The Phnom Penh Post Search

Search form




Logo of Phnom Penh Post newspaper Phnom Penh Post - យេនឌ័រ​ត្រូវ​បាន​លើក​ស្ទួយ​ក្នុង​សង្គម​គ្រួសារ​តើ​គ្រួសារ​យេនឌ័រ​គួរ​តែ​ធ្វើ​ការ​ជាមួយ​គ្នា​ឬ​ទេ​?




យេនឌ័រ​ត្រូវ​បាន​លើក​ស្ទួយ​ក្នុង​សង្គម​គ្រួសារ​តើ​គ្រួសារ​យេនឌ័រ​គួរ​តែ​ធ្វើ​ការ​ជាមួយ​គ្នា​ឬ​ទេ​?

យេនឌ័រ​ត្រូវ​បាន​លើក​ស្ទួយ​ក្នុង​សង្គម​គ្រួសារ​តើ​គ្រួសារ​យេនឌ័រ​គួរ​តែ​ធ្វើ​ការ​ជាមួយ​គ្នា​ឬ​ទេ​?

Content image - Phnom Penh Post
លោកនាយករដ្ឋមន្ត្រី និងភរិយាចូលរួមក្នុងពិធីសិទ្ធិនារីអន្តរជាតិ

ភ្នំពេញ : ទស្សនៈ​យេនឌ័រ​ បាន​ជ្រាប​ចូល​មក​ស្រុក​ខ្មែរ​ជាង​១០ ​ឆ្នាំ​ហើយ​ តាម​រយៈ​អង្គការ​ក្រៅ​រដ្ឋាភិបាល​មួយ​ចំនួន​ និង​ក្រសួង​កិច្ចការ​នារី​។​ រហូត​មក​ដល់​ពេល​នេះ​ ឃើញ​មាន​ការ​​អភិវឌ្ឍ​ប្រសើរ​ឡើង​បន្តិច​ម្តង​ៗ​ផ្នែក​យេនឌ័រ​នេះ ​នៅ​តាម​ស្ថាប័ន​នានា ​ចាប់​តាំង​ពី​តំណាង​រាស្រ្ត មន្ត្រី​ជាន់​ខ្ពស់​​រាជ​រដ្ឋា​ភិបាល​ មន្ត្រី​រាជការ​ រហូត​ដល់​កម្មករ​ កម្មការិនី​។​​ ថ្មីៗ​​នេះ​ ក្រសួង​មហា​ផ្ទៃ​បាន​ផ្តល់​តួនាទី​នគរបាល​ស្នង​ការ​រង​ជា​ស្ត្រី​មួយ​រូប​តាម ​បណ្តា​ខេត្ត​ ក្រុង​នានា។

ជាមួយ​គ្នា​នេះ​ដែរ ​ក្នុង​ឱកាស​ទិវា​សិទ្ធិ​នារី​អន្តរ​ជាតិ​ឆ្នាំ​នេះ​ លោក​នាយក​រដ្ឋ​មន្ត្រី​ ហ៊ុន​​ សែន ក៏​បាន​​ចូល​​រួម​ចំណែក​លើក​ស្ទួយ​ និង​​គាំទ្រ​ស្ត្រី​ចូល​រួម​កសាង​ព្រះ​រាជា​ណា​ចក្រ​កម្ពុជា​ផង​ដែរ​ តែ​លោក​ក៏​បាន​ព្រមាន​ជំទាវ​ៗ​ជា​ភរិយា​របស់​រដ្ឋ​មន្ត្រី​មួយ​ចំនួន​ថា​ «កុំ​​ឲ្យ​ប្រែ​ក្លាយ​​ ក្រសួង​រដ្ឋ​ទៅ​ជា​ក្រសួង​គ្រួសារ​»។​ ចុះ​ចំណែក​ស្ថាប័ន ​សមាគម ​អង្គការ​ក្រៅ​រដ្ឋាភិបាល​និង​ក្រុម​ហ៊ុន​ធំៗ​បាន​ប្រព្រឹត្ត​ដូច​ស្ថាប័ន​រដ្ឋ​ ដូច​ដែល​លោក​នាយក​រដ្ឋ​មន្ត្រី​ធ្វើ​ការ​ព្រមាន​ដែរ​ឬ​ទេ​?

តាម​ការ​សង្កេត​របស់​ខ្ញុំ សព្វ​ថ្ងៃ​នេះ​វប្បធម៌​គ្រួសារ​និយម​ (Nepotism)​ ​នៅ​តែ​កើត​មាន​មួយ​ចំនួន​​​នៅ​បណ្តា​ស្ថាប័ន​ធំៗ​ទាំង​នោះ។​​ ជា​ឧទាហរណ៍​​ ​មាន​អង្គការ​មួយ​ចំនួន​តូច​ត្រូវ​បាន​គេ​មើល​ឃើញ​ថា​​ ខិត​ខំ​ប្រឹង​ប្រែង​ធ្វើ​ការ​យ៉ាង​​សកម្ម​ក្នុង​ការ​លើក​ស្ទួយ​ផ្នែក​ ផ្សេង​ៗ​គ្នា​ សុខ​ភាព​នានា ​សិទិ្ធ​មនុស្ស ​សមភាព​យេនឌ័រ​​​ តាម​រយៈ​ការ​បណ្តុះ​បណ្តាល​​ ស្រាវជ្រាវ​​ តស៊ូ​មតិ​និង​បណ្តាញ​នានា​​ ធ្វើ​យ៉ាង​ណា​ឲ្យ​បុរស​​ស្ត្រី​មាន​ភាព​ស្មើ​គ្នា​នៅ​ក្នុង​សង្គម​។​​ តែ​អង្គការ​ទាំង​នេះ​ធ្វើ​ជា​មិន​ដឹង​​មិន​ឮ​អំពី​គ្រួសារ​យេន​ឌ័រ​​(​ប្តី​​ ​និង​ប្រពន្ធ​​ ហើយ​ខ្លះ​ទៀត​ថែម​ទាំង​សាច់​ញាតិ និង​អតីត​មិត្ត​រួម​ការ​ងារ)​​​​ ខ្លួន​ឯង​នៅ​ក្នុង​អង្គភាព​តែ​មួយ​ជា​យូរ​ឆ្នាំ​មក​ហើយ​​។

តើ​គោល​នយោបាយ​យេនឌ័រ​ បាន​បញ្ជាក់​ថា ទាល់​តែ​ធ្វើ​ដូច្នេះ​ទើប​បាន​ហៅ​ថា ​មាន​យេនឌ័រ​ឬ? ​​ឬ​មួយ​ក៏​គោល​នយោបាយ​យេនឌ័រ​ ​​មាន​ការ​ខ្វះខាត ចន្លោះ​ប្រហោង​ត្រង់​ចំណុច​នេះ​​មើល​ទៅ​? ​តើ​នេះ​ជា​ការ​អភិវឌ្ឍ​យេនឌ័រ​នៅ​ក្នុង​សង្គម​ ឬ​ការ​អភិវឌ្ឍ​គ្រួសារ​យេនឌ័រ​?

បើ​តាម​គោល​នយោបាយ​របស់​អង្គការ​មួយ​ចំនួន​ធំ​ ​គឺ​បាន​ចែង​យ៉ាង​ច្បាស់​អំពី​ទំនាស់​ផល​ប្រយោជន៍​ រវាង​សមាជិក​គ្រួសារ​ធ្វើ​ការ​នៅ​អង្គភាព​តែ​មួយ​ មិន​អនុញ្ញាត​ទេ​ ​ពី​ព្រោះ​វា​អាច​ពាក់​ព័ន្ធ​ទៅ​នឹង​សកម្ម​ភាព​អវិជ្ជមាន​នានា​ដូច​ជា អំពើ​ផ្តាច់​ការ​​​(​ផ្គុំ​គ្នា​ដក​បុគ្គលិក​ចេញ​តាម​ចិត្ត​)​ អំពើ​ពុករលួយ​ និង​ការ​ប្រើ​ប្រាស់​សម្ភារ​របស់​អង្គ​ភាព​ខ្ជះខ្ជាយ​សេរី​ ជា​ពិសេស​ការ​ប្រើ​ប្រាស់​រថយន្ត និង​សាំង​ជា​ដើម។

ការ​​ប្រព្រឹត្ត​​បែប​​គ្រួសារ​យេនឌ័រ​ គួរ​​​ឲ្យ​​ខ្មាស​​អៀន​​ណាស់​​។​ ខ្វះ​​អី​​ការងារ​​ជា​​ច្រើន​​ ដែល​​កំពុង​​រង់​​ចាំ​​អ្នក​​មាន​​បទ​ពិសោធ​​​ស្រាប់​​ គ្រាន់​​តែ​​យូ​​របន្តិច ​​នឹង​​គង់​​តែ​​រក​​បាន​​ទេ។ ភាគី​ម្ខាង​ណា​មួយ​គួរ​តែ​ដាក់​ពាក្យ​រក​ការងារ​ស្ថាប័ន​ផ្សេង ឬ​ក៏​ធ្វើ​​ការងារ​ជា​អ្នក​ពិគ្រោះ​យោបល់​ឯករាជ្យ​ទៅ​។ ពុំ​ចាំ​បាច់​រស់​នៅ​ជា​មួយ​គ្នា​ហើយ​ ទៅ​ធ្វើការ​ក្នុង​កា​រិយា​ល័យ​តែ​​មួយ​ទៀត​ ឬ​មួយ​ក៏​ទា​ល់​តែ​ធ្វើ​ដូច្នេះ​ទើប​ គេ​សរសើរ​ថា ​មនុស្ស​គំ​រូ​ ផ្នែក​យេនឌ័រ​មែន​ទេ?

តាម​ពិត​ជា​ទូទៅ​ទាំង​ទស្សនៈ​យេនឌ័រ​ ​និង​គោល​នយោបាយ​របស់​អង្គភាព​មិន​បាន​​លើក​ទឹក​ចិត្ត​​សមាជិក​គ្រួសារ​​ ធ្វើ​ការ​ជា​មួយ​គ្នា​ក្នុង​អង្គ​ភាព​តែ​មួយ​ទេ​។ តែ​គឺ​មក​ពី​បុគ្គល​ទាំង​នោះ​ទេ​ដែល​អនុវត្ត​ទ្រឹស្តី​យេនឌ័រ​មិន​ត្រឹម​ត្រូវ។​ ​ពេល​ខ្លះ​បុគ្គលិក​ក្រោម​ឱវាទ ​ធុញ​ទ្រាន់​មិន​ដឹង​និយាយ​ប្រាប់​ថា​ម៉េច បាន​ត្រឹម​តែ​ត្អូញ​ត្អែរ​ដាក់​គ្នា ឬ​ប្រាប់​មិត្ត​ភកិ្ត​ថា​ មាន​ការ​រំខាន​នៅ​កន្លែង​ធ្វើការ​ដោយ​សារ​​គ្រួសារ​យេនឌ័រ​ដែល​មាន​ទំនាស់​ គ្នា​នៅ​ផ្ទះ​​ ហើយ​បន្ត​មក​ទាស់​គ្នា​នៅ​ក្នុង​ការិយាល័យ​ទៀត​។ ម្តង​ម្កាល​ បុគ្គលិក​ធំ​ក្លិន​ឆ្អេះ​ទឹក​នោម​កូនៗ​របស់​គ្រួសារ​យេនឌ័រ​នៅ​ក្នុង​រថយន្ត​ អង្គភាព​ទៀត បុគ្គលិក​ថ្នាក់​ក្រោម​មិន​ហ៊ាន​​មាត់​កទេ​ ​ព្រោះ​ខ្លាច​គ្រួសារ​យេនឌ័រ​ ដក​ចេញ​ពី​តំណែង​ ដោយ​សារ​ឮល្បី​ខាង​ព្រួត​គ្នា​​ដក​បុគ្គលិក​ ឬ​ក៏​បង្ខំ​ឲ្យ​បុគ្គលិក​​ធ្វើ​ជា​សុំ​​លា​​លែង​​ពី​ទួនាទី​របស់​ពួក​គេ។

ហេតុ​​អ្វី​បាន​ជា​គណៈ​កម្មការ​នាយក​ និង​ម្ចាស់​ជំនួយ​មិន​ធ្វើ​ការ​ត្រួត​ពិនិត្យ​មើល​សកម្ម​ភាព​ ក៏​ដូច​ជា​គោល​នយោបាយ​​របស់​អង្គការ​ទាំង​នោះ​ឡើង​វិញ​ផង​?​ បើ​មើល​ឃើញ​ច្បាប់​របស់​អង្គការ​ទាំង​នេះ ​អនុញ្ញាត​ឲ្យ​សមាជិក​គ្រួសារ​ធ្វើ​ការ​ជា​មួយ​គ្នា​បាន​ គួរ​តែ​កែ​ប្រែ​ច្បាប់​ទម្លាប់​មិន​ល្អ​​នេះ​ចេញ​ទៅ​បាន​ទេ? ឬ​​មួយ​ក៏​គិត​ថា​ក្រៅ​តែ​ពី​គ្រួសារ​យេនឌ័រ​ហ្នឹង​ គ្មាន​នរណា ​ឬ​ក៏​​ស្ថាប័ន​ណា​ធ្វើ​កិច្ចការ​ទាំង​នោះ​កើត​ឬ?

ការ​លើក​យក​ករណី​ក្រុម​គ្រួសារ​​យេនឌ័រ​មួយ​ចំនួន​តូច​​ទាំង​នេះ​មក​​ ពិភាក្សា មិន​មែន​មាន​ន័យ​ថា​​ វា​យ​ឆ្នាំង​បាយ​​គ្រួសារ​យេនឌ័រ​ទេ ​គឺ​ចង់​ឲ្យ​គ្រួសារ​យេនឌ័រ​ទាំង​នេះ​មាន​ការ​កែ​ប្រែ​ កុំ​ឲ្យ​ចេះ​តែ​ខាង​បង្រៀន និង​បង្ខំ​ឲ្យ​គេ​កែប្រែ​អត្ត​ចរិត ឬ​ក៏​ឥរិយាបថ​ តែ​ខ្លួន​ឯង​នៅ​ដដែល។​ ការ​អនុវត្ត​នេះ​មិន​ថា​តែ​ស្ថាប័ន​រដ្ឋ​ទេ ចំណែក​ឯ​អង្គការ​​​និង​ក្រុម​ហ៊ុន​នានា​​ ក៏​មិន​គួរ​យក​អង្គភាព​ទាំង​នេះ ​ទៅ​ជា​អង្គ​ភាព​គ្រួសារ​ផង​ដែរ​។​ធ្វើ​ដូច​នេះ​ទើប​មាន​ភាព​យុត្តធម៌​សម្រាប់​បុគ្គលិក​ដទៃ​ទៀត​ ហើយ​«បើ​ឃើញ​គេ​ធ្វើ​ខុស​កុំ​យក​តម្រាប់​តាម​!»​​៕

ចូល​រួម​ផ្តល់​យោបល់​លើ​អត្ថ​បទ​នេះ​តាម​រយៈ soprach.tong@phnompenhpost.com

អត្ថបទគួរចាប់អារម្មណ៍