សព្វ​ថ្ងៃ​នេះ ទៅ​ដល់​កន្លែង​ណា​ដូច​កន្លែង​ណា​ដែរ ប្រជា​ពលរដ្ឋ​ម្នាក់ៗ​ត្អូញ​ត្អែរ​អំពី​អាហារ​ដែល​ពោរ​ពេញ​ដោយ​ជាតិ​គីមី មិន​ដឹង​តើ​ទិញ​បន្លែ​ត្រី​សាច់ ឬ​ទទួល​ទាន​អាហារ​ដែល​ចម្អិន​រួច​កន្លែង​ណា​ដែល​មិន​មាន​សារជាតិ​គីមី​ប៉ះពាល់​សុខភាព? ចំណែក​អ្នក​ខ្លះ​ទៀត​ត្អូញ​ត្អែរ​ពី​ប្រភេទ​ជំងឺ​រ៉ាំរ៉ៃ​ថ្មីៗ​ក្នុង​ខ្លួន​ដែល​ចេះ​តែ​កើត​មាន ម្តង​ឈឺ​ក្រពេះ ម្តង​ឈឺ​គ្រុន​ពោះ​វៀន ខ្លះ​រលាក​ថ្លើម ខ្លះ​ទៀត​រលាក​ទង​សួត ខ្លះ​ឡើង​ឈាម ខ្លះ​ទឹក​នោម​ផ្អែម​-ប្រៃ ខ្លះ​ធាត់​ជ្រុល ឯ​អ្នក​ខ្លះ​ទៀត​ពុល​អាហារ​ឈឺ​ភ្លាម​ស្លាប់​ភ្លាម ជាដើម។ ប្រភេទ​ជំងឺ​ទាំង​នេះ​គេ​ចាត់​ចូល​ទៅ​ក្នុង​ក្រុម​ជំងឺ​មិន​ឆ្លង តើ​មូល​ហេតុ​អ្វី​បាន​ជា​មាន​អ្នក​ជំងឺ​ចេះ​តែ​កើត​មាន​ឡើង​ច្រើន​ទៅៗ​ដូច​នេះ? ឬ​មក​ពី​ឥរិយាបថ​របស់​អ្នក​ទទួល​ទាន​អាហារ ឬ​ក៏​មក​ពី​អាហារ​ទាំង​គោក ទាំង​ទឹក​នោះ​មាន​សារជាតិ​គីមី​ខ្លាំង​ពេក​ធ្វើ​ឲ្យ​មនុស្ស​ពុល​ធ្លាក់​ខ្លួន​ឈឺ​បែប​នេះ?