះ​រាជ​ដំណាក់​នៅ​បូក​គោ ​នៅ​កែប​ជា​ដើម​ ​បើ​ទោះ​បី​ជា​មាន​ការ​អភិវឌ្ឍ​ជុំវិញ​តំបន់​នោះ​ក៏​ដោយ។

អ្នក​មាន​អំ​ណាច​និង​ឧក​ញ៉ាៗ​ខ្លះ ​ដល់​ពេល​មាន​លុយ​ចាយ​មិន​អស់​ទៅ​គឺ​គ្មាន​គំនិត​បរិចា្ចគ​និង​ធ្វើ​ទាន​ដើម្បី​ជាតិ​ដូច​មន្ទីរពេទ្យ​គន្ធបុប្ផា​ជាដើម ​ឬ​ជួយ​ផ្ទាល់​ទៅ​ពលរដ្ឋ​ក្រីក្រ​ទេ​គឺ​មាន​តែ​យក​លុយ​ទៅ​ចាយ​លេង​ជា​មួយ​នឹង​ល្បែង​ស៊ី​សង​នៅ​កាស៊ី​ណូ ​ឬក៏​យក​លុយ​ទៅ​ចិញ្ចឹម​ស្រី​ក្មេង​ឬ​តារា​ល្បីៗ ​ទិញ​តាំង​ពី​ឡាន ​វីឡា និង​សម្ភារ​ទំនើបៗ ​ធ្វើ​យ៉ាង​ណា​ដើម្បី​សប្បាយ​ទៅ​នឹង​ការ​ស្រើប​ស្រាល​កាម​តណ្ហា​របស់​ខ្លួន​តែ​ប៉ុណ្ណោះ។

រីឯខ្លះ​ទៀត យក​លុយ​ផ្ទាល់​ខ្លួន​ទៅ​ដាក់​ធនា​គារ​បរទេស​រាប់​លាន​ដុល្លារ​ បើ​ទោះ​បី​ជា​ថ្នាក់​ដឹក​នាំ​អំពាវនាវ​ឲ្យ​យក​លុយ​ទាំង​នោះ​មក​ចូល​រួម​ចំណែក​កសាង​ប្រទេស​ជាតិ​ខ្លះផង ​ក៏​នៅ​តែ​ពួក​គេ​ធ្វើ​មិន​ដឹង​មិន​ឮ​ដដែល។ បើ​ធ្វើ​ការ​ប្រៀប​ធៀប​ជា​មួយ​​ព្រះមហាក្សត្រ​វិញ គឺ​ព្រះ​អង្គ​មាន​តែ​ថវិកា​ជាតិ​ថ្វាយ​ជូន​ជា​រៀង​រាល់​ឆ្នាំ​ទៅ​ក្រសួង​ព្រះ​បរម​រាជ​វាំង​ប្រ​មាណ​ជា​ ២០ ​លាន​ដុល្លារ ​យក​បម្រើ​សព្វ​សារពើ និង​កម្មវិធី​ធំៗ ហើយ​និយាយ​ឲ្យ​ចំ​ទៅ ​មាន​តែ​ព្រះ​មហា​ក្សត្រ​ស្រុក​ខ្មែរ​ទេ​ដែល​ក្រ​ជាង​គេ​នៅ​លើ​ពិភព​លោក ​តែ​ព្រះ​អង្គមាន​មេត្តា​ធម៌ ធ្វើ​ព្រះ​រាជ​ទាន ដែល​សូម្បី​តែ​កាក​បាទ​ក្រហម​ក៏​ព្រះ​អង្គ​ចូល​រួម​ធ្វើ​ព្រះរាជ​​ទាន​ដែរ៕

ចូល​រួម​ផ្តល់​យោបល់​តាម​រយៈ soprach.tong@phnompenhpost.com

អត្ថបទគួរចាប់អារម្មណ៍