The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋាភិបាល​ពុំ​ទាន់​មាន​យុទ្ធសាស្រ្ត​ជាក់លាក់ ​ក្នុង​ការ​គ្រប់គ្រង​អាវុធ

រដ្ឋាភិបាល​ពុំ​ទាន់​មាន​យុទ្ធសាស្រ្ត​ជាក់លាក់ ​ក្នុង​ការ​គ្រប់គ្រង​អាវុធ

អាវុធ​ដែល​សមត្ថកិច្ច​ឆែក​ឃើញ​ក្នុង​ផ្ទះ​ឪពុក​ឧកញ៉ា ថោង សារ៉ាត់ នៅ​សង្កាត់​ស្ទឹងមានជ័យ​កន្លង​មក។
អាវុធ​ដែល​សមត្ថកិច្ច​ឆែក​ឃើញ​ក្នុង​ផ្ទះ​ឪពុក​ឧកញ៉ា ថោង សារ៉ាត់ នៅ​សង្កាត់​ស្ទឹងមានជ័យ​កន្លង​មក។ រូបថត សហការី

រដ្ឋាភិបាល​ពុំ​ទាន់​មាន​យុទ្ធសាស្រ្ត​ជាក់លាក់ ​ក្នុង​ការ​គ្រប់គ្រង​អាវុធ

ចាប់​តាំង​អំពី​ការ​បង្ក្រាប​អាវុធ​ជាតិ​ផ្ទុះ​របស់​រាជរដ្ឋាភិបាល​តាំងពី​ត្រឹម​អាណត្តិ​ទី ១ មក​តើ​សមត្ថកិច្ច​ប៉ូលិស និង​កងរាជ​អាវុធហត្ថ​ប្រមូល​អាវុធ​ពី​ក្រុម​ឧក្រិដ្ឋជន​បាន​ប៉ុន្មាន​ហើយ? តើ​អាច​បង្ហាញ​អាវុធ​ទាំង​អស់​នោះ​ជា​សាធារណៈ​បាន​ដែរ​ឬ​ទេ? តើ​ការ​គ្រប់គ្រង​អាវុធ​ទាំង​នោះ​ដោយ​របៀប​យ៉ាង​ដូចម្តេច? តើ​អាវុធ​ទាំង​នោះ​បាន​មកពី​ណា​បាន​ជា​ចាប់​មិន​ចេះ​អស់​ មិន​ចេះ​ហើយ​អ៊ីចឹង?

ការ​ប្រើប្រាស់​អាវុធ​សព្វ​ថ្ងៃ​នេះ​មិន​ដឹង​ថា​នរណា​ជា​នរណា​ទេ​នៅ​ពេល​ដែល​មាន​ជនស៊ីវិល​ម្នាក់​ជិះ​ម៉ូតូ​កញ្ចាស់​សោះ​ក៏​មាន​អាវុធ​ដែរ​ពេល​ខ្លះ​អាវុធ​របស់​គាត់​ជ្រុះ​ចេញ​ពី​ចង្កេះ​ដែល​សៀត​សម្ញែង​ធ្លាក់​ទៅ​លើ​ដី ឬ​ឥដ្ឋ​ធ្វើ​ឲ្យ​ប្រជាពលរដ្ឋ​ដែល​នៅ​ក្បែរ​នោះ​ភ្ញាក់​រត់​ចែក​ជើង​គ្នា​ក៏​មាន។ រីឯ​ម្ចាស់​ក៏​រើស​អាវុធ​នោះ​សៀត​ចង្កេះ​ទាញ​ម៉ូតូ​ជិះ​ទៅ​បាត់​មិន​ដឹង​ថា​គាត់​ជា​ប៉ូលិស​សម្ងាត់ ឬ​ក៏​ជា​ចោរប្លន់?

ចំពោះ​ការ​ឆែក​អាវុធ​ជាតិ​ផ្ទុះ​តាម​ផ្លូវ​វិញ​ដូច​ភ្លៀង​រលឹម​ពេល​មាន​ផ្ទុះ​អាវុធ​នឹក​ឃើញ​ចង់​ចុះ​ឆែក​ពិនិត្យ​មើល​តាម​ផ្លូវ​សាធារណៈ​មួយ​ប្រាវ​​ទៅ។

ការ​ប្រើប្រាស់​អាវុធ​បែប​អនាធិបតេយ្យ​នេះ​ត្រូវ​បាន​គេ​យក​ទៅ​ធ្វើ​សកម្មភាព​សម្រាប់​ប្លន់​បាញ់​បោះ​សេរី ការ​ធ្វើ​ឃាតកម្ម ការ​គំរាម​គេ​ឯង​ខ្លះ​ទៀត​មិន​បាន​អី​ក៏​យក​ទៅ​អួត​គេ​ឯង​នៅ​កន្លែង​ផឹកស៊ី​ដែរ​ហើយ​បើ​ពេល​ស្រវឹង​វិញ​ក៏​ចាប់​​ទាញ​អាវុធ​មក​កម្លា​ឆ្វេង​​ស្ដាំ​ធ្វើ​ឲ្យ​ផ្អើល​គេ​ឯង​ក៏​មាន​ដែរ ដែល​សកម្មភាព​បែប​នេះ​បាន​បង្ក​​ឲ្យ​មាន​ភាព​ភ័យខ្លាច​ដល់​ប្រជាពលរដ្ឋ។

ជួន​កាល​អ្នក​មាន​អាវុធ​ខ្លះ​​ចិត្ត​ស្លុយ​ទៀត​គឺ​យក​កំហឹង​មក​ដាក់​​តាម​ខ្លួន​ពោល​គឺ​ឲ្យ​តែ​ទាស់​ចិត្ត​បនិ្តច​គឺ​ទាញ​អាវុធ​មក​បាញ់​គេ​ឯង​ប្រាវៗ​ដូចជា​ករណី​ខ្លះ​មើល​ទៅ​ជា​រឿង​​តូចៗ​សោះ រឿង​​ស្នេហា​ប្រចណ្ឌ​គ្នា​ប្តី​ជា​មន្ត្រី​រដ្ឋបាល​ព្រៃឈើ​មាន​អាវុធ​ពេល​ខឹង​ប្រពន្ធ​ក៏​បាញ់​សម្លាប់​ហើយ​បាញ់​សម្លាប់​ខ្លួន​ឯង​ទៀត។

រីឯ​ករណី​បាញ់​គ្នា​ដោយសារ​តែ​ដណ្តើម​ស្រី​ក្នុង​ហាង​ពេល​ខ្លះ​ស្ត្រី​ដែល​បម្រើ​សេវា​កម្សាន្ត​ក៏​ត្រូវ​បាន​គេ​បាញ់​សម្លាប់​​ចោល​រួច​ផ្តល់​សំណង​បន្តិច​បន្តួច​តែ​ប៉ុណ្ណោះ​ហើយ​អ្នក​បាញ់​ភាគច្រើន​ក៏​ជា​មន្ត្រី​ប៉ូលិស និង​ប៉េអឹម​ផង​ដែរ។

ការ​យក​កំហឹង​ទល់​នឹង​កំហល់​​ដោយ​ប្រើ​អាវុធ​បាញ់​​គ្នា​ផុយៗ​បែប​នេះ​បើ​នៅ​រដ្ឋ​មួយ​​ចំនួន​ដូច​សហរដ្ឋ​អាមេរិក​ដែល​គេ​ឲ្យ​ចុះ​បញ្ជី​ប្រើប្រាស់​អាវុធ​សម្រាប់​ការពារ​ខ្លួន​វិញ​គឺ​បាញ់​​គ្នា​ស្លាប់​អស់​​គ្មាន​សល់​ទេ។

ម្យ៉ាង​វិញ​ទៀត​សមត្ថកិច្ច​កម្រ​សួរ​នាំ​តាមដាន​ចាប់​អ្នក​ជួញដូរ​អាវុធ​ណាស់​បន្ទាប់​ពី​ចោរប្លន់​ត្រូវ​ចាប់​បាន​នោះ​នរណា​ជា​អ្នក​លក់​អាវុធ​ឲ្យ​ចោរ​បាន​ជា​ចាប់​មិន​ចេះ​អស់​មិន​ចេះ​ហើយ​យ៉ាង​នេះ? បើ​ទោះបី​ជា​ពួកគេ​ចេញ​ពី​គុក​ហើយ​ក៏ដោយ​តែ​ពួកគេ​ធ្វើ​សកម្មភាព​ប្លន់​ទៀត​គឺ​អាវុធ​មិន​​ដឹង​បាន​មកពី​កន្លែង​ណា? បាន​ម៉ូយ​​មកពី​ណា​អី​ក៏​លឿន​ម្ល៉េះ?

ម្តងម្កាល​ឃើញ​ថា​ តម្លៃ​អាវុធ ១ ដើម​ដែល​យក​ទៅ​ធ្វើ​ឃាតកម្ម​នោះ​ថ្លៃ​ជាង​ផ្ទះ​ឃាតករ​ទៅ​ទៀត​ដូច​ករណី​ឃាតកម្ម​លោក កែម ឡី កាលពី​សប្តាហ៍​មុន​នេះ​អាវុធ​ដែល​ជនសង្ស័យ​ប្រើ​ថ្មី​ចែស​ម៉ាក​ហ្ក្លក់​ Glock ហ្នឹង​មើល​ទៅ​តម្លៃ​ថ្លៃ​ជាង​​ផ្ទះ​របស់​ឃាតករ​នៅ​ស្រុក​អង្គរជុំ​ ខេត្ត​សៀមរាប​ទៅ​ទៀត​ព្រោះ​ផ្ទះ​ជនសង្ស័យ​ដែល​សមត្ថកិច្ច​បង្ហាញ​នោះ​មើល​ទៅ​មិន​គួរ​ឲ្យ​ជឿ​ថា​ឃាតករ​នោះ​មាន​លុយ​ខ្លួន​ឯង​​ទិញ​អាវុធ​ទំនើប​ប្រភេទ​នោះ​ប្រើ​សោះ​ឡើយ​។

ករណី​បាញ់​ប្រហារ​​លោក កែម ឡី ដែល​លោក​បាន​ចំណាយ​​ពេល​រៀន​ទម្រាំ​តែ​បាន​ចំណេះដឹង​ខ្ពង់​ខ្ពស់ និង​ធ្វើការ​ចូលរួម​អភិវឌ្ឍ​ប្រទេស​បាន​កសាង​ស្នាដៃ​ជាច្រើន​បែរ​ជា​ត្រូវ​គេ​សម្លាប់​​តែ​មួយ​ប៉ប្រិច​ភ្នែក​ទាំង​ព្រឹក​ព្រលឹម​នៅ​កណ្តាល​រាជធានី​ភ្នំពេញ​ក្នុង​ចំណោម​ហ្វូង​មហាជន​​នៅ​ពេញ​បែប​នេះ។

ចំពោះ​ការ​បាញ់​ប្រហារ​លោក កែម ឡី ត្រូវ​បាន​លោក​នាយក​រដ្ឋមន្ត្រី ហ៊ុន សែន ប្រកាស​ភ្លាមៗ​ទទួល​ស្គាល់​អសមត្ថភាព​​របស់​សមត្ថកិច្ច​ក្នុង​ការ​ផ្តល់​សុវត្ថិភាព​ជូន​ប្រជាពលរដ្ឋ​ហើយ​រាជរដ្ឋាភិបាល​ត្រូវ​បាន​គេ​រិះគន់​ផង​ដែរ។

ជា​រឿយៗ​លោក​នាយក​រដ្ឋមន្ត្រី​តែងតែ​​មាន​ប្រសាសន៍​ក្នុង​ការ​រឹតបន្តឹង​សុវត្ថិភាព​ជូន​ប្រជាពលរដ្ឋ​មាន​​តាំងពី​ព្រមាន​ដក​មន្ត្រី​សមត្ថកិច្ច​ណា​អសកម្ម​ចេញ​ពី​តំណែង​ផង​ដែរ​ជាពិសេស​មន្ត្រី​ណា​ដែល​មាន​កូន​បាញ់​បោះ​សេរី ឬ​បាញ់​គេ​ក៏​ចាប់​បក​ស័ក្តិ​ដែរ​មុន​នឹង​លោក​ចុះ​ចេញ​ពី​តំណែង។ តែ​កម្រ​ឃើញ​មន្ត្រី​ទាំង​នោះ​ត្រូវ​បាន​ដក​ចេញ​ពី​តំណែង​ណាស់។

វប្បធម៌​គ្មាន​ទោសពៃរ៍​នេះ​ហើយ​ដែល​ធ្វើ​ឲ្យ​ប៉ះពាល់​ដល់​ការ​គ្រប់គ្រង​អាវុធ​ជាតិ​ផ្ទុះ​របស់​រាជរដ្ឋាភិបាល​តើ​ការ​ដែល​បង្ហាញ​ពី​ពិភពលោក​ថា​កម្ពុជា​មាន​សន្តិភាព​យ៉ាង​ដូចម្តេច? បើ​ប្រជាពលរដ្ឋ​រស់នៅ​ដោយ​មាន​ភាព​ភ័យខ្លាច​រឿង​សុវត្ថិភាព​បើ​ឃាតករ​ចូល​មក​បាញ់​សម្លាប់​មនុស្ស​កណ្តាល​ទីប្រជុំជន​ដូចជា​គ្មាន​ញញើត​សមត្ថកិច្ច​អ្វី​បន្តិច​សោះ​​បែប​នេះ។ ដូច​ករណី​ឃាតកម្ម​លើ​លោក កែម ឡី សមត្ថកិច្ច​ចាប់​បាន​តែ​ឃាតករ​ហើយ​កំពុង​ស្វែងរក​អ្នក​នៅ​ពី​ក្រោយ​ខ្នង​ទៀត​តែ​សម្រាប់​អ្នក​នយោបាយ​បាន​ត្រឹម​តែ​ចោទ​គ្នា​លាប​ពណ៌​ដាក់​គ្នា​បែរ​ទៅ​ជា​នាំ​គ្នា​គិត​គូរ​រឿង​ចំណេញ​ខាត​នយោបាយ​គណបក្ស​រៀងៗ​ខ្លួន​លើ​សាកសព​លោក កែម ឡី ទៅ​វិញ។

បើ​តាម​របាយការណ៍រ​បស់​ក្រសួង​មហាផ្ទៃ​ឆ្នាំ ២០១៥ បទល្មើស​ព្រហ្មទណ្ឌ​មាន​ចំនួន ២៧០៩ លើក​មាន​ការ​ថយ​ចុះ ១០៥ លើក​បើ​ប្រៀប​ធៀប​ជាមួយ​ឆ្នាំ ២០១៤ តែ​បទឧក្រិដ្ឋ​មាន ៧៥១ លើក​បាន​កើន​ឡើង ៣៥ លើក​វិញ។

ប្រជាពលរដ្ឋ​កាន់តែ​មាន​ការ​ភ័យ​ខ្លាច​ពី​អសន្តិសុខ​នៅ​សល់ ២ ពាន់​ករណី​នៃ​បទល្មើស​កំពុង​តែ​តាម​ចាប់​ខ្លួន​ទៀត​ខណៈ​ដែល​អ្នក​ពាក់ព័ន្ធ​ករណី​នេះ​ក៏​កំពុង​ធ្វើ​សកម្មភាព​ដែរ​ព្រោះ​ពេល​ខ្លះ​សួរ​ទៅ​សុទ្ធ​តែ​ធ្លាប់​ប្លន់ ៧-៨ ដង​ហើយ​ខ្លះ​ទៀត​ជា​មុខ​សញ្ញា​ចាស់ និង​អំពើ​ឃាតកម្ម។

កន្លង​មក​លោក​នាយរដ្ឋមន្ត្រី ហ៊ុន សែន ធ្លាប់​ដោះស្រាយ​បញ្ហា​សន្តិសុខ និង​សុវត្ថិភាព​បាន​ជោគជ័យ​ដូចជា​យុទ្ធសាស្ត្រ​ឈ្នះ-ឈ្នះ​ទៅលើ​អតីត​ខ្មែរ​ក្រហម​តាម​ព្រំដែន​តែ​ហេតុ​អ្វី​បាន​ជា​លោក​ដោះស្រាយ​សុវត្ថិភាព​ជូន​ប្រជាពលរដ្ឋ​នៅ​ខាង​ក្នុង​យូរ​ហើយ​នៅ​តែ​មិន​បាន​ជោគជ័យ​ដែល​ជា​សកម្មភាព​មួយ​ផ្នែក​ធំ​នៃ​ការ​ទាក់ទាញ​សន្លឹកឆ្នោត​ដែរ​នោះ? ព្រោះ​ឥឡូវ​នេះ​គ្មាន​សង្គ្រាម​ទៀត​ទេ​ឲ្យ​តែ​ខំប្រឹងប្រែង​អភិវឌ្ឍ​ និង​អនុវត្ត​ច្បាប់​ឲ្យ​បាន​ត្រឹមត្រូវ​ដឹង​តែ​ពី​បាន​ផល​ហើយ​មិន​ចាំបាច់​ទៅ​ចែក​អំណោយ​ដូច​មុន​ទៀត​ទេ​គឺ​មាន​ន័យ​ថា​និន្នាការ​នេះ​មាន​ការ​ផ្លាស់ប្តូរ​ហើយ​សម្រាប់​ម្ចាស់​ឆ្នោត​នោះ។

បើ​តាម​បទពិសោធ​នៅ​សហរដ្ឋ​អាមេរិក​ចំពោះ​ការ​គ្រប់គ្រង​អាវុធ​នេះ​គឺ​កំពុង​តែ​ជជែក​ដេញដោល​គ្នា​យ៉ាង​ខ្លាំង​រឿង​បញ្ឈប់​ការ​ប្រើប្រាស់​អាវុធ​ជា​លក្ខណៈ​ឯកជន​ដែល​បាន​ចុះ​បញ្ជី​នៅ​បណា្ត​រដ្ឋ​មួយ​ចំនួន ដោយសារ​មាន​ករណី​បាញ់​រះ​សម្លាប់​ដោយសារ​ភេរវកម្ម​ធំៗ​ការ​ប្រកាន់​ពូជសាសន៍​ពណ៌​សម្បុរ និង​ក្រុម​ស្រឡាញ់​ភេទ​ដូច​គ្នា​ថ្មីៗ​នេះ​បង្ក​ឲ្យ​មាន​សោកនាដកម្ម​ដ៏​ធំធេង។

សម្រាប់​កម្ពុជា​វិញ​មិន​លំបាក​ដូច​សហរដ្ឋ​អាមរិក​នោះ​ទេ​គឺ​រាជរដ្ឋាភិបាល​គ្រាន់តែ​មាន​យន្តការ​ថ្មី​ក្នុង​ការ​អនុវត្ត​ការ​គ្រប់គ្រង​អាវុធ​ក្នុង​ស្រុក​នេះ​ឲ្យ​ច្បាស់លាស់ និង​មាន​ប្រសិទ្ធភាព​ទៅ​វិញ​ដើម្បី​ធានា​សុវត្ថិភាព​ជូន​ប្រជាពលរដ្ឋ​ដូច​ការ​សន្យា​មុន​ការ​បោះឆ្នោត​នោះ​ទៅ​ជា​ការ​គ្រប់គ្រាន់​ហើយ។

ដើម្បី​ឲ្យ​មាន​តម្លាភាព​គឺ ទី ១) រាល់​អាវុធ​ដែល​ខុស​ច្បាប់​ដក​ហូត​ពី​ជនល្មើស​ត្រូវ​យក​មក​ដាក់​ក្នុង​ឃ្លាំង​ទាំងអស់​ឲ្យ​គ្រប់​ចំនួន។ ទី ២ )អាវុធ​ប្រើ​សម្រាប់​តែ​នៅ​កន្លែង​ធ្វើការ​ ឬ​បេសកកម្ម​បាន​ហើយ​លុះ​ដល់​ចប់​ការងារ​ដាច់​ខាត​ត្រូវ​យក​ទៅ​ទុក​នៅ​ការិយាល័យ​វិញ​ជា​ជាង​យក​តាម​ខ្លួន​ដើរ​សម្ញែង​គេ​ឯង​តាម​ហាង​ផឹកស៊ី និង​យក​មក​ដាក់​នៅ​ផ្ទះ​ទុក​គំរាម​គេ​នោះ។ ទី ៣) ត្រួត​ពិនិត្យ​លើ​អាវុធ​ដែល​លួច​នាំ​ចូល​ខុស​ច្បាប់៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

អត្ថបទគួរចាប់អារម្មណ៍