នៅ​ពេល​ដែល​ខ្ញុំ​មាន​ឱកាស​ចេញ​ទៅ ទីក្រុង​បាងកក ប្រទេស​ថៃ ម្តងៗ​ខ្ញុំ​តែង​តែ​ដើរ​ចូល​ផ្សារ​និង​ញ៉ាំ​អាហារ​នៅ​ហាង​តាម​ផ្លូវ​ខ្ញុំ​បាន​ជួប និង​ជជែក​ជាមួយ​ខ្មែរៗ​យើង​ដែល​ទៅ​ធ្វើ​ការ​ឲ្យ​គេ​នៅ​ទីនោះ មាន​តាំង​ពី​អ្នក​ស៊ី​ឈ្នួល​លក់​ទំនិញ អ្នក​រត់​តុ រហូត​ដល់​អ្នក​សុំ​ទាន។ ខ្ញុំ​បាន​សាកសួរ​ពី​មូល​ហេតុ​ដែល​គាត់​ធ្វើ​ចំណាក​ស្រុក និង​ផល​វិបាក​ដែល​ពួក​គាត់​រស់​នៅ​ទីនោះ ចម្លើយ​របស់​ពួក​គាត់​មិន​សូវ​ខុស​គ្នា​ប៉ុន្មាន​ទេ​គឺ​នៅ​ស្រុក​ខ្មែរ​អត់​ការងារ​ធ្វើ​បើ​មាន​ក៏​មាន​ប្រាក់​ខែ​តិច​មិន​អាច​ចិញ្ចឹម​ជីវិត​រស់​ទេ​ហើយ​ខ្លះ​ទៀត​ថា នៅ​ធ្វើ​អី​បើ​ដី​ស្រែ​ក៏​អស់​ផ្ទះ​ក៏​គ្មាន ខ្លះ​មាន​ដី​តែ​គេ​រឹប​អូស​យក​អស់​អ៊ីចឹង​ចេះ​តែ​រសាត់​អណ្តែត​មក​រក​ការងារ​ធ្វើ​នៅ​ទីនេះ​តាម​គេ​តាម​ឯង។