.jpg)
ប្រមុខមេដឹកនាំប្រទេសអាស៊ាន និងមេដឹកនាំអូស្ត្រាលីនៅក្នុងកិច្ចប្រជុំនៅអូស្ត្រាលីថ្មីៗនេះ។ រូបថត AFP
នៅពេលមេដឹកនាំប្រទេសអាស៊ីអាគ្នេយ៍មកដល់ប្រទេសអូស្ត្រាលីកាលពីពេលថ្មីៗនេះគឺពួកគេបានគូសបញ្ជាក់អំពីសករាជថ្មីមួយនៅក្នុងទំនាក់ទំនងដ៏យូរអង្វែងបំផុតមួយក្នុងតំបន់នេះ។
នេះគឺជាកិច្ចប្រជុំកំពូលពិសេសអាស៊ាន-អូស្ត្រាលីលើកដំបូងដែលថ្នាក់ដឹកនាំក្នុងតំបន់ទាំងអស់បានជួបប្រជុំគ្នានៅក្នុងប្រទេសអូស្ត្រាលី។ ប៉ុន្តែខណៈដែលកិច្ចប្រជុំកំពូលនេះតំណាងឱ្យកិច្ចប្រជុំជាប្រវត្ដិសាស្ដ្រនោះវាក៏នៅតែរក្សាប្រពៃណីការទូតដ៏យូរអង្វែងផងដែរ។ ប្រទេសអូស្ត្រាលី និងរដ្ឋទាំង ១០ នៅតំបន់អាស៊ីអាគ្នេយ៍គឺមានទំនាក់ទំនងដ៏រឹងមាំបំផុតមួយ។
កាលពី ៤៤ ឆ្នាំមុនប្រទេសអូស្ត្រាលីបានក្លាយជាដៃគូខាងក្រៅលើកដំបូងគេបង្អស់របស់ប្លុកនៃបណ្តាប្រទេសសមាគមប្រជាជាតិអាស៊ីអាគ្នេយ៍ ឬហៅកាត់ថាអាស៊ានមួយនេះ។ យើងបានរួមគ្នានៅក្នុងពេលវេលាមួយដែលរដ្ឋជាច្រើននៅក្នុងតំបន់នេះកំពុងបោះជំហានដំបូងរបស់ខ្លួនជាប្រទេសឯករាជ្យដើម្បីខិតខំធ្វើឱ្យជីវិតរស់នៅរបស់ប្រជាពលរដ្ឋខ្លួនបានប្រសើរឡើង។ ចាប់តាំងពីពេលនោះមកអាស៊ានបានជួយប្រជាជនក្នុងតំបន់ឲ្យរីករាយជាមួយនឹងពេលវេលាដ៏មានស្ថិរភាពគ្មានសង្គ្រាមធ្ងន់ធ្ងររវាងរដ្ឋ និងរដ្ឋ។
ស្ថិរភាពនេះបានបង្កើតឲ្យមានភាពរុងរឿងដែលអនុញ្ញាតឱ្យសមាជិកអាស៊ានធ្វើការជាមួយគ្នាកាន់តែជិតស្និទ្ធលើវិស័យពាណិជ្ជកម្ម និងសេដ្ឋកិច្ច ហើយជីវិតរស់នៅរបស់ប្រជាពលរដ្ឋកាន់តែមានភាពងាយស្រួល និងរីកចម្រើនជាលំដាប់សម្រាប់ក្រុមគ្រួសារជាច្រើននៅទូទាំងតំបន់អាស៊ីអាគ្នេយ៍ទាំងមូលដែលមិនធ្លាប់មានពីមុន។ ប្រទេសអូស្ត្រាលីតែងតែឈរនៅជាមួយអាស៊ានដើម្បីសម្រេចឲ្យបានគោលដៅរបស់ខ្លួន។ កិច្ចសហប្រតិបត្តិការរបស់យើងបច្ចុប្បន្ននេះគឺកាន់តែមានភាពទូលំទូលាយ។
គោលនយោបាយអន្តរជាតិរបស់អូស្ត្រាលីឆ្នាំ ២០១៧ បានបញ្ជាក់ជាថ្មីនូវអាទិភាពខ្ពស់របស់អូស្ត្រាលីស្តីពីការគាំទ្រចំពោះអាស៊ាន ក៏ដូចជាទំនាក់ទំនងទ្វេភាគីរបស់យើងនៅក្នុងតំបន់អាស៊ីអាគ្នេយ៍នេះ។
កម្មវិធីជំនួយអភិវឌ្ឍន៍របស់ប្រទេសអូស្ត្រាលីបានជួយដោះស្រាយបញ្ហានានា ដូចជាការជួញដូរមនុស្ស និងគាំទ្រដល់មហិច្ឆតារបស់អាស៊ានសម្រាប់កំណើនសេដ្ឋកិច្ច ហើយសង្គមជាតិរបស់យើងគឺកាន់តែខិតជិតគ្នា។ ជនអន្តោប្រវេសន៍មកពីអាស៊ីអាគ្នេយ៍ និងក្រុមគ្រួសាររបស់ពួកគេបានជួយប្រទេសអូស្ត្រាលីឲ្យក្លាយជាសង្គមពហុវប្បធម៌ដែលជោគជ័យបំផុតមួយនៅក្នុងពិភពលោក។
បច្ចុប្បន្ននេះស្ទើរតែពាក់កណ្តាលនៃប្រជាជនអូស្ត្រាលីគឺបានកើតនៅក្រៅប្រទេស ឬយ៉ាងហោចណាស់មានម្តាយ ឬឪពុកកើតនៅក្រៅប្រទេស។ អាស៊ាន គឺជាផ្នែកមួយនៃប្រវត្តិសាស្ត្រដ៏ធំនេះដោយមានជនជាតិអូស្ត្រាលីជាងមួយលាននាក់បានអះអាងថា ពួកគេមានជាប់ពូជពង្សនឹងអាស៊ាននេះបើតាមជំរឿនថ្នាក់ជាតិចុងក្រោយរបស់យើង។ ទំនាក់ទំនងអាជីវកម្ម និងពាណិជ្ជកម្មរវាងអូស្ត្រាលី និងអាស៊ានក៏បានរីកចម្រើនកាន់តែខ្លាំងឡើងផងដែរ ដែលបានជួយកែលម្អស្តង់ដារការរស់នៅសម្រាប់ប្រជាពលរដ្ឋនៅទូទាំងតំបន់។
ស្រូវសាឡីដែលត្រូវបានដាំដុះដោយកសិករអូស្ត្រាលីគឺជាសារធាតុផ្សំដ៏សំខាន់នៅក្នុងការផលិតមីដែលជាអាហារសំខាន់របស់ក្រុមគ្រួសារជាច្រើនហើយអ្នកអាចរកទិញទឹកដោះគោដែលផលិតដោយប្រទេសអូស្ត្រាលីក៏ដូចជាចំណីអាហារស្រស់ៗ និងវីតាមីនផ្សេងៗទៀតនៅតាមហាងលក់ទំនិញនានានៅទូទាំងតំបន់នេះបាន។
ប្រទេសអូស្ត្រាលីបាននាំចូលពីអាស៊ានមានដូចជារថយន្ត សម្ភារ ទូរគមនាគមន៍ កុំព្យូទ័រគ្រឿងម៉ាស៊ីន និងផលិតផលសម្រាប់ផលិតកម្មផ្សេងៗទៀតដែលកំពុងកើនឡើងខ្លាំង។
អាស៊ានមានកិច្ចព្រមព្រៀងពាណិជ្ជកម្មជាមួយអូស្ត្រាលី និងនូវែលសេឡង់ ដែលនៅតែជាស្តង់ដារមាសរបស់តំបន់នេះសម្រាប់បើកឱកាសធ្វើពាណិជ្ជកម្ម និងការវិនិយោគ។ ដើម្បីធ្វើសមាហរណកម្មសេដ្ឋកិច្ចក្នុងតំបន់អាស៊ានឲ្យកាន់តែវែងឆ្ងាយ អាស៊ាន និងអូស្ត្រាលី (រួមជាមួយប្រទេសចិន ឥណ្ឌា ជប៉ុនកូរ៉េ និងនូវែលសេឡង់) កំពុងចរចាគ្នាអំពីភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់។
នេះគឺជាគំនិតផ្តួចផ្តើមរបស់អាស៊ាន ដើម្បីកសាងកិច្ចព្រមព្រៀងពាណិជ្ជកម្មសេរី (FTA) ដែលមានស្រាប់របស់អាស៊ាននឹងជាមួយដៃគូរបស់ខ្លួន។ សមាជិកអាស៊ានចំនួន ៤ ក៏ជាផ្នែកមួយនៃកិច្ចព្រមព្រៀងគ្រប់ជ្រុងជ្រោយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិកផងដែរ។ យើងក៏មានកិច្ចព្រមព្រៀងពាណិជ្ជកម្មដោយផ្ទាល់ជាមួយប្រទេសសិង្ហបុរីម៉ាឡេស៊ី ថៃ និង ១ ទៀតកំពុងដំណើរការគឺប្រទេសឥណ្ឌូនេស៊ី។
ជាការពិតណាស់សម្រាប់ប្រទេសអូស្ត្រាលី ៥ ប្រទេសក្នុងចំណោម ១៥ ប្រទេសដែលមានទំនាក់ទំនងពាណិជ្ជកម្មធំបំផុតជាមួយយើងឥឡូវនេះគឺស្ថិតនៅក្នុងបណ្តាប្រទេសអាស៊ីអាគ្នេយ៍។ នៅក្នុងវិស័យអប់រំសម្រាប់គ្រួសារដែលជ្រើសរើសបញ្ជូនកូនៗរបស់ពួកគេឲ្យទៅសិក្សានៅក្រៅប្រទេសគឺភាគច្រើនពួកគេជ្រើសរើសប្រទេសអូស្ត្រាលីដោយមាននិស្សិតប្រមាណជិត ១០ ម៉ឺននាក់មកពីតំបន់នេះបានចុះឈ្មោះចូលរៀននៅទីនោះ ហើយកាលពីឆ្នាំមុនមានប្រជាពលរដ្ឋអាស៊ានប្រមាណ ១,៤ លាននាក់បានចូលមកប្រទេសអូស្ត្រាលីដើម្បីធ្វើការងារ ធ្វើអាជីវកម្ម និងធ្វើដំណើរកម្សាន្តហើយជារៀងរាល់ឆ្នាំប្រជាជនអូស្ត្រាលីប្រមាណ ៣ លាននាក់បានទៅទស្សនាប្រទេសនានាក្នុងតំបន់អាស៊ាន ដើម្បីគយគន់មើលសម្រស់ធម្មជាតិ និងស្វែងយល់បទពិសោធវប្បធម៌របស់ពួកគេ។
ដូចដែលពលរដ្ឋអូស្ត្រាលីពេលវិលត្រឡប់មកកាន់មាតុប្រទេសវិញបន្ទាប់ពីពួកគេទៅទស្សនាប្រទេសទាំងនោះគឺពួកគេនៅមានអារម្មណ៍ជាប់ដិតដាមពេញមួយជីវិតរបស់ពួកគេ ចំណែកឯមេដឹកនាំអាស៊ីអាគ្នេយ៍ដែលមកទស្សនកិច្ចនៅទីក្រុងស៊ីដនីនេះនឹងជួយបង្កើនទំនាក់ទំនងកាន់តែខ្លាំងឡើងហើយនឹងផ្តល់ផលប្រយោជន៍ដល់យើងទាំងអស់គ្នា។
កិច្ចប្រជុំកំពូលពិសេសអាស៊ាន-អូស្ត្រាលី ដែលលោកនាយករដ្ឋមន្ត្រីអូស្ត្រាលី Malcolm Turnbull ធ្វើជាម្ចាស់ផ្ទះរៀបចំកិច្ចប្រជុំនេះគឺមានបំណងបង្កើនកិច្ចការពារសន្តិសុខ និងវិបុលភាព។ តួនាទីដ៏សំខាន់សម្រាប់រដ្ឋាភិបាលទាំងអស់នោះគឺធ្វើឲ្យប្រជាពលរដ្ឋរបស់ពួកគេរស់នៅដោយមានសុវត្ថិភាពសុខក្សេមក្សាន្ត និងមានសេរីភាព។
តំបន់របស់យើងកំពុងប្រឈមនឹងការគំរាមកំហែងដូច្នេះហើយយើងមិនអាចដោះស្រាយតែម្នាក់ឯងបានទេ។ ការការពារប្រជាពលរដ្ឋរបស់យើងពីហានិភ័យផ្សេងៗ និងពីក្រុមភេរវករជាកាតព្វកិច្ចដ៏សំខាន់បំផុតមួយដែលទាមទារឲ្យយើងចែករំលែកចំណេះដឹង និងជំនាញឲ្យគ្នាទៅវិញទៅមកហើយប្រទេសអូស្ត្រាលី និងអាស៊ានបានធ្វើការរួមគ្នាជាយូរមកហើយដើម្បីប្រឆាំងទៅនឹងការគំរាមកំហែងទាំងនេះ។
កិច្ចប្រជុំកំពូលនេះក៏នឹងពង្រឹងកិច្ចខិតខំប្រឹងប្រែងដើម្បីប្រឆាំងទៅនឹងការគំរាមកំហែងណាមួយនៅក្នុងវិស័យបច្ចេកវិទ្យាថ្មីៗ និងការវាយប្រហារតាមអ៊ីនធឺណិតជាដើមហើយនៅទីបញ្ចប់ កិច្ចប្រជុំកំពូលនេះនឹងបង្កើតភាពជោគជ័យមួយក្នុងចំណោមជោគជ័យធំៗបំផុតរបស់អាស៊ានគឺការជំរុញកំណើនសេដ្ឋកិច្ច។ ទាំងប្រទេសអូស្ត្រាលី និងអាស៊ានបានបង្ហាញថា យើងកាន់តែមានភាពល្អប្រសើរឡើង ខណៈដែលសេដ្ឋកិច្ច និងអាជីវកម្មរបស់យើងកាន់តែខិតទៅជិតគ្នា។ ប្រទេសអូស្ត្រាលីរីករាយនឹងឆ្នាំទី ២៧ នៃកំណើនសេដ្ឋកិច្ចរបស់ខ្លួនដែលរីកចម្រើនឥតឈប់ឈរ។
ផលិតផលក្នុងស្រុកសរុបរបស់អាស៊ានបានកើនឡើង ៤ ដងនៅក្នុងរយៈពេល ១៥ ឆ្នាំកន្លងមកនេះដែលបង្កើតឱ្យមានមនុស្សឋានៈកណ្តាលថ្មីកាន់តែច្រើន។ កិច្ចប្រជុំកំពូលនេះនឹងប្រមូលផ្តុំអ្នកជំនួញមកពីក្រុមហ៊ុនពហុជាតិរហូតដល់ក្រុមហ៊ុនតូចៗ ដើម្បីលើកកម្ពស់អាជីវកម្ម និងពាណិជ្ជកម្មឲ្យកាន់តែជិតស្និទ្ធគ្នា។
អនាគតដ៏មានសុវត្ថិភាព និងវិបុលភាពនឹងមិនអាចកើតឡើងដោយឯងៗបានទេ។ អំណាចត្រូវបានផ្លាស់ប្តូរហើយការប្រកួតប្រជែង ដើម្បីអំណាចត្រូវបានសាកល្បងសម្រាប់តំបន់របស់យើងនេះ។ វាអាចមានព្រឹត្តិការណ៍ផ្សេងៗកើតឡើងដែលតំបន់របស់យើងមិនរំពឹង។ ប៉ុន្តែយើងអាចបង្កើតគោលនយោបាយនានាដែលជួយលើកកម្ពស់ការបើកចំហសេដ្ឋកិច្ច និងច្បាប់គាំទ្រដែលធ្វើឱ្យយើងកាន់តែមានសុវត្ថិភាព និងភាពរុងរឿងកាន់តែច្រើនជាងមុន។ ការរៀបចំកិច្ចប្រជុំកំពូលពិសេសអាស៊ាន អូស្ត្រាលីនេះគឺបានបង្ហាញអំពីការប្តេជ្ញាចិត្តដ៏រឹងមាំរបស់ប្រទេសអូស្ត្រាលីចំពោះអាស៊ាន និងចំណងមិត្តភាពដ៏យូរអង្វែងរបស់យើងជាមួយបណ្តាប្រទេសក្នុងតំបន់អាស៊ីអាគ្នេយ៍នេះ។
វាអាចពាក់ព័ន្ធនឹងមេដឹកនាំ ប៉ុន្តែបញ្ហាដែលពួកគេជជែកពិភាក្សាគ្នាគឺមានសារៈសំខាន់ណាស់សម្រាប់យើងទាំងអស់គ្នា៕ NS
ដោយលោក Jane Duke ឯកអគ្គរដ្ឋទូតអូស្ត្រាលីប្រចាំអាស៊ាន។
