The Phnom Penh Post Search

Search form

យុវជន​ទំនើង​នៅ​តែ​បង្ក​គ្រោះថ្នាក់​ដល់​អាយុ​ជីវិត​ ដោយសារ​ឆក់​កាបូប

យុវជន​ជាប់​ចោទ​ឆក់​ខ្សែក​ជនបរទេស​នៅ​ម្តុំ​ផ្សារ​កណ្តាល​កាលពី​ថ្ងៃ​ទី ២៦ ​ខែ​សីហា​។
យុវជន​ជាប់​ចោទ​ឆក់​ខ្សែក​ជនបរទេស​នៅ​ម្តុំ​ផ្សារ​កណ្តាល​កាលពី​ថ្ងៃ​ទី ២៦ ​ខែ​សីហា​។ រូបថត នគរបាលជាតិ

យុវជន​ទំនើង​នៅ​តែ​បង្ក​គ្រោះថ្នាក់​ដល់​អាយុ​ជីវិត​ ដោយសារ​ឆក់​កាបូប

បន្ទាប់​ពី​មាន​ការ​ផ្លាស់ប្តូរ​ការ​រស់នៅ​ពី​សង្គម​និយម​មក​មូលធន​និយម​តាំងពី​ដើម​ទសវត្សរ៍​ឆ្នាំ​ ១៩៩០ មក​ធ្វើឲ្យ​ពលរដ្ឋ​ខ្មែរ​ម្នាក់ៗ​ចេះ​តែ​ចង់​មាន​ចង់​បាន​តាម​វិធីសាស្ត្រ​ខុសៗ​គ្នា​ធ្វើ​យ៉ាងណា​ដើម្បី​ឲ្យ​ខ្លួន​មាន​ភាព​ហ៊ឺហា​ទាន់​សម័យ​នឹង​គេ​បើ​ទោះបី​ជា​ទ្រព្យ​នោះ​ខ្លះ​បាន​មក​ដោយ​ទុច្ចរិត​តាមរយៈ​កិបកេង​ ពុករលួយ បោកប្រាស់​គេ ឬ​ក៏​លួច​ឆក់​ប្លន់​គេ​ក៏ដោយ​។​ ជាពិសេស​គឺ​ក្រុម​យុវជន​ដែល​មាន​ទម្លាប់​ចាយ​លុយ​ធំ​ហើយ​គ្មាន​ការងារ​ធ្វើ​គឺ​អំពើ​អបាយមុខ​នឹង​ធ្លាក់​មកលើ​ពួកគេ​ភ្លាមៗ​ដូចជា​ការ​លួច​ និង​​ឆក់​ទូរស័ព្ទ កាបូប ​និង​ខ្សែក ដែល​ជា​លក្ខណៈ​បន្ទាន់ៗ​ដើម្បី​​បំពេញ​តម្រូវ​ការ​សប្បាយ​ប្រចាំ​ថ្ងៃ​។

សកម្មភាព​ឆក់​ទូរស័ព្ទ​ កាបូប និង​ខ្សែក នេះ​កើត​មាន​ឡើង​ជា​រៀងរាល់​ថ្ងៃ​នៅ​កន្លែង​ទីប្រជុំជន​ជាពិសេស​នៅ​តាម​ផ្លូវ​រាជធានី​ភ្នំពេញ​គ្រាន់តែ​ទីកន្លែង​ខុសៗ​គ្នា​។ ប្រជាពលរដ្ឋ​មាន​ការ​ត្អូញត្អែរ​ជា​ខ្លាំង​ដោយ​ខ្លាច​លែង​ចង់​ហ៊ាន​ធ្វើ​ដំណើរ​តាម​ផ្លូវ​ចំពោះ​ចោរ​ឆក់​ដែល​ជា​យុវជន​ក្មេងៗ​ជិះ​ម៉ូតូ​ឆក់​របស់​របរ​មាន​តម្លៃ​ដែល​នៅ​ជាប់​នឹង​ខ្លួន​ជាទូទៅ​ពួក​យុវជន​ទំនើង​ទាំងនោះ​ធ្វើការ​តាមដាន​ជនរងគ្រោះ​តាំងពី​ចេញ​ដំណើរ​ពី​ណា​មក​ណា​ជាពិសេស​គឺ​ជនរងគ្រោះ​ទៅ​ចូលរួម​ ឬ​ក៏​ចាកចេញ​ពី​ភ្ជាប់​ពាក្យ​ ហូបការ បង្កក់​កូន​ ឬ​កម្មវិធី​ជប់​លៀង​ធំៗ​ជួនកាល​កំពុង​តែ​ការ​ ហែជំនូន​ក៏​ពួកគេ​អាច​ឆក់​ខ្សែក ខ្សែដៃ ក្រវិល កាបូប​ដៃ ទូរស័ព្ទ​ទំនើបៗ​ កាមេរ៉ា ជាដើម។​ រីឯ​ជនបរទេស​ក៏​ជា​គោលដៅ​ធំ​របស់​ពួកគេ​ក្នុង​ការ​ឆក់​របស់របរ​ផង​ដែរ​។

ឥឡូវ​នេះ​បញ្ហា​បាត់​របស់​ជា​រឿង​សោកស្តាយ​មួយ​តែ​បញ្ហា​ធំ​គឺ​បណ្តាល​ឲ្យ​ជនរងគ្រោះ​គ្រោះថ្នាក់​ភ្លាម​ដូចជា​ដាច់​ទង​ត្រចៀក ឈាម​ហូរ​ពេល​ត្រូវ​បាន​​ចោរ​ឆក់​ក្រវិល​ហើយ​ពេល​ខ្លះ​ទាញ​កាបូប​គ្នា​ទៅវិញ​ទៅមក​ធ្វើឲ្យ​ធ្លាក់​ដួល​ពី​លើ​ម៉ូតូ​ខ្លះ​រងរបួស​ធ្ងន់ធ្ងរ​ខ្លះ​ក៏​បណ្តាល​ឲ្យ​ស្លាប់​ភ្លាមៗ​។ ដូច​ករណី​និស្សិត​ពេទ្យ​ឆ្នាំ​ទី ៥ ​ត្រូវ​ចោរឆក់​កាបូប​ទាំង​ព្រលឹម​អុរ​ធ្លាក់​ពី​លើ​ម៉ូតូ​បោក​ក្បាល​ស្លាប់​ភ្លាមៗ​យ៉ាង​អាណោច​អាធ័ម​កាលពី​សប្តាហ៍​មុន​នេះ​។ ករណី​ស្លាប់​ដោយសារ​ចោរឆក់​របស់របរ​តាម​ផ្លូវ​សាធារណៈ​នេះ​មិន​មែន​ជា​លើក​ទី​ ១ ទេ​គឺ​កើត​មាន​ឡើង​ច្រើន​ករណី​ណាស់​ដែល​សមត្ថកិច្ច​មិន​អាច​បង្ក្រាប​បាន​នូវ​បញ្ហា​នេះ​ជា​ស្ថាពរ​នៅ​ឡើយ​ទេ​។ តើ​ចំា​ដល់​ពេល​ណា​?

ចំណែកឯ​ប៉ូលិស​ខេត្ត​ព្រះសីហនុ​ក៏​កំពុង​កសាង​សំណុំ​រឿង​យុវជន ២ ​នាក់​ករណី​ឆក់​កាបូប​នេះ​ដែរ​ទៅ​តុលាការ​ខេត្ត​កាលពី​សប្តាហ៍​មុន​។ ម្យ៉ាងវិញ​ករណី​ខ្លះ​រឿង​មិន​គួរ​ឲ្យ​ជឿ​នោះ​គឺ​យុវជន​ដែល​ឆក់​កាបូប​នោះ​គឺ​ជា​និស្សិត​សាកល​វិទ្យាល័យ​ដែល​បាន​សារភាព​នៅ​ប៉ុស្តិ៍​ប៉ូលិស​សង្កាត់​ស្រះចក ខណ្ឌ​ដូនពេញ​ បន្ទាប់ពី​ប្រជាពលរដ្ឋ​ចាប់​បាន​កាលពី​សប្តាហ៍​មុន។​ សំណួរ​សួរ​ថា​ហេតុ​អ្វី​បាន​ជា​យុវជន​ធ្លាក់​ខ្លួន​ទៅ​ធ្វើ​ជា​ចោរ​ឆក់​កាបូប ទូរស័ព្ទ​ ឬ​ក៏​ខ្សែក​បែប​នេះ?​ តើ​ពួកគេ​ដឹង​អំពី​គ្រោះថ្នាក់​ដល់​ជនរងគ្រោះ​នៅ​តាម​ផ្លូវ​ដែរ​ឬ​ទេ? ឬ​ក៏​គ្រោះថ្នាក់​ពួកគេ​វិញ​នៅពេល​គេ​ចាប់​ខ្លួន​បាន​ពេល​កំពុង​ឆក់​នោះ​? ហើយ​ពួកគេ​មាន​ទំនាក់ទំនង​ជាមួយ​ប៉ូលិស​យ៉ាង​ដូចម្តេច​?

ចម្លើយ​ទាំង​នេះ​មាន​នៅក្នុង​របាយការណ៍​សិក្សា​ស្រាវជ្រាវ​របស់​អង្គការ​ GAD/C ​កាលពី​ឆ្នាំ​ ២០០៣​​ ស្តីពី​ឥរិយាបថ​ និង​បទពិសោធ​របស់​យុវជន​បងធំ​ (ទំនើង)​ ដែល​ពាក់ព័ន្ធ​ទៅ​នឹង​ការ​ប្រព្រឹត្ត​អំពើ​ហិង្សា អំពើ​រំលោភ​សេពសន្ថវៈ គ្រឿង​ញៀន​ និង​អំពើ​ចោរកម្ម​ដែល​ខ្ញុំ​បាន​ចូលរួម​សិក្សា​ស្រាវជ្រាវ​ និង​សម្ភាស​ផ្ទាល់​យុវជន​ដែល​ធ្លាប់​បាន​ប្រព្រឹត្ត​អំពើ​ទាំង​នេះ។ ដោយ​ភ្ជាប់​នូវ​សំណួរ​គន្លឹះ​ដែល​បាន​សួរ​ទៅ​ពួកគេ​ថា​តើ​អ្នក និង​ក្រុម​របស់​អ្នក​បាន​ប្រាក់​ចំណូល​មកពី​ណា​ដើម្បី​ធ្វើ​សកម្មភាព​?

យុវជន​ទំនើង​ដែល​បាន​ផ្តល់​សម្ភាសន៍​នៅក្នុង​របាយការណ៍​នេះ​គឺ​៖ «បាន​រៀបរាប់​អំពី​សកម្មភាព​របស់​ពួកគេ​មាន​លក្ខណៈ​ប្រហាក់​ប្រហែល​គ្នា។ ចំពោះ​ប្រាក់​ចំណូល​ដំបូង​ពួកគេ​ចេះ​លួច​លុយ​ឪពុក​ម្តាយ​ម្តង​ពី ៤០០ ទៅ​ ៥០០ ដុល្លារ​បន្ទាប់​មក​ពួកគេ​ចេះ​ដាក់​របស់របរ​បញ្ចាំ​ដូចជា​ម៉ូតូ ទូរស័ព្ទ​ ខ្សែក ​ឬ​ក៏​លក់​តែ​ម្តង​​។

អស់​ពី​វិធី​ទាំងនេះ​គឺ​ចាប់ផ្តើម​ចេញ​លួច ឬ​ឆក់​ខ្សែក​ កាបូប ទូរស័ព្ទ កុំព្យូទ័រ ហើយ​លុយ​ដែល​បាន​មក​ចែក​គ្នា​ខ្លះ​គឺជា​ទូទៅ​យក​ទៅ​ផឹកស៊ី ចូល​ក្លិប​យក​ស្រី​ទៅ​បូក​ (រំលោភ​បូក) ជក់​គ្រឿងញៀន លេង​ល្បែង​ស៊ីសង​។ អ្នក​ដែល​ជំនាញ​ឆក់​ខ្សែក​ ឬ​កាបូប​មែនទែន​ក៏​បាន​ពន្យល់​យ៉ាង​ច្បាស់​គឺ​ដាច់ខាត​បាន​របស់​ហើយ​មិន​ឲ្យ​ជនរងគ្រោះ​ធ្លាក់​ពី​លើ​ម៉ូតូ ឬ​ក៏​ធុកធុក​ទេ​គឺ​គ្រាន់តែ​ភ្ញាក់​មួយ​ភ្លែត​ហើយ​ក៏​បាន​ចំអក​ទៅ​អ្នក​ដែល​គ្មាន​បទពិសោធ ឬ​ក៏​មិន​​ចេះ​វិញ​ថា​ឆក់​ធ្វើឲ្យ​ខ្សែក​ដាច់​ជា​ ៣ ​កំណាត់ ឬ​ក៏​ទាញ​កាបូប​ធ្វើឲ្យ​ម្ចាស់​កាបូប​ធ្លាក់​ពី​លើ​ម៉ូតូ​គ្រោះថ្នាក់​ចរាចរណ៍​ជាដើម​។

យ៉ាងណា​ក៏ដោយ​មួយ​ចំនួន​នៃ​ពួកគេ​ក៏​មិន​ភ្លេច​ឲ្យ​លុយ​ប៉ូលិស​ចាយ​យ៉ាង​តិច​ ៥០ ​​ដុល្លារ​ដែរ​ព្រោះ​ប៉ូលិស​ដែល​ឈរ​ជើង​នៅ​ទីតាំង​មូលដ្ឋាន​ដឹងថា​ពួកគេ​ធ្វើអី​នៅ​ទី​នោះ​ហើយ​ប្រសិន​បើ​មាន​ប៉ូលិស​ដេញ​តាម​គឺ​ប្រឹង​ជិះ​គេច​ឲ្យ​ផុត​ពី​តំបន់​ហ្នឹង​ហើយ​បើ​ចាប់​បាន​យុទ្ធសាស្ត្រ​ពួកគេ​គឺ​មាន​ប៉ុន្មាន​ឲ្យ​ប៉ូលិស​ទាំងអស់​ធ្វើ​យ៉ាង​ណា​ឲ្យ​រួច​ខ្លួន​មួយ​គ្រា​សិន​។​

ទោះបី​ជា​យ៉ាង​ណា​ ក៏​យុវជន​ដែល​ធ្លាប់​មាន​បទពិសោធ​ទាំង​នេះ​បាន​ដឹង​ជា​មុន​ថា​ប្រសិន​បើ​ពួកគេ​ត្រូវ​ប្រជាជន​ចាប់​បាន​គឺ​គេ​វ៉ៃ​ទក់សាច់ ឬ​ក៏​អាច​ស្លាប់​ដែរ​។

ដោយសារ​កំហឹង​ពី​ម្ចាស់​របស់​ ឬ​ក៏​ជនរងគ្រោះ​ដែល​ជា​ភ្ញៀវ​របស់​ម៉ូតូឌុប ឬ​ក៏​ធុកធុក​ធ្វើឲ្យ​ពួកគេ​មាន​គំនុំ​ជាមួយ​នឹង​ក្រុម​យុវជន​ដែល​ឆក់​ខ្សែក​ កាបូប​ទាំងនេះ​ឲ្យ​តែ​ចាប់​បាន​គឺ​មាន​ដំបង បំពង់ទីប ឬ​ក៏​សោ​យក​មក​សំពង​ហើយ។ កន្លង​មក​ធ្លាប់​មាន​ចាប់​បាន​ចោរឆក់​គឺ​ពួកគេ​នាំ​គ្នា​វាយ​ទាល់​តែ​ស្លាប់​តាមរយៈ​ការ​កាត់ទោស​ដោយ​ហ្វូង​មហាជន​ (Mob killing) ព្រោះ​ពួកគេ​ខ្វះ​ការ​ជឿជាក់​ទៅលើ​ប៉ូលិស​ និង​តុលាការ។ តែ​ការ​ដោះស្រាយ​បែប​នេះ​គឺ​បាន​ផ្ទុយ​ទៅ​នឹង​ច្បាប់​ហើយ​ពួកគេ​អាច​មាន​ទោស​ខ្លួនឯង​ទៅវិញ​។

តើ​រាជរដ្ឋាភិបាល​គួរ​រក​វិធី​ដោះស្រាយ​យ៉ាង​ដូចម្តេច​ដើម្បី​កុំ​ឲ្យ​មាន​គ្រោះថ្នាក់​ដល់​អាយុ​ជីវិត ឬ​ក៏​ពិការភាព​ដោយសារ​តែ​យុវជន​ទំនើង​ឆក់​កាបូប ឬ​ខ្សែក​បាន? ដើម្បី​កុំ​ឲ្យ​ប៉ះពាល់​ភ្ញៀវទេសចរ​ផង? ហើយ​ដើម្បី​ឲ្យ​យុវជន​ចៀស​ឆ្ងាយ​ពី​អំពើ​ចោរកម្ម​ឆក់​របស់របរ​​តាម​ផ្លូវ​សាធារណៈ​​ផង​នេះ? បើ​សិន​ជា​ចាប់​យុវជន​ដែល​ឆក់​របស់របរ​ទាំង​នេះ​យក​ទៅ​ដាក់គុក​វិញ​គឺ​រក​គុក​ដាក់​គ្មាន​ទេ។

បើ​បញ្ហា​យុវជន​ឆក់​កាបូប ខ្សែក និង​ទូរស័ព្ទ​នេះ​បន្ទុក​បណ្តាក់​តែ​លើ​ប៉ូលិស​ក៏​មិនមែន​ជា​ដំណោះស្រាយ​យូរអង្វែង​ព្រោះ​បញ្ហា​យុវជន​នេះ​គឺ​ធំ​ណាស់​ត្រូវ​ធ្វើ​អន្តរាគមន៍​មុន​ការ​ប្រព្រឹត្ត​របស់​ពួកគេ​ឲ្យ​ខាង​តែ​បាន​។ ​

ដូចជា​ក្រសួង​អប់រំ យុវជន និង​កីឡា​សព្វ​ថ្ងៃ​ហ្នឹង​ធ្វើអ្វី​ខ្លះ​ក្នុង​ការ​ដោះស្រាយ​បញ្ហា​យុវជន​នេះ? ហើយ​សាលា​រាជធានី និង​ក្រុង​តាម​ខេត្ត​នានា​បាន​ធ្វើ​អ្វី​ខ្លះ? បើ​មើល​អ្វីៗ​នៅ​ជុំវិញ​យុវជន​ និង​សាលារៀន​សព្វថ្ងៃ​ពោរពេញ​​ទៅ​ដោយ​គ្រឿង​ស្រវឹង ក្លិប​កម្សាន្ត ខារ៉ាអូខេ​ ល្បែង​ហ្គេម​ស៊ីសង យុវជន​ទិញ​គ្រឿងញៀន​ដូច​ទិញ​ស្ករគ្រាប់​ទៅ​ហើយ​នោះ​?

រីឯ​ក្រុម​ប្រឹក្សា​យុវជន​កម្ពុជា​បាន​ធ្វើអ្វី​ខ្លះ​ហើយ​ឬ​នៅ​?​ដើម្បី​ឲ្យ​ឆ្លើយតប​ទៅ​នឹង​គោលនយោបាយ​អភិវឌ្ឍន៍​យុវជន​ដូចជា​ការ​បង្កើត​កន្លែង​​សម្រាក​កម្សាន្ត និង​កីឡា​បាន​សមស្រប​ហើយ​ឬ​នៅ? បង្កើត​មជ្ឈមណ្ឌល​អប់រំ​សម្រាប់​យុវជន​ដើម្បី​ទាក់ទាញ​យុវជន​ហើយ​ឬ​នៅ? តើ​ការ​ដោះស្រាយ​បញ្ហា​អត់​ការងារ​ធ្វើ​របស់​យុវជន​ទៅ​ដល់​ណា​​ហើយ​?

ផ្អែក​តាម​របាយការណ៍​សិក្សា​ស្រាវជ្រាវ​របស់​សម្ព័ន្ធ​យុវជន​​ដើម្បី​ឯកភាព និង​អភិវឌ្ឍន៍ (YCUD) ​ស្តីពី​កង្វល់​របស់​យុវជន​ក្នុង​ឆ្នាំ​ ២០១៥ ឃើញ​​ថា​៖ «យុវជន​ជិត ៤៩ ភាគរយ​នៃ​យុវជន​​សរុប​ដែល​បាន​ផ្តល់​ចម្លើយ​បាន​សម្តែង​កង្វល់​ពី​​ភាព​អត់​មាន​ការងារ​ធ្វើ​ជា​បញ្ហា​ចម្បង​របស់​ពួកគេ»។

នេះ​ហើយ​ជា​បញ្ហា​ដែល​យុវជន​ងាយ​ធ្លាក់​ចូល​ទៅ​ក្នុង​អំពើ​អបាយមុខ​ផ្សេងៗ​។ រីឯ​មន្ត្រី​ប៉ូលិស​គួរតែ​ធ្វើការ​សិក្សា​ស្រាវជ្រាវ​ពី​បច្ចុប្បន្នភាព​ទៅលើ​ឫសគល់​នៃ​បញ្ហា​ដែល​ធ្វើឲ្យ​យុវជន​​ធ្វើ​សកម្មភាព​ដែល​ជះ​ឥទ្ធិពល​អាក្រក់​​ទៅ​ដល់​សង្គម និង​វិស័យ​ទេសចរណ៍​ជា​ជាង​ចាប់​បាន​គ្រាន់តែ​ឃុំ​ខ្លួន​ធ្វើ​កំណត់​ហេតុ​ទៅ​ចប់​ហើយ​នោះ។ រីឯ​សមាគម​យុវជន​ខ្លះ​មិន​បាន​ចូលរួម​ដោះស្រាយ​បញ្ហា​របស់​យុវជន​ទេ​គឺ​បង្កើត​សមាគម ​ឬ​សហព័ន្ធ​ខ្លះ​បាន​ត្រឹម​តែ​កេងប្រវ័ញ្ច​នយោបាយ​ទាក់ទាញ​សន្លឹក​ឆ្នោត​ពី​យុវជន​ទៅវិញ​ទេ​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

អត្ថបទគួរចាប់អារម្មណ៍